Pangbalin nga Ad-adda pay ken ni Cristo: Ti Pangngarig ti Bakras
Iti panawen ti Apo, saan a napateg no sadino ti pangrugiantayo no di ketdi no sadino ti pagturongantayo ti kapatgan.
Idi ubingak, adu dagiti arapaapko. Maysa nga aldaw a naggapuak iti eskuela, dinamagko, “Nanang, anianto ti pagbalinak inton dumakkelak: maysa a professional basketball player wenno maysa a rock star?” Daksanggasat, ni Clark a “ tuppol” nga awan makita kenkuana a pagilasinan ti masakbayan nga atleta wenno nalatak a kumakanta. Ken iti baet ti adu a panagkagumaan, naulit-ulit ti pannakapaayko a sumrek iti advanced academic program iti pagadalak. Insingasing dagiti mannursurok nga agtalinaedak laeng iti standard classroom. Iti panaglabas ti panawen, naaddaanak iti nasayaat nga ugali iti panagadal. Ngem saan agingga iti misionko iti Japan a nariknak a nangrugi dagiti intelektual ken naespirituan a kabaelak. Intultuloyko ti nagtrabaho a sipapasnek. Ngem iti umuna a gundaway iti biagko, sinstematiko nga inramanko ti Apo iti panagdur-asko, ket daytoy ti nangaramid iti amin a pakaidumaan.
Kakabsat, iti daytoy a Simbaan, mamatitayo iti nadiosan a potensial dagiti amin nga annak ti Dios ken iti kabaelantayo nga agbalin a maysa a nangnangruna pay ken ni Cristo. Iti panawen ti Apo, saan a napateg no sadino ti pangrugiam no di ket no sadino ti pagturongam ti kapatgan.1
Tapno ipakita daytoy a prinsipio, ipakitak ti sumagmamano a basic math. Ita, saankayo a madanagan no mangngegyo ti balikas a math iti sapasap a komperensia. Inpanamnama dagiti math faculty iti BYU-Idaho nga uray dagiti agdadamo ket maawatanda daytoy. Mangrugi babaen iti pormula para iti maysa a linia. Ti intercept, para kadagiti panggeptayo, ket daytoy ti pangrugian ti liniatayo. Ti intercept mabalin a maaddaan iti nangato wenno nababa a pangrugian a punto. Ti bakras ti linia ket mabalin ngarud nga agpabangato wenno agpababa.
Agduduma dagiti intercept-tayo iti biag—mangrugitayo iti agduduma a lugar nga addaan iti agduduma a paglaingan ken parabur iti biag. Adda dagiti nayanak nga addaan kadagiti nangato nga intercept, a napnuan iti gundaway. Maipasango dagiti dadduma iti kasasaad a napnuan karit ken kasla saan a nainkalintegan.2 kalpasanna dumur-astayo iti maysa a slope wenno bakras ti bukod a panagdur-as. Saan a ti pangrugian ti mangikeddeng ti masakbayantayo no di ket ad-adda pay babaen iti bakrastayo. Makita ni Jesucristo ti nadiosan a potensial sadino man ti pangrugiantayo. Nakitana daytoy iti agpalpalama, iti managbasol, ken iti masakit. Nakitana daytoy iti dumakdaklis, iti agsingsingir iti buis, ken iti napeklan wenno zealot. Sadino man ti pangrugiantayo, ibilang ni Cristo no ania ti aramidentayo iti naited kadatayo.3 Idinto nga ipamaysa ti lubong dagiti intercept-tayo, ti Dios ipamaysana ti bakrastayo. Iti calculus iti Apo, aramidennanto amin a makatulong a mangiturong kadagiti bakrastayo iti langit.
Daytoy a prinsipio ti mangted liwliwa kadagiti mangikarkarigatan, ken agsardeng kadagiti kasla addaan amin iti pagimbagan. Rugiak man ti mensahek kadagiti tao nga addaan kadagiti narigat a kasasaad a pangrugian, agraman ti kinakurapay, gundaway iti edukasion, narigat a situasion iti pamilia. Maipasango ti dadduma iti karit a mainaig iti bagi, sakti iti ti panunot, wenno dagti natawid a sakit.4 Siasino man a nga adda narigat a pangrugianna, bigbigenyo koma nga ammo ti Mangisalakan dagiti pagrigatantayo. Inawatna “dagiti pagkurangan[tayo], tapno mapno ti lalaemna iti kaasi … tapno maammuanna … no kasano nga alawenna[tayo] a maibatay kadagiti pagkurangan[tayo].”5
Mangibinglayak man ti dua a tay-ak ti pammaregta kadagiti maipaspasango iti narigat a kasasaad iti pangrugian. Umuna, ipamaysayo no sadino ti pagturongam a saan a ti nangrugiam. Biddut ti saan a panangikaso ti kasasaadyo—pudno dagitoy ket masapul a sanguenyo ida. Ngem iti nalabes a panagpokus iti narigat a pangrugian ibagana ti kinasiasinoyo ken manglapped iti kabaelanyo nga agpili.6
Tawtawen iti napalabas nagserbiak iti grupo dagiti agtutubo iti asideg ti siudad iti Boston, Massachusetts, a nabiit pay a miembro ti Simbaan. Makasulisog a mangriribuk ti pannakipagriknak ken pannakaseknan iti kasasaadda iti tarigagay a mangibaba iti pagrukodan ti Dios.7 Naamirisko idi agangay nga iti kabilegan a wagas a maipakitak iti panagayatko ket iti saanko pulos panangibaba kadagiti namnamaek. iti amin a banag nga ammok nga aramiden, sangkamaysa nga impokusmi ti potensialda, ket nangrugi ti tunggal maysa nga itag-ayda dagiti bakrasda. Ti panagdur-asda iti ebanghelio ket in-inut ngem agtultuloy. Ita, nakapagserbidan iti mision, nagturpos iti kolehio, nagkallaysa iti templo, ket iturturongdan iti naisangsangayan a bukod ken propesional a biagda.
Maikadua, iramanyo ti Apo iti wagas a panangitag-ay iti bakrasyo. Bayat ti panagserbik a kas presidente iti BYU–Pathway Worldwide, malagipko a nakatugawak iti dakkel a devotional idiay Lima, Peru, a ni Elder Carlos A. Gudoy ti nagsarita. Iti ikikitana iti kongregasion, nalapunos ti riknana a nakakita iti nagadu a napudno nga umuna-a-henerasion nga agad-adal iti unibersidad. Nalabit a nautobna met ti bukodna a dana a narigat a pinagpasaranna, kinuna ni Elder Godoy a napnuan panagrikna: ti Apo “tulongannakayto iti nalablabes ngem iti panangtulongyo iti bagbagiyo. [Isu nga] iramanyo ti Apo iti daytoy a proseso.”8 Insuro ni propeta Nephi “maisalakantayo babaen ti parabur, kalpasan ti amin nga aramidtayo.”9 Masapul nga aramidentayo ti amin a kabaelantayo,10 nga iraman ti panagbabawi, ngem babaen laeng ti parabur ti Apo a maamiristayo iti nadiosan a pagbalinantayo.11
Kamaudiananna, mangibinglayak man ti dua a balakad kadagiti addaan nangato a pangrugian. Umuna, maipakitatayo kadi nga agpakumbabatayo kadagiti kasasaad a saan met a datayo iti nangaramid? Kas sigud a BYU President inadaw ni Rex E. Lee kadagiti estudiantena, “Imminumtayo amin kadagiti bubon a saan met a datayo ti nangkali ken pinabaratayo dagiti bagbagitayo kadagiti apoy a saan met a datayo ti nangpaadda.”11 Kalpasanna imbagana kadagiti estudiantena a mangisubli ken mangsukat kadagiti bubon ti edukasion nga inaramid dagiti immun-una a pioneer. Ti pannakapaay a mangmula manen iti talon a minulaan ti sabali ket mabalin a mayarig iti panangisubli iti talento a saan nga immadu.
Maikadua, iti panangipamaysa iti nangato a pangrugian ket masansan a masiluannatayo iti rikna a datayo ket agbalballigi, ngem ti kinapudnona, ti akin-uneg a bakrastayo ket saan a dumurdur-as. Insuro ni Harvard professor Clayton M. Christensen a kaaduan kadagiti nagballigi a tattao ket isuda dagiti kapapakumbabaan agsipud ta natalekda a mangawat ti pannakaatur ken makasursuro manipud iti siasino man.13 Binalakadannatayo ni Elder D. Todd Christofferson a “situtulok nga [agbirok iti wagas] nga umawat ken uray pay mangsarak iti pannakaatur.”13 Uray pay no kasla naannayas dagiti paspasamak, rumbeng a biroken dagiti gundaway a sumayaat babaen iti nainkararagan a panagdawat.
Nangrugitayo man iti kinawadwad wenno iti narigat a kasasaad, maamiristayo a ti maudi a pagbalinantayo ket mapasamak laeng no aramidentayo ti Dios a kaduatayo. Nakisarsaritaak iti nabiit iti maysa a nalatak nga educator a nagdamdamag maipapan iti balligi iti BYU-Pathway. Nalaing isuna ken napudno tisaludsod, ngem nalawag a kayatna ti nainlubongan a sungbat. Imbinglayko kenkuana dagiti programatayo iti panagkagumaan iti panagpatalinaed ken panangisuro. Ngem inggibusko babaen iti panagkunak iti, “Napintas amin dagitoy nga aramid, ngem ti pudno a gapu ti panagdur-as dagiti estudiantemi ket gapu ta isursuromi kadakuada ti nadiosan a potensialda. Utobenyo no iti unos ti panagbiagyo, naibaga kadakayo a diyo kabaelan ti agballigi iti kaano man. Ken kalpasanna panunotenyo ti epekto ti panangisuro kadakayo a pudno a dakayo ti anak ti Dios nga addaan iti nadiosan a posibilidad.” Nagsardeng sa kalpasanna gagangay nga insungbatna, “Nasamay ngarud dayta.”
Kakabsat, maysa kadagiti milagro daytoy, ti Simbaan ti Apo, ket kabaelan ti tunggal maysa kadatayo ti agbalin a nangnangruna pay ken ni Cristo. Awan ammok a sabali nga organisasion a mangit-ited kadagiti miembrona iti ad-adu a gundaway nga agserbi, agisubli, agbabawi, ken agbalin a nasaysayaat a tao. Nangrugitayo man iti nawadwad wenno narigat nga a kasasaad, pagtalinaedentayo koma dagiti panagkita ken dagiti bakrastayo a nakatudo nga agpalangit. Bayat ti panangaramidtayo, itag-aynatayonto ni Cristo iti nangato a lugar. Iti nagan ni Jesucristo, amen.