Natibker kadagiti Bagyo
No umay dagiti bagyo iti biag, mabalin a natibkerka agsipud ta nakatakderka iti bato ti pammatim ken ni Jesucristo.
Patpatgek a kakabsatko, nabendisionantayo iti daytoy nga aldaw a dumngeg kadagiti naparegta a katulongan ti Dios a mangted iti pammagbaga ken pammaregta. Ammo ti tunggal maysa kadatayo iti sadino man nga agbibiagtayo iti napeggad a panawen. Ikararagko a matulongankayo nga agtultuloy a natibker kadagiti bagyo a pakaipasanguantayo, nga addaan iti natalna a puso.1
Ti lugar a pangrugian ket ti pananglagip a tunggal maysa ket maipatpategtayo nga anak ti Dios ken adda dagiti naparegta a katulonganna. Nakitan dagita a katulongan ti Dios dagiti panawen a pagbibiagantayo. Nagsurat ni Apostol Pablo ken ni Timoteo, “Ngem ammuem daytoy, a kadagiti maud-udi nga al-aldaw umaydanto ti al-aldaw a napeggad.”2
Asino man nga addaan iti mata a makakita kadagiti pagilasinan ti tiempo ken lapayag a makangngeg kadagiti balikas dagiti propeta, ammoda a dayta ket pudno. Umay kadatayo dagiti pagpeggadan manipud kadagiti puersa ti kinadangkes. Umad-adu dagitoy a puersa. Agbalin a narigrigat a dayawen dagiti katulagan a rumbeng nga aramiden ken tungpalen tapno agbiagtayo iti ebanghelio ni Jesucristo.
Datayo a maseknan iti bagbagitayo ken dagiti patpatgentayo, adda namnama iti kari ti Dios a nangaramid iti natalged a lugar kadagiti umay a bagyo.
Adtoy ti maysa a balikas ti ladawan dayta a lugar. Madagdagullit nga iladladawan dagiti sibibiag a propeta daytoy. Kas pagarigan, kas naisurat iti Libro ni Mormon, imbaga ti naregta ken naayat nga ama kadagiti annakna a lallaki no kasano a papigsaenda dagiti bagida tapno agtalinaedda a natibker kadagiti bagyo a nasapsapa ngem dagitoy: “Ket ita, annakko, laglagipenyo, laglagipenyo a babaento ti bato ti Mannubbottayo, nga isu ni Cristo, ti Anak ti Dios, a nasken a bangonenyo ti pamuonyo; tapno no yeg ti sairo ti nabileg nga anginna, wen, dagiti gayang iti alipugpog, wen, no amin dagiti uraro ken nabileg a bagyona sumaplit kadakayo, awanto ti bilegna kadakayo a mangirarem, iti taaw ni ladingit ken awan inggana a kinaay-ay-ay, gapu iti bato a binangonyo, nga awan duadua a pamuon, … a no bangonen dagiti tao saanda a matuang.”3
Ti rigat ken ti awan inggana a ladingit a nasaritana ket dagiti nakaro nga epekto ti basbasol no ditayo naan-anay a pagbabawyan ida. Dagiti umad-adu a bagyo ket dagiti pannullisog ken ti umad-adu a panagdarup ni Satanas. Iti kaano man di nagbalin a napatpateg ngem ita a maawatan no kasano nga ipasdek dayta awan duadua a pundasion. Para kaniak, awan ti nasaysayaat a lugar a kitaen ngem iti maudi a sermon ni Ari Benjamin kas nairekord iti Libro ni Mormon.
Dagiti naimpadtuan a balikas ni Ari Benjamin ti mayaplikar kadatayo ita. Ammona manipud iti bukodna a padas dagiti kinarungsot ti gubat. Sinaluadanna dagiti taona iti kombat , nagpannuray iti bileg ti Dios. Nalawag a nakitana dagiti nakabutbuteng a bileg ni Lucifer a mangsulisog, manggandat a mangparmek, ken mangupay kadagiti annak ti Dios.
Inawisna dagiti taona ken datayo ti mangbangon iti awan duadua a bato ti kinatalged, nga isu ti Mangisalakan. Inlawlawagna a nawayatayo nga agpili iti umisu ken biddut ket ditayo maliklikan dagiti bunga dagiti pilitayo. Direkta ket natadem ti pannakisaritana gapu ta ammona no ania a leddaang ti sumangbay kadagiti saan a dumngeg ken agtungpal kadagiti ballaagna.
Daytoy ti panangiladawanna kadagiti bunga ti pilitayo no sumurottayo iti parikna ti Espiritu wenno sumurottayo iti mensahe ti kinadakes nga aggapu ken Satanas, a mangsulisog ken mangperdi kadatayo ti panggepna:
“Ta adtoy, adda rigat a naisaad kenkuana a mangpili nga agtungpal iti dayta nga espiritu; gapu ta no pilienna ti agtungpal kenkuana, ket agtalinaed ken matay a sibabasol, isu met laeng ti agsagaba iti pannakadadael ti kararuana ta inawatna ti gunggonana nga agnanayon a panagsagaba, gapu ta sinalungasingna ti linteg ti Dios a maikaniwas iti bukodna a pannakaammo. …
“Ngarud no saan nga agbabawi dayta a tao, ket agtalinaed ken matay a kabusor ti Dios, riingen ti pagayatan ti nailangitan a linteg ti saan a matay a kararuana iti nabiag a rikna iti bukodna a basol, mangpakessen kenkuana iti imatang ti Apo ken mangpunno iti barukongna iti manidsidir a basol, ken sakit, ken saem, a mayarig iti saan a masebseban nga apuy, ket agpangpangato ti gil-ayabna nga awan patinggana.”
Intuloy a kinuna ni Ari Benjamin, “O, kadakayo amin a nataengan, ken kasta met kadakayo nga agkabannuag, ken dakayo a babassit nga ubbing a makaawat kadagiti saok, gapu ta imbagak a silalawag kadakayo tapno maawatanyo, ikararagko nga agriingkayo a manglagip iti nakaal-alingget a kasasaad dagiti naglabsing.”4
Para kaniak, ti bileg dayta a ballaag nga agbabawi ket mapanunotko ti sigurado a tiempo inton agtakdertayo iti sanguanan ti Mangisalakan kalpasan daytoy a biag. Kalikagumantayo a naimpusuan a di umadayo gapu iti bain ngem ketdi sumango Kenkuana, kitaen a nakaisem, ken dumngeg a sawenna, “Naimbag, adipen a nalaing ken mapagtalkan: … sumrekka.”5
Inlawlawag ni Ari Benjamin no kasano nga umawattayo iti namnama a dumngeg kadagitoy a balikas no mabirokantayo ti wagas ditoy a biag tapno mabaliwan ti nakaparsuaantayo babaen ti Pannubbot ni Jesucristo. Dayta laeng ti wagas a pakabangonantayo iti awan duadua a pamuontayo ken agtakder a di maisin kabayatan dagiti bagyo ti sulisog ken pannubok a dumteng. Inladawan ni Ari Benjamin dayta a panagbaliw ti nakaparsuaantayo iti maysa a napintas a metapora a kanayon a nangsagid itoy pusok. Inaramat daytoy dagiti propeta iti rinibribun a tawen kasta met ti Apo. Isu daytoy: nasken nga agbalintayo a maysa nga ubing—maysa a bassit nga ubing.
Para iti dadduma, narigatto dayta nga awaten. Kaaduan kadatayo ti aggusto nga agbalin a napigsa. Maibilangtayo met ti bagitayo a kasla ubing a nakapsut. Padpadaanan ti adu a nagannak ti aldaw a saanton nga agtignay nga inuubing dagiti annakda. Ngem naawatan ni Ari Benjamin, ken ti asino man a mortal no ania ti kaipapanan ti agbalin a tao a napigsa ken natured, ipakitana a ti agbalin a maysa nga ubing ket saan a panagbalin nga inuubing. Daytoy ti panagbalin a kas iti Mangisalakan, a nagkararag iti Amana iti pigsa tapno maaramidna ti pagayatan ti Amana ken mangsubbot iti basbasol ti amin nga annak ti Amana ken kalpasanna inaramidna daytoy. Nasken a mabaliwan ti nakaparsuaantayo tapno agbalin kas maysa nga ubing ket makagun-od ti pigsa tapno natalged ken natalna iti tiempo ti rigat.
Daytoy ti panangiladawan ni Ari Benjamin no sumangbay dayta a panagbalbaliw: “Agsipud ta kabusor ti Dios ti nailubongan a tao, ket kastan manipud iti pannakatnag ni Adan, ket kastanto pay, iti agnanayon, malaksid no sumuko iti panangawis ti Nasantuan nga Espiritu, ken ikkatenna ti nailubongan a kinatao ket agbalin a santo babaen ti pannubbot ni Cristo nga Apo, ket agbalin a kasla ubing, natulnog, nadayaw, napakumbaba, naanus, napnuan ayat, siaayat a mangtungpal iti amin a banag a makita ti Apo a rumbeng nga ipabaklay kenkuana, kas iti ubing a natulnog iti amana.”6
Maawattayo dayta a panagbalbaliw no agaramid ken pabaruentayo dagiti katulagantayo iti Dios. Dayta ti mangyeg iti bileg ti Pannubbot ni Cristo a mangpalugod iti panagbalbaliw iti puspusotayo. Mariknatayo daytoy no makiranudtayo iti sakramento, aramiden ti ordinansa ti templo para iti pimmusayen a kapuonan, agpaneknek kas saksi ti Mangisalakan, wenno agaywan iti tao nga agkasapulan kas disipulo ni Cristo.
Kadagidiay a padas, iti panaglabas ti panawen agbalintayo a kas ubing iti kabaelantayo nga agayat ken agtulnog. Umaytayo agtakder iti awan duadua a pundasion. Ti pammatitayo ken ni Jesucristo ti mangiturong kadatayo nga agbabawi ken agtungpal kadagiti bilinna. Agtulnogtayo, ket magun-odtayo ti bileg a mangliklik iti sulisog, ken ti naikari a panangkadkadua ti Espiritu Santo.
Agbalbaliw ti nakaparsuaantayo tapno agbalin a kas maysa nga ubing, natulnog iti Dios ken ad-adda a managayat. Dayta a panagbalbaliw ti mangpaikari kadatayo tapno agragsak kadagiti sagut nga umay babaen ti Espiritu Santo. Ti panangkadkadua ti Espiritu Santo ti mangliwliwa, mangtarabay, ken mangpapigsa kadatayo.
Naammuak ti sumagmamano a kayat a sawen ni Ari Benjamin idi sawenna a makapagbalintayo kas maysa a bassit nga ubing iti sanguanan ti Dios. Nasursurok babaen iti adu a kapadasan a masansan unay nga agsao iti naulimek a timek ti Espiritu Santo, nalaka unay a mangngeg no ti puso ti maysa ket naemma ken managpabus-oy, kas iti maysa nga ubing. Kinapudnona, ti kararag a maar-aramid ket “Kayatko laeng no ania ti kayatmo. Ibagam laeng kaniak no ania dayta. Aramidekto!”
No umay dagiti bagyo iti biag, mabalin a natibkerka agsipud ta nakatakderka iti bato ti pammatim ken ni Jesucristo. Dayta a pammati ti mangiturongto kenka iti inaldaw a panagbabawi ken agtultuloy a panagtungpal iti katulagan. Kalpasanna kanayonto a laglagipem Isuna. Ken babaen dagiti bagyo ti gura ken kinadangkes, mariknamto ti kinatibker ken panangnamnama.
Ad-adda pay ngem dayta, makitamto ti bagim a mangitag-ay kadagiti dadduma iti nagtalged a bato. Ti pammati ken ni Jesucristo ti kanayon a mangiturong iti dakdakkel a namnama ken iti rikna ti kinaasi kadagiti dadduma, nga isu ti pudno nga ayat ni Jesucristo.
Iburayko kadakayo ti sagrado a pammaneknekko nga impaay kenka ti Apo a ni Jesucristo ti awis nga “Umayka kaniak.”7 Awisennaka, gapu ta ay-ayatennaka ken dagiti ay-ayatem, tapno umasideg Kenkuana para iti talna ditoy a biag ken ti agnanayon a biag iti umay a lubong. Ammona a naan-anay dagiti bagyo a sarangtenyonto iti pannakasuotyo kas paset iti plano ti kinaragsak.
Ipakaasik kadakayo nga awatenyo ti awis ti Mangisalakan. A kas maysa a naemma ken managayat nga ubing, awatem ti tulongna. Aramidem ken tungpalem dagiti katulagan nga idiayana iti Ti Simbaan ni Jesucristo dagiti Santo iti Ud-udina nga Aldaw. Dagitoy ti mangpatibkerto kadakayo. Ammo ti Mangisalakan dagiti bagyo ken dagiti lugar ti kinatalged iti dalan nga agsubli Kenkuana ken iti Nailangitan nga Amatayo. Ammona ti dalan. Isu ti Dalan. Ipaneknekko daytoy iti sagrado a nagan ni Jesucristo, amen.