Dagiti Katulagantayo iti Dios Patibkeren, Salakniban, ken Isagananatayo para iti Agnanayon a Gloria
Bayat a pilientayo ti agaramid kadagiti katulagan ken tungpalen ida, mabendisionantayto iti ad-adu a ragsak iti daytoy a biag ken nadayag nga agnanayon a biag nga umay.
Sisters, nagragsaken a panaguummongtayo kas sapasap a panagkikinnabsatan! Kas babbai nga agaramid ken agtulnog iti katulagan iti Dios, ibinglaytayo dagiti naespirituan a begkes a makatulong kadatayo a mangsango kadagiti karit ti aldawtayo ken isagananatayo iti Maikadua a Yaay ni Jesucristo. Ti panagtulnog kadagitoy a katulagan ti mangpalugod kadatayo a mangimpluensia iti dadduma nga umasideg iti Mangisalakan.
Nakitulag dagiti nabuniagan iti dayta a di-malipatan nga aldaw nga awatenda ti nagan ni Jesucristo, tapno kanayon a laglagipenda Isuna, ken tungpalenda dagiti bilinna, ken agserbi Kenkuana agingga iti panungpalan. No aramidentayo dagitoy a banag, ikari ti Nailangitan nga Ama a pakawanenna ti basbasoltayo ken itedna kadatayo ti panangkadkadua ti Espiritu Santo. Mangrugi kadatayo dagitoy a bendision iti dana, a no agtultuloytayo ken agibtur agingga iti panungpalan, palugodannatayo a makipagnaed Kenkuana ken ti Anakna a ni Jesucristo iti celestial a pagarian. Tunggal nabuniagan a tao ket makarian kadagitoy a pribelihio no tungpalenna ti katulagan a naaramid iti dayta a naisangsangayan nga aldaw.
Umawat kadagiti nabileg a kari dagiti agaramid iti ad-adu pay a katulagan iti templo no la ketdi napudnoda. Sipapasnek nga ikaritayo nga agtungpal iti bilbilin ti Dios, agbiag iti ebanghelio ni Jesucristo, nadalus iti dayaw, ken idaton ti oras ken talentotayo iti Apo. Kas supapak, ikari ti Dios dagiti bendision ditoy a biag ken ti gundaway nga agsubli Kenkuana.1 Iti dayta a proseso, naikkantayo iti bileg tapno maammuantayo ti nagdumaan ti kinapudno ken biddut, umisu wenno palso, iti baet ti adu a makatikaw ken negatibo a timek a mangngegantayo. Anian a nakabilbileg a sagut!
Kas panagsagana iti umuna a biahek iti templo, tinulongannak ti inak ken dagiti kabsat a Relief Society nga agpili iti aytem a kasapulak, agraman ti napintas a ceremonial clothing. Ngem immay ti kaskenan a panagsagana sakbay a maammuan no ania ti ikawes. Kalpasan ti pannakainterbyuk tapno ikeddeng no maikariak, inlawlawag ti bishopko dagiti katulagan nga aramidek. Ti naannad a panangilawlawagna ti nangted kaniak iti gundaway nga agpanunot ken agsagana nga agaramid kadagita a katulagan.
Idi dimteng ti aldaw, nakipasetak nga addaan iti managyaman ken natalna a rikna. Numan diak naawatan ti naan-anay a pateg dagiti katulagan nga inaramidko, ammok a kaduak ti Dios babaen dagita a katulagan ket naikari kaniak dagiti bendision a diak unay maawatan no nagtungpalak kadagitoy. Manipud iti dayta umuna a padas, naipanamnama a kanayon kaniak a ti panagtungpaltayo kadagiti katulagan nga inaramidtayo iti Dios ket mangpalugod kadatayo a maaddaan iti bileg ti Mangisalakan, a mangpapigsa kadatayo kadagiti pannuboktayo, mangipaay iti salaknib manipud iti impluensia ti kabusor, ken isagananatayo iti agnanayon a gloria.
Dagiti padas ti biag mabalin a nakakatkatawa wenno nakalidliday, naranggas wenno nadayag. Tunggal padas makatulong kadatayo nga ad-adda a maawatan ti ayat ti Amatayo ken ti kabaelantayo nga agbalbaliw babaen ti sagut a parabur ti Mangisalakan. Ti panagtulnog kadagiti katulagantayo ti mangpalugod ti bileg ti Mangisalakan a mangdalus kadatayo bayat nga agsursurotayo babaen iti padas—bassit man a biddut a panaghusga wenno dakkel a pannakapaay. Adda idiay ti Mannubbottayo a mangsippaw kadatayo no matnagtayo no la ketdi agsublitayo Kenkuana.
Nagtakderkayo kadin iti nangato a rangkis a nakatudo dagiti mukodyo iti igidna ken nakatallikudkayo iti derraas iti baba? Iti rappeling, nupay sitatalged a nakakonektakayo kadagiti nalalagda a tali ken ramit a makaispal kadakayo iti talged, ti panagtakder iti igid ket makapagbitek latta iti puso. Ti panagatras iti rangkis ken panagbitin iti angin ket agkasapulan iti panagtalek iti angkla a naigalut a natalged iti saan a magaraw a banag. Masapul ti talek iti tao a mangunnat a naimbag ti tali bayat ti panagbabam. Ket uray ikkannaka ti ramit iti kabaelan a mangkontrol iti panagbabam, nasken nga agtalekka a saan nga ipalubos ti kaduam a matnagka.
Malagipko unay ti rappellingmi iti grupo dagiti babbalasitang. Siak ti umuna iti grupo a napan. Bayat ti panagatrasko iti rangkis, natnagak nga awanan iti kontrol. Pagimbaganna, naisagud ti tali ket nagsardeng ti napaspas unay a panagbabak. Idi naibitinbitinak iti katenggaan ti natatadem a nangato a rangkis, napasnek a nagkararagak para iti asino man wenno ania man a banag a manglaplapped kaniak iti diak pannakatnag kadagiti bato.
Kalpasanna, naammuak a di unay natalged ti pannakaipuesto ti anchor bolt, bayat ti yaadayok iti igid, ti tao a mangun-unos kaniak ket napaspas a naguyod iti igid ti rangkis. Uray kaskasano, naisigkatna dagiti sakana kadagiti bato. Idi naisaad iti kasta a posision, naibabanak, saggabassit iti imana, iti tali. Nupay diak makita, ammok nga inaramidna ti amin a kabaelanna a mangisalakan kaniak. Sabali pay a gayyem ti adda iti tengnga ti rangkis, nakasaganan a mangsippaw kaniak no dinak matengngel ti tali. Idi magaw-atakon, tinengngelna ti singkawko ket imbabanak iti daga.
Addaan ni Jesucristo a kas angkla ken naan-anay a kaduatayo, mapatalgedtayo iti naayat a pigsana iti pannakasuot ken pannakaispal babaen Kenkuana. Kas insuro ni President M. Russell Ballard: “Ti pammati iti Dios ken iti Anakna a ni Apo Jesucristo, isu ti … angkla nga adda iti biagtayo a mangtengngel kadatayo iti panawen ti riribuk ken kinadangkes. … Ti pammatitayo … nasken a nakasentro ken ni Jesucristo, ti biagna ken ti pannubbotna, ken ti pannakaisubli ti ebangheliona.”2
Ti naespirituan a ramit a mangsaluad iti pannakabettak iti bato ti panagrigat ket ti pammaneknektayo ken ni Jesucristo ken dagiti katulagan nga aramidentayo. Makapagpannuraytayo kadagitoy a suporta a mangiturong kadatayo iti talged. Kas naayat a kaduatayo, di ipalubos ti Mangisalakan a matnagtayo iti labes ti dina magaw-at. Uray iti oras ti panagsagaba ken ladingittayo, adda sadiay a mangitag-ay ken mangparegta. Tulongannatayo ti bilegna nga umimbag manipud iti dakes a bunga ti pili ti dadduma. Nupay kasta, nasken a yusongtayo ti singkaw ket penkentayo a natalged ti pannakaisiglotna. Nasken a pilientayo ti maikapet a naimbag iti Mangisalakan tapno maibegkes Kenkuana babaen dagiti katulagantayo.3
Kasano a mapapigsatayo dayta nga angkla? Agkararagtayo a sipapakumbaba iti puso, adalen ken utoben dagiti nasantuan a kasuratan, makiranud iti sakramento iti espiritu ti panagbabawi ken panagraem, napasnek nga agtungpal iti bilin, ken suroten ti balakad ti propeta. Ket no ipatungpaltayo dagiti inaldaw nga aramidtayo iti “nangatngato ken nasansantuan”4 a wagas, ad-adda a nakakonektatayo iti Mangisalakan ken, kasta met, matulongantayo ti dadduma nga umasideg Kenkuana.
Ania ti langa dayta a “wagas a nangatngato ken nasansantuan”? Ikarigatantayo ti agbiag iti ebanghelio iti amin a pannakipulapoltayo. Aywanantayo dagiti agkasapulan babaen ti pudno a ministering, a mangipekpeksa iti ayat babaen ti simple a serbisio. Ibinglaytayo ti naimbag a damag ti ebanghelio kadagiti agkasapulan iti talna ken pigsa ken “di ammo ti pakabirokan.”5 Agobratayo a mamagkaykaysa kadagiti pamilia iti kinaagnanayon iti agsumbangir ti belo. Ken kadagiti nagaramid iti katulagan iti balay ti Apo, kas inlawlawag ni President Russell M. Nelson, “Ikawes ti tunggal nataengan a temple patron ti sagrado a garment ti priesthood, [a] … mangipalagip kadatayo… a magna iti dana ti katulagan iti tunggal aldaw iti nangatngato ken nasansantuan a wagas.”6 Dagitoy nga aramid saan laeng a masansan a napateg iti inaldaw a pagragsakan—ken agnanayon a rag-o.
Awanen ti napatpateg pay iti agnanayon a panagdur-astayo no di ti panangtungpal kadagiti katulagantayo iti Dios. No maaramid dagiti sagrado a katulagantayo iti templo, makapagtalektayo iti narag-o a pannakitipon kadagiti ay-ayatentayo iti agsumbangir ti belo. Dayta ubing wenno nagannak wenno asawa a pimmusayen ket mangnamnama iti amin a pusona a napudnokanto kadagiti katulagan a mangbegkes kadakayo a sangkamaysa. No ditayo ikankano wenno silalag-an a tratuentayo dagiti katulagantayo iti Dios, isagmaktayo dagita nga agnanayon a begkes. Itan ti panawen nga agbabawi, agatur, ken agpadas manen.
Saan a manayon ti ragsak no isukattayo dagiti bendision ti agnanayon a rag-o iti apagkanito a nam-ay. Ania man ti edadtayo, dayta ti kinapudno: ti tulbek iti manayon a biag ket panagbiag iti ebanghelio ni Jesucristo ken panagtulnog iti katulagantayo. Impasingked ti propetatayo, ni President Nelson, a ti, “kangrunaan a talgedtayo ken ti napaut a ragsaktayo agpannuray laeng iti panagkapet iti landok a pagkaptan iti ebanghelio ni Jesucristo, a naan-anay kadagiti katulagan ken ordinansana. No aramidentayo, makapagtalgedtayo nga aglayag kadagiti naapres a danum gapu ta makaasidegtayo iti bileg ti Dios.”7
Adu kadatayo ti mangpaspasar kadagiti naapres a danum. No mayallontayo babaen dagiti dalluyon ti rigat ken no dadduma mabulsektayo babaen dagiti agus ti lulua a sumangbay kadagita a rigrigat, nalabit a ditay ammo no ania ti direksion ti pananggaudtayo iti bilog iti biagtayo. Mabalin a ditayo pay ipagarup nga adda pigsatayo nga agpaigid. Ti pananglagip no asinoka—maysa nga ipatpateg nga anak ti Dios—apay addaka iti daga, ken ti panggepmo a tun-oyen a makidenna iti Dios ken dagiti ipatpategmo ket makailawlawag iti pannirigam ket itudona kenka ti umno a direksion. Iti baet ti bagyo adda naraniag a silaw a mangipakita iti dalan. “Siak ti silaw nga agraniag iti kasipngetan,” kinuna ni Jesus.8 Maipanamnama kadatayo ti talged no kumitatayo iti silawna ken pagtalinaeden ti integridad dagiti katulagantayo.
Maysa a pribilehio a maam-ammo dagiti babbai iti amin nga edad nga agbibiag iti nadumaduma a kasasaad nga agtungtungpal kadagiti katulaganda. Inaldaw, kumitada iti Apo ken iti propetana para iti pannarabay, imbes nga iti nalatak a media. Iti laksid dagiti bukodda a karit ken makaperdi a pilosopia ti lubong a mangpawil kadakuada nga agtungpal kadagiti katulaganda, inkeddengda nga agtalinaedda iti dana ti katulagan. Agpannurayda iti kari ti “amin nga adda [iti] Ama.”9 Ket ania man ti edadyo, tunggal maysa kadakayo a babbai a nakitulag iti Dios kabaelanyo nga itag-ay ti silaw ti Apo, ket maiturongyo ti dadduma Kenkuana.10 Babaen ti panagtungpal kadagiti katulaganyo, bendisionannakayto iti bileg ti priesthoodna ken maaddaankayo iti napigsa nga impluensia iti amin a makapulapolyo. Kas iti imbaga ni President Nelson, dakayo dagiti babbai a mangipatungpalto kadagiti pammadto a naipadles!11
Patpatgen a kakabsat, kangrunaan ti amin, agtalinaedkayo iti dana ti katulagan ken ni Jesucristo! Nabendisionantayo nga umay ditoy lubong iti panawen nga adun dagiti templo iti lubong. Ti panagaramid ken panagtungpal kadagiti katulagan ket magun-od ti tunggal maikari a miembro ti Simbaan. Dakayo a young adult, diyo urayen ti panagasawa wenno panagmision tapno aramidenyo dagita a sagrado a katulagan. Makapagsaganaka a kas balasitang nga umawat iti saluad ken pigsa nga itden dagiti katulagan iti templo a madagdagus kalpasan nga agtawenka iti 18 no nakasaganakan nga umawat ken makarikna iti tarigagay a mangdayaw kadagita a katulagan ti templo.12 Dakayo a nakaawaten kadagiti bendision ti templo, diyo ipalubos dagiti makalapped wenno makasinga a mangyadayo kadakayo kadagiti agnanayon a kinapudno. Agadal ken agsaludsodkayo kadagiti matalek a pagtaudan iti dakdakkel a pannakaawat iti sagrado a kinapateg dagiti katulagan nga inaramidmo. Masansan a mapankayo iti templo agingga a kabaelanyo ket dumngegkayo iti Espiritu. Mariknayonto ti nadungngo a pammatalged nga addakayo iti dana ti Apo? Makitayonto ti tured nga agtultuloy kasta met a maitugotyo dagiti dadduma.
Ipaneknekko a no pilientayo ti agaramid kadagiti katulagan iti Nailangitan nga Ama ken maaddaan iti bileg ti Mangisalakan a mangtungpal kadagitoy, mabendisionantayto iti ad-adu a ragsak ditoy a biag ngem iti maipagaruptayo ken nadayag nga agnanayon a biag iti umay a lubong.13 Iti nagan ni Jesucristo, amen.