Pammati nga Agtignay ken Agbalin
Babaen ti panagkararag ken panagadal iti nasantuan a kasuratan, ken panagtignay, maluktantayo dagiti parabur ti langit ken agbalin a nasaysayaat a pasurot ti Mangisalakan a ni Jesucristo.
Nabiit kalpasan a naawaganak nga agserbi kas General Authority Seventy, naaddaanak iti gundaway a makasao ni President Russell M. Nelson iti sumagmamano a minuto. Di naplano daytoy a panagkitami iti cafeteria, ket nagsayaat unay daytoy a nangawis kadakami ken Elder S. Mark Palmer a makilanglang iti pangaldaw kenkuana.
“Ania ngata ti pagsaritaanmi iti pangngaldaw a kadua ti propeta?” ti dimteng iti panunotko. Isu nga inkeddengko a dinamag ken ni President Nelson no adda balakad wenno pannarabayna kaniak gapu ta karugrugik laeng ti pagrebbengan a nakaawagak. Simple unay ken natarus ti sungbatna; kinitanak ket kinunana, “Elder Schmeil, naawaganka iti no ania ti pakapagbalinam.” Kas bunga dayta a padas rinugiak ti nagut-utob maipapan iti kayat ti Apo a pagbalinak. Iti panangpanunotko iti daytoy, naamirisko a kayatna nga agbalinak a nasaysayaat nga asawa, ama, ken anak ken katulongan. Naamirisko nga amin daytoy maipatungpal no itrabahok ti agbalin a nasaysayaat a disipulo ti Mangisalakan a ni Jesucristo.
Itay naudi a sapasap a komperensia, kinuna ni President Nelson: “Agkasapulan iti panagkagumaan ti nasayaat nga aramid. Ti panagbalin a pudno a disipulo ni Jesucristo ket saan nga eksepsion.”1 Aw-awisennatayo ni President Nelson nga agtrabahotayo a napasnek nga agbalin a nasaysayaat a disipulo ni Jesucristo. Imbagana kadatayo a tapno agbalintayo nga ad-adda kas iti Mangisalakan, nasken a papigsaentayo ti pammatitayo babaen ti panagdawat, panagtignay, ken panagadal a maibilang iti dadduma pay a banag.
1. Agdawat
Kinunana, “Agdawat iti tulong iti Nailangitan nga Amam, iti nagan ni Jesucristo para iti tulong.”2 Ti panagdawat babaen iti kararag ti maysa kadagiti tulbek a mangammo no kasano ti agbalin a nasaysayaat a disipulo ni Jesucristo.
Iti gibus ti panagministrona kadagiti Nephite iti America, nagpangato ni Jesucristo iti langit. Idi agangay, naguummong dagiti disipulona, “nagkaykaysa iti nabileg a panagkararag ken panagayuno. Ket imparang manen ni Jesus ti bagina kadakuada, agsipud ta agkarkararagda iti Ama iti naganna.”3 Apay nga impakita manen ni Jesus ti Bagina kadagiti disipulona? Gapu ta nagkarkararagda; nagdawdawatda.
Kalpasanna intuloyna:
“Ita mapanak iti Ama. Ket pudno kunak kadakayo, maitedto kadakayo ti ania man a banag a dawatenyo iti Ama iti naganko.
“Ngarud, dumawatka, ket umawatkanto; agtuktokka, ket mailukatto kenka; ta isu a dumawat, umawat; ket kenkuana nga agtuktok, mailukatanto.”4
Nasken a dumawattayo iti pammati a mangammo iti pagayatan ti Apo, ken mangawat nga ammo ti Apo no ania ti nasaysayaat para kadatayo.
2. Agtignay
Ti panagtignay ti kasapulan pay a tulbek iti panagbalin a nasaysayaat a disipulo ni Jesucristo. No agtignaytayo, tarabayen ken iturongnatayto iti dalan. Awan duaduak a nagkalikagum ni Nephi iti tarabay ti Apo a mangammo no kasano ti mangala iti pinanid a gambang ken ni Laban, nupay namindua a pinadas dagiti kakabsatna a saan a nagballigi. Ngem nagtignayda, ket inturong ida ti Apo iti dalanda. Kamaudiananna, nagballigi ni Nephi iti maikatlo a gundaway. Nalagipna, “Imbagnosnak ti Espiritu, ta diak ammo idi damo dagiti banag a rumbeng nga aramidek.”5
Kastoy ti panagtrabaho ti Apo no agkagumaan ken agtignaytayo, uray no awan ti nalawag a pannakaawattayo no ania ti kasapulan a maaramid. Imbaga ti Apo ken ni Nephi no ania ti aramiden: mapan alaen dagiti pinanid. Ngem dina imbaga ken ni Nephi no kasano nga aramiden. Binay-anna a ni Nephi ti agpanunot ken agkiddaw iti tulong ti Apo—ken masansan a kastoy ti panagtrabaho ti Apo iti biagtayo. No agtignaytayo iti pammati, tarabayen ken iturongnatayo ti Apo.
3. Agadal
Iti 3 Nephi, dinakamat dagiti disipulo iti Mangisalakan nga adda panagsisinnupanget dagiti tao maipanggep iti nagan ti Simbaan. Kas sungbat, insuro ti Mangisalakn ti napateg a prinsipio idi dinamagna, “Dida kadi nagbasa iti nasantuan a kasuratan?”6 Kalpasanna ti panagadal ti kasapulan pay a tulbek iti panagbalin a nasaysayaat a disipulo ni Jesucristo. Agkadua ti panagkararag ken panagadal iti nasantuan a kasuratan. Agtinnulongda para iti pagimbagantayo. Daytoy ti wagas nga impasdeken ti Apo. “Agpennekkayo kadagiti balikas ni Cristo; ta adtoy, ibaga kadakayo dagiti balikas ni Cristo amin a banag a rumbeng nga aramidenyo.”7
Insuro pay ti Mangisalakan a nasken a ditayo laeng adalen ti nasantuan a kasuratan ngem isurotayo pay ida, kas impakitana kadagiti Nephite: Ket ita napasamak nga idi naipalawagen ni Jesus ti nasantuan a kasuratan, nga insuratda, imbilinna kadakuada nga isuroda dagiti banag nga impalawagna.”8
Daytoy ti maysa a gapu no apay a nasken nga agsubli ni Nephi a mangala iti pinanid a gambang: kasapulan ti pamiliana dagiti nasantuan a kasuratan saan laeng mangtulong kadakuada nga agdaliasat iti naikari a daga ngem mangtulong pay kadakuada nga isuro dagiti annakda. Naskentayo met nga agpatarabay kadagiti nasantuan a kasuratan iti panagdaliasattayo, ken nasken nga isurotayo ida iti pagtaengan ken kadagiti takemtayo iti Simbaan.
4. Agtignay nga Agbalin
Mamin-adu a saanto dumteng a dagus dagiti sungbat iti kararag. Ngem nasken a mamatitayo nga agtultuloy, agtignay iti kinalinteg, ken pursigido kas ken Nephi idi inkarigatanna nga alaen dagiti pinanid a gambang. Ipakitanto ti Apo kadatayo ti nasken nga aramidentayo; no adalentayo ti nasantuan a kasuratan, itedto ti Apo ti sungbat wenno ti kasapulan a pigsa nga aguray iti maysa pay nga aldaw, maysa pay a lawas, ken mangpadas iti maysa pay a gundaway. Kinuna ni Elder Richard G. Scott: “Pagyamanan a no dadduma bay-an ti Apo nga agkarigatankayo iti nabayag sakbay nga umay ti sungbat. Dayta ti mangigapu a dumakkel ti pammatiyo ken dumur-as ti kinataoyo.”9
Babaen iti panagkararag ken panagadal iti nasantuan a kasuratan, kanayon nga inikkannak ti Apo iti pigsa nga agtignay ken agibtur iti maysa pay nga aldaw, maysa pay a lawas, ket mangpadas manen. Mamin-adu a saan a dimteng a dagus dagiti sungbat. Adda dagiti saludsodko a di pay nasungbatan, ngem agdawdawat ken agad-adalak latta, ket naragsakak nga itultuloy ti Apo a papigsaennak nga agtignay iti panagurayko iti sungbat.
Kinuna ni Elder Richard G. Scott, “Iti pannagnayo iti beddeng ti pannakaawatyo iti sipnget ti panagduadua, nga ar-aramaten ti pammati, maiturongkayto a mangsapul iti pangrisut a diyo koma magun-od.”10
Ti agbalin a nasaysayaat a pasurot ti Mangisalakan a ni Jesucristo ket tungpal biag a panagdaliasat, ken addatayo amin iti agduduma a tukad, nga agtigtignay iti sabali nga addang. Nasken a laglagipentayo a saan a kompetision daytoy, addatayo ditoy nga agiinnayat ken agtitinnulong. Nasken nga agtignaytayo tapno mapalugodantayo makipagtrabaho ti Mangisalakan kadatayo iti biagtayo.
Iti pannakisaona ken ni Sidney Rigdon, kinuna ti Apo ti sumaganad: “Naimutektekankan ken dagiti aramidmo. Nangngegkon dagiti kararagmo, ket insaganakan iti ad-adu nga aramid.”11 Paneknekak a denggen ken sungbatan ti Apo dagiti kararagtayo, am-ammonatayo; ken adda dakkel a paaramidna kadatayo. Babaen ti panagkararag ken panagadal iti nasantuan a kasuratan, ken panagtignay, maluktantayo dagiti parabur ti langit ken agbalin a nasaysayaat a pasurot ti Mangisalakan a ni Jesucristo.
Insuro ni President Dallin H. Oaks a “ti Maudi a Panangukom saan laeng a panangamiris iti kadagupan dagiti nasayaat ken dakes a tignay—no ania ti inaramidtayo. Panangbigbig iti maudi nga epekto dagiti tignay ken panunottayo—no ania ti nagbalinantayo.”12
Agyamanak kadagiti propeta, mammadto, ken mammaltiing, isuda dagiti agbambantay iti torre. Makitada dagiti banag a ditayo makita. Paneknekak a babaen ti balikasda, makapagbalintayo a pasurot ni Jesucristo ken magun-od ti potensialtayo. Paneknekak a sibibiag ni Cristo ken am-ammona ti tunggal maysa kadatayo. Daytoy ti Simbaanna. Iti sagrado a nagan ni Jesucristo, amen.