Ti Pannakaiparbeng Ket Saan A Ti Kinaawan Pakababalawan

Ni Bradley R. Wilcox

Maikadua a Mammagbaga iti Sapasap a Panguluen ti Young Men

No mariknam a namin-adukan a napaay a mangpadpadas, laglagipem ti Pannubbot ni Cristo ken ti parabur a mamagbalin a posible ket pudpudno.

Naminsan nga inusarko ti voice-to-text feature iti phone-ko a nag-messagre iti anakko a babai ken manugangko. Kinunak, “Hey, dakayo a dua. Ay-ayatenkayo.” Ti naawatda, “Kagurakayo a dua. Rumbeng nga ayatenkayo.” Saan kadi a nakakasdaaw ti kinapardas ti saan a pannakaawat ti maysa a positibo ken nagsayaat ti panggepna a mensahe? No dadduma kastoy ti mapaspasamak kadagiti mensahe ti Dios iti panagbabawi ken pannakaiparbeng.

Biddut ti panangawat ti mensahe dagiti dadduma a saanaen a kasapulan ti panagbabawi ken panagbalbaliw. Iti mensahe ti Dios dagitoy ket nasken.¹ Ngem saan kadi nga ay-ayatennatayo ti Dios iti laksid dagiti pagkurkurangantayo? Siempre! Ay-ayatennatayo unay. Ay-ayatek dagiti appokok, dagiti kinaimperpektoda ken amin, ngem saanna kayat a sawen a diak kayat a rumang-ay wenno agbalinda iti rumbeng a pagbalinanda. Ay-ayatennatayo ti Dios no aniatayo man, ngem ay-ayatennatayo unay tapno imbatinatayo iti kastoy a wagas.² Iti idadakkeltayo iti Apo ket isu amin ti kaipapanan ti mortalidad.³ Ti panagbalbaliw ket isu amin ti kaipapanan ti Pannubbot ni Cristo. Saannatayo laeng a mapagungar, madalusan, maliwliwa, ken maagasan ni Cristo, ngem iti laksid amin dagitoy, kabaelannatayo a balbaliwan nga ad-adda nga agbalin a kas Kenkuana.⁴

Biddut ti panangawat dagiti dadduma iti mensahe a ti panagbabawi ket maminsan laeng a pasamak. Ti mensahe ti Dios, kas insuro ni President Russell M. Nelson, “Ti panagbabawi … ket maysa a proseso.⁵ Ti panagbabawi ken maulit-ulit a panagregget ket kasapulan ti panawen,⁶ isu a ti panangtallikod ti basol⁷ ken “awanen ti tarigagay nga agaramid iti kinadakes, ngem agtultuloy a panagaramid iti kinaimbag”⁸ ket awan patinggana.⁹

Ti biag ket kasla maysa a panagbiahe iti away. Saantayo a makadanun iti papanantayo iti maysa laeng a tangke ti gasolina. Masapul a kargaantayo a kanayon ti tangke. Ti pannakiranud iti sakramento ket kasla iti ipapantayo iti gasolinaan. Bayat iti panagbabawi ken panangipabarotayo kadagiti katulagan, ikaritayo iti intay panagtungpal kadagiti bilin, ket ti Dios ken ni Cristo bendisionandatayo babaen iti Nasantuan nga Espiritu.¹⁰ Iti ababa a pannao, ikaritayo ti sipipinget a panagtultuloy iti intay panagdaliasat, ket inkari ti Dios ken ni Cristo a kargaanda ti tangke.

Adu dagiti agbiddut a makaawat ti mensahe a saanda a maiparbeng a makiraman iti ebanghelio gapu ta addaanda kadagiti madi a kababalin. Iti mensahe ti Dios ket ti pannakaiparbeng ket saan a ti kinaawan ti pakababalawan.¹¹ Ti pannakaiparbeng ket ti panagbalin a napudno ken panangpadas. Masapul a napudnotayo iti Dios, kadagiti priesthood leader, ken kadagiti sabali pay a mangay-ayat kadatayo,¹² ken aramidentayo ti amin a kabaelantayo nga agtungpal kadagiti bilin ti Dios ken pulos a ditay sumuko gapu laeng ta agbidduttayo.¹³ Kinuna ni Elder Bruce C. Hafen a ti panangpatanor ti Nakristianuan a galad “ad-adda a kasapulan iti kinaanus ken kinapinget ngem iti kinaawan pakababalawan.”¹⁴ Kinuna ti Apo a dagiti sagut ti Espiritu ket “naitedda a para iti pagimbagan dagiti mangayat kaniak ken mangtungpal kadagiti amin a bilinko, ken isu a mangsapul a mangaramid.”¹⁵

Insurat ti maysa nga agtutubo a lalaki nga awagak ti Damon, “Iti panagdakkelko limmabanak iti pornograpia. Kanayon a mababainak la unay ta saanko a maaramid a rumbeng dagiti bambanag.” Tunggal agbiddut ni Damon, nakaro ti saem ti panagbabawi ket husgaanna ti bagina a saan isuna a maikari iti aniaman a klase ti kaasi, pammakawan, wenno gundaway manipud iti Dios. Kinunana, “Nagkeddengak a kaikariak ti agbalin a dakes iti amin a tiempo. Napanunotko a mabalin a kagurguranak ti Dios gapu ta saanko nga ikarkarigatan a lablabanan daytoy. Malabanak iti makalawas ken no dadduma ket makabulan, ngem maulit kunto manen ket mapanunotko, ‘Saanko met la a kabaelan daytoy, isu nga apay a padasek pay laeng?’”

Iti naminsan a pannakaupay ni Damon, kinunana iti priesthood leaderna, “Siguro agsardengak latta nga umay iti simbaanen. Nabannogakon iti panagbalinko nga ipokrito.”

Insungbat ti liderna: “Saanka nga ipokrito gapu ta adda kayatmo nga isardeng a madi nga aramid. Ipokritoka no ilemmengmo daytoy, no iyulbodmo daytoy, wenno allukoyem ti bagim a ti Simbaan ti adda problemana gapu ta nangato unay dagiti pagrukodanna. No napudnoka kadagiti aramidmo ken agar-aramidka iti addang a makapagdur-as, saan a panagbalin nga ipokrito daytoy. Daytoy ket panagbalin a disipulo.”¹⁶ Inadaw daytoy a lider ti insuro ni Elder Richard G. Scott: “Naidumduma ti panangkita ti Apo kadagiti pagkapsutan a maidasig iti panagrebelde. … No agsao ti Apo kadagiti pagkapsutan, kanayon nga addaan iti kaasi.”¹⁷

Nangted ti namnama ken ni Damon dayta a pannirigan. Naamirisna a ti Dios ket awan sadiay ngato nga agkunkuna nga “Inaramid manen ni Damon.” No di ket, mabalin a kunkunana a, “Kitaenyo no kasano ti kaadayon ni Damon.” Nagsardengen daytoy nga agtutubo a lalaki a sidudumog iti bain wenno agbirok kadagiti pambar ken panangikalintegan. Nangsapul iti nadiosan a tulong ket nasarakanna daytoy.¹⁸

Kinuna ni Damon, “Ti laeng gundaway a napanak iti Dios iti naglabas ket idi dumawatak ti pammakawan, ngem ita dumawatak payen iti parabur—‘ti mangpabael a bilegna’ [Bible Dictionary, “Grace”]. Diak kaano man inaramid dayta idi. Kadagitoyen nga aldaw saanko unay ik-ikkan ti panawen a guraen ti bagbagik gapu iti naaramidko ket inyad-aduk ti orasko a mangayat ken ni Jesus gapu iti inaramidna.”

Ti panangibilang no kasano ti kabayag a limmaban ni Damon, saan a nakatulong ken saan a pudno para iti nagannnak ken lider a tumultulong a mangibaga a dagus kenkuana iti “pulos a saanen” wenno mangikeddeng iti pagalagadan ti panangliklik tapno maibilang a “maiparbeng.” Imbes ketdi, nangirugida kadagiti babassit a kabaelan a ragpaten a panggep. Insardengda dagiti nainget a panangnamnama ket impamaysada ti in-inut a panagdur-as, a nangpalubos ken ni Damon a mangbangon kadagiti agsasaruno a balligi imbes a pannakapaay.¹⁹ Isuna, kas kadagiti nabalud a tattao ni Limhi, nasursurona a mabalin nga “in-inut a rimmang-ay.”²⁰

Imbalakad ni Elder D. Todd Christofferson: “No maipasango iti maysa a dakkel unay a banag, ikagumaantayo nga aramiden daytoy nga in-inut iti inaldaw. … Ti panangiraman kadagiti baro ken naimbag nga ugali iti kababalintayo wenno pananglaban iti madi nga ugali wenno nakairuaman ti masansan a kaipapananna ket ti naaramidmo ita, inton bigat ken sumarunonto manen, nalabit iti adu pay nga aldaw, bulan wenno tawen. … Ngem kabaelantayo nga aramiden gapu ta mabalintayo ti dumawati iti Dios … para iti tulong a kasapulantayo iti inaldaw.”²¹

Ita, kakabsatko, saan a nagbalin a nalaka ti pandemia a COVID-19 para iti asinnoman, ngem ti pannakailasin a gubbuay ti quarantine restriction ti nangparigat iti biag dagiti lumablaban nga addaan iti dakes a bisio. Laglagipen a posible ti panagbalbaliw, ti panagbabawi ket maysa a proseso, ken ti pannakaiparbeng ket saan a ti kaawan pakababalawan. Kangrunaan iti amin, laglagipen a kayatnatayo a tulungan ti Dios ken ni Cristo itan a mismo.²²

Biddut ti panangawat dagiti dadduma iti mensahe nga agur-uray ti Dios a tumulong agingga a malpas ti panagbabawitayo. Ti mensahe ti Dios ket tulongannatayo kabayatan iti panagbabawitayo. Magun-odantayo ti paraburna “sadinoman ti ayantayo iti dana ti panagtungpal.”²³ Kinuna ni Elder Dieter F. Uchtdorf : “Saan a masapul ti Dios dagiti tao nga awan pakababalawanda. Birbirukenna dagiti mangidaton kadagiti ‘pusoda ken iti maysa a nakem a natulnog’ [Doktrina ken Katulagan 64:34], ket aramidenna ida a naan-anay ken ni Cristo’ [Moroni 10:32–33].”²⁴

Nagadun dagiti nasaktan gapu iti nasinasina ken nariribuk a panaglalangen ket narigat para kadakuadan ti mamati iti kaasi ken kinaanus ti Dios. Marigatanda a mangkita iti kinasiasinno ti Dios—maysa a managayat nga Ama a mangipapaay kadagiti pagkasapulantayo²⁵ ken ammona ti “mangted kadagiti naimbag a banag kadagiti dumawat kenkuana.”²⁶ Ti paraburna ket saan laeng a premio para kadagiti maiparbeng. Daytoy ti “nadiosan a tulong” nga itedna a makatulong nga agbalintayo a maiparbeng. Saan laeng a gunggona daytoy para kadagiti nalinteg. Daytoy ti “parabur ti pigsa” nga itedna a makatulong tapno agbalintayo a nalinteg.²⁷ Saantayo laeng a magmagna nga agturong iti Dios ken ni Cristo. Magmagnatayo a kaduatayo Ida.²⁸

Iti intero a Simbaan, iyebkas dagiti agtutubo dagiti Tema ti Young Women ken Tema ti Korum ti Aaronic Priesthood. Manipud New Zealand agingga iti Spain againgga iti Ethiopia agingga iti Japan, kuna dagiti agtutubo a babbai, “Ipatpategko ti sagut ti panagbabawi.” Manipud Chile agingga iti Guatemala agingga iti Moroni, Utah, kuna dagiti agtutubo a lallaki, “No ikarigatak ti agserbi, aramatek ti pammati, agbabawi, ken dumur-as iti inaldaw, maikariak nga umawat kadagiti bendision ti templo ken ti napaut a rag-o ti ebanghelio.”

Ikarik a dagidiay a bendision ken rag-o ket pudpudno ken magun-od dagiti agtungtungpal kadagiti amin a bilin ken “isu a mangsapul a mangaramid.”²⁹ No mariknam a namin-adukan a napaay a mangpadpadas, laglagipem ti Pannubbot ni Cristo ken ti parabur a mamagbalin a posible ket pudpudno.³⁰ “Nakatanggaya kadakayo dagiti manangngaasi nga imana.”³¹ Ay-ayatennakayo—ita, iti 20 a tawen, ken iti agnanayon. Iti nagan ni Jesucristo, amen.

Dagiti Nagadawan

1. Kitaen iti Juan 3:3-6; Mosiah 27:25

2. Kitaen iti Neal A. Maxwell, “I Will Arise and Go to My Father,” Ensign, Set. 1993, 65–68.

3. Kitaen iti Helaman 3:21.

4. Kitaen iti 2 Taga Corinto 5:17; Mosiah 3:19

5. Russell M. Nelson, “We Can Do Better and Be Better,” Liahona, Mayo 2019, 67.

6. Kitaen iti Mosiah 26:30; Moroni 6:8; Doktrina ken Katulagan 1:31–32.

7. Kitaen iti Doktrina ken Katulagan 58:43

8. Mosiah 5:2

9. Kitaen iti Jacob 6:11; Alma 15:17.

10. Kitaen iti 2 Nephi 31:20; Mosiah 18:10; Doktrina ken Katulagan 20:77.

11. Kitaen ti Lukas 15:11–32; Romano 3:23–25. Kinuna ni Elder Gerrit W. Gong, “Ti panagbalin a maiparbeng saanna a kayat a sawen a ti panagbalin a naan-anay” (“Always Remember Him,” Liahona, Mayo 2016, 109). Iti panagsaona kadagiti agad-adal iti Brigham Young University, inlawlawag ni President Cecil O. Samuelson: “Ti maysa ket mabalin a naisangsangayan a maiparbeng iti ebanghelio uray pay no lablabananna pay laeng dagiti bukodna a pagkurangan. … Ti pannakaiparbeng ket nasken, ngem saanda nga agpada iti kinaan-anay” (“Be Ye Therefore Perfect” [Brigham Young University devotional, Set. 6, 2011], 1, 5, speeches.byu.edu). Kinuna ni Elder Marvin J. Ashton: “Ti pannakaiparbeng ket maysa a proseso, ken ti kinaan-anay ket maysa nga agnanayon a panagdaliasat. Mabalin a maikaritayo nga agragsak kadagiti sumagmamano a pribilehio nga uray pay saantayo a naan-anay” (“On Being Worthy,” Ensign, Mayo 1989, 20).

12. Inawagan ni Elder Neil L. Andersen iti “nasin-aw a kinapudno” ken insurona, “Ti kinapudno ket isu ti puso ti espiritualidad ket isu ti rumbeng nga adda iti napudno ken napaut a panagbabawi” (The Divine Gift of Forgiveness [2019], 193, 48).

13. Insurat ni Elder Neil L. Andersen, “Mabalin nga adda dagiti gundaway a mapasanudtayo, ngem dagdagus ken sipapakumbabatayo kuma nga agsubli nga agparintumeng ken agturong iti umno a direksion” (The Divine Gift of Forgiveness, 208).

14. Bruce C. Hafen, The Broken Heart (1989), 186.

15. Doktrina ken Katulagan 46:9; nainayon ti panangyunay-unay.

16. Kitaen iti Doktrina ken Katulagan 10:67.

17. Ni Richard G. Scott, “Personal Strength through the Atonement of Jesus Christ,” Liahona, Nob. 2013, 83.

18. Kitaen iti Doktrina ken Katulagan 6:35–37.

19. Kinuna ni President Russell M. Nelson: “Saan a namnamaen ti Apo ti kinaperpektotayo itoy a panawen iti agnanayon a panagdur-astayo. Ngem namnamaenna nga agbalintayo a suminsin-aw” (“We Can Do Better and Be Better,” 68; nainayon ti panangyunay-unay).

20. Mosiah 21:16.

21. Ni D. Todd Christofferson, “Recognizing God’s Hand in Our Daily Blessings,” Liahona, Ene. 2012, 28–29; kitaen pay iti D. Todd Christofferson, “The Divine Gift of Repentance,” Liahona, Nob. 2011, 38–41.

22. Kitaen iti Joshua 1:5, 9; Isaias 41:10; Mateo 11:28–30; 2 Nephi 28:32; Doktrina ken Katulagan 24:8

23. Ni D. Todd Christofferson, “Free Forever, to Act for Themselves,” Liahona, Nob. 2014, 19.

24. Ni Dieter F. Uchtdorf, “Five Messages That All of God’s Children Need to Hear” (Brigham Young University devotional, Ago. 17, 2021), 3, speeches.byu.edu.

25. Kitaen iti Ether 1:42–43.

26. 3 Nephi 14:11

27. Ni Dieter F. Uchtdorf, “The Gift of Grace,” Liahona, May 2015, 107; kitaen met iti 2 Nephi 2:3; Jacob 4:7. Kinuna ni President Russell M. Nelson, “Saan a kasapulan ti Apo iti naan-anay a pammati tapno magun-odtayo ti naan-anay a pannakabalinna” (“Christ Is Risen; Faith in Him Will Move Mountains,” Liahona, Mayo 2021, 102).

28. Kitaen iti Deuteronomio 2:7; Mateo 1:23; Doktrina ken Katulagan 100:12. Insurat ni Elder Robert E. Wells: “Ti Nailangitan nga Amatayo ket saan a managlangan a Dios, kasta met a ni Jesus saan a natay. Maiyaplikarda ita a nangnangruna ngem idi” (The Mount and the Master [1991], 26).

29. Doktrina ken Katulagan 46:9.

30. Kitaen ti Sheri Dew, Amazed by Grace (2015), 4.

31. 3 Nephi 9:14.