Dagiti Adalen iti Bubon
Makaasidegtayo iti Mangisalakan para iti pigsa ken pangpaimbag a mangpabael kadatayo a mangtungpal kadagiti amin a nakaibaonantayo nga aramiden ditoy.
Anian a rag-o ti makiummong iti tunggal maysa kadakayo iti daytoy a sesion dagiti babbai ti sapasap a komperensia!
Dimmakkelak iti western New York ken dinar-ayak ti bassit a branch ti Simbaan agarup 20 milia (32km) manipud iti balaymi. Idi nagtugawak iti klase ti Sunday School iti sirok ti daan a maup-upaan a kapiliami a kaduak laeng ti gayyemko a ni Patti Jo, diak pulos impagarup nga agbalinak a paset ti global sisterhood ti minilmilion a babbai.
Lima tawen ti naglabas, nagsakit iti nakaro ti asawak, ni Bruce, idi agserserbikami kadagiti naikonsagrar a Santo iti Europe East Area. Nagawidkami, ket pimmusay kalpasan laeng ti sumagmamano a lawas. Nagbaliw ti biagko iti agpatnag. Nagladingitak ket nariknak ti kinakapuy ken kinalupoy. Impakaasik iti Apo nga iturongna ti dalanko: “Ania ti ipaaramidmo kaniak?”
Kalpasan ti mano a lawas, as-asikasuek ti mail-ko idi naiturong ti matak iti bassit a ladawan iti katalog. Idi asitgak, naamirisko a daytoy ti rendision ti artist iti babai a Samaritana a kaduana ni Jesus iti bubon. Iti dayta a kanito kinasaonak ti Espiritu a silalawag: “Dayta ti rumbeng nga aramidem.” Aw-awisennak ti naayat a Nailangitan nga Ama nga umasidegak iti Mangisalakan ket agadal.
Kayatko nga ibinglay kadakayo ti tallo a lesson nga ad-adalek bayat ti panagtuloyko nga uminum iti bubonna iti “sibibiag a danum.”1
Umuna: Dagiti Naglabas ken Agdama a Kasasaadtayo Saan a Mangikeddeng iti Masakbayantayo
Kakabsat, ammok nga adu kadakayo ti makarikna kas iti nariknak, agduadua a mangsango iti narigat a karit ken pannakapukaw—gapu ta saan a mapaspasamak ti biagyo iti wagas a ninamnama, inkararagan, ken plinanoyo.
Ania man ti kasasaadtayo, sagrado ti biagtayo ken adda kaipapanan ken panggepna. Maipatpateg nga anak ti Dios ti tunggal maysa kadatayo, nayanak iti kinadios iti kararuatayo.
Ti Mangisalakantayo, ni Jesucristo, babaen ti pangsubbot a sakripisiona, inaramidna a posible a madalusan ken maagasantayo, a mangpabael kadatayo a mangtungpal iti panggeptayo iti daga ania man ti pangngeddeng dagiti miembro ti pamilia, marital status, salun-at ti bagi wenno panunot, wenno ania man a situasion.
Ibilangyo ti babai iti bubon. Ania ti kita ti biagna? Impapan ni Jesus nga addaan ti babai iti lima nga asawa ken saan a naikallaysa iti lalaki a kadendennana. Ngem, iti laksid dagiti rigrigatna iti biag, isu ti umuna a nangibagaan ti Mangisalakan nga Isu ti Mesias. Kinunana, “Siak met laeng isuna a makisasao kenka.”2
Nagbalin a nabileg a saksi, a mangipakpakdaar kadagiti kailianna a ni Jesus isu ti Cristo. “Ket adu kadagiti Samaritano iti dayta a siudad ti namati kenkuana iti kinuna ti babai.”3
Dagiti naglabas ken agdama a kasasaadna saan a nangikeddeng iti masakbayanna. Kas kenkuana, mapilitayo ti umasideg iti Mangisalakan ita para iti pigsa ken pangpaimbag a mangpabael kadatayo a mangipatungpal iti amin a nakaibaonantayo nga aramiden.
Maikadua: Ti Bileg Adda Kadatayo
Iti pamiliar a bersikulo iti Doktrina ken Katulagan, yallukoy ti Mangisalakan kadagiti babbai ken lallaki a “siaanep a makiraman iti nasayaat nga aramid, ket agaramid iti adu a banag iti bukodda a pagayatan, ket agipatungpal iti adu a kinalinteg; ta adda kadakuada ti bileg.”4
Kakabsat, adda kadatayo ti bileg nga agipatungpal iti adu a kinalinteg!
Impaneknek kadatayo ni President Nelson, “Tunggal babai ken lalaki a makitulag iti Dios ken agtungpal kadagita a katulagan, ken maikari a makiraman kadagiti ordinansa ti priesthood, ket maikarida unay iti bileg ti Dios.”5
Naammuak a no agpasnektayo a mangdayaw iti sagrado a katulagan iti panagbuniag iti nasantuan a templo, bendisionannatayto ti Apo iti “pangpaimbag, pangpapigsa a bilegna” ken iti “naespirituan a pannakaawat ken pannakariing nga awanan[tayo] idi.”6
Maikatlo: “Agtaud kadagiti Babassit a Banag ti Naindaklan”7
Iti Kaskasaba iti Bantay, insuro ni Jesus kadagiti disipulona, “Dakayo ti asin ti daga”8 ken “Dakayo ti silaw ti lubong.”9 Idi agangay indasigna ti panagdur-as ti pagarian ti langit iti lebadura, “nga innala ti maysa a babai, ket inlaokna iti tallo a salup nga harina, agingga iti isu amin immalsa.”10
-
Asin
-
Lebadura
-
Silaw
Uray iti saggabassit unay, apektuan ti tunggal maysa ti amin a banag iti lawlawna. Awisennatayo ti Mangisalakan a mangusar iti bilegna nga agbalin nga asin, lebadura, ken silaw.
Asin
Makapasiddaaw no kasano ti kadakkel ti pagdumaan ti sangkabassit nga asin iti raman ti kanentayo. Ngem, ti asin ti maysa kadagiti kalakaan iti gatad ken kasimplean a paglaok.
Iti libro ti 2 Ar-ari, mabasatayo maipapan ti “balasang,”11 nga innala dagiti Sirios ken nagbalin nga adipen ti asawa ni Naaman, kapitan ti buyot ti Siria. Isu ti asin; agtutubo pay, awan ti pategna iti lubong, ket nagbalin nga adipen iti ganggannaet a pagilian a nalawag a saanna a ninamnama.
Nupay kasta, insaona ti dua a binatog nga addaan bileg ti Dios, nga agpampaneknek iti asawa ni Naaman: “Amangan koma no ni Apok adda iti mammadto nga adda idiay Samaria! no kasta immimbag koman iti kukutelna.”12
Nakadanon dagiti napammatian a balikasna ken Naaman, nga inaksionanna, a nangpalugod kenkuana tapno maimbagan ti bagi ken espirituna.
Masansan nga agpokustayo kadagiti adipen a nanguyot ken Naaman nga agdigos iti karayan Jordan, kas imbilin ni propeta Eliseo, ngem saan a napan ni Naaman iti ridaw ni Eliseo nga awan ti “balasang.”
Mabalin nga agtutubokayo wenno makarikna nga awan pategyo, ngem makapagbalinkayo kas asin iti pamilia, pagadalan ken komunidadyo.
Lebadura
Nangankay kadin iti tinapay nga awan lebadurana? Kasano nga iladawanyo daytoy? Napuskol? Nadagsen? Natangken? Babaen laeng iti sangkabassit a lebadura, umalsa ti tinapay, dumakkel nga agbalin a nalaglag-an ken nalamlamuyot.
No awisentayo ti bileg ti Dios iti biagtayo, masukatantayo iti “espiritu ti ladingit”13 nga addaan pannirigan a mangitag-ay iti dadduma ken mangted siled iti puspuso a maagasan.
Itay nabiit maysa a gayyemko ti nakaidda iti agsapa ti Paskua, nga agladladingit. Impakaasi dagiti annakna a bumangon; nupay kasta, napnuan iti saem gapu iti agur-uray a diborsiona. Nakaidda nga agsangsangit, imbukbokna ti kararuana iti kararag iti Nailangitan nga Ama, a mangibagbaga iti pannakaupayna.
Idi gibusanna ti kararagna, inyarasaas ti Espiritu kenkuana nga ammo ti Dios ti saemna. Napnuan isuna iti panangngaasina kenkuana. Daytoy sagrado a padas ti nangpatalna iti riknana ken nangpanamnama kenkuana a saan nga agladladingit nga agmaymaysa. Bimmangon, rimmuar, ket nangbukel iti maysa a snowman kaduana dagiti annakna, a mangsuksukat iti ladingit dayta a bigat iti ragsak ken rag-o.
Silaw
Kasano ti kaadu ti silaw a mausar a mangpukaw iti sipnget iti siled? Maysa a bassit a rayos. Ket dayta a rayos ti silaw iti nasipnget a lugar makapagtaud iti bileg ti Dios kadakayo.
Nupay mariknayo nga agmaymaysakayo a mangpasar iti rigrigat ti biag, mapagraniagyo ti silaw iti sipnget ti di panagkikinnaawatan, pannakatikaw, ken kinaawan pammati. Ti silawyo iti pammati ken Cristo ket agbalin a natibker ken awan duadua, a mangiturong kadagiti adda iti lawlawyo iti talged ken talna.
Kakabsat, makapagbalbaliw ti puspuso ken maparaburan ti biag no idiayatayo ti sangapirit nga asin, sangakutsara a lebadura, ken rayos ti silaw.
Paneknekak a ti Mangisalakan ti asin iti biagtayo, mangaw-awis kadatayo a mangraman iti rag-o ken ayatna.14 Isu ti lebadura no narigat ti biagtayo, a mangmangted kadatayo iti namnama15 ken mangitagtag-ay iti dagensentayo16 babaen ti awan kapadana a bileg ken pangsubbot nga ayatna.17 Isu ti silawtayo,18 a mangsilsilnag iti dalantayo nga agawid.
Ikararagko a makaasidegtayo iti Mangisalakan, kas iti babai iti bubon, ket uminum iti sibibiag a danumna. Kadua dagiti tao ti Samaria, maipakdaartayo, “Ita mamatikami, … dakami met laeng nangngegmi ket ammomi a pudno daytoy ni Cristo, ti Mangisalakan ti lubong.”19 Iti nagan ni Jesucristo, amen.