Addaan iti Bileg ti Naindaklan a Dayag ti Dios
Ti panangdayawtayo kadagiti katulangan ti mangted igam kadatayo iti kinalinteg ken iti nadayag a bileg ti Dios.
Ikararagko a lawlawagan ken itandudonatayo amin ti Espiritu Santo no ibilangtayo a sangkamaysa ti datdatlag nga aramid ti pannakaisalakan ken pannakaitan-ok iti dispensasion ti pakabuklan ti panawen.
Umuna nga Isasarungkar ni Moroni ken ni Joseph Smith
Agarup tallo a tawen kalpasan ti Umuna a parmata, iti sardam ti Septiembre 21, 1823, agkarkararag ni ubing a Joseph Smith tapno umawat iti pannakapakawan dagiti basolna ken ammuen ti kasasaadna iti sango ti Dios.1 Nagpakita ti kinatao iti abay ti katrena, inawaganna ni Joseph iti naganna, ket kinunana “isu ti mensahero a naibaon manipud iti yan ti Dios … ket Moroni ti naganna.” Inlawlawagna “nga adda ipaaramid ti Dios ken ni [Joseph]”2 ket kalpasanna binilinna maipapan iti yaay ti Libro ni Mormon. Sipapateg, maysa ti Libro ni Mormon iti umuna a topiko a naisarita iti mensahe ni Mormon.
Ti Libro ni Mormon ti mainayon a pammaneknek ken ni Jesucristo ket naindaklan a ramit ti kumbersion iti ud-udina nga aldaw. Panggeptayo iti panangibinglay iti ebanghelio a mangawis iti amin nga umay ken Jesucristo,3 mangawat iti bendision ti naisubli nga ebanghelio, ken agibtur agingga iti udina babaen ti pammati iti Mangisalakan.4 Ti panagtulong iti tao a mangpadas iti naindaklan a panagbalbaliw ti puso5 ken mangibegkes iti bagida iti Apo babaen ti sagrado a katulagan ken ordinansa ket dagiti kangrunaan a panggep ti panangikasaba iti ebanghelio.
Ti panangyam-ammo ni Moroni iti Libro ni Mormon ken ni Joseph Smith ti nangirugi iti aramid ti pannakaisalakan ken pannakaitan-ok para iti tao ditoy a bangir ti belo iti dispensasion ti pakabuklan ti panawen.
Iti tuloy ti pammilinna ken ni Joseph, insaruno nga inadaw ni Moroni ti libro ni Malakias iti Daan a Tulag, nga adda bassit pagdumaanna iti pagsasao a nausar iti bersion a King James:
Adtoy, ipalgakko kadakayo ti Priesthood, babaen ti ima ni Elias a propeta, sakbay ti yaay ti naindaklan ken nakaam-amak nga aldaw ti Apo.
“… Ket imulananto iti puspuso dagiti ubbing ti karkari nga inaramid dagiti amma, ket maisublinto ti puspuso dagiti ubbing kadagiti ammada. No saanto a kasta, awan duadua a madadaelto ti sangabukel a daga iti yaayna.”6
Panggeptayo iti panangbangon kadagiti templo a mangaramid a sidadaan dagiti nasantuan a lugar a pakaannongan dagiti sagrado a katulagan ken ordinansa a kasapulan iti pannakaisalakan ken pannakaitan-ok ti pamilia ti tao, iti agpada a sibibiag ken natay. Ti pammilin ni Moroni ken Joseph Smith maipapan iti napateg nga akem ni Elias ken turay ti priesthood ti nangpadur-as iti aramid ti pannakaisalakan ken pannakaitan-ok ditoy bangir a belo ken nangrugi iti dispensasiontayo ti aramid para kadagiti natay iti bangir ti belo.
Kas pakagupgopan, dagiti pannursuro ni Moroni idi Septiembre ti 1823 maipapan iti Libro ni Mormon ken ti mision ni Elias ket nangipasdek iti pundasion ti doktrina para iti aramid ti pannakaisalakan ken pannakaitan-ok iti agsumbangir ti belo.
Dagiti Pannursuro ni Propeta Joseph Smith
Dagiti adalen a nasursuro ni Joseph Smith ken Moroni ti nangimpluensia iti tunggal aspekto ti ministrona. Kas pagarigan, iti napasnek a panagtitipon a naangay iti Kirtland Temple idi Abril 6, 1837, kinuna ti Propeta, “Kalpasan ti amin a naisao, kaindaklan ken kapatgan a pagrebbengan ti mangikasaba iti Ebanghelio.”7
Dumani pito a tawen kalpasanna, idi Abril 7, 1844, inted ni Joseph Smith ti sermon a maam-ammo ita a King Follett Discourse. Impakdaarna iti dayta a bitla, “Ti kaindaklanan a pagrebbengan ditoy lubong nga inted ti Dios kadatayo ket ti panagsukisok kadagiti minataytayo.”8
Ngem kasano a ti panangikasaba iti ebanghelio ken panagsukisok iti minataytayo agpada a kaindaklanan a pagrebbengan nga inted ti Dios kadatayo? Patiek nga inyunay-unay ni Propeta Joseph Smith iti agpada a palawag ti kangrunaan a kinapudno a dagiti katulagan, a sumrek babaen dagiti awtoritatibo nga ordinansa iti priesthood, mabegkesdatayo ken ni Apo Jesucristo kapatgan iti aramid ti pannakaisalakan ken pannakaitan-ok iti agsumbangir ti belo.
Ti aramid ti misionario ken templo ken family history ket komplementario ken agkakanaig nga aspekto ti maysa a naindaklan nga aramid a mangipamaysa iti sagrado a katulagan ken ordinansa a mangpabael kadatayo nga umawat iti bileg ti Kinadiosan iti biagtayo, ken kamaudianan, agsubli iti sidong ti Nailangitan nga Ama. Ngarud, ti dua nga insao ti Propeta a kasla sumupsupiat iti damo, kinapudnona, mangitampok iti pannakasentro daytoy naindaklan nga aramid iti ud-udina nga aldaw.
Maibegkes iti Mangisalakan babaen kadagiti Katulagan ken Ordinansa
Kinuna ti Mangisalakan:
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay iti kararuayo.
“Ta ti sangolko nalaka ken nalag-an ti awitko.”9
Alaentayo ti sangol ti Mangisalakan kadatayo no agsursuro, maikari nga umawat, ken agdayawtayo iti sagrado a katulagan ken ordinansa. Naibegkestayo a sitatalged iti mangisalakan no sipupudnotayo a manglagip ken mangaramid iti kasayaatan nga agbiagtayo a mayannurot iti obligasion nga inawattayo. Ket dayta a pannakaibegkes Kenkuana ti pagtaudan ti naespirituan a pigsa iti tunggal panawen ti biagtayo.
Dagiti Natulagan a Tao ti Apo
Awisenkayo a mangibilang kadagiti bendision a naikari kadagiti agtungtungpal iti katulagan a disipulo ni Jesucristo. Kas pagarigan, ni Nephi “nakitana ti simbaan ti Kordero ti Dios [iti ud-udina nga aldaw], ket bassit ti kamengna, … a sasanto ti Dios, addada met iti amin a dagdaga; … ket bassit ti masakupanda.”10
Isu “naimatanganna [pay] ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo,, … ket igamda ti kinalinteg ken addaanda iti nadayag a bileg ti Dios.”11
Ti ragup ti balikas nga “igamda ti kinalinteg ken addaanda iti nadayag a bileg ti Dios” saan laeng a nasayaat nga ideya wenno pagwadan ti napintas a pagsasao iti nasantuan a kasuratan. Ketdi, dagitoy a bendision ti nakasagana a pakakitaan iti biag ti adu a disipulo ti Apo iti ud-udina nga aldaw.
Gapu kadagiti pagrebbengak kas miembro ti Sangapulo-ket-dua makapagbiaheak iti intero a lubong. Ken naparaburannak a maam-ammo ken masursuruan iti napapateg nga adalen manipud kadakayo. Paneknekak a dagiti natulagan a tao ti Apo ita pudno nga igamda ti kinalinteg ken addaanda iti nadayag a bileg ti Dios. Nasaksiakon ti kinapudno, kinatured, pannirigan, kinaanep, ken rag-o nga aglablabes iti kabaelan ti tao—a ti laeng Dios ti makaipaay.
Nasaksiak ti kinalinteg ken ti nadayag a bileg ti Dios, a maawat babaen dagiti katulagan ken ordinansa, iti biag ti agtutubo a miembro ti Simbaan a dumani nabaldado gapu iti naames nga aksidente iti lugan. Kalpasan dagiti narigat a bulan ti panagpalaing ken panangibagay iti baro a lifestyle daytoy a tao gapu iti naiget a panaggaraw, naam-ammok ken nakasaritak daytoy nabileg a kararua. Iti panagsarsaritami dinamagko, “Ania ti naitulong daytoy a padas a nasursurom?” Dagus the insungbatna ti, “diak agliday. Diak makagura. “Ken agbalinto a nasayaat ti amin.”
Nasaksiak ti kinalinteg ken ti nadayag a bileg ti Dios, a naawat babaen dagiti katulagan ken ordinansa iti biag dagiti kabumbuniag ken kakumkumpirma a miembro ti Simbaan. Naggagar dagitoy a convert nga agadal ken agserbi, natallugod ngem masansan a di sigurado no kasano a lipatenda dagiti daan nga ugali ken kannawidan, ngem sirarag-o nga agbalin a “makipagili kadagiti santo, ken ti sangakabbalayan ti Dios.”12
Nasaksiak ti kinalinteg ken ti nadayag a bileg ti Dios a maawat babaen dagiti katulagan ken ordinansa iti biag ti maysa a pamilia a nangaywan a sidudungngo iti asawa ken nagannak a masakit unayen. Inladawan dagitoy natured a disipulo ti panawen a narikna ti panagmaymaysa ti pamiliada—ken panawen nga ammoda a ti ima ti Apo ti mangitagtag-ay ken mangpappapigsa kadakuada. Impeksa daytoy a pamilia ti napudnuan a panagyamanda iti narigat a padpadasda iti biag a nangpalugod kadatayo a dumur-as ken agbalin nga ad-adda kas iti Nailangitan nga Amatayo ken Mannubbottayo, ni Jesucristo. Tinulongan ken pinaraburan ti Dios daytoy a pamilia iti pannarabay ti Espiritu Santo ken inaramidna ti pagtaenganda a sagrado a lugar a pagkamangan kas ti templo.
Nasaksiak ti kinalinteg ken ti nadayag a bileg ti Dios, a naawat babaen dagiti katulagan ken ordinansa iti biag ti maysa a miembro ti Simbaan a nakapadas iti parikut ti diborsio. Ti naespirituan ken emosional a pannakariribuk daytoy a kabsat ket pinadakkel ti di nainkalintegan a mainaig iti pananglabsing ti asawana iti katulagan ken ti panagsinada. Kayatna ti hustisia ken panagsungbat.
Idi agkarkarigatan daytoy napudno a babai iti amin a napasamak kenkuana, inadal ken inutobna ti Pannubbot ti Mangisalakan a napangpanggep ken nasnasged ngem idi iti biagna. In-inut, a ti naun-uneg a pannakaawat iti pangsubbot a mision ni Cristo nailimog iti kararuana—ti panagsagabana para iti basbasoltayo, ken dagiti pay saem, pagkapsutan, pannakapaay, ken lidaytayo. Ket naparegta a mangdamag iti bagina: gapu ta nabayadanen ti gatad para kadagita a basol: idawatmo kadi pay dayta a gatad a mabayadan iti mamindua? Naamirisna a di nainkalintegan wenno di manangngaasi ti kasta a kasapulan.
Naadal daytoy a babai a ti panangibegkes ti bagina iti Mangisalakan babaen ti katulagan ken ordinansa a makaagas iti sugat a gapuanan ti di nalinteg a panangaramat iti moral agency ti sabali a tao ken mangpabael kenkuana a mangsapul iti kapasidad a mamakawan ken umawat iti talna, asi, ken ayat.
Kari ken Pammaneknek
Posible laeng dagiti kari ken bendision ti katulagan gapu iti Mangisalakantayo, ni Jesucristo. Awisennatayo a kumita Kenkuana,13 umay Kenkuana,14 agsursuro Kenkuana,15 ken ibegkestayo ti bagitayo Kenkuana16 babaen dagiti katulagan ken ordinansa ti naisubli nga ebangheliona. Paneknekak ken ikarik a ti panangdayaw iti katulagan igamannatayo iti kinalinteg ken iti nadayag a bileg ti Dios. Ket paneknekak a ti sibibiag nga Apo Jesucristo ti Mangisalakantayo. Sirarag-o a paneknekak dagitoy a kinapudno iti sagrado a nagan ni Apo Jesucristo, amen.