Ti Awan Inggana a Panangngaasi ti Mangisalakan
Ti panangipakita iti asi kadagiti dadduma ti anag ti ebanghelio ni Jesucristo.
Maysa kadagiti insuro a naisangsangayan a pagbatayan ti Mangisalakan bayat ti naindagaan a panagserbina ket ti panangtratona iti panangngaasi iti dadduma. Utobentayo koma daytoy a pagbatayan ken ti praktikal a pannakayaplikarna babaen ti panangadal iti pakaammuan maipapan iti isasarungkar ni Jesus iti pagtaengan ni Simon a Fariseo.
Isalaysay ti Ebanghelio ni Lucas nga adda maysa a babai, a maibilang a maysaa a managbasol, a simrek iti pagtaengan ni Simon bayat ti kaadda sadiay ni Jesus. Iti napakumbaba a panagbabawi, inasitgan ti babai ni Jesus, binugguanna dagiti sakana iti luana, pinunasanna ida iti buokna, ken sana inagkan ida ken binukbokan iti bangbanglo.1 Ti napannakkel a nangsangaili, a nangibilang iti baginaa a natantan-ok iti dayaw ngem iti babai, napanunotna iti bagina nga addaan panangumsi ken kinapalangguad, “No pudno a propeta daytoy a tao, ammona koma no siasino daytoy a babai a nangsagsagid kenkuana: gapu ta maysa a managbasol.”2
Ti nasansanto-ngem-sika a kababalin ti Fariseo ti nangiturong kenkunana iti di nainkalintegan a pananghusga ken ni Jesus ken iti babai. Gapu ta ammona amin a bambanag, ammo ti Mangisalakan ti panunot ni Simon, ken iti naindaklan a sirib, kinaritna ti pananglais ni Simon, ken binallaaganna pay gapu ti saan a nasayaat a panangsangailina iti espesial a sangaili kas iti Mangisalakan iti pagtaenganna. Kinapudnona, ti direkta a panangtubngar ni Jesus iti Fariseo ket nagserbi a pammaneknek nga addaan ni Jesus iti sagut ti panagipadto ket daytoy a babai, napakumbaba ken addaan nasneban a puso, nagbabawi ken napakawan kadagiti basolna.3
Kas iti adu pay a pasamak bayat ti naindagaan a panagserbi ni Jesus, daytoy a pakaammuan ti mangipakita manen a manangngaasi ti Mangisalakan kadagiti umasideg Kenkuana—awan naidaddaduma—aglalo kadagiti agkasapulan unay iti tulongna. Ti kinapakumbaba ken naraem nga ayat nga impakita ti babai ken ni Jesus ket pammaneknek a napudno ti panagbabawi ken tarigagayna a nga umawat iti pannakapakawan ti basbasolna. Nupay kasta, ti kinapalangguad ni Simon, ken ti natangken a panagpuspusona,4 ti nanglapped kenkuana a makipagrikna iti agbabbabawi a kararua, ken impakitana pay iti Mangisalakan ti lubong ti kaawan panangisakit ken pananglais. Impasimudaag ti galadna a ti wagas ti panagbiagna ket awanen ti makaartap a napinget ken narabaw a panagtungpal kadagiti pagalagadan ken panangiparangarang iti natured a pammatina babaen iti kinaparammag ken palso a kinasanto.5
Ti manangngaasi ken personal a panangministro ni Jesus iti daytoy a pakaammuan ket mangipakita iti naan-anay a pagulidanan ti nasken a pannakilangentayo iti padatayo a tao. Addaan dagiti nasantuan a kasuratan iti adu a pagarigan no kasano nga impakita ti Mangisalakan ti naparegta nga awan inggana a panangngaasi, iti pannnakilangenna kadagiti tao ti ti aldawna ken panangtulongna kadagiti agsagsagaba ken dagiti “nakakaasi, a kasda la karnero nga awan pastorda.”6 Impaayna ti asina kadakuada a nagkasapulan iti tulong para kadagiti dagensenda, agpada iti bagi ken espiritu.7
Ti manangngaasi a kababalin ni Jesus ket nagtaud iti panagayatna,8 ti natarnaw ken naan-anay nga ayatna ti kaipapanan ti manangsubbot a sakripisiona. Ti kinamanangngaasi ti maysa a kangrunaan a kababalin dagiti agkagumaan para iti pannakapasanto, ken daytoy a nadiosan a galad ti mamagsinggalut kadagiti nakristianuan a kababalin kas iti pannakipagladingit kadagiti agladladingit, mannakipagrikna, manangngaasi ken kinasayaat.9 Ti panangyebkas iti panangngaasi iti dadduma ket kinapudnona, ti kaipapanan ti ebanghelio ni Jesucristo ken ti naitanda a pakakitaan ti naespirituan ken nainriknaan a kinaasidegtayo iti Mangisalakan. Mainayon pay, ipakitana ti lebel ti impluensiana kadatayo iti wagastayo ti panagbiag ken ipakitana ti potensial ti espirututayo.
Napnuan kaipapanan a mapaliiw a ti kinamanangngaasi ni Jesus ket saan a manmano ken naibilin a parangarang a maibatay iti listaan dagiti aramid a mairingpas ngem dagiti inaldaw a panangipeksa iti kinapudno ti natarnaw nga ayatna para iti Dios ken kadagiti annakna ken ti di agbalbaliw a tarigagayna a mangtulong kadakuada.
Nabaelan ni Jesus a mangilasin kadagiti kasapulan ti tattao uray man pay iti adayo. Ngarud, saan a nakakaskasdaaw, kas pagarigan, nga idi naagasan ti maysa nga adipen ti centurion,10 dagus a nagdaliasat ni Jesus manipud iti Capernaum a napan iti siudad a maawagan iti Nain. Idiay nga inaramid ni Jesus ti maysa kadagiti napnuan asina a milagro bayat ti naindagaan a panagserbina idi imbilinna ti natayen nga agtutubo a lalaki, ti kakaisuna nga anak ti balo a babai, tapno bumangon ket agbiag. Saan laeng a narikna ni Jesus ti napalaus a panagsagaba dayta a nakakaasi nga ina ngem ti pay narigat a kasasaad ti biagna, ket naasian a pudno kenkuana.11
Kas iti managbasol a babai ken ti balo iti Nain, adu a tattao iti aglawlawtayo ti agsapsapul iti liwliwa, panangikaso, panangibilang, ken uray ania man a tulong a maipaaytayo kadakuada. Mabalintayo amin nga instrumento iti ima ti Dios ken agtignay a siaasi para kadagiti agkasapulan, kas ti inaramid ni Jesus.
Adda am-ammok nga ubing a babai a nayanak nga addaan iti nakaro a kinagusing ken kinagusab. Nasken a maoperar daytoy iti maikadua nga aldaw ti biagna, umuna kadagiti adu a pannakaoperarna. Gapu iti napudno a panangngaasi dagiti makapadpadas iti kastoy met a pannubok, daytoy nga ubing ken nagannak ket nangipaay iti tulong, pannakaawat ken tulong a mainaig iti riknakadagiti agpaspasar iti daytoy narikut a realidad. Nagsuratda kaniak itay nabiit ket imbinglayda: “Babaen daytoy a panagsagaba ti balasangmi, naaddaankami iti gundaway a mangam-ammo kadagiti nasayaat a tattao nga agkasapulan iti liwliwa, tulong, ken pammaregta. Iti di pay unay nabayag, ti anakmi a babai nga 11 ti tawenna itan, ket nakisarita iti nagannak ti maladaga nga addaan ti kapadana a pannubok. Bayat iti daytoy a panagsaritada, apagkanito nga inikkat ti balasangmi ti mask nga us-usarenna gapu iti pandemia, tapno makita dagiti nagannak nga adda namnama, uray no iti sumarsaruno a tawtawen pay lang a marisut ti problemada. Agyamankami iti gundaway a makipagriknakami kadagiti agsagsagaba, a kas ti inaramid ni Jesus para kadatayo. Mariknami a mapalag-anan ti panagladingitmi no adda matulonganmi a mapalag-anan ti panagladingitda.”
Patpatgek a gagayyemko, bayat ti panangigaedtayo a mangiraman ti kinamanangngaasi iti wagas ti panagbiagtayo, kas impakita ti Mangisalakan, agbalintayonto nga ad-adda a sensitibo kadagiti kasapulan ti tattao. Iti dayta ad-adda a kinasensitibo, ti rikna iti pudno a pannakaseknan ken ayat ti mangimpluensianto iti tunggal aramidtayo. Bigbigento ti Apo ti panagkagumaantayo, ket mabendisionantayonto kadagiti gundaway nga agbalin nga instrumento iti imana a mangpalukneng ti puspuso ken mangipaay iti tulong kadagiti “ima dagiti maidasay.”12
Ti balakad ni Jesus ken ni Simon a Fariseo ket nalawag a saantayo pulos nga agaramid iti nadagsen ken nadawel a pananghusga iti padatayo a tao gapu ta agkasapulantayo amin iti pannakaawat ken kaasi kadagiti pagkurangantayo manipud iti Nailangitan nga Amatayo. Saan kadi a daytoy ti eksakto nga insuro ti Mangisalakan iti maysa a pasamak idi imbagana, “Apay a dillawem ti puling iti mata ni kabsatmo, no dimo pay madlaw ti troso iti matam?”13
Masapul a panunotentayo a saan a nalaka nga awaten amin a pasamak a makagapu iti kababalin wenno reaksion ti maysa a tao. Makaallilaw dagiti makinruar a buya ken no dadduma saan a mangibagi iti umiso a pagrukudan ti kababalin ti maysa a tao. Saan a kas kadatayo, kabaelan ni Cristo a kitaen a nalawag ti amin a pakaseknan ti maysa a sitwasion.14 Uray no ammotayo ti amin a pagkapsutantayo a kas Kenkuana, saan nga agdardarasudos ti Mangisalakan a mangpabasol kadatayo ngem agtultuloy a makipagubra kadatayo a siaasi iti panaglabas ti panawen, a mangtultulong a mangikkat ti puling iti matatayo. Kanayon a kitaen ni Jesus ti puso, saan a ti akinruar a langa.15 Impakdaarna Mismo, “Dikayo mangukom babaen iti makitayo.”16
Itan, ibilang ti nainsiriban a balakad ti Mangisalakan kadagiti sangapulo-ket-dua a disipulo a Nephite maipapan iti daytoy a saludsod:
“Ket ammuenyo a dakayonto ti ukom kadagitoy a tao, a mayalubog iti pangngeddeng nga itedkonto kadakayo, a nainkalintegan. Ngarud, ania a kita ti tao ti rumbeng a pagbalinanyo? Pudno kunak kadakayo, kas kaniak.”17
“Ngarud kayatko a naan-anaykayo a kas kaniak, wenno kas iti kinaan-anay ti Amayo nga adda sadi langit.”18
Iti daytoy a konteksto, risuten ti Apo ti panangukom kadagiti saan a nainkalintegan a manguk-ukom kadagiti babak dagiti dadduma. Tapno maikaritayo nga agaramid iti nalinteg a panangukom, masapul nga igaedtayo ti agbalin a kas iti Mangisalakan ken kitaentayo a siaasi dagiti pagkurangan ti tunggal indibidwal, uray pay babaen ti panangkitana. Gapu ta narigat a matun-oytayo ti kinaan-anay, nalabit, nasaysayaat no agpakawantayo iti sakaanan ni Jesus gapu kadagiti pagkurangantayo, kas iti panagpakawan ti babai iti balay ti Fariseo a saan ketdi nga agbusbostayo iti panawen ken pigsa a mangbibiang kadagiti pagkurangan dagiti sabali.
Gagayyemko, paneknekak a no igaedtayo nga iraman ti kinamanangngaasi a pagwadan ti Mangisalakan iti biagtayo, manayonan ti kabaelantayo a mangdayaw kadagiti nasayaat a kababalin ti kaarrubatayo ken ti nakaisigudan a galadtayo a manghusga iti pagkuranganda ket kumapsutto. Ti kinasingedtayo iti Dios ket dumur-as, ken agbalinto a nasamsam-it ti biagtayo, ad-adda a manangngaasitayo, ken masarakantayunto ti awan patinggana a gubuayan ti kinaragsak. Agbalintayonto a mamagkappia,19 a ti panagsaotayo naalumamay kas iti linnaaw ti maysa nga agsapa iti panagsusulbod.
Ikararagko nga agbalintayonto nga ad-adda a naunday iti panagsagaba ken pannakaawat iti padatayo a tao ken ti kaasi ti Apo, iti naan-anay a kinapakumbaba, mapalag-annanto ti pannakasikortayo iti pagkuranganda. Daytoy ti awis kadatayo ti Mangisalakan. Paneknekak a sibibiag Isuna. Isu ti naan-anay a pagwadan ti kinamanangngaasi ken naanus a kinadisipulo. Iburayko ti pammaneknekko kadagitoy a kinapudno iti nasantuan a nagan ti Mangisalakan a ni Jesucristo, amen.