Ti Ayat ti Dios
Binendisionannatayo ti Amatayo ken Mannubbottayo iti bilbilin, ken iti panangtungpal iti bilbilinda, mariknatayo ti naan-anay nga ayatda ken naun-uneg.
Ay-ayatennatayo ti Nailangitan nga Amatayo a naan-anay.1 Iti ayatna, nagaramid iti plano, plano ti pannakasubbot ken ragsak a mangted kadatayo iti gundaway ken rag-o a siaayattayo nga awaten, agraman ti amin nga adda Kenkuana.2 Tapno magun-od daytoy, siaayat nga indatonna ti Patpatgenna nga Anakna, ni Jesucristo, kas Mannubbottayo. “Ta kasta la unay ti panagayat ti Dios iti lubong; nga intedna ti Anakna a Bugbugtong, tapno amin a mamati kenkuana, saan a mapukaw, no di ket adda biagna nga agnanayon.”3 Natarnaw ti ayat ti Amana—sapasap iti amin ngem personal iti tunggal maysa.
Ibinglay ni Jesucristo iti Amana daytoy met la a naan-anay nga ayat. Idi damo nga inlawlawag ti Ama ti naindaklan a planona iti ragsak, inawaganna ti maysa nga agakem kas Mangisalakan a mangsubbot kadatayo—napateg a paset ti plano. Nagboluntario ni Jesus, “Adtoyak, ibaonnak.”4 Ti Apo, “saan nga agaramid iti ania man malaksid ti pagimbagan ti lubong; ta patpatgenna ti lubong, uray pay no ipustana ti biagna no mayasidegna la ketdi amin dagiti tao kenkuana. Gapuna, awan ti binilinna a di makiranud iti panangisalakanna.”5
Daytoy nadiosan nga ayat ikkannatayo iti nawadwad a gin-awa ken kumpiansa no agkararagtayo iti Ama iti nagan ni Cristo. Awan kadatayo ti ganggannaet Kadakuada. Nasken a ditayo agkedked nga umawag iti Dios, uray no mariknatayo a ditay maikari. Makapagpannuraytayo iti asi ken parabur ni Jesucristo a mangngegan.6 No agtalinaedtayo iti ayat ti Dios, bumasbassit ti panagpannuraytayo iti anamong ti dadduma mangtarabay kadatayo.
Ti Ayat ti Dios Saan a Pambar iti Basol; Ketdi Idiayana ti Pannakasubbot
Gapu ta sakupen ti ayat ti Dios ti amin, adda agkuna nga “awan kondisionna,” ken ipagarupda, a maikeddengda a kaipapanan dayta nga “awan kondisionna,” dagiti bendision ti Dios, ken ti pannakaisalakan “awan kondisionna.” Saanda a kasta. Adda masansan nga agkuna, “ay-ayatennak ti Apo no asinoak,” ket sigurado a pudno dayta. Ngem dinatayo maala iti pagarianna a kastoytayo laeng, “gapu ta awan ti narugit a banag a makapagtaeng sadiay, wenno makapagtaeng iti sidongna.”7 Nasken a marisut nga umuna ti basbasoltayo.
Naminsan a nakita ni Professor Hugh Nibley a di makapagibtur ti pagarian ti Dios no palugodanna uray ti kabassitan a basol: Ti kabassitan a rugit ti korapsion kaipapananna a ti sabali a lubong awan ti saan a korapsion wenno agnanayon. Ti kabassitan a depekto iti maysa a pasdek, institusion, kodigo, wenno ugali di maliklikan nga agpeggad iti panaguray iti kinaagnanayon.”8 “Naiget”9 dagiti bilin ti Dios gapu ta makapagtakder laeng ti pagarian ken umilina no agtultuloy a liklikanda ti dakes ken pilien ti naimbag, nga awan eksepsion.10
Napaliiw ni Elder Jeffrey R. Holland, “Nalawag a naawatan ni Jesus nga adu iti agdama a kulturatayo ti kasla nakalipat: nga adda napateg a paggidiatan ti bilin a mangpakawan iti basol (nga agnanayon a kabaelanna nga aramiden) ken ti ballaag a maibusor iti panangkondena iti daytoy (a dina pulos inaramid uray naminsan).”11
Nupay kasta, iti baet dagiti pagkurangantayo, manamnamatayo latta a ragpaten ti “nadayaw a nagan ken kasasaad,”12 maysa a lugar, iti Simbaanna ken iti celestial a lubong. Kalpasan a nailawlawagna a dina mapalugodan wenno ikankano ti basol, impatalged ti Apo kadatayo:
“Nupay kasta, mapakawan dagiti agbabawi ken agaramid iti bilin ti Apo.”13
“Ket kas iti kaadu ti panagbabawi dagiti taok ti panangpakawankonto iti naglabsinganda kaniak.”14
Ti panagbabawi ken nadiosan a parabur ti mangrisut iti problema:
“Laglagipenyo met dagiti balikas ni Amulek nga imsaona ken Zeezrom, iti siudad ti Ammonihah; ta imbagana kenkuana a pudno ti yaay ti Apo a mangsubbot kadagiti taona, ngem saanto nga umay a mangsubbot kadakuada iti basbasolda, ngem subbotenna ida manipud iti basbasolda.
“Ket adda bilegna nga inted kenkuana ti Ama a mangsubbot kadakuada manipud kadagiti basolda gapu iti panagbabawi; ngarud imbaonna dagiti anghelna a mangipakdaar kadagiti damag iti kasasaad ti panagbabawi, a mangyeg iti bileg ti Mannubbot, iti pannakaisalakan dagiti kararuada.”15
Iti kondision ti panagbabawi, maited ti Apo ti asi a saan a takawan iti hustisia, ken “saan nga agsardeng ti Dios nga agbalin a Dios.”16
Ti wagas ti lubong, kas ammoyo, isu ti anti-Cristo, wenno “ania man a banag no di ni Cristo.” Ti biagtayo maysa a pannakaulit ti pakasaritaan ti Libro ni Mormon a pagaramidan dagiti karismatik a tao iti di nalinteg a panangituray iti dadduma, agrambak iti pannakipagseks, ken agitandudo iti panagpabaknang kas panggep ti biagtayo. Ti pilosopiada “mangikalintegan iti panagkumit iti bassit a basol”17 wenno ad-adu a basol, ngem awan mangidiaya iti pannakasubbot. Umay laeng dayta babaen ti dara ti Kordero. Ti kasayaatan nga “ania man a banag ngem ni Cristo” wenno “ania man a banag ngem panagbabawi” a maidiaya ti ummong ket ti panangibagada nga awan basol, wenno no adda man basol, awan dagiti bungana. Diak makita a nasamay unay dayta a panagsupiat iti Maudi a Panangukom.18
Ditay koma gandaten ti imposible iti panangpadas a mangikalintegan iti basbasoltayo. Ket kasupadina, ditay koma gandaten ti imposible a panangpunas iti epekto ti basol babaen ti bukodtayo a pagimbagan. Ti relihiontayo saan a relihion ti panagkalintegan wenno relihion ti perpeksionismo no di ketdi relihion ti pannakasubbot—babaen ken Jesucristo. No maibilangtayo kadagiti agbabbabawi, babaen iti Pannubbotna nailansa ti basbasoltayo iti krusna, ken “babaen kadagiti saplitna maagasantayo.”19
Ti Tartarigagayan nga Ayat dagiti Propeta Maipada iti Ayat ti Dios
Nabayagen a naawis ti pasnekko, ken nariknak pay, ti tartarigagayan nga ayat dagiti propeta ti Dios iti ballaagda maibusor iti basol. Saanda a naguyugoy iti tarigagay a mangkondena. Ti pudno a tarigagayda maipada iti ayat ti Dios; kinapudnona, daytoy ti ayat ti Dios. Ayatenda dagiti tao a nakaibaonanda, asinoda man ken ania man ti mabalin a kayariganda. Kas met la ti Apo, di kayat dagiti katulonganna nga agsagaba ti asino man iti saem ti basol ken madi a pili.20
Naibaon ni Alma a mangipakdaar iti mensahe ti panagbabawi ken pannakasubbot iti nadangkes a tattao a naayat a mangidadanes, mangparigat, ken mangpatay kadagiti mamati a Kristiano, agraman ni Alma mismo. Ngem inayatna ida ken tinarigaganna ti pannakaisalakanda. Kalpasan ti panangipakdaarna iti Pannubbot ni Cristo kadagiti tao ti Ammonihah, impakaasi ni Alma: “Ket ita, kakabsatko, tarigagayak iti kaunggan a paset ti pusok, wen, iti napnuan gagar uray pay no nasaem, a dumngegkayo kadagiti balikasko, ket iwagsakyo dagiti basolyo, ken diyo yaleng-aleng ti aldaw a panagbabawiyo; … tapno maitag-aykayo iti maudi nga aldaw ken sumrek iti paginanaan ti [Dios].”20
Iti balikas ni Presidente Russell M. Nelson, “Pudno a daytoy ket gapu ta ipatpategtayo unay ti amin nga annak ti Dios ta ipakdaartayo ti kinapudnona.”22
Ay-ayatennakayo ti Dios; Ay-ayatenyo Kadi?
Siwawaya a maited ti ayat ti Ama ken ti Anak ngem iramanna pay dagiti namnamaen. Manen, inadaw ni Presidente Nelson, “Dagiti linteg ti Dios ket paregtaen ti awan patinggana nga ayatna para kadatayo ken ti tarigagayna nga agbalintayo iti amin a kabaelantayo a pagbalinan.”23
Gapu ta ay-ayatendakayo, dida kayat a panawandakayo a “kastakayo laeng.” Gapu ta ay-ayatedakayo, kayatda a maaddaankayo iti rag-o ken balligi. Gapu ta ay-ayatendakayo, kayatda nga agbabawikayo gapu ta dayta ti dana iti ragsak. Ngem piliyo daytoy—Dayawenda ti karbenganyo nga agpili. Nasken a pilienyo nga ayaten ken pagserbian Ida, ken tungpalenyo ti bilbilinda. Sa siwawadwad a mangbendision kasta met a mangipateg kadakayo.
Kangrunaan a namnamaenda kadatayo ti agayat met. “Ti saan nga agayat saanna nga ammo ti Dios; ta ti Dios isu ti ayat.”24 kas iti insurat ni Juan, “Patpatgek, no inayatnatayo ti Dios, nasken nga agiinnayattayo met.”25
Nalagip ti sigud a Primary General President Joy D. Jones nga idi apagassawada, naawaganda nga agassawa a mangsarungkar ken agminister iti pamilia a saan a nakimismisa iti adun a tawen. Dagus a nalawag iti umuna nga isasarungkarda a saanda a maawat. Kalpasan ti pannakapaay iti adu a pananggandat ken adu a napudnuan a panagkararag ken panagutob, immawat da Brother ken Sister Jones iti sungbat ti apay ti serbisioda itoy a bersikulo iti Doktrina ken Katulagan: “Ayatenyo ti Apo a Diosyo, iti amin a pusoyo, iti amin a kabaelan, panunot, ken pigsayo; ken iti nagan ni Jesucristo pagserbianyo.”26 Kinuna ni Sister Jones:
“Naamirismi a sipupudno nga inkarkarigatanmi a pagserbian daytoy a pamilia ken nagserbi iti bishopmi, ngem nasken a saludsodenmi iti bagimi no pudno nga agserserbikami gapu ta ay-ayatenmi ti Apo. …
“… Rinugianmi a pasungadan dagiti isasarungkarmi daytoy a maipatpateg a pamilia gapu iti ayatmi para iti Apo [kitaen iti 1 Nephi 11:22]. Inaramidmi daytoy para Kenkuana. Inaramidna a saanen a narigat ti panagkarigatan. Kalpasan ti adu a bulan a panagtakdermi iti ruar ti ridaw, pinastreknakamin ti pamilia iti balayda. Idi agangay, kanayonkamin nga agkakadua nga agkararag ken agsasarita maipapan ti ebanghelio. Napadur-as ti napaut a panaggagayyem. Dinaydayaw ken inay-ayatmi Isuna babaen ti panagayatmi iti annakna.”27
Iti panangbigbig nga ay-ayatennatayo a naan-anay ti Dios, madamagtayo, “Kasano nga ay-ayatek ti Dios? Makapagpannuray kadi iti ayatko kas panagpannurayko iti ayatna?” Di kadi maikari a namnama nga agbiag tapno maayatnatayo ti Dios di laeng iti baet ti pagkurangantayo ngem gapu iti pagbalinantayo? O, maisaona kadatayo kas iti kinunana ken ni Hyrum Smith, kas pagarigan, “Siak, ti Apo, ay-ayatek gapu ti integridad ti pusona.”28 Laglagipentayo koma ti naasi a balakad ni Juan: Ta daytoy ti ayat ti Dios, nga agtungpaltayo iti bilbilinna: ket saan a nadagsen dagiti bilinna.”29
Kinapudnona, saan a nadagsen dagiti bilinna—kasupadina laeng. Minarkaanda ti dana ti pannakaagas, ragsak, talna, ken rag-o. Binendisionannatayo ti Amatayo ken Mannubbottayo iti bilbilin, ken iti panangtungpal iti bilbilinda, mariknatayo ti naan-anay nga ayatda ken naun-uneg.30
Adtoy ti solusion iti di agsarday a panawen ti pannakirangettayo—ti aayt ti Dios. Iti panawen a panagrang-ay iti pakasaritaan ti Libro ni Mormon kalpasan ti panagministro ti Mangisalakan, naireport nga “awan ti panagririnnupir iti pagilian, gapu iti ayat ti Dios a nagnaed iti puso dagiti umili.”31 No agpasnektayo nga agturong iti Zion, lagipentayo ti kari iti Apocalipsis: “Nagasat dagiti agtungpal iti bilbilinna, ta maaddaanda iti karbengan iti kayo ti biag, ken makastrekda kadagiti ruangan nga agturong iti [nasantuan] a siudad.”32
Paneknekak ti kinapudno ti Nailangitan nga Amatayo ken ti Manubbottayo, ni Jesucristo, ken iti di agbalbaliw, di agsarday nga ayatda. Iti nagan ni Jesucristo, amen.