Adda Estoria ti Tunggal Maysa Kadatayo
Umaykayo koma ta sapulenyo ti pamiliayo, amin a henerasionyo, ket iyawidyo ida
Gagayyem, ken kakabsat, adda estoria ti tunggal maysa kadatayo. Kabayatan a taktakuatentay ti bukodtay nga estoria, kumamangtayo, makikaduatayo, agbalintayo.
Ti naganko ket Gerrit Walter Gong. Maysa a Dutch a nagan ti Gerrit, ti Walter (a nagan ti amak) ket nagan ti Amerikano, ken Gong, siempre, maysa a nagan ti Chinese.
Kuna dagiti eksperto nga agarup 70-110 bilion a tao dagiti nagbiagen ditoy daga. Siguro maymaysa laeng ti agnagan iti Gerrit Walter Gong.
Adda Estoria ti Tunggal Maysa Kadatayo Paggaayatko “ti tudo iti rupak [ken] ti pul-oy ti angin.”1 Magnaak a kas kadagiti penguin iti Antarctica. Itedko kadagiti ulila iti Guatemala, dagiti ubbing nga adda iti kalsada idiay Cambodia, babbai a Maasai iti African Mara, ti umuna unay a ladawanda.
Agur-urayak iti ospital a nakaiyanakan ti tunggal anakko no kasta nga awagannak a tumulong ti doktor.
Agtalekak iti Dios. Mamatiak a “[datayo], tapno maaddaan[tayo] iti ragsak,”2 adda nakedngan a tiempo iti tunggal banag iti baba ti langit.3
Ammom kadi ti estoriam? No ania ti kaipapanan ti naganmo? Dimmakkel ti populasion manipud iti 1.1 billion a tattao idi 1820 ti umadani 7.8 billion idi 2020.4 Idi tawen ti 1820 kaslang inflection a panawen iti pakasaritaan. Adu kadagiti naiyanak kalpasan ti 1820 dagiti addaan kadagiti sibibiag a lagip ken rekord a mangitudo kadagiti nadumaduma a henerasion ti pamilia. Mangpanunotkayo man iti maysa nga espesial, naragsak a pakalaglagipan a kadua ti apongyo wenno sabali a miembro ti pamilia?
Ania man ti pakadagupan dagiti indibidual a nagbiag ditoy daga, adda patinggana daytoy, mabilang, ti saggaysa a tao. Sika ken siak, napategtayo.
Ken ibilangmo koma daytoy, uray no am-ammotayo ida wenno saan, naiyanaktayo iti maysa nga ina ken ama. Ket ti tunggal maysa nga ina ken ama ket naiyanak iti maysa nga ina ken ama.5 Naiyanak wenno naadaptar man ti kaputotan, kamaudiananna naikappengtayo iti nailangitan a pamilia ti Dios ken iti naindagaan a pamilia.
Rinugian ti Umuna a Dragon Gong, ti maika-30 a lelongko iti tumeng a naiyanak idi AD 837, ti purok ti pamiliami iti akin-abagatan a China. Iti umuna a gundaway a panagbisitak iti purok ti Gong, kuna dagiti tao, “Wenhan huilaile” (“Nagsublin ni Gerrit”).
Iti biang ni nanangko, iraman ti kaputotan ti pamiliami dagiti rinibu nga apiliedo, ket adu pay dagiti matakuatan.6 Adu pay a pamilia ti nakaikappengan ti tunggal maysa kadatayo. No ti ammom ket nakumpleton ni ikitmo iti tumeng ti amin a pakasaritaan ti pamiliayo, sapulem koma dagiti kasinsinmo ken kasinsin dagiti kasinsinmo. Ikamangmo ti apiliedo ti pamiliam kadagiti 10 bilion a nagan a posible a matunton iti FamilySearch nga adda iti online ken ti 1.3 billion nga indibidual iti Family Tree.7
Awisem dagiti gagayyem wenno pamilia a mangidrowing iti sibibiag a kayo. Kas insuro ni President Russell M. Nelson, dagiti nabiag a kayo ket addaanda kadagiti ramut ken sanga.8 Umuna wenno maikasangapuloka man a henerasion, kumamangka iti naglabas para iti masakbayan. Pagkakamangem dagiti ramut ken sanga iti sibibiag a kayo ti pamiliam.9
Ti saludsod a “Sadino ti naggapuam?” ket dawatenna ti kapuonan, lugar a nakayanakan, ken pagilian wenno nakayanakan a daga. Iti intero a lubong, 25 a porsiento kadatayo ti mangtunton ti nakayanakan a daga iti China, 23 porsiento iti India, 17 porsiento dagiti dadduma pay a paset iti Asia ken ti Pacific, 18 porsiento iti Europe, 10 porsiento iti Africa, 7 porsiento iti America.10
Ti saludsod a, “Sadino ti naggapuam?” awisennatayo pay a mangtakuat iti nadiosan a kinataotayo ken espritual a panggep iti biag.
Adda Estoria ti Tunggal Maysa Kadatayo
Nakasarak tay am-ammok a pamilia a naikappeng kadagiti lima a kaputotan idi pinasiarda tay daan a pagtaenganda idiay Winnipeg, Canada. Imbaga ti lolo kadagiti appokona idiay maipapan ti aldaw nga adda dua a misionario (awagna kadakuada anghel manipud iti langit) ti nangyeg ti naipasubli nga ebanghelio ni Jesucristo, a nangbaliw iti pamiliada iti agnanayon.
Maysa nga ina nga am-ammok ti nangawis kadagiti annakna ken kakasinsinna nga agdamag maipapan kadagiti padas iti panagubing ti lolada iti tumeng. Dagiti padas ken adal ti biag ti lolada iti tumeng ket nagbalinen a gameng ti family book a namagkaysa kadagiti henerasion.
Adda maysa nga agtutubo a lalaki a nangurnos iti maysa a “Dad journal.” Adu a tawenen ti napalabas, dinungpar ti lugan a gapu ti nakatayan ni tatangna. Tapno ma-ammona ni tatangna, daytoy natured nga agtutubo ket tinaginayonna dagiti pakalaglagipan ti kinaubing, ken estoria manipud iti pamilia ken gagayyem.
No saludsodem no paggapuan ti kaipapanan ti biag, kaadduan a sungbat dagiti tao ket pamilia ti umuna.11 Karaman dagitoy ti sibibiag a pamilia ken dagiti pimmusayen. Siempre, no mataytayo, agtultuloytayo latta nga agbiag. Itultuloytayo ti agbiag iti sabali pay a bangir ti belo.
Sibibiagda pay, ket maikari ngarud a laglagipentayo dagiti kapuonantayo.12 Laglagipentayo ti tawidtayo babaen kadagiti sarsarita, rekord ken estoria ti pamilia, memorials wenno lugar a pakalaglagipan, ken ladawan bayat ti selebrasion, taraon, wenno aytem a mangipalagip kadatayo dagiti ipatpategtayo.
Panunotem no sadino ti pagnanaedam—di ngamin nagsayaat no kasano a lagipen ken dayawen ti pagilian ken komunidad ti kapuonan, pamilia, ken dadduma pay a nagserbi ken nagsakripisio? Kas pagarigan, iti pananglagip iti panagapit ti autum iti South Molton, Devonshire, England, pagaayatmi ken Sister Gong a sapulen ti bassit a simbaan ken komunidad a nagnaedan ti pamiliami a Bawden. Dayawen dagiti kapuonantayo babaen ti pananglukat ti langit babaen iti templo ken aramid iti family history13 ken ti panagbalin a mamagtugmok14 iti agsasaruno a henerasiontayo.15
Iti agdama a panawen a “Piliek ti bagik,” mapaimbag ti kagimongan no agkakamang dagiti henerasion iti napnuan kaipapanan a wagas. Kasapulantayo dagiti ramut tapno maaddaan iti payyak—pudno a relasion, napnuan kaipapanan a panagserbi, panagbiag a nasayaat ngem dagiti makitkita iti social media.
Ti pannakaikappengg iti kapuonantayo ket mabalin a baliwanna ti biagtayo iti wagas a di tayo ninamnama. Manipud kadagiti pannubok ken balligida, makagun-odtayo iti pammati ken pigsa.16 Manipud iti panagayat ken sakripisioda, masursurotayo ti mamakawan ken panagtultuloy. Agbalin a natibker dagiti annaktayo. Magun-odtayo ti pannakasaluad ken bileg. Ti pannakainaig kadagiti kapuonan ti mangnayon iti kinasinged iti pamilia, panagyaman, dagiti milagro. Kasta a pagnaigan ti mangpasangbay iti tulong manipud iti sabali pay a bangir ti belo.
Kas ti idadateng ti ragsak iti pamilia, kasta met ti liday. Awan ti indibidual a perpekto, wenno uray asino man a pamilia. No dagiti mangayat, mangtaripato ken mangsalaknib kadatayo ket saanda a naaramid ti pasetda, mariknatayo ti pannakabaybay-a, bain, sakit. Agbalin a ti pamilia eppes a sabut. Ngem, iti tulong ti langit, maawatantayo ti pamiliatayo ken makapagkikinnapiatayo iti tunggal maysa.17
No dadduma ti saan pulos nga agbaliw a panagkumit nga agtulnog iti relasion ti pamilia ti makatulong kadatayo a mangragpat kadagiti narigat a bambanag. Iti sumagmamano a pasamak, agbalin ti komunidad a pamilia. Adda naisangsangayan a balasang a masansan nga umakar-akar ti narikut a pamiliana ngem nakasapul iti naayat a pamilia iti Simbaan a nangpasangbay kenkuana. Ti genes ken nakaugalianen ti pamilia ket makaimpluwensia ngem saan nga isu ti mangikeddeng ti kinasiasinnotayo.
Kayat ti Dios a ti pamiliatayo agragsak ken agnanayon. Napaut unay ti agnanayon no pagbalinentayo a di agragsak ti tunggal maysa. Ababa ti kinaragsak no ti napateg a relasion agsardeng itoy a biag. Babaen kadagiti sagrado a katulagan, ipaay ni Jesucristo ti ayatna, bileg ken asina tapno agbalbaliwtayo18 ket paimbagenna dagiti relasiontayo. Ti napasnek a panagserbi iti templo para kadagiti ipatpategtayo ti mangpabalin a pudno ti Pannubbot ti Mangisalakan kadatayo amin. No napasanto, makapagsublitayo iti presensia iti Dios kas pamilia nga agkaykaysa iti agnanayon.19
Ti tunggal estoriatayo ket maysa a panagdaliasat nga agtultuloy, bayat ti intay panagtakuat, panagparnuay, ken agbalin kadagiti posibilidad a di tay ninamnama.
Imbaga ti Propeta Joseph Smith, “Agparparang kadagiti dadduma a kasla nabatad unay a doktrina ti sasawentayo—ti bileg a mangisurat wenno mapagkappeng iti daga ken mapagkappeng iti langit.”20 Ti pannakipulapol a maparnuaytayo ditoy addanto met idiay nga addaan iti agnanayon a gloria.21 Pudno, “datayo no awanda [dagiti kameng ti pamiliatayo] saantayo nga agbalin a naan-anay; wenno isuda no awantayo saanda nga agbalin a naan-anay,” a “sibubukel ken naan-anay ken awan pagkuranganna a pagkaykaysana.”22
Ania ti mabalintayo nga aramiden itan?
Umuna, panunotem ti bagim iti nagbaetan ti agsinnango a dua a sarming ti agnanayon. Iti maysa a direksion, iladawam ti bagim kas maysa nga anak a babai, apoko, apoko iti tumeng a babai, iti bangir a direksion, maysaka a kas ikit, ina, lola. Anian ti kapaspas ti panaglabas ti panawen! Iti kada panawen ken akem, panunotem no asino ti kaduam. Ummongem dagit ladawanda ken estoriada; aramidem ti pudno a pakalaglagipanda. Isurat dagiti naganda, padpadas, kangrunaan a petsa. Isuda ti pamiliam—ti pamilia nga adda kenka ken ti pamilia a kayatmo.
Bayat ti panangannongmo kadagiti ordinansa iti templo para kadagiti miembro ti pamilia, ti Espritu ni Elijah, “ti mangipakita a ti Espiritu Santo ti mangipaneknek iti nadiosan a kababalin ti pamilia,”23 agrereppengto ti puspuso dagiti ama, ina ken annak iti ayat.24
Maikadua, pagbalinem a ti panagpadas iti family history ket nairanta ken boluntario. Awagam ni lelangmo. Mingmingam dagiti mata ti kayanak a maladaga. Mangipaay iti oras—a mangtakuat iti agnanayon—ti kada panawen iti dayta a panagdaliasat. Adalen ken bigbigen a managyaman ken sipupudno ti tawid ti pamiliam. Agragsak ken agbalin a positibo, ket no masapul, aramidem amin a kabaelam a napakumbaba ta saanmo nga ipasa ti negatibo. Bay-am a mangrugi kenka dagiti nasayaat a banag.
Maikatlo, bisitaen ti FamilySearch.org. I-download ti available a mobile apps. Libre ken makaliwliwada. Agtakuat, makikappeng, maibilang. Kitaem no kasano a mainaigka kadagiti tao iti maysa a kuarto, anian a kalakana ken kinaragsak nga inayon ti nagnagan iti sibibiag a kayo ti pamiliam, tapno masapulan ken mabendisionan dagiti ramut ken sanga.
Maikapat, tumulong a mapagkaykaysa ti pamilia para iti agnanayon. Laglagipem ti demograpia ti langit. Ad-adu pay dagiti adda iti sabali a bangir ti belo ngem iti daytoy a bangir. Bayat ti iyaasideg ti ad-adu pay a templo kadatayo, mangipaaykayo koma kadagiti agur-uray iti gundaway nga umawat kadagiti ordinansa ti templo.
Ti kari iti Paskua ti Panagungar ket kanayon, ken babaen ken Jesucristo, agbalintayo a kasayaatan nga estoria, ket ti pamiliatayo agbalin a naragsak ken agnanayon. Iti amin a henerasiontayo, paimbagen ni Jesucristo dagiti nasnaayan ti pusoda, wayawayaanna dagiti nakabalud ken ibulosna dagiti maparparigat.25 Ti maibilang iti katulagan ti Dios ken iti tunggal maysa26 karaman ti panangammo a ti espiritu ken bagitayo ket maikaykaysa iti panagungar ken ti kapatgan a relasiontayo agtultuloy iti labes ti patay nga addaan iti naan-anay a rag-o.27
Adda Estoria ti Tunggal Maysa Kadatayo Umayka takuatem ti bukodmo. Umayka ta sapulem ti bosesmo, ti kantam, ti pannakitunosmo Kenkuana. Daytoy ti pudno a panggep a pinarsua ti Dios ti langlangit ken ti daga ket nakitana a nasayaatda.28
Dayawem ti Plano ti kinaragsak ti Dios, ti Pannubbot ni Jesucristo, ti agtultuloy a pannakaisubli ti ebanghelio ken Simbaanna. Umaykayo koma ta sapulenyo ti pamiliayo, amin a henerasionyo, ket iyawidyo ida. Iti sagrado ken nasantuan a nagan ni Jesucristo, amen.