Awan ti Balsamo Aya Idiay Galaad?
Ti pangagas a bileg ti Mangisalakan saan laeng a ti kabaelanna a mangagas iti bagitayo ngem, nalabit a napatpateg, ti kabaelanna a mangagas iti puspusotayo.
Di nagbayag kalpasan ti misionko, idi estudianteak iti Brigham Young University, nakaawatak ti awag iti telepono manipud ken ni tatangko. Imbagana kaniak a na-diagnose iti pancreatic cancer ket nupay bassit ti gundawayna a makalasat, determinado a maagasan ken agsubli kadagiti gagangay nga aramidenna iti biag. Dayta tawag iti telepono ti namagladingit kaniak. Ti amak ti nagbalin a bishopko, gayyemko, ken mamalbalakadko. Iti panangutobmi iti inak ken dagiti kakabsatko iti masakbayan, kasla naliday. Agserserbi iti mision ni adingko a Dave iti New York ken nakiraman uray no adayo kadagitoy narikut a pasamak ti pamilia.
Insingasing dagiti medical provider dayta nga aldaw ti operasion tapno malapdan ti panagwaras ti cancer. Sipapasnek a nagayuno ken nagkararag ti pamiliak iti milagro. Nariknak nga umdas ti pammatimi a maagasan ti amak. Kasakbayan laeng ti operasion, nangtedkami ken manongko a Norm iti pammendision iti amak. Iti amin a pammati a napagkaykaysaanmi, inkararagmi a maagasan.
Naiskediul ti operasion nga agpaut iti adu nga oras, ngem kalpasan laeng ti ababa nga oras, rimmuar ti doktor iti pagurayan a siled tapno kasao ti pamiliami. Imbagana kadakami nga idi rugianda ti operasion, nakitada a nagwarasen ti cancer iti sibubukel a bagi ti amak. Batay iti napaliiwda, sumagmamano laengen a bulan ti panagbiag ti amak. Nauppapaykami.
Idi makariing ti amak manipud iti operasionna, naggagar a mangammo no nagballigi met laeng ti procedure. Imbagami kenkuana ti naulpit a damag.
Intuloymi ti nagayuno ken nagkararag para iti milagro. Bayat ti panagkapuy ti salun-at ti amak, inkararaganmi a maep-epan koma ti saemna. In-inut, idi kumaro ti kasasaadna, indawatmi iti Apo a palubosannan a matay iti nadaras. Sumagmamano laeng a bulan kalpasan ti operasionna, kas impadles ti surgeon, pimmusay ti amak.
Nawadwad nga ayat ken pammateg ti imbukbok dagiti miembro ti ward ken gagayyem iti pamiliak. Naaramid ti nangayed a pamunpon a nangted pammadayaw iti biag ti amak. Nupay kasta, iti panaglabas ti panawen, napadasanmi ti sakit ti kaawan ti amak, ket nasdaawak no apay a saan a naagasan ti amak. Napanunotko a saan a natibker ti pammatik. Apay a nakaawat iti milagro ti dadduma a pamilia, ngem saan ti pamiliami? Naadalko iti misionko a lukibek ti nasantuan a kasuratan para iti sungbat, ket ngarud rinugiak ti nagsukisok iti nasantuan a kasuratan.
Isuro ti Daan a Tulag ti maysa a nabanglo a lana wenno sapsapu a mausar a pangagas iti sugat, a naaramid manipud iti mula a dimmakkel idiay Galaad. Iti panawen ti Daan a Tulag, maam-ammo ti sapsapu a kas “balsamo idiay Galaad.”1 Nagladingit ni propeta Jeremias kadagiti kalamidad a nakitana kadagiti taona ket ninamnamana ti pannakaagas. Nagdamag ni Jeremias, “Awan ti balsamo aya idiay Galaad? Awan ti mangngagas aya idiay?”2 Babaen ti literatura, musika, ken arte, masansan a maitudo ken Jesucristo kas Balsamo idiay Galaad gapu iti nakaskasdaaw a bilegna a mangagas. Kas ken Jeremias, pinampanunotko, “Awan ti balsamo aya idiay Galaad para iti pamilia Nielson?”
Iti Marcos kapitulo 2 ti Baro a Tulag, makitatayo ti Mangisalakan iti Capernaum. Adu a tao ti nagdamag maipapan iti pangagas a bileg ti Mangisalakan, ket nagbaniagada iti Capernaum tapno agasan ida ti Mangisalakan. Nakaad-adu dagiti nagummong iti uneg ken iti lawlaw ti balay a yan ti Mangisalakan ta awanen ti lugar tapno maawatna amin ida. Uppat a lallaki ti nangbagkat iti tao a di makagunay tapno agasan ti Mangisalakan. Saanda a makalasat iti umariwekwek a tattao, isu a binutbutanda ti atep ti balay ket impalusotda ti tao nga imbaba tapno makipagkita iti Mangisalakan.
Idi binasak daytoy nga estoria, nasdaawak iti kinuna ti Mangisalakan idi makitana daytoy a tao: “Anak, napakawanen dagiti basolmo.”3 Panagkunak a no maysaak iti uppat a lallaki a nangbagkat itoy a tao, nakunak koma iti Mangisalakan, “Inyegmi talaga ditoy tapno maagasan.” Panagkunak insungbat koma ti Mangisalakan, “naagasakon.” Posible kadi a diak naan-anay a naawatan—a ti pangagas a bileg ti Mangisalakan saan laeng a ti kabaelanna a mangagas iti bagitayo ngem, nalabit a napatpateg, ti kabaelanna a mangagas iti puspusotayo ken ti naliday a puspuso ti pamiliak?
Insuro ti Mangisalakan ti napateg a leksion babaen daytoy a padas idi inagasanna ti bagi daytoy a tao iti kamaudiananna. Nagbalin a nalawag kaniak a ti mensahena ket mabalinna a sagiden ti mata dagiti nabulsek ket makakitada. Mabalinna a sagiden dagiti lapayag dagiti tuleng, ket makangngegda. Mabalinna a sagiden dagiti luppo dagiti saan a makapagna, ket makapagnada. Maagasanna dagiti mata ken lapayag ken luppotayo, ngem kapatgan ti amin, maagasanna ti puspusotayo no dalusannatayo iti basol ken itag-aynatayo iti narigat a pannubok.
Idi agparang ti Mangisalakan kadagiti tao iti Libro ni Mormon kalpasan ti Panagungarna, insaona manen ti pangagas a bilegna. Nangngeg dagiti Nephite ti timekna manipud iti langit a kunkunana, “Saankayo kadi nga agsubli ita kaniak, ket ibabawiyo dagiti basolyo, ket mapasurotkayo, tapno agasankayo?”4 Idi agangay, insuro ti Mangisalakan, “Gapu ta saanyo nga ammo no kaano ti isusubli ken panagbabawida, ket umayda kaniak nga addaan iti naan-anay a panggep iti pusoda, ket agasakto ida.”5 Saan nga ibagbaga ti Mangisalakan ti pisikal a pannakaagas no di ketdi naespirituan a pannakaagas dagiti kararuada.
Nangted ni Moroni iti nayon a pannakaawat idi ibinglayna dagiti balikas ti amana, ni Mormon. Kalpasan ti panangisaona iti milagro, inlawlawag ni Mormon, “Ket kinuna ni Cristo: No adda pammatiyo kaniak maaddaankayo iti pannakabalin nga agaramid iti ania man a banag a mainugot kaniak.”6 Naammuak a ti panggep ti pammatik nasken a ni Jesucristo, ken nasken nga awatek ti mainugot Kenkuana no aramatek ti pammatik Kenkuana. Maawatak itan a ti ipupusay ti amak ket mainugot iti plano ti Dios. Ita, no ipatayko dagiti imak iti ulo dagiti sabali tapno bendisionak ida, adda pammatik ken Jesucristo, maawatak a pisikal a maagasanto ti maysa a tao no mainugot daytoy ken Cristo.
Ti Pannubbot ti Mangisalakan, a mangaramid a magun-od ti agpada a pangsubbot ken pangpabael a bilegna, isu ti kangrunaan a bendision nga idiaya ni Jesucristo iti amin. No agbabawitayo a napnuan a panggep ti pusotayo, dalusannatayo ti Mangisalakan iti basol. No siraragsak nga itedtayo ti pagayatantayo iti Ama, uray iti karigatan a kasasaad, palag-anento ti Mangisalakan dagiti dagensentayo.7
Ngem adtoy ti dakdakkel a leksion a naadalko. Sibibiddut a namatiak a saan a naaramat ti pangagas a bileg ti Mangisalakan iti pamiliak. Iti pananglagipko itan nga addaan manakman a mata ken padas makitak a ti pangagas a bileg ti Mangisalakan ti pakakitaan iti biag ti tunggal miembro ti pamiliak. Nakapokusak unay iti pisikal a pannakaagas ta diak nakita dagiti milagro a napasamak. Pinapigsa ken pinaregta ti Apo ti inak iti labes ti kabaelanna iti daytoy narigat a pannubok, ket nangiturong iti napaut ken nawadwad a biag. Naaddaan iti naisangsangayan a positibo nga impluensia kadagiti annak ken appokona. Ti Apo pinaraburannak ken dagiti kakabsatko iti ayat, kaykaysa, pammati, ken kinatibker a nagbalin a napateg a paset ti biagmi ken agtultuloy agingga ita.
Ngem kasano ti amak? Kas iti amin nga agbabawi, naespirituan a naagasan idi kinalikaguman ken inawatna dagiti bendision a sidadaan gapu iti Pannubbot ti Mangisalakan. Inawatna ti pannnakapakawan dagiti basolna ket ita urayenna ti milagro ti Panagungar. Insuro ni Apostol Pablo: “Ta kas matayda amin ken Adan, kasta met mabiagdanto amin ken Cristo.”8 Kitaem, kunak iti Mangisalakan, “Inyegmi kenka ti amak tapno maagasan,” ket nalawag kaniak itan nga inagasan ti Mangisalakan isuna. Naaramat ti balsamo idiay Galaad iti pamilia Nielson—saan nga iti wagas nga impagarupmi, ngem iti napatpateg a wagas a nangbendision ken agtultuloy a mangbendision iti biagmi.
Iti Juan kapitulo 6 ti Baro a Tulag, nagaramid ti Mangisalakan iti makaay-ayo unay a milagro. Addaan iti sumagmamano nga ikan ken tinapay, pinakan ti Mangisalakan ti 5,000. Namin-adu a nabasakon daytoy nga estoria, ngem adda paset dayta a padas a nalibtawak a dakkel ti kaipapananna kaniak itan. Kalpasan a pinakan ti Mangisalakan ti 5,000, indawatna kadagiti disipulona a mangummong iti nabati pay a tedda, a nangpunno iti 12 a basket. Nasdaawak no apay nga adda panawen ti Mangisalakan nga aramiden dayta. Nalawag kaniak a maysa a leksion a maadaltayo iti dayta a gundaway daytoy: Napakanna ti 5,000 ket adda pay natda. “Umdas ti paraburko iti amin a tao.”9 Ti pangsubbot ken pangagas a bileg ti Mangisalakan makalubanna ti ania man a basol, sugat, wenno pannubok, ania man ti kadakkel wenno karigatna—ket adda pay natda. Umdas ti paraburna.
Iti dayta a pannakaammo, makapagtultuloytayo iti pammati, iti panangammo a no dumteng ti narigat a panawen—ket sigurado dumtengdanto—wenno no likmutan ti basol ti biagtayo, agtakder ti Mangisalakan nga addaan “pangpaimbag a payakna,”10 aw-awisennatayo nga umasideg Kenkuana.
Paneknekak kadakayo ti Balsamo idiay Galaad, ti Mangisalakan a Jesucristo, ti Mannubbottayo, ken ti datdatlag a pangagas a bilegna. Paneknekak ti tarigagayna a mangagas kadakayo. Iti nagan ni Jesucristo, amen.