Tapno Agbalin a Pasurot ni Cristo
Tapno agbalin a pasurot ni Cristo, ikagumaan nga itunos dagiti tignay, ugali, ken biagtayo iti Mangisalakan.
Iti bukodko a panagadal iti nasantuan a kasuratan, naawis ti riknak iti kumbersion ni Saul ti Tarsus, nga idi agangay nagbalin a naam-ammo a kas Pablo, kas nailadawan iti Biblia.
Ni Pablo ti tao a naregget a nakiraman iti pannakaidadanes ti Simbaan ken dagiti Kristiano. Ngem gapu iti bileg ti langit ken ti Pannubbot ni Jesucristo, naan-anay a nagbalbaliw, ket nagbalin a maysa kadagiti naindaklan a katulongan ti Dios. Modelona iti biag ti Mangisalakan a ni Jesucristo.
Iti maysa a pannursuro ni Pablo kadagiti taga Corinto, inawisna ida nga agbalin a pasurotna ta isu mismo ket pasurot ni Cristo (kitaen iti 1 Taga Corinto 11:1). Daytoy ti pudno ken husto nga awis iti panawen ni Pablo agingga ita: agbalin a pasurot ni Cristo.
Inrugik nga inutob no ania ti kaipapanan iti agbalin a pasurot ni Cristo. Ken napatpateg pay, inrugik a sinaludsod, “iti ania a wagas a masapul a tuladek Isuna?”
Tapno agbalin a pasurot ni Cristo, ikagumaan nga itunos dagiti tignay, ugali, ken biagtayo iti Mangisalakan. Maaddaan iti nasayaat a kababalin. Agbalin a pudno a disipulo ni Jesucristo.
Inadalko ti dadduma nga aspekto ti biag ti Mangisalakan, ken innalak, kas paset ti mensahek ita, ti uppat a kababalinna nga ikagumaak a tuladen nga isu ti ibinglayko kadakayo.
Ti umuna a kababalin ni Jesucristo ket ti kinapakumbaba. Napakumbaba unay ni Jesucristo idiay biag sakbay ti yaay iti daga (premortal life). Iti Konseho iti Langit, binigbig ken binay-anna nga agballigi ti pagayatan ti Dios iti plano ti pannakaisalakan ti tao. Kinunana, “Ama, maaramid ti pagayatam, ket kukuam ti gloria iti agnanayon” (Moises 4:2).
Ammotayo nga insuro ni Jesucristo ti kinapakumbaba ken nagpakumbaba Isuna a nangdayaw iti Amana.
Agbiagtayo koma a napakumbaba gapu ta mangyeg daytoy iti talna (kitaen iti Doktrina ken Katulagan 19:23). Umun-una ti kinapakumbaba ngem gloria, ken mangyeg iti parabur ti Dios kadatayo: “Agkaweskayo amin iti kinaemma nga agtitinnulongkayo: ta ti Dios tallikudanna dagiti natangsit, ngem ikkanna ti parabur dagiti napakumbaba” (1 Pedro 5:5). Mangyeg ti kinapakumbaba iti nalanay a sungbat. Daytoy ti pagtaudan iti nalinteg a kinatao.
Insuro ni Elder Dale G. Renlund:
“Dagiti tao a magna a napakumbaba iti Dios malagipda ti inaramid ti Ama ken Jesucristo para kadakuada.
“Agtignaytayo a sidadayaw iti Dios babaen ti pannakipagna a sipapakumbaba Kenkuana” (“Do Justly, Love Mercy, and Walk Humbly with God,” Liahona, Nob. 2020, 111, 109).
Ti maikadua a kababalin ti Mangisalakan ket ti kinatured. No panunotek ni Jesucristo idi agtawen iti 12, nagtugaw iti templo ti Dios a kaduana dagiti doktor ti paglintegan ken sinursuruanna ida iti nadiosan a banag, makitak nga iti kinaubingna addaanen iti tured, iti naidumduma a tured. Nupay pagarupen ti kaaduan a makitada koma ti barito a sursuruan dagiti doktor ti linteg, isursurona ida ket “dumdumngegda kenkuana, ken pagsalsaludsodanda” (Patarus ni Joseph Smith, Lucas 2:46 [iti Lucas 2:46, footnote c]).
Nagserbikami iti full-time mission iti Democratic Republic of the Congo Mbuji-Mayi Mission manipud 2016 agingga iti 2019. Kalsada ti dalan nga agbiahe iti mision manipud iti maysa a zone a mapan iti sabali. Rimsua ti maysa a pasamak iti dayta a lugar nga adda dagiti tulisan iti kalsada a nagarmas iti natadem nga igam tapno pangdarup kadagiti agbambaniaga.
Lima a misionario nga agbibiahe a mapan iti sabali a zone kas paset iti pannakayakarda ti nagbalin kadagiti biktima iti daytoy a pannakaburibor. Gapu ta biktimakami mismo itoy a pasamak no dadduma idi, nangrugikami a nagbuteng para iti biag ken talgedmi amin, nagkedkedkami pay nga agbiahe kadagitoy a kalsada nga agbisita kadagiti misionario ken mangangay iti zone conference. Dimi ammo no kasano ti kapaut ti kaadda daytoy. Nangaramidak iti report nga impatulodko iti Area Presidency, ket impeksak ti butengko iti panagtultuloyko nga agbiahe iti kalsada a kakaisuna a dalan a mangdanon kadagiti misionariomi.
Iti sungbatna kaniak, imbaga ni Elder Kevin Hamilton, a presidentemi iti Africa Southeast Area: “Ibalakadko nga aramidenyo amin a kabaelanyo. Agalibtakkayo ken agkararagkayo. Diyo isagmak ti bagiyo wenno dagiti misionarioyo iti pakadangranyo, ngem ketdi agtultuloykayo iti pammati. ‘Ta saannatay nga inikkan ti Dios ti espiritu ti kinatakrot; no di ti kinatibker, ken ti ayat, ken ti naimbag a nakem’ (2 Timoteo 1:7).”
Daytoy a balakad ti nangpapigsa unay kadakami ken namagtultuloy iti panagbiahe ken panagserbimi a situtured agingga iti gibus ti misionmi, gapu ta dimngegkami iti direksion ti Amami iti Langit babaen iti dayta a nasantuan a kasuratan.
Iti agdama a nasantuan a kasuratan, mabasatayo dagiti naparegta a sao ni Propeta Joseph Smith a mangut-utob iti pammaregta ti Apo kadatayo: “Kakabsat, ditayto kadi agtuloy iti dakkel a panggep? Agtuloykayo a saan nga agsanud. Pigsa ti pakinakem, kakabsat; ket ala, ala gaw-aten ti balligi!” (Doktrina ken Katulagan 128:22).
Maaddaantayo koma iti tured nga agaramid iti umno, uray no di nalatak daytoy—ti tured a mangsaluad iti pammatitayo ken agtignay iti pammati. Maaddaantayo koma iti tured nga agbabawi iti inaldaw, ti tured nga umawat iti pagayatan ti Dios ken agtungpal kadagiti bilinna. Maaddaantayo koma iti tured nga agbiag a nalinteg ken aramiden ti manamnama kadatayo kadagiti agduduma a pagrebbengan ken saadtayo.
Ti maikatlo a kababalin ti Mangisalakan ket ti mamagpakawan. Bayat ti mortal a panagministrona, nilapdan ti Mangisalakan a batuenda ti babai a natakuatan iti pannakiabigna. Imbilinna kenkuana nga “inkan, ket dika agbasolen” (Juan 8:11). Daytoy ti namagtignay kenkuana nga agbabawi ken mapakawan, kas iti naisurat iti nasantuan a kasuratan, “nagdaydayaw ti babai iti Dios manipud iti dayta nga oras, ken namati iti naganna” (Patarus ni Joseph Smith, Juan 8:11 [iti Juan 8:11, footnote c]).
Bayat ti Christmas devotional idi Disiembre 2018, nagsarita ni Presidente Russell M. Nelson maipapan iti uppat a sagut nga inawattayo iti Mangisalakan. Kinunana a maysa a sagut nga idiaya ti Mangisalakan ket ti kabaelan a mamakawan:
“Babaen ti awan patinggana a Pannubbotna, mapakawanyo dagiti nangdangran kadakayo ken dagiti di pulos mangawat iti pagrebbengan iti kinaulpitda kadakayo.
“Gagangay a nalaka ti mamakawan iti maysa a sipupudno ken sipapakumbaba nga agdawat iti pammakawanyo. Ngem ikkannakayto ti Apo iti kabaelan a mamakawan iti asino man a nang maltrato kadakayo iti ania man a wagas” (“Four Gifts That Jesus Christ Offers to You” [First Presidency Christmas devotional, Dec. 2, 2018], broadcasts.ChurchofJesusChrist.org).
Sipupudnotayo koma nga agpipinnakawan tapno magun-od ti pammakawan ti Ama. Ti pammakawan ti mangwayawaya ken mangpaikari kadatayo a makiranud iti sakramento iti tunggal Domingo. Kalikagumantayo ti mamakawan tapno agbalintayo a pudno a disipulo ni Jesucristo.
Ti maikapat a kababalin ti Mangisalakan ket ti kinamanagsakripisio. Daytoy ti paset ti ebanghelio ni Jesucristo. Inted ti Mangisalakan ti kadaklan a sakripisio ti biagna kadatayo tapno masubbottayo. Iti pannakariknana iti saem ti sakripisio, indawatna iti Amana nga iyadayona ti kopa, ngem inleppasna ti agnanayon a sakripisio. Daytoy ti Pannubbot ni Jesucristo.
Insuro ni Presidente M. Russell Ballard daytoy: Ti sakripisio [ti] pangipakitaan iti natarnaw nga ayat. Ti tukad ti ayattayo iti Apo, iti ebanghelio, ken iti padatayo a tao ket mabalin a rukoden no ania dagiti sidadaan nga isakripisiotayo para kadakuada” (“The Blessings of Sacrifice,” Ensign, Mayo 1992, 76).
Maisakripisiotayo ti orastayo nga agministering, agserbi iti dadduma, agaramid iti naimbag, agaramid iti family history work, ken ag-magnify iti callingtayo iti Simbaan.
Makaitedtayo iti kuartatayo babaen iti panagbayad iti apagkapullo, daton iti panagayuno, ken dadduma pay a donasion a pangbangon iti pagarian ti Dios iti daga. Kasapulantayo ti sakripisio nga agtungpal kadagiti katulagan nga inaramidtayo iti Mangisalakan.
Ikararagko a babaen iti panangsurot ken ni Jesucristo ken panangusar iti bendison ti Pannubbotna, agbalintayo nga ad-adda pay a napakumbaba, agbalintayo nga ad-add a naturtured, ad-adda a mamakawantayo, ken ad-adu ti maisakripisiotayo para iti pagarianna.
Paneknekak a sibibiag ti Nailangitan nga Amatayo ken am-ammona iti tunggal maysa kadatayo, a ni Jesus isut’ Kristo, a ni President Russell M. Nelson ti propeta ti Dios iti agdama. Paneknekak a Ti Simbaan ni Jesucristo dagiti Santo iti Ud-udina nga Aldaw ti pagarian ti Dios iti daga ken pudno ti Libro ni Mormon. Iti sagrado a nagan ni Jesucristo, ti Manubbottayo, amen.