Agdan ti Pammati
Ti kinaawan pammati ti manglapped iti kabaelantayo a mangkita kadagiti milagro, idinto a ti pokus ti pammati iti Mangisalakan ti manglukat iti bileg ti langit.
Kasano nga apektuanto dagiti karit ti biag ti pammatitayo ken Jesucristo? Ken ania ti epekto ti pammatitayo iti rag-o ken talna a padasentayo itoy a biag?
Tawen idi ti 1977. Nagkiriring ti telepono, ken ti mensahe ti nangpaliday iti puspusomi. Agsagsagana da Carolyn ken Doug Tebbs iti yaakarda iti baro a pagtaenganda kalpasan ti panangileppas iti graduate school. Dimteng ti elders quorum a mangkarga iti lugan a pagakar. Ni Doug, iti panangpennekna a nawaya ti dalan sakbay ti panagbuelta, kimmita iti maudi a gundaway. Dina nakita ti bassit nga anakna a ni Jennie, a kellaat a nagtaray iti likud ti trak iti di umno a kanito. Iti apagdarikmat, natay ti patpatgenda a Jennie.
Ania ti simmaruno a napasamak? Ti saem kadi a napalaus a nariknada ken ti di mailadawan ti rikna ti pannakapukaw ket mangparnuay iti di mapagtunos a baet da Carolyn ken Doug, wenno mangbegkes kadi daytoy iti pusoda ken mangpatibker iti pammatida iti plano ti Nailangitan ng Ama?
Ti nagdalanan a nagpautan ken nagsaeman ti rigrigatda, ngem manipud iti sadino man dimteng dagiti naespirituan a pigsa a di mapukaw ti namnama, no di ketdi “agtultuloy[da].”1 No kaskasano nagbalin nga ad-adda a kas ken Cristo daytoy nakaskasdaaw nga agassawa. Ad-adda a managkumit. Ad-adda a managrikna. Mamatida nga, iti panawenna, ikonsagrar ti Dios dagiti rigatda para iti pagimbaganda.2
Nupay di naan-anay a maikkat ti saem ken pannakapukaw, naliwliwa da Carolyn ken Doug iti namnama a babaen ti panagtalinaed a natibker iti dana ti katulagan, matagikuada ti patpatgenda a Jennie iti agnanayon.3
Ti pagwadanda ti nangpapigsa iti pammatik iti plano ti Apo. Ditayo makita ti amin a banag. Makitana. Kinuna ti Apo ken Joseph Smith iti Liberty Jail nga “amin dagitoy a banag ipaayandaka iti padas, ket agbalindanto a pagsayaatam. Ti Anak ti Tao bimmaba iti babaenda amin. Nain-indaklanka kadi ngem isu?”4
No awatentayo ti pagayatan ti Apo, suruannatayo a makipagna Kenkuana.5 Kas agtutubo a misionario nga agserserbi iti Tahiti, nakiddawak a mangannong iti masakit a maladaga. Impataymi ti imami iti ulona ket binendisionanmi isuna nga umimbag. Simmayaat ti salun-atna, ngem nagsakit manen daytoy. Iti maikadua a gundaway binendisionanmi ngem awan nagbaliwanna. Nakiddaw ti maikatlo. Impakaasimi iti Apo a maaramid ti pagayatanna. Nabiit kalpasanna, nagsubli daytoy bassit nga espiritu iti nailangitan a taengna.
Ngem nagulimekkami. Kayatmi nga agbiag ti maladaga, ngem adda dagiti sabali a plano ti Apo. Ti panangawat iti pagayatanna ngem iti bukodmi ti tulbek iti panangsarak iti rag-o ania man dagiti kasasaadmi.
Ti simple a pammatimi ken ni Jesucristo idi damo a maadalmi maipapan Kenkuana ket makapagtalinaed iti puspusomi iti panangsangomi kadagiti karit. Matarabaynatayto ti pammatitayo Kenkuana iti baet dagiti pakariribukan ti biag. Awan duadua, maammuantayto nga adda kinasimple iti sabali a bangir ti pakariribukan ti biag6 no agtalinaedtayo a “[natibker] ken ni Cristo, addaan naan-anay a kinalawag ti namnama.”7
Paset ti panggep ti biag ti mangpalugod kadagitoy a tubeng tapno agbalin a pagaddangan a bato no ulientayo iti awagak nga “agdan ti pammati”—maysa nga agdan gapu ta isingasingna a saan nga istatik ti pammati. Makauli ken makababa daytoy segun iti pili nga aramidentayo.
No ikarigatantayo a buklen ti pammati iti Mangisalakan, ditayo maawatan a naan-anay ti ayat ti Dios kadatayo ken agtungpal kadagiti lintegna gapu ta obligasiontayo. Mabalin a ti pannakabasol ti agbalin pay nga umuna mangparegta ngem ti ayat. Mabalin a di pay a napadasan ti pudno a pannakaikonekta Kenkuana.
No kalikagumantayo a patibkeren ti pammatitayo, matikawtayo iti insuro ni Santiago. Impalagipna a “ti pammati a di mapakuyugan kadagiti ar-aramid isu ti eppes.”8 Madalebtayo no ipagaruptayo nga agpannuray ti amin kadatayo. Ti panagpannuray unay iti bagitayo ti makaipawil iti kabaelantayo a manggun-od iti bileg ti langit.
Ngem no agtultuloytayo iti pudno a pammati ken ni Jesucristo mangrugi nga agbaliw ti pokustayo. Mabigbigtayo a panagtulnog ken pammati iti Mangisalakan ti mangpaikari kadatayo a kanayon a kaduaennatayo ti Espirituna.9 Ti panagtulnog saanen nga iritante, ngem agbalin a panagsapsapul.10 Mabigbigtayo a ti panagtulnog iti bilbilin ti Dios ti mangpabalin kadatayo tapno agtalek Kenkuana. Addaan iti talekna umay ti nayon a lawag. Daytoy a lawag ti mangtarabay iti dalantayo iti biag ken mangpalugod a makitatayo a nalawlawag ti dana a nasken nga alaentayo.
Ngem adda pay. No dumakkel ti pammatitayo iti Mangisalakan, makitatayo ti nainaka a panangamiris a mairaman ti nadiosan a pannakaawat iti relasiontayo iti Dios—ti natibker a tignay manipud iti “Ania ti kayatko?” iti “Ania ti kayat ti Dios?” Kas iti Mangisalakan, agtignaytayo “saan iti pagayatak, no di ti pagayatam.”11 Aramidentayo ti aramid ti Dios ken agbalin a ramit kadagiti imana.12
Agnanayon ti panagdur-astayo. Insuro ni President Nelson nga adu pay ti kayat ti Nailangitan nga Ama nga ammuentayo.13 Iti panagdur-astayo, nasaysayaat a maawatantayo ti insuro ti Apo ken Joseph Smith: “Ta no tungpalenyo dagiti bilinko maawatyonto ti pakabuklanna, ket maitan-okkayo kaniak a kas kaniak; … ibagak kadakayo, umawatkayonto iti ad-adu pay a parabur.”14
No kasano ti kangato nga ulientayo ti agdan ti pammati ket desisiontayo. Insuro ni Elder Neil L. Andersen a “ti pammati saan a naiparparna ngem babaen ti pili.”15 Makapilitayo nga agaramid iti pili a kasapulan a mangpatibker iti pammatitayo iti Mangisalakan.
Ibilang ti epekto dagiti pili a naaramid idi bimmaba da Laman ken Lemuel iti agdan ti pammati idinto ta immuli ni Nephi iti nangatngato. Adda kadi nalawlawag a representasion ngem iti pagdumaan ti sungbat ni Nephi a “Mapanak ket aramidek”16 bersus iti pannakakita laeng da Laman ken Lemuel iti anghel, a panangsungbat iti “Kasano a mabalin a yawat ti Apo?”17
Ti kinaawan pammati ti manglapped iti kabaelantayo a mangkita kadagiti milagro, idinto a ti pokus ti pammati iti Mangisalakan ti manglukat iti bileg ti langit.
Uray no nakapuy ti pammatitayo, kanayonto a mayunnat ti ima ti Apo tapno itag-aynatayo.18 Tawtawen ti naglabas, inawatko ti rebbengen a mangbukel manen iti stake iti Nigeria. Iti maudi a minuto, adda nabalbaliwan iti petsa. Adda maysa a lalaki iti stake a nangikeddeng a pumanaw iti ili para iti umuna a petsa ti komperensia. Dina kinayat nga ipapeggad ti pannakaawagna kas stake president.
Idi adda iti adayo, naaddaan iti nakaro nga aksidente, ngem saan a nadangran. Daytoy ti nangigapu iti panangibilangna no apay a naispal ti biagna. Nalagipna manen ti desision nga inaramidna. Nagbabawi ken napakumbaba a dinar-ayanna ti baro a komperensia. Ket wen, naawagan nga agbalin a baro a stake president.
Insuro ni Elder Neal A. Maxwell: “Iti laeng panangitunos iti pagayatantayo iti pagayatan ti Dios ket naan-anay a ragsak a masarakan. Ania man a basbassit a banag agresulta iti basbassit a paset.”19
Kalpasan nga aramiden “amin dagiti naipakumit iti bilegtayo,” sa orasen tapno “agtakdertayo … a makaimatang iti panangisalakan ti Dios.”20 Nakitak daytoy idi agserserbiak kas ministering brother iti pamilia McCormick. Naasawan iti 21 a tawen, nagserbi ni Mary Kay a sipupudno kadagiti takemna. Saan a miembro ti Simbaan ni Ken ket awan ti essemna nga agbalin a maysa, ngem patpatgenna ti asawana, pinilina ti agsimba a kakuyogna.
Maysa a Domingo natignayak a mangibinglay iti pammaneknekko ken ni Ken. Indawatko kenkuana no maaramidko. Simple ken nalawag ti sungbatna: “Saan, agyamanak.”
Naklaatak. Nariknak ti pannignay ket pinadasko a suroten. Makapasulisog nga ikeddeng a diak pay inaramid ti pasetko. Ngem kalpasan ti kararag ken panagutob, nakitak a nupay umno ti panggepko, nagtalekak unay iti bagik ken bassit unay iti Apo.
Idi agangay, nagsubliak ngem iti sabali a pokus. Mapanak laeng kas maysa a ramit kadagiti ima ti Apo nga awan sabali a tarigagayko no di suroten ti Espiritu. Kaduak ti napudno a kompanionko, ni Gerald Cardon, simrekkami iti balay ti McCormick.
Nabiit kalpasanna, natignayak a mangawis ken ni Gerald a kantaen ti “I Know That My Redeemer Lives.”21 Kinitanak nga agsalsaludsod, ngem iti kaadda ti pammatina iti pammatik, inaramidna. Pinunno ti napintas nga espiritu ti siled. Dimteng ti pannignay a mangawis kada Mary Kay ken Kristin, ti anakda a babai, a mangiburay iti pammaneknekda. Idi inaramidda daytoy, pimmigsa ti Espiritu. Kinapudnona, kalpasan ti pammaneknek ni Kristin, nagarubos ti lua iti pingping ni Ken.22
Ti Dios ti nangaramid. Di laeng nasagid ti puspuso ngem nagbaliw nga agnanayon. Naikkat ti duapulo-ket-maysa a tawen a kaawan pammati babaen ti bileg ti Espiritu Santo. Kalpasan ti makalawas, nabuniagan ni Ken. Kalpasan ti makatawen, nailantip da Ken ken Mary iti balay ti Apo para iti panawen ken iti kinaagnanayon.
Napadasanmi a dua ti kaipapanan ti panangsukat iti pagayatanmi iti pagayatan ti Apo, ken dimmakkel ti pammatimi Kenkuana.
Ibilangyo koma dagiti sumaganad a saludsod dagiti propeta ti Dios no ikarigatanyo nga ulien ti agdanyo iti pammati:
Nauksob kadi ti kinatangigko?23
Mangtedak kadi ti lugar iti pusok para iti balikas ti Dios?24
Ipalubosko kadi a maikonsagrar dagiti sagabaek nga agpaay a pakairanudak?25
Naayatak kadi a paalimon ti pagayatak iti pagayatan ti Ama?26
No nariknak a kumanta iti pangsubbot nga ayat, mariknak kadi itan?27
Bay-ak kadi nga agballigi ti Dios ti biagko?28
No makitam a maisuppiat ti agdama a danam iti pammatim iti Mangisalakan, ngarud sapulem koma ti dalanmo nga agsubli Kenkuana. Agpannuray ditoy ti pannakaitan-okmo ken ti an-annabom.
Makapagmulatayo koma iti bukel ti pammati iti uneg ti puspusotayo. Mataraonantayo koma dagiti bukel no ibegkestayo ti bagitayo iti Mangisalakan babaen ti panangdayawtayo iti katulagantayo Kenkuana. Iti nagan ni Jesucristo, amen.