Ti Pammati nga Agdawat ken Kalpasanna Agtignay
Ti pammati ken ni Jesucristo isu ti tulbek iti panangawat kadagiti paltiing ti kinapudno.
Patpatgek a kakabsatko, agyamanak iti gundaway a makasaritakayo iti sesion iti rabii ti Sabado ti sapasap a komperensia. Iti panangyam-ammona iti komperensia itay bigat, kinuna ni President Russell M. Nelson a ti “natarnaw a paltiing kadagiti saludsod iti pusoyo ti mangaramid itoy a komperesia a kapatgan ken di malipatan. No diyo pay nagun-od ti ministering ti Espiritu Santo a mangtulong kadakayo a dumngeg iti kayat ti Apo a denggenyo itoy dua nga aldaw, awisenkayo nga aramidenyo itan.”1 Nagkiddawak iti dayta a bendision iti panagsaganak nga umawat iti paltiing para itoy a panagkakaduatayo. Sipapasnek nga ikararagko a maawatyo koma dayta a paltiing manipud iti Dios.
Di nagbalbaliw ti wagas nga umawat iti paltiing iti Dios manipud iti aldaw da Adan ken Eva. Daytoy pay laeng para iti amin a naawagan a katulongan ti Apo manipud idi punganay agingga ita. Daytoy pay laeng para kadatayo. Kanayon a maaramid babaen ti panangaramat iti pammati.2
Umdas ti pammati ti agtutubo a ni Joseph Smith a nagdamag iti Dios, namati a sungbatan ti Dios ti naimpusuan a kasapulanna. Ti sungbat a simmangbay ti namagbaliw iti lubong. Kayatna nga ammuen no ania a simbaan ti kappenganna tapno madalusan iti basol. Ti sungbat a naawatna nangparegta kenkuana nga agdamag iti napintas a salsaludsod ken agtignay iti agtultuloy a paltiing a karugrugi laeng.3
Ti padasmo mabalin a maipada iti daytoy a komperensia. Adda dagiti saludsodmo a maidawatam iti sungbat. Umdas ti pammatim a mangnamnama nga umawatkanto iti sungbat ti Apo babaen dagiti katulonganna.4 Awanto ti gundawaymo a dumawat iti napigsa iti sungbat dagiti agsarita, ngem makapagdawatka ken Amam iti kararag.
Ammok iti padas nga umay ti sungbat a mangpunno iti kasapulam ken ti naespirituan a panagsaganam. No kasapulam ti sungbat a napateg iti agnanayon a pagimbagam wenno iti dadduma, nalabit nga umay ti sungbat. Ngem, uray kalpasanna, maawatmo—kas iti inaramid ni Joseph Smith—ti sungbat nga aganus.5
No ti pammatim ken Jesucristo nangiturong iti puso a napalukneng babaen ti epekto ti pannubbotna, ad-adda a mariknamto dagiti arasaas ti Espiritu kas sungbat ti karkararagmo. Napadasak mismo a ti naalumamay, bassit a timek—a napaypayso—ket nalawag ken maawatan iti panunotko no mariknak ti naulimek ken panagtulnog iti pagayatan ti Apo. Mailadawan dayta a rikna ti kinapakumbaba kas, “Saan a ti pagayatak, no di ti pagayatam.”6
Daytoy a proseso ti paltiing ket no apay mangngegyo dagiti agsarita a mangisuro itoy a komperensia iti maaw-awagan iti doktrina ni Cristo.7 Umay kadatayo ti paltiing kas proporsion iti tukad a nagkiddawantayo nga umawat iti doktrina ni Cristo iti puspusotayo ken ipatungpal daytoy iti biagtayo.
Malagipyo iti Libro ni Mormon nga insuro ni Nephi kadatayo a ti pammati ken Jesucristo ti tulbek iti paltiing ti kinapudno ken kaadda ti panagtalek a sursurotentayo ti direksion ti Mangisalakan. Insurat ni Nephi dagiti sumaganad a balikas sinigsiglo sakbay a nayanak ni Jesucristo iti mortalidad:
“Agsao dagiti anghel babaen ti bileg ti Espiritu Santo; gapuna, isasaoda dagiti balikas ni Cristo. Gapuna, imbagak kadakayo, agpennekkayo kadagiti balikas ni Cristo; ta adtoy, ibaga kadakayo dagiti balikas ni Cristo amin a banag a rumbeng nga aramidenyo.
“Gapuna, ita kalpasan a naisaok dagitoy a balikas, a no saanyo a maawatan ida, gapu ta saankayo a nagsaludsod, wenno saankayo a nagtuktok; gapuna, saankayo a maipan iti lawag, ngem nasken a maungaw iti kasipngetan.
“Gapu ta adtoy, kunak manen kadakayo a no sumrekkayo iti dayta a dalan, ket awatenyo ti Espiritu Santo, ipakitananto kadakayo amin a banag a rumbeng nga aramidenyo.
“Adtoy, daytoy ti doktrina ni Cristo, ket awanton ti doktrina a maited kalpasan a maipakitana kadakayo ti bagina iti lasag. Ket inton maipakitana kadakayo ti bagina iti lasag, aramidenyonto dagiti banag nga ibagana kadakayo.”8
Isaonto ti Apo kadatayo dagiti banag babaen dagiti katulonganna ita ken kadagiti masungad nga aldaw. Ibagana dagiti banag a nasken nga aramidentayo.9 Dinto ipukkaw ti Mangisalakan dagiti bilin kadatayo. Kas iti insuro ni Elias:
“Ket kinunana, Rummuarka, ket agtakderka iti rabaw ti bantay iti sango ni Jehova. Ket adtoy, ni Jehova limmabas, ket maysa a dakkel ken napigsa nga angin binessaangna dagiti bantay, ket binurakna dagiti bato iti sango ni Jehova; ngem ni Jehova awan idi iti angin: ket kalpasan ti angin maysa a ginggined; ngem ni Jehova awan idi iti ginggined:
“Ket kalpasan ti ginggined maysa nga apuy; ngem ni Jehova awan idi iti apuy: ket kalpasan ti apuy maysa a bassit naalumamay a timek.”10
Ti pannakangngeg ti dayta a timek aggapu iti pammatitayo Kenkuana. Addaan umdas a pammati, agdawattayo iti direksion nga addaan panggep a mapan ket aramiden no ania ti idawatna.11 Mapadur-astayto ti pammati a mangammo nga ania man ti dawatenna mangparabur iti dadduma, ken mapatarnawtayo iti proseso gapu iti ayatna kadatayo.
Kas iturongnatayo ti pammatitayo ken Jesucristo a dumawat iti Ama iti sungbat, daytanto met a pammati ti mangyeg iti nalamuyot nga apros ti Apo tapno denggen ti direksionna ken determinado ken aggagar nga agtulnog. Ikantatayo ti balikas ti himno iti rag-o, nupay narigat ti aramid: “Nasam-it ti aramid, Diosko, ken Arik.”12
Ti ad-adda a kaadda ti doktrina ni Cristo iti biag ken pusotayo, ad-adda a mariknatayo ti ayat ken simpatia kadagiti awanan pulos kadagiti bendision ti pammati ken ni Jesucristo wenno mangikarkarigatan a mangpatalinaed itoy. Narigat ti agtungpal kadagiti bilin ti Apo no awan pammati ken panagtalek Kenkuana. Idinto nga adda ti napukawan iti pammati iti Apo, mabalin a batikusenda pay ti balakadna, nga awaganda ti naimbag iti dakes, ken dakes iti naimbag.13 Tapno maliklikan daytoy nakaam-amak a biddut, nasken a ti bukod a paltiing a maawattayo ket maitunos kadagiti pannursuro ti Apo ken dagiti propetana.
Kakabsat, kasapulan ti pammati nga agtungpal kadagiti bilin ti Apo. Kasapulan ti pammati ken ni Jesucristo nga agserbi iti dadduma para Kenkuana. Kasapulan ti pammati a rummuar tapno isuro ti ebangheliona ket idiaya iti tao a di makarikna iti timek ti Espiritu wenno mangilibak iti kinapudno ti mensahe. Ngem no aramatentayo ti pammatitayo ken ni Cristo—ken surotentayo ti sibibiag a propetana—pumigsanto ti pammati iti sangalubongan. Gapu iti teknolohia, nalabit nga ad-adu ti annak ti Dios a dumngeg ken mangbigbig iti sao ti Dios itoy a gibus ti lawas ngem iti ania man a dua nga aldaw iti pakasaritaan.
Addaan iti pumigpigsa a pammati a daytoy ti Simbaan ken pagarian ti Apo iti daga, ad-adu a miembro ti agbayad iti apagkapullo ken agabuloy a pangtulong kadagiti agkasapulan, uray dagiti miembro a makapadas kadagiti pannubok iti bukodda. Addaan pammati nga inawagan ida ni Jesucristo, nakasarak dagiti misionario iti sangalubongan iti wagas a mangparmek kadagiti karit a pinarnuay ti pandemia, panagaramid a natured ken naragsak. Ket iti nayon nga aramidda, pimmigsa ti pammatida.
Ti oposision ken dagiti pannubok ket nabayagen a pangparegta para iti panagdur-as ti pammati. Kanayon a pudno dayta, manipud pay iti rugi ti Pannakaisubli ken panangbukel iti Simbaan ti Apo.14
Pudno ita ti insao ni President George Q. Cannon iti nabayagen a panawen ken pudnonto aginggan iti yaay ti Apo tapno personal nga idauluanna ti Simbaanna ken dagiti taona: “Ti panagtulnog iti Ebanghelio mangyeg [iti tattao] iti nasinged unay a pannakinaig iti Apo. Ipasdekna ti asideg a koneksion dagiti tao iti daga ken ti Naindaklan a Namarsuatayo iti langlangit. Mangyeg iti panunot ti tao iti rikna ti naan-anay a panagtalek iti Mannakabalin ken kinatallugodna a denggen ken sungbatan ti araraw dagiti agtalek Kenkuana. Iti panawen ti pannubok ken rigat saan a magatadan daytoy a panagtalek. Mabalin a dumteng ti riribuk iti tunggal maysa, mabalin nga agbanta ti didigra ken kasla maparmek ti namnama ti tunggal tao, ngem sadino man a pakagun-odan dagiti tao iti pribilehio nga isangbay ti panagtulnog iti Ebanghelio, addaanda iti sigurado a lugar ti saadda; adda ti sakada iti rabaw ti bato a saana magaraw.”15
Paneknekak a ti bato a pagtakderantayo ti pammaneknektayo a ni Jesus ti Cristo; a daytoy ti Simbaanna nga idauluanna a mismo; ken ni President Russell M. Nelson ti sibibiag a propetana ita.
Dumawat ken umawat ni President Nelson iti direksion manipud iti Apo. Para kaniak isu ti pagwadan ti panagdawat iti dayta a direksion nga addaan determinasion a suroten daytoy. Dayta isu met la a determinasion nga agtulnog iti direksion ti Apo ket adda iti puso ti amin a nagsarita ket agsarita, agkararag, ken agkanta itoy sapasap a komperensia ti Simbaanna.
Sapay koma ta dagiti agbuybuya ken dumdumngeg itoy a komperensia iti intero a daga mariknada ti ayat ti Apo kadakuada. Sinungbatan ti Nailangitan nga Ama ti kararagko a mariknak koma ti uray bassit a paset ti ayat ti Apo kadakayo ken ti ayatna iti Nailangitan nga Amana, nga isu ti Nailangitan nga Amatayo.
Ipaneknekko a sibibiag ni Jesucristo. Isu ti Mangisalakanko ken Mannubbottayo. Daytoy ti Simbaanna. Adda Isuna iti ulona. Isu, ken ti Nailangitan nga Amana, nagparangda kas tao ken ni Joseph Smith iti kakaywan iti New York. Naisubli ti ebanghelio ni Jesucristo ken ti priesthoodna babaen kadagiti nailangitan a mensahero.16 Babaen ti bileg ti Espiritu Santo, ammok a pudno dayta.
Ikararagko a maaddaankayo iti kasta met la a pammaneknek. Ikararagko a dawatenyo iti Nailangitan nga Ama ti pammati ken ni Jesucristo a kasapulanyo nga aramiden ken tungpalen dagiti katulagan a mangpalugodto iti Espiritu Santo nga agbalin a kanayon a kaduayo. Ibatik kadakayo ti ayatko ken pammaneknekko iti sagrado a nagan ni Jesucristo, amen.