Nagunggonaan ti Napudno a Panagsukisok
Awisek ti amin kadatayo a papigsaen ti pammatitayo ken Cristo, nga agtultuloy a mangbaliw iti biag ti amin nga agsapul Kenkuana.
Iti rugi ti 1846, rinibribu a pioneer a lallaki, babbai, ken ubbing ti nagpalaud iti Zion. Ginutugot ti awan patinggana a kinatured ti naindaklan a pammatida. Para iti sumagmamano, di naileppas ti panagdaliasat ta natayda iti dalan. Ti dadduma, mapaspasanguan ti naindaklan a rigat, ti sipapammati a nagtultuloy.
Gapu kadakuada, kalpasan ti sumaruno a kaputotan, nabendisionan ti pamiliak ti pudno nga ebanghelio ni Jesucristo.
Kas iti sabali nga agtutubo, a dakamatekto, agtawenak iti katorse idi rugiak ti agsaludsod iti relihion ken pammatik. Dimmar-ayak iti simbaan ti sabali a pammati nga asideg iti balaymi, ngem essemko ti sumarungkar iti adu nga agduduma a simbaan.
Maysa a malem, nakitak ti dua a babbarito iti nangisit nga amerikana ken puraw a polo a sumsumrek iti balay ti kaarrubami. Aglanga dagitoy a babbarito nga—espesialda.
Nakitak iti sumaruno nga aldaw ti kaarrubak, ni Leonor Lopez, ket nagdamagak maipanggep kadagita dua a agtutubo Inlawlawag ni Leonor a misionarioda iti Ti Simbaan ni Jesucristo dagiti Santo ti Ud-udina nga Aldaw. Siraragsak a nangibaga kaniak a nabuniagan ti pamiliana iti Simbaan maysa a tawen a nasapsapa. Nakitana nga interesado-ak, inawisnak ni Leonor a makipagkita kadagiti misionario ti Simbaan.
Kalppasan ti dua nga aldaw, kaduak ti pamilia Lopez a nakipagkita kadagiti misionario. Inyam-ammoda ti bagbagida nga Elder John Messerly iti Ogden, Utah, ken Elder Christopher Osorio iti Walnut Creek, California. Diakto pulos ida malipatan.
Gapu ta agtawenak laeng idi iti 14 impapilit ni Elder Messerly a mapankami iti abay ti balaymi tapno ammo ni nanangko ti isursuroda kaniak. Sadiay, inlawlawagna nga immayda tapno ibinglay ti mensahe maipanggep ken ni Jesucristo ket nagdawat ti pammalubos a mangisuro kaniak. Imanamong ti inak ket nakiraman pay bayat ti panangisuroda kaniak.
Immuna nga indawat dagiti misionario a mangted iti kararag ni Leonor. Daytoy ti nangsagid unay kaniak gapu ta ti kararagna saan a maulit-ulit a nayulo a balikas ngem naipeksa manipud iti pusona. Nariknak a pudno a kasarsaritana ti Amana a Nailangitan.
Kalpasanna insuronakami dagiti misionario maipanggep ken ni Jesucristo. Impakitada ti maysa a ladawanna a nangawis iti riknak gapu ta daytoy ti ladawan ti nagungar, sibibiag a ni Cristo.
Intuloyda, nga insurodakami no kasano nga impasdek ni Jesus ti Simbaanna idi nagkauna a panawen, nga Isu ti ulo a kaduana ti sangapulo‑ket‑dua nga Apostol. Insurodak maipanggep iti Ikakalilis iti Kinapudno—no kasano a napukaw ti turay ni Cristo iti daga kalpasan a natay dagiti Apostolna.
Imbagada iti 14-ti-tawenna a barito nga agnagan iti Joseph Smith nga, idi nasapsapa a panawen ti1800, simmarungkar iti nadumaduma a simbaan a nagsuksukisok iti kinapudno. Iti panaglabas ti panawen, ad-adda a natikaw ni Joseph. Kalpasan a nabasana iti Biblia a mabalintayo ti “agdawat koma iti Dios”1 iti kinasirib, ni Joseph, a sipapammati, napan iti kakaywan tapno agkararag ken agdamag no ania a simbaan ti nasken a pakikappenganna.
Maysa kadagiti misionario ti nagbasa iti pakaammuan ni Joseph no ania ti napasamak idi nagkararag:
“Nakitak ti kasla adigi a lawag iti mismo a ngatuen ti ulok, a naranraniag pay ngem init, nga in-inut a nagpababa a nagdisso kaniak.
Nakitak ti dua a Kinatao idi agdisso ti lawag kaniak, nga artapan ti lawag ken tan-okda ti amin a panangiladawan, a nagtakder iti angin iti ngatuek. Maysa kadakuada ti nagsao kaniak, nga inawagannak iti naganko, ket kinunana, intudona ti kaduana—Daytoy ti Ay-ayatek nga Anakko. Dumngegka Kenkuana!”2
Kabayatan dayta a leksion, impaneknek ti espiritu kaniak ti adu a kinapudno.
Umuna, dumngeg ti Dios iti amin a napudno a karkararag dagiti annakna, ken silulukat ti langit iti amin—di laeng iti sumagmamano.
Maikadua, ti Dios Ama, ni Jesucristo, ken ti Espiritu Santo ti tallo a nagsisina a kinatao, agkaykaysa iti panggep “a mangipatungpal iti saan nga ipapatay ken ti agnanayon a biag ti tao.”3
Maikatlo, naparsuatayo iti ladawan ti Dios. Ti Nailangitan nga Amatayo ken ti Anakna, ni Jesucristo, ket nagtagilasag ken nagtagitulang, ngem naitan-okda ken naan-anay, ngem ti Espiritu Santo ti kinatao ti espiritu.4
Maikapat, babaen ken ni Joseph Smith, insubli ni Jesucristo ti ebangheliona ken ti pudno a Simbaanna iti daga. Ti turay ti priesthood a naited iti kadagiti Apostol ni Cristo 2000 a tawen ti napalabas ti isu met laeng a priesthood nga intalek da Pedro Santiago ken Juan kada Joseph Smith ken Oliver Cowdery .5
Kamaudiananna, nasursurotayo maipapan iti mainayon a pammaneknek ken ni Jesucristo: ti Libro ni Mormon. Insurat dagiti nagkauna a propeta, saritaenna maipapan dagiti tao a nagnaed iti America kasakbayan, kabayatan, ken kalpasan ti pannakayanak ni Jesus. Manipud itoy nasursurotayono kasano a naam-ammo, inayat, ken nagrukbabda ken ni Cristo, a nagparang kadakuada kas nagungar a Mangisalakan.
Natignaynak unay ti espiritu bayat ti idi naammuak ti impakdaar ti Mangisalakan kadakuada: “Adtoy, siak ni Jesucristo, a pinaneknekan dagiti propeta nga umayto ditoy lubong.”6
Nangted dagiti misionario iti bukodmi a kopia ti Libro ni Mormon Binasa ken inawatmi ti awis a masarakan iti gibus ti Libro ni Mormon, a mabasa:
“Ket inton awatenyo dagitoy a banag, igunamgunamko a dawatenyo iti Dios, ti Agnanayon nga Ama, iti nagan ni Cristo, no saan a pudno dagitoy a banag; ket no naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona kadakayo, babaen ti pannakabalin ti Espiritu Santo.
“Ket babaen ti pannakabalin ti Espiritu Santo maammuanyo ti kinapudno ti amin a banag.”7
Dumanin 45 a tawen manipud idi damo a naamuak ken ti inak ti rag-o ken bileg ti kaadda ti pammati ken ni Cristo. Gapu idi iti pammatida ken ni Cristo nga imbinglay ti pamilia Lopez ti baro a pammatida kaniak. Gapu iti pammatida ken ni Cristo a pinanawan dagitoy dua a missionario iti pagtaenganda iti Estados Unidos tapno sapulenda ti inak ken siak. Ti pammati amin dagitoy a maipatpateg a gagayyem a nangimula iti bukel ti mustasa ti pammati kadakami a manipud idi dimmakkel a natibker a kayo dagiti agnanayon a bendision.
Kabayatan dagitoy nagasat a tawen, naammuantayo, kas imbaga ni President Russell M.Nelson: “Amin a banag a nasayaat iti biag—ti tunggal potensial a bendision nga addaan iti agnanayon a kinapateg—mangrugi iti pammati. Ti panangpalugod iti Dios nga agballigi iti biagtayo ket mangrugi iti pammati a sitatallugod Isuna a mangiwanwan kadatayo. Ti pudno a panagbabawi ket mangrugi iti pammati nga addaan ni Jesucristo iti bileg a mangdalus, mangagas, ken mangpapigsa kadatayo.”8
Awisek ti amin kadatayo a papigsaen ti pammatitayo ken ni Cristo, isu a namagbalbaliw ti biagmi iti ay-ayatek nga inak ket agtultuloy a mangbaliw iti biag ti amin nga umasideg Kenkuana. Ammok a ni Joseph Smith ti Propeta ti Pannakaisubli, a ni President Nelson ti propetatayo ita, a ni Jesus ti sibibiag a Cristo ken ti Mannubbottayo, ken sibibiag ti Nailangitan nga Ama ket sungbatanna amin a karkararag dagiti annakna. Paneknekak dagitoy a kinapudno iti sagrado a nagan ni Jesucristo, amen.