Panangpaunegtayo iti Kumbersiontayo ken ni Jesucristo
Dagiti nasantuan a kasuratan ken ti pannakaammotayo iti Dios ket sagut—sagut a masansan unay a ditayo ik-ikkan iti pateg. Ipategtayo koma dagitoy a bendision.
Agyamanak unay, Elder Nielson, iti napintas a mensahem. Kinasapulantayo dayta.
Patpatgek a kakabsatko, insuro kadatayo ni Presidente Russell M Nelson itay nabiit: “Kasapulan ti panagregget nga agaramid iti ania man a nasayaat. Saan a mailaksid ti panagbalin a pudno a disipulo ni Jesucristo. Kasapulan ti panagregget iti panangpapigsa iti pammati ken panagtalekyo Kenkuana.” Karaman kadagiti intedna a rekomendasion a mangpadakkel iti pammatitayo ken ni Jesucristo ti panagbalintayo a napasnek nga agad-adal, iraremtayo ti bagbagitayo iti panagadal kadagiti nasantuan a kasuratan tapno maawatantayo a nasaysayaat ti mision ken panagministro ni Cristo. (Kitaen iti “Christ Is Risen; Faith in Him Will Move Mountains,” Liahona, Mayo 2021, 103.)
Masursurotayo iti Libro ni Mormon a dagiti nasantuan a kasuratan ket napateg a paset ti kaamaan ni Lehi—napateg unay ta nagsubli da Nephi ken dagiti kakabsatna iti Jerusalem tapno magun-odda dagiti pinanid a gambang (kitaen iti 1 Nephi 3–4).
Ipalgak dagiti nasantuan a kasuratan ti pagayatan ti Dios kadatayo, a kas iti inaramid ti Liahona ken ni Nephi ken ti amana. Kalpasan a nadadael ti baina, kasapulan ni Nephi a maammuan no sadino ti panannna a pakagun-odanna iti taraon. Kinita ti amana, ni Lehi, ti liahona ket nakitana dagiti banag a naisurat. Nakita ni Nephi dagiti pagitudo iti bola nga agkuti babaen iti pammati, kinaregta, ken kinapasnek a naited kadakuada. Nakitana pay ti sinurat a nalaka a mabasa ken nangted kadakuada iti pannakaawat maipanggep kadagiti dana ti Apo. Naammuanna a yeg ti Apo dagiti naindaklan a banag babaen ti babassit a wagas. Natulnog maipanggep kadagiti pangiturong nga inted ti Liahona. Immuli iti bantay ket nakagun-od iti taraon para iti pamiliana, a nagsagaba unay gapu iti kinaawan daytoy. (Kitaen iti 1 Nephi 16:23–30.)
Para kaniak kasla maysa ni Nephi a napasnek nga agad-adal kadagiti nasantuan a kasuratan . Mabasatayo a pagragsakan ni Nephi dagiti nasantuan a kasuratan, inutobna ida iti pusona, ken insuratna ida para iti pagadalan ken pagimbagan dagiti annakna (kitaen iti 2 Nephi 4:15–16).
Kinuna ni Presidente Russell M. Nelson:
“No ‘agtultuloytayo, nga agpennek iti balikas ni Cristo, ken agibtur agingga iti panungpalan … maaddaan[tayto] iti biag nga agnanayon’ [2 Nephi 31:20].
“Saan laeng a mangraman ti kayatna a sawen ti agpennek. Nanamen ti kayatna a sawen ti agpennek. Nanamentayo dagiti nasantuan a kasuratan babaen ti panagadal kadagitoy iti espiritu ti naragsak a panangtakuat ken napudno a panagtungpal. No agpennektayo kadagiti balikas ni Cristo, maisiglotda ‘iti taptapi a puspuso a naglasag’ [2 Taga Corinto 3:3]. Agbalinda a napateg a paset ti kinataotayo” (“Living by Scriptural Guidance,” Liahona, Ene. 2001, 21).
Ania ti Sumagmamano a Banag nga Aramidentayto No Agragsak dagiti Kararuatayo kadagiti Nasantuan a Kasuratan?
Dumakkelto ti tarigagaytayo nga agbalin a paset ti pannakaummong ti Israel iti agsumbangir a dasig ti belo. Normal ken gagangay nga awisentayto ti pamilia ken gagayyemtayo a dumngeg kadagiti misionario. Maikaritayonto, ken maaddaantayto iti agdama a temple recommend tapno makapan iti templo agingga a mabalin. Agtrabahotayto nga agsapul, agsagana, ken mangipatulod iti nagnagan dagiti kapuonantayo iti templo. Agbalintayto a napudno nga agtungpal iti aldaw ti Sabbath, makigimong iti Domingo tapno pabaruentayo dagiti katulagantayo iti Apo no maikaritayo a makiranud iti sakramento. Ikedengtayto nga agtalinaed iti dana ti katulagan, ken agbiag iti tunggal balikas nga agaon iti ngiwat ti Dios (kitaen iti Doktrina ken Katulagan 84:44).
Ania ti Kayat a Sawen Kenka ti Agragsak iti Bambanag ti Apo?
Saan laeng a mabisin ken mawaw iti pannakaammo ti panagragsak kadagiti nasantuan a kasuratan. Napadasan ni Nephi ti naindaklan a rag-o bayat iti biagna. Ngem, naipasango met isuna iti rigrigat ken liday (kitaen iti 2 Nephi 4:12–13). “Nupay kasta,” kinunana, “Ammok no asino ti nagtalkak” (2 Nephi 4:19). Bayat ti panagadaltayo kadagiti nasantuan a kasuratan, maawatantayo a nasaysayaat ti plano ti Dios iti pannakaisalakan ken pannakaitan-ok, ken agtalektayonto kadagiti inkarina kadatayo iti nasantuan a kasuratan, kasta met kadagiti kari ken bendision dagiti agdama a propeta.
Maysa a malem, naawisak ken ti asawak iti pagtaengan ti maysa a gayyem. Saan pay pulos a nangngeg ti pito-ti-tawenna nga anakda, a ni David maipapan iti estoria da David ken Goliat iti Biblia, ket kayatna a mangngeg daytoy. Idi inrugik nga isalaysay ti estoria, nariknana a babaen ti pammati ken iti nagan ti Dios ti Israel, nasugatan ken napapatay ni David ti Filisteo babaen iti maysa a palsiit ken bato, nga awan ti iggemna nga espada (kitaen iti 1 Samuel 17).
Kinitanak kadagiti nangisit a matana, sinaludsodna kaniak a sititibker, “Asino ti Dios?” Inlawlawagko a ti Nailangitan nga Amatayo ti Dios ken maammuantayo ti maipapan Kenkuana kadagiti nasantuan a kasuratan.
Kalpasanna dinamagna, “Ania dagiti nasantuan a kasuratan?” Imbagak a balikas ti Dios dagiti nasantuan a kasuratan ken masarakanna dagiti napipintas nga estoria a makatulong kenkuana a maam-ammona a nasaysayaat ti Dios kadagitoy. Kiniddawko iti inana nga usarenna ti Biblia iti pagtaenganna ken saanna a paturogen ni David no saanna nga ibasa ti sibubukel nga estoria kenkuana. Naragsakan isuna bayat ti panangdengngegna iti daytoy. Dagiti nasantuan a kasuratan ken ti pannakaammotayo iti Dios ket sagut—sagut a masansan unay a ditayo ik-ikkan iti pateg. Ipategtayo koma dagitoy a bendision.
Bayat ti panagserbik iti mision kas maysa nga agtutubo, napaliiwko a babaen iti panangisuromi babaen iti nasantuan a kasuratan, nagbalbaliw dagiti biag ti adu a tao. Naammuak ti bilegda ken no kasano a mapagbalbaliwda ti biagtayo. Naidumduma ti tunggal tao a nasuruanmi iti naisubli nga ebanghelio nga addaan ti nagduduma a kasapulan. Dagiti nasantuan a kasuratan, wen, dagiti naisurat a padto dagiti nasantuan a propeta, ti nangyeg kadakuada iti pammati iti Apo ken iti panagbabawi ken panagbaliw ti puspusoda.
Dagiti nasantuan a kasuratan ti nagpunno kadakuada iti rag-o idi immawatda ti pammaregta, direksion, liwliwa, pigsa, ken sungbat kadagiti kasapulanda. Adu kadakuada ti nangikeddeng a mangbaliw ti panagbiagda ken nangrugida a mangtungpal kadagiti bilin ti Dios.
Allukoyennatayo ni Nephi nga agragsak kadagiti balikas ni Cristo, gapu ta ibaga kadatayo dagiti balikas ni Cristo ti amin a banag a masapul nga aramidentayo (kitaen iti 2 Nephi 32:3).
Awisenkayo a maaddaan iti manayon a plano nga agadal kadagiti nasantuan a kasuratan. Umaykayo, Sumurot Kaniak ti maysa a dakkel a resource iti panangisuro ken panagadal iti ebanghelio, a mangpauneg iti kumbersiontayo ken ni Jesucristo, ken mangtulong kadatayo nga agbalin a kas Kenkuana. No adalentayo ti ebanghelio, saan laeng nga agkalkalikagumtayo a maaddaan iti baro a pakaammo; ngem ketdi, agkalkalikagumtayo nga agbalin a “baro a parsua” (2 Taga Corinto 5:17).
Tarabayennatayo ti Espiritu Santo iti kinapudno ken paneknekanna kadatayo ti kinapudno (kitaen iti Juan 16:13). Lawlawaganna dagiti panunottayo, pasantakenna ti pannakaawattayo, ken sagidenna ti puspusotayo babaen iti paltiing manipud iti Dios, ti pagtaudan ti amin a kinapudno. Patarnawen ti Espiritu Santo dagiti puspusotayo. Paregtaennatayo iti tarigagay nga agbiag a mayannurot iti kinapudno ken yarasaasna kadatayo dagiti wagas a mangaramid iti daytoy. “Isuronto kadatayo ti Espiritu Santo … ti amin a banag” (Juan 14:26).
No maipapan kadagiti balikas nga impalgakna ken ni Propeta Joseph Smith, kinuna ti Mangisalakantayo:
“Saan a balikas dagitoy ti tattao wenno ti tao, ngem balikasko; …
“Gapu ta timekko ti mangisao kadagitoy kadakayo; ta naitedda kadakayo babaen ti Espirituk … ;
“Gapuna, mabalinyo a paneknekan a nangngegyo ti timekko, ken ammoyo dagiti balikasko” (Doktrina ken Katulagan 18:34–36).
Rumbeng nga agkalikagumtayo a manggun-od iti panangkadkadua ti Espiritu Santo. Rumbeng a daytoy a panggep a tun-oyen ti mangituray kadagiti desisiontayo ken mangtarabay kadagiti kapanunotan ken tignaytayo. Nasken a kalikagumatayo a maaddaan iti amin a banag a mangawis iti impluensia ti Espiritu ket supringentayo ti ania man a banag a sumiasi iti daytoy nga impluensia.
Paneknekak a ni Jesucristo ti ay-ayaten nga Anak ti Nailangitan nga Ama. Ay-ayatek ti Mangisalakan. Agyamaak kadagiti nasantuan a kasuratanna ken kadagiti sibibiag a propetana. Propetana ni Presidente Nelson. Iti nagan ni Jesucristo, amen.