Dagiti Banag ti Kararuak
Ania dagiti banag nga utobenyo? “Ania dagiti banag a talaga a napateg kadakayo? “Ania dagiti banag ti kararuam?
Kakabsatko, bayat ti panagtakderko manen ditoy ipatpategtayo a Conference Center naipalagip kaniak dagiti balikas ni Apotol Pedro: “Apo, nagsayaaten ti kaaddatayo ditoy.”1
Naipamaysa dagiti panunotko ita nga aldaw kadagiti balikas ni propeta Nephi, a nangitalimeng iti kasuratan dagiti taona iti kalpasan ti ipapatay ni Ama Lehi. Insurat ni Nephi, “Ket kadagitoy isuratko dagiti banag ti kararuak.”2
No mabasak daytoy a bersikulo, a pampanunotek a ti balikas a banag ket saan unay nga elegante wenno naespirituan, saan unay a nadayag a maiparis iti “kararuak.” Ngem naammuak a ti balikas a banag ket nausar kadagiti nasantuan a kasuratak iti 2,354 a daras.3 Kas pagarigan, iti Moises: “Siak ti Pangrugian ken Panungpalan, ti Mannakabalin a Dios; babaen ti Bugbugtongko pinarsuak dagitoy a banag.”4 Ket iti balikas ni Nephi: “Adtoy, naragsak ti kararuak kadagiti banag ti Apo; ket agnanayon nga ut-utoben ti pusok dagiti banag a nakitak ken nangngegko.”5
Mapataud dagiti saludsod kadagiti balikas ni Nephi “Ania dagiti banag nga utobenyo?” “Ania dagiti banag a talaga a napateg kadakayo?” “Ania dagiti banag ti kararuayo?”
Dagiti banag ti kararuatayo ket masansan a malawlawagan ken mapauneg babaen ti panagdamag kadagiti saludsod.
Bayat ti pandemia naam-ammok dagiti agtutubo iti nadumaduma a paset ti intero a lubong iti adu a debosional, dadakkel ken babassit, babaen dagiti broadcast ken social media, ket napagsasaritaanmi dagtiti saludsodda.
Ti agtawen katorse a ni Joseph Smith addaan iti maysa saludsod iti kaunggan ti kararuana, nga indatagna iti Apo. Inyunay-unay ni Presidente Russell M. Nelson : “Idatagyo dagiti saludsodyo iti Apo ken iti dadduma pay a mapagtalkan a pagtaudan. Adalenyo nga addaan iti tarigagay a mamati imbes a maaddaan iti namnama a makakitakayo iti pagkurangan iti biag ti propeta wenno maysa a pagdumaan iti nasantuan a kasuratan. Isardeng ti panangpadakkel kadagiti panagduaduayo babaen iti panangisaritayo kadagitoy kadagiti … managduadua. Paiturongkayo ti Apo nga agdaliasat iti naespirituan a panagtakuat.”6
Masansan agsaludsod dagiti agtutubo no ania ti patiek ken apay a mamatiak.
Malagipko ti virtual a panagbisita iti pagtaengan ti maysa a balasang. Dinamagko no damo a nagbisita ti maysa nga Apostol iti balayda. Dagus nga ken insungbatna, “Wen.” Napintas ti saludsodna kaniak: “Ania dagiti kapatgan a banag a nasken a maammuak?”
Sinungbatak iti dagiti banag ti kararuar dagiti banag a mangisagana kaniak a dumngeg kadagiti parikna, a mangparegta iti panagkitak iti labes dagiti wagas ti lubong, a mangted iti panggep ti aramidko iti ebanghelio ken iti mismo a biagko.
Iburayko man kadakayo ti sumagmamano a banag ti kararuak? Maiyaplikar dagitoy a banag iti amin nga agtarigagay nga agbalin a napudno a disipulo ni Jesucristo. Sangapulo ti nasayaat a kumpleto a numero. Ita mangtedak iti pito ket mangnamnamaak a dakayo ti mangkumpleto ti walo, siam, ken sangapulo manipud iti bukodyo a padas.
Ti umuna, ayatenyo ti Dios nga Ama ken ni Jesucristo, ti Mangisalakantayo.
Impaulog ni Jesus ti umuna a naindaklan a bilin: “Ayatem ti Apo a Diosmo iti amin a pusom, ken iti amin a kararuam, ken iti amin a panunotmo.”7
Impakdaar ni Presidente Nelson ti kinapasnekna iti Dios, nga Agnanayon nga Amatayo ken iti Anakna, ni Jesucristo, idi naawagan a mangidaulo ti Simbaan ti Apo, a kinunana, “Am-ammok Ida, ay-ayatek Ida, ken ikarik a pagserbian Ida—ken dakayo—iti tunggal nabati pay nga anges ti biagko.”8
Isu a ti umuna, ayatenyo ti Ama ken ti Anak.
Maikadua, “Ayatenyo ti padayo a tao.”9
Saan laeng daytoy a nasayaat a kapanunotan; daytoy ti maikadua a naindaklan a bilin. Dagiti kaarrubayo ket ti asawa ken pamiliayo, dagiti miembro ti ward, katrabaho, kakuarto, dagiti saantayo kapammatian, dagiti agkasapulan iti tulong, kinapudnona, ti tunggal maysa. Ti kaipapanan ti “ayatem ti padam a tao” ket nailadawan iti himno nga “Agiinnayatkayo.”10
Ipalagip ni Presidente Nelson kadatayo, “No ayatentayo ti Dios iti amin a pusotayo, iturongna ti puspusotayo iti pagsayaatan ti dadduma.”11
Maikatlo, ayatenyo ti bagiyo.
Ditoy ti adu a paNagkarigatan. Saan kadi a naidumduma a narigrigat ti panangayat iti bagitayo ngem iti panagayat kadagiti sabali? Ngem, kinunaa ti Apo, “Ayatem ti padam a tao a kas iti bagim.”12 Ipategna ti kinadiosan iti kaunggantayo isu a nasken a kastatayo met. No madagensenantayo kadagiti biddut, sakit ti nakem, kinakurang, luksaw, pungtot, wenno basol, ti bileg ti Pannubbot ti Apo , babaen iti nailangitan a panggep, ti maysa kadagiti banag a mangitag-ay iti kararua.
Maikapat, tungpalenyo dagiti bilin.
Inlawlawag a nasayaat ti Apo: “No ayatendak, tungpalenyo dagiti bilinko.”13 Igaedyo ti agbalin a nasaysayaat bassit iti inaldaw ken agtultuloykayo iti kinalinteg.
Maikalima, kanayon a maikarikayo a dumar-ay iti templo.
Awagak daytoy iti pannakairekomenda iti Apo. Uray man no makapanka iti templo wenno saan, ti panagbalin a maikari iti maysa nga agdama a temple recommend ti mamagtalinaed kenka a nakapokus iti bambanag a napateg, ti dana ti katulagan.
Maikanem, agrag-o ken agragsakkayo.
“Gapuna, agragsakkayo, ket saankayo nga agbuteng,”14 kinuna ti Apo. Apay? Kasano, no masansan a maipasangotayo kadagiti karit iti tunggal pagturongan? Gapu ti kari nga inaramid ni Jesucristo: “Ta siak nga Apo adda kadakayo, ket agtakderakto iti abayyo.”15
Inlawlawag ni Presidente Nelson ti naisubli nga ebanghelio kas “maysa a mensahe ti rag-o!”16 Ket inlawlawagna, “Bassit ti pakainaiganna ti rag-o a mariknatayo iti kasasaad ti biagtayo ken amin nga aramidentayo iti panangipokus iti biagtayo.”17
Maikapito, surotenyo ti sibibiag a propeta ti Dios.
Daytoy ti mabalin a maikapito iti listaak a banag, ngem daytoy ti kapatgan iti panunotko no maipanggep iti kinapategna ita nga aldaw.
Addaantayo iti maysa a propeta ditoy daga iti agdama! Diyo panunoten no ania ti kaipapanan dayta kadakayo. Lagipenyo ti balasitang a dinakamatko itay rugina. Kayatna a maammuan no ania dagiti banag a kapatgan. “Surotenyo ti sibibiag a propeta,” kinunak idin ket yunay-unayko manen ita nga aldaw.
Mabigbigtayo kas maysa a Simbaan nga idadauluan dagiti propeta, mammadto, ken mammaltiing nga inawagan ti Dios para iti daytoy a panawen. Ikarik a no denggen ken surotenyo ti balakadda, saankayonto pulos a mayaw-awan. Saan iti kaano man!
Agbibiagtayo iti panawen a “mayallo-allon kadagiti dalluyon,”18 no mabatbatikos ti kinaespirituan, kinatakneng, kinatarnaw, ken panagraem. Kasapulantayo ti agpili. Adda ti timek ti Apo kadatayo babaen ti propetana a mangpatalna ti butengtayo, mangitag-ay ti panagkitatayo, ta no agsao ni Presidente Nelson, agsao para iti Apo.
Naparaburantayo iti nasantuan a kasuratan ken pannursuro a mangipalagip kadatayo, “Ti panunotko saan a kas iti panunotyo, ket ti aramidko saan a kas kadagiti aramidyo, kinuna ti Apo.”19
Kas ken ni Naaman, maingel a lider ti militar ti Syria, ngem maysa nga agkukutel, a nabagaan a ni propeta Eliseo ti makaagas kenkuana. Imbaon ni Eliseo iti mensaherona a mangibaga ken ni Naaman a mapan agdigos iti Karayan Jordan iti maminpito tapno madalusan. Saan a naay-ayo ni Naaman. Awan duadua nga adda nadaydayag a karayan ngem ti Jordan, ken apay a mangibaon iti maysa nga adipen idinto ninamnamana ni Eliseo, ti propeta, a mismo a mangagas kenkuana? Pimmanaw ni Naaman ngem idi agangay naallukoy met laeng dagiti adipenna: “Di met aya aramidem ti aniaman nga ipaaramid kenka ti propeta uray narigat?”20 Napan ngarud nagdigos ni Naaman iti naminpito a daras ket naagasan.
Ipalagip ti pakasaritaan ni Naaman ti peggad iti panagpili ti paset ti balakad ti propeta a maibagay iti panpanunottayo, namnamaentayo, wenno kadawyan ti panawen. Agtultuloy ti propetatayo a mangiturong kadatayo iti bukodtayo a Karayan Jordan tapno maagasan.
Ti kapatgan a balikas a mabalintayo a denggen, utoben, ken suroten ket isu dagiti naipaltiing babaen iti sibibiag a propetatayo. Paneknekak a nakiinnumanak ken ni Presidente Nelson maipanggep iti nadadagsen a pakaseknan ti Simbaan ken ti lubong, ket nakitak nga agayus ti paltiing babaen kenkuana. Am-ammona ti Apo, ammona dagiti aramidna, ket kayatna nga amin nga annak ti Dios ket dumngegto Kenkuana, ti Apo a ni Jesucristo.
Iti uneg ti adu a tawtawen, nangngegantayo ti propeta iti mamindua iti tunggal tawen iti sapasap a komperensia. Ngem gapu kadagiti narikut nga isyu ti aldawtayo, masansan unay nga agsarsarita ni Presidente Nelson kadagiti forum,21 social media,22 debosional,23 ken uray pay iti press briefings.24 Napaliiwko a mangisagsagana ken mangidatdatag kadagiti nakaskasdaaw a naipalgak a mensahe a mangguyugoy iti ad-adu a panagyaman, mangitandudo iti dakdakkel a panangiraman iti amin a kakabsattayo iti lubong, ken mangparayray iti kappia, namnama, ragsak, salun-at, ken pannakaagas iti bukodtayo a biag.
Naparaburan nga agipakpakaammo ni Presidente Nelson, ngem napatpateg, isu ti maysa a propeta ti Dios. Nakakaskasdaaw no panunotem, ngem nasken nga utoben a ti nalawag a panangiturong ti mangsaluad kadatayo manipud iti pananglimlimo, pananggundaway, ken ti nainlubongan nga ar-aramid nga agtultuloy latta iti agdama.25
Ti kagay ti kinamammadto ket maipanggep iti paltiing. “Ti Pannakaisubli ti Pakabuklan ti Ebanghelio ni Jesucristo: Maysa a Waragawag iti Lubong para iti Maika-200 a Tawen,” a naipaay iti sapasap a komperensia ti Abril, ket nayunay-unay a ti Apo ti mangiturturong iti dayrtoy nga aramid. Iti daytoy a waragawag, imbaga ti Umuna a Panguluen ken Korum ti Sangapulo-ket-dua: “Siraragsak nga ipakdaarmi a dumurdur-asen ti naikari a Pannakaisubli babaen ti agtultuloy a paltiing. Ti daga saanton a kas iti sigud, agsipud ta ti Dios ‘pagkaykaysaennanto ti amin a bambanag ken ni Cristo’ (Taga Efeso 1:10).”26
“Dagiti amin a banag ken ni Cristo”27 ken “dagiti banag ti kararuak”28 ket no ania ti kaipapanan daytoy a SImbaan, daytoy nga ebanghelio ken dagitoy a tao.
Gibusak babaen iti maysa nga awis kadakayo a mangutob iti pito nga “banag ti kararuak” nga imbinglayko ita nga aldaw: ayatenyo ti Dios nga Ama ken ni Jesucristo, ti Mangisalakantayo; ayatenyo ti padayo a tao; ayatenyo ti bagiyo; tungpalenyo dagiti bilin; kanayon a maikarikayo iti maysa a temple recommend; agrag-o ken agragsakkayo; ken surotenyo ti sibibiag a propeta ti Dios. Awisenkayo a mangileppas iti bukodyo a walo, siam, ken sangapulo. Panunotenyo dagiti wagas a maibinglayyo a naimpusuan a “banag” iti dadduma ken allukoyenyo ida nga agkararag, agutob, ken agkiddaw iti pannarabay ti Apo.
Dagiti banag ti kararuak ket napateg kaniak kas met iti adda kadakayo. Dagitoy a banag ti mangpatibker iti serbisiotayo iti Simbaan ken ti amin a pakaseknan iti biagtayo. Ikumitdatayo ken ni Jesucristo, ipalagipda kadatayo dagiti katulagantayo, ken patalgedendatayo kadagiti ima ti Apo. Paneknekak a tarigagayanna a ti kararuatayo a “saanto a mabisinan wenno mawaw, ngem mabsogto”29 iti ayatna bayat ti intayo pananggun-od ti agbalin a pudno a disipulona, a makipagkaykaysa Kenkuana a kas Isuna iti Ama. Iti nagan ni Jesucristo, amen.