Itag-ayyo ti Silawyo
Simple ti awisko ita: ibinglayyo ti ebanghelio. Dakayo mismo itag-ayyo ti silawyo.
Bayat ti panagbiahek iti eroplano a mapan idiay Peru manon a tawen ti naglabas, nakaabayko idi ti maysa a nangibaga nga atheist isuna. Dinamagna no apay mamatiak iti Dios. Iti naragsak a panagpatangmi, imbagak kenkuana a mamatiak iti Dios gapu ta nakita ni Joseph Smith Isuna—ken innayonko pay a ti pannakaammok iti Dios nagun-odko manipud iti personal ken pudno nga espiritual a kapadasak. Imbinglayko ti pammatik nga “ipamatmat amin dagiti banag nga adda Dios”1 ket nagdamagak no kasano a mamati iti daga—daytoy ubbog ti biag iti kawaw nga espasio—ket napaadda. Kinunana iti bukodna a balikas, nga “ti aksidente” mabalin a napasamak iti naunday a panawen. Idi inlawlawagko a nakaim-imposible nga “aksidente” ti makaigapu iti kasta a ngayed ken urnos, nagulimek ket kalpasanna napakumbaba a nagkuna, “Awan makunakon.” Dinamagko no basaenna ti Libro ni Mormon. Kinunana a basaenna, isu a nangipatulodak iti kopiana.
Sumagmamano a tawen kalpasanna naaddaannak iti baro a gayyem iti airport ti Lagos, Nigeria. Nagam-ammokami bayat ti panangkitana iti pasaportek. Nagdamagak maipapan kadagiti pammati iti relihionna, ket inyebkasna ti natibker a pammatina iti Dios. Imbinglayko ti rag-o ken regta ti naisubli nga ebanghelio ni Jesucristo ket dinamagko no kayatna ti masuruan iti ad-adu pay manipud kadagiti misionario. Wen kinunana, ket nasursuruan, ken nabuniagan. Kalpasan iti dua a tawen, bayat a magmagnaak iti airport iti Liberia, nangngegko ti timek a mangaw-awag iti naganko. Timmaliawak, nakitak ti isu met la a barito nga umas-asideg a nakaisem. Siraragsak a naginnabrasakami ket impakaammona nga aktibon iti Simbaan ken tumultulong kadagiti misionario a mangisur-suro iti nobiana.
Iti agdama, saanko nga ammo no binasan ti atheist a gayyemko ti Libro ni Mormon wenno kimmappengen iti Simbaan. Inaramid ti maikadua a gayyemko. Para kadakuada a dua, pagrebbengak2—gundawayko—iti agpada: nga itag-ay ti silaw ti ebanghelio—a mangipateg, mangibinglay, ken mangawis iti kadawyan, gagangay a wagas.3
Kakabsatko a lallaki ken babbai, napadasak dagiti bendision ti panangibinglay iti ebanghelio, ket naisangsangayanda. Adtoy ti sumagmamano kadagitoy:
Mangyeg ti Panangibinglay iti Ebanghelio iti Rag-o ken Namnama
Ammotayo a nagbiagtayo kas annak ti Nailangitan nga Amatayo sakbay nga immaytayo ditoy daga4 ket naparsua ti daga para iti panggep a mangted iti tunggal tao ti gundaway a maaddaan iti bagi, manggun-od iti padas, masuruan, ken dumur-as tapno umawat iti agnanayon a biag—nga isu ti biag ti Dios.5 Ammo ti Nailangitan nga Ama nga agsagaba ken agbasoltayo iti daga, isu nga imbaonna ti Anakna a ti “di maartapan a biagna”6 ken ti awan patinggana a pangsubbot a sakripisiona7 ti namagbalin a mapakawan, maagasan, ken mapalaingtayo.8
Ti panangammo kadagitoy a kinapudno ket makapagbalbaliw iti biag. No masursuro ti tao ti nagloriaan a panggep ti biag, maawatanna a pakawanen ken saranayen ni Cristo dagiti mangsurot Kenkuana, ket pilienna a suroten ni Cristo iti danum ti panagbuniag, agbalin a nasaysayaat ti biag—uray no di agbaliw ti kasasaad ti biag.
Ti sister a nakaragragsak a naam-ammok iti Onitsha, Nigeria, imbagana a manipud idi naammuanna ti ebanghelio ken nabuniagan (ket ita usarek dagiti bukodna a balikas), “amin a bambanag ket pagimbagak. Naragsakak. Addaak iti langit.”9 Mangted iti rag-o ken namnama iti kararua ti agpadpada a mangipapaay ken umaw-awat iti ebanghelio. Pudno, “anian a kinarag-oyo”10 no ibinglayyo ti ebanghelio! Ti panangibinglay iti ebanghelio ket rag-o iti rag-o, namnama iti namnama.11
Ti Panangibinglay iti Ebanghelio Mangisangbay iti Bileg ti Dios iti Biagtayo
Idi nabuniagantayo, simrektayo iti agnanayon12 a katulagan iti Dios nga “agserbi kenkuana ken agtungpalen iti bilbilinna,”13 agraman ti “agtakder a saksi [Kenkuana] iti amin a kanito ken iti amin a banag, ken iti amin a lugar.”14 No “agtalinaedtayo” Kenkuana babaen iti panagtungpal kadaytoy a katulagan, agayus ti pammaregta, panangsaranay, bileg ti kinadios iti biagtayo manipud ken Cristo, kas iti sanga nga umawat iti pannakataraon manipud iti puon ti ubas.15
Ti Panangibilay iti Ebanghelio Salaknibannatayo iti Sulisog
Imbilin ti Apo:
“Itag-ayyo ti silawyo tapno agraniag iti lubong. Adtoy siak ti silaw nga itag-ayyo—iti naimatanganyo nga inaramidko. …
“… Imbilinko nga … umaykayo kaniak, tapno marikna ken makitayo; ket kasta met ti aramidenyo iti lubong; ket asino man a saan nga agtungpal iti daytoy a bilin itulokna ti bagina a mayasideg iti sulisog.”16
No pilien ti di mangitag-ay ti silaw ti ebanghelio yadayonatayo iti kinapudno ken pannakaammo, ket ad-adda a masulisogtayo. Ti napateg, pudno ti saritaan: a no pilien ti mangitag-ay iti silaw ti ebanghelio naan-anay nga iyas-asidegnatayo iti silaw ken salaknib nga ipaayna a maibusor iti sulisog. Anian a nagdakkel a bendision iti agdama a lubong!
Mangyeg ti Panangibinglay iti Ebanghelio iti Pannakapaimbag
Inawat ni Sister Tiffany Myloan ti awis a mangsuporta kadagiti misionario iti laksid ti panagsagabana, karaman dagiti saludsod iti pammatina. itay kallabes imbagana kaniak a ti panangsuporta kadagiti missionario ti nangpabaro iti pammati ken pagimbaganna. Iti balikasna, “Makapaimbag unay ti aramid ti misionario.”17
Rag-o. Namnama. Makaitandudo a bileg manipud iti Dios. Salaknib iti pannulisog. Pannakaagas. Amin daytoy—ken ad-adu pay (agraman ti pannakapakawan ti basbasol)18—ti mangpatarnaw kadatayo kas bendision ti langit no ibinglaytayo ti ebanghelio.
Itan, Ti Panangkita iti Naindaklan a Gundawaytayo
Kakabsat, “adu iti amin a … partido, [sekta,] ken denominasion … a mayadayo pay laeng iti kinapudno gapu ta dida ammo no sadino ti pangsapulanda.”19 Dakdakkel ti panagkasapulan nga itag-ay ti silawtayo iti amin a pakasaritaan ti tao. Ket ti kinapudno ad-adda a magun-od itan.
Ni Jimmy Ton, a dimmakkel a Budista, ket naawis ti riknana iti maysa a pamilia a nangibinglay ti pakasaritaan ti biagda iti You Tube. Idi naammuanna a miembroda iti Ti Simbaan ni Jesucristo dagiti Santo iti Ud-udina nga Aldaw inadalna mismo ti ebanghelio iti online, binasana ti Libro ni Mormon iti app, ket nabuniagan kalpasan ti pannakipagkitana kadagiti misionario iti kolehio.20 Maysa itan a full-time missionary ni Elder Ton.
Isu ken dagiti padana a misionario iti intero a lubong ket buyot ti Apo—kas naadaw iti propetatayo.21 Maigiddiat iti ayo ti lubong ti ar-aramiden dagitoy a misionario: idinto nga ipakita dagiti survey a ti Gen Z umad-adayoda iti Dios,22 dagiti agtutubotayo a mannakigubat23 dagiti elder ken sister ti mangisubli kadagiti tao iti Dios. Ket ti umad-adu a bilang dagiti miembro ti Simbaan makikaykaysada kadagiti misionario iti panangibinglay ti ebanghelio, mangtultulong iti ad-adu pay a gagayyem nga umay ken Cristo ken iti Simbaanna.
Dagiti miembro a Santo iti Ud-udina nga Aldaw iti Liberia timmulongda iti 507 a gagayyem a nagbuniag kabayatan ti 10 a bulan a kaawan ti agserbi full-time missionary iti pagilianda. Idi nadamag ti maysa kadagiti stake president iti Liberia a mabalinen nga agsubli dagiti full-time missionary, kinunana, “Ay, nagsayaaten, matulongandatayo itan iti aramidtayo.”
Husto isuna: ti pannakaummong ti Israel—ti kaindaklan nga aramid iti daga24—nga isu ti pagrebbengantayo iti katulagan. Ket daytoy ti panawentayo! Simple ti awisko ita: ibinglayyo ti ebanghelio. Dakayo mismo ket itag-ayyo ti silawyo. Agkararagkayo iti tulong ti langit ket surotenyo dagiti naespirituan a parikna. Ibinglayyo ti biagyo a kadawyan ken gagangay, ket awisenyo ti sabali pay a tao nga umay ken mangkita, umay ken tumulong, ken umay ken agkameng.22 Ket agrag-okayo ken dagiti patpatgenyo no maawatyo dagiti naikari a bendision.
Ammok a babaen ken Cristo maikasaba dagitoy naimbag a damag kadagiti napakumbaba; ken Cristo mabedbedan dagiti nasugatan iti pusona; ken Cristo maruk-atan dagiti balud, ket ken Cristo, ken Cristo laeng, maikkan dagiti agladladingit iti ngayed para iti dapu.26 Iti kasta, dakkel a pagkasapulan a maipakaammo dagitoy a banag!27
Paneknekak a ni Jesucristo ti akin-aramid ken mangpasantak iti pammatitayo.28 Ileppasnanto, buklennanto, ti pannakaaramat ti pammatitayo—nupay saan a naan-anay—a mangitag-ay iti silaw ti ebanghelio. Agaramidto iti milagro iti biagtayo ken iti biag dagiti ummongenna, ta Isu ti Dios dagiti milagro.29 Iti datdalag a nagan ni Jesucristo, amen.