Ayat ti Dios: Ti Kangrunaan a Makaparag-o iti Kaunggan
Saan a masarakan ti ayat ti Dios iti kasasaadti biagtayo ngem iti kaaddanaiti biagtayo.
Kakabsat, ammoyo kadi no kasano nga ay-ayatennakayo unay ti Dios, ti Amatayo a Nailangitan? Nariknam kadi ti ayatna iti kaunggan ti kararuam?
No ammom ken maawatam no kasano a naipategka kas anak ti Dios, mabaliwanna ti isu amin a banag. Baliwanna ti panagriknam maipapan iti bagim no makaaramidka iti biddut. Baliwanna no kasano ti riknam no mapasamak dagiti narigat a bambanag. Baliwanna ti pannirigam kadagiti bilin ti Dios. Baliwanna ti pannirigam iti dadduma ken ti kabaelam a mangaramid iti pagdumaan.
Insuro ni Elder Jeffrey R. Holland: “Ti umuna a naindaklan a bilin ti kinaagnanayon ket ti agayat iti Dios iti amin a puso, kabaelan, panunot, ken pigsatayo—dayta ti umuna a naindaklan a bilin. Ngem ti umuna a naindaklan a kinapudno ti kinaagnanayon ket ti Dios ay-ayatennatayo iti amin a puso,kabaelan, panunot, ken pigsana.”1
Kasano a maammuantayo iti kaunggantayo dayta naindaklan a kinapudno ti kinaagnanayon?
Naiparmata ken ni propeta Nephi dayta kabilgan a pakakitaan ti ayat ti Dios. Iti panangbuyana iti kayo ti biag, nagdamag ni Nephi a mangammo iti kayulogan dayta. Kas sungbat, impakita ti anghel ken Nephi ti maysa a siudad, maysa nga ina, ken maladaga. Idi kumita ni Nephi iti siudad ti Nasaret ken iti nalinteg nga ina a ni Maria, a nakaubba iti maladaga a Jesus, kinuna ti anghel, “Adtoy ti Kordero ti Dios, wen, a kas Anak ti Agnanayon nga Ama!”2
Iti dayta sagrado a kanito, naawatan ni Nephi nga iti pannakayanak ti Mangisalakan, impakita ti Dios ti natarnaw ken naan-anay nga ayatna. Ti ayat ti Dios, impaneknek ni Nephi, “a nangyagsep iti bagina iti puspuso dagiti annak ti tao.”3
Mailadawantayo ti ayat ti Dios kas lawag nga aggapu iti kayo ti biag, a nangyagsep iti bagina iti amin a daga iti puspuso dagiti annak ti tao. Ti silaw ken ayat ti Dios adda iti amin a pinarsuana.4
No dadduma, mapagbiddutantayo nga ipapan a mariknatayo laeng ti ayat ti Dios kalpasana surotentayo ti landok a pagkaptan ken makiranud iti bunga. Ti ayat ti Dios, nupay kasta, di laeng dagiti umay itikayo ti umawat ngem dayta ti bileg a mamagsukisok kadatayoiti dayta a kayo.
“Gapuna, isu ti kangrunaan a matarigagayan iti amin a banag,” Insuro ni Nephi, ket impukkaw ti anghel, “Wen, ken isu ti kangrunaan a makaparag-o iti kaunggan.”5
Duapulo a tawen ti napalabas, maysa a kapamilia ti kimmayakay iti Simbaan. Adu dagiti di nasungbatan a saludsodna. Ti asawana, maysa a kumbert, nagbalin a napudno iti pammatina. Ingkarigatanda ti mangtaginayon iti panagasawada idi rumsua ti dida panagkinnaawatan.
Itay napalabas a tawen nangisurat iti tallo a saludsod maipapan iti Simbaan a narigatna a risuten ket impatulodna iti dua nga agassawa a gagayyemna iti adun a tawen. Inawisna ida a mangutob kadagita a saludsod ken umayda mangrabii tapno ibinglay ti kapanunotanda.
Kalpasan daytoy a panagbisita ti gagayyem, napan iti siledna ket nangirugi iti maysa a proyekto. Dayta a panagsasarita ken ti naipakita kenkuana nga ayat ti gagayyemna immapay iti panunotna. Insuratna a napilitan nga agsardeng iti trabahona. Kinunana: “Maysa a silaw ti nangsallukob iti kararuak. … Malasinko daytoy nauneg a rikna ti pannakalawlawag, ngem itoy a kasasaad nagtultuloy a pimmigsa ngem iti sigud ket nagpaut iti adu a minuto. Intugawko nga addaan naulimek a rikna, a naawatak kas parangarang ti ayat ti Dios kaniak. … Nariknak ti maysa a naespirituan a parikna a nangibaga kaniak a makasubliak iti simbaan ket ipeksak daytoy nga ayat ti Dios iti aramidek idiay.”
Kalpasanna nasdaaw kadagiti saludsodna. Ti rikna a naawatna ket ti panangdayaw ti Dios iti saludsodna, ken ti kinaawan ti nalawag a sungbat ti saan koma a manglapped kenkuana nga agtultuloy.6 Ibinglayna koma ti ayat ti Dios iti amin bayat a nagtultuloy a nagutob. Kabayatan a nagtignay iti dayta a parikna, nakarikna iti kinasinged ken ni Joseph Smith, a nangibaga kalpasan ti Umuna a Parmatana, “Napnuan iti ayat ti kaunggak, ket makapagrag-oak iti naindaklan a rag-o.”7
Nakaskasdaaw, ta kalpasan ti sumagmamano a bulan, inawatna ti isu met la a calling a nagserbianna iti 20 a tawen. Idi damo a naikkan iti calling, inakemna ti responsibilidad kas nagaget a miembro ti Simbaan. Ti saludsod itan para kenkuana saan a “Kasano a maipatungpalko ti callingko?” ngem “Kasano a maipakitak ti ayat ti Dios iti panagserbik?” Iti kastoy a baro a wagas, nakarikna iti rag-o, kaipapanan, ken panggep iti amin nga aspekto ti callingna.
Kakabsat, kasano a maawattayo ti makapagbalbaliw a bileg ti ayat ti Dios? Inawisnatayo ni propeta Mormon nga “agkararagkayo iti Ama iti amin a kabaelan ti pusoyo, tapno maaddaankayo iti daytoy nga ayat, nga impaayna iti amin a napudno a pasurot ti anakna, ni Jesucristo.”8 Dinatayo laeng aw-awisen ni Mormon nga agkararag tapno mariknatayo ti ayat ti Dios iti daddumangem agkararag tapno ammotayo ti natarnaw nga ayat ti Dios para kadatayo9
No umawattayo iti ayatna, masarakantayo ti dakdakkel a rag-o nga agayat ken agserbi a kas inaramidna, agbalin a pudno a pasurot ti Anakna, ni Jesucristo.”10
Saan a masarakan ti ayat ti Dios iti kasasaad ti biagtayo ngem iti kaaddana iti biagtayo. Ammotayo ti ayatna no awatentayo ti pigsa iti labes ti bukodtayo ken no ti Espirituna mangyeg iti talna, liwliwa, ken direksion. No dadduma mabalin a narigat a marikna ti ayatna. Makapagkararagtayo tapno makita ti imana iti biagtayo ken tapno makita ti ayatna iti ngayed dagiti pinarsuana.
No utobentayo ti biag ti Mangisalakan ken ti awan patinggana a sakripisiona, maawatantayo ti ayatna kadatayo. Nadayaw a kantaentayo dagiti balikas ni Eliza R. Snow: ”Imbukbokna ti napateg a darana; Insagutna ti biagna.”11 Ti kinapakumbaba ni Jesus a nagsagaba para kadatayo mailimog iti kararuatayo, manglukat iti puspusotayo tapno dumawat iti pammakawanna ket itdenna ti tarigagay nga agbiag a kas inaramidna.12
Insurat ni President Russell M. Nelson,“No ad-adda nga agkumittayo a tuladen ti diagna, ad-adda nga agbalin a nadiosan ken natarnaw ti ayattayo.”13
Insarita ti balongko: “Idi 11 ti tawenko, inkeddengmi nga agaggayyem a libtawan ti umuna a kagudua ti klasemi iti Primary. Idi sumangpetkami, iti siddaawmi, sibabara a kinablaawannakami ti titsermi. Kalpasanna nangidaton iti kararag a nangyebkasanna ti panagyaman iti Apo ta inkeddengmi ti umay iti klase dayta nga aldaw iti bukodmi a pagayatan. Diak malagip ti leksionmi wenno ti nagan ti titsermi, ngem ita, kalpasan iti 30 a tawen, masagidak pay laeng iti impakitana kaniak a natarnaw nga ayat dayta nga aldaw.”
Iti naglabas a lima tawen, nakitak ti pagwadan ti nadiosan nga ayat bayat idadar-ayko iti Primary sadiay Russia. Nakitak ti maysa a sister a nagparintumeng iti sango ti dua nga ubbing a nagpaneknek kadakuada nga uray isuda laengen ti sibibiag iti daga, nagsagaba ket natay ni Jesus para laeng kadakuada.
Paneknekak a ti Apo ken Mangisalakantayo pudno a natay para iti tunggal maysa kadatayo. Daytoy ti panangipeksa iti awan patinggana nga ayatna kadatayo ken iti Amana.
“Ammok a sibibiag ti Mannubbotko. Anian a liwliwa ti itden daytoy nasam-it a binatog! … Sibibiag tapno paraburanna[tayo] iti ayatna.”14
Luktantayo koma ti puspusotayo a mangawat iti natarnaw nga ayat ti Dios kadatayo ket ibukbok dayta nga ayat iti amin nga aramidtayo. Iti sagrado a nagan ni Jesucristo, amen.