Pangrugi a Mensahe
Dayawenmi dagiti annak a babbai ti Dios iti daytoy espesial a sesion babaen ti panangipamaysada kadagiti pakaseknanda ken dagiti adda iti organisasionda.
Patpatgek a kakabsatko a babbai, bayat ti panangrugitayo iti daytoy naisangsangayan a sesion dagiti babbai ti sapasap a komperensia, maragsakanak a mangted daytoy a pangrugi a mensahe manipud iti Umuna a Panguluen.
Dagiti sesiontayo iti Sabado addaan iti pakasaritaan ti nadumaduma a panggep ken nadumaduma nga agbuybuya ken agdengdengngeg. Daytoy a sardam nayonantayo dayta a pakasaritaan bayat ti iseserrektayo iti baro a panggep ken pamuspusan para iti makita a masakbayan. Saan nga agbalbaliw ti ebanghelio ni Jesucristo. Saan nga agbalbaliw ti doktrina ti ebanghelio. Saan nga agbalbaliw dagiti bukod a katulagantayo. Ngem iti panaglabas dagiti tawen, dagiti miting nga angayentayo a mangipakaammo kadagiti mensahetayo ket agbalbaliw ken nalabit unay nga agtultuloy nga agbaliw iti panaglabas dagiti tawen.
Para ita, daytoy a miting iti sardam ti Sabado ket maysa a sesion ti sapasap a komperensia, saan a sesion ti ania man nga organisasion. Kas iti amin a sesion ti sapasap a komperensia, ti panagplano, dagiti agsarita, ken ti musika ket intuding ti Umuna a Panguluen.
Indawatmi ken ni President Jean B. Bingham, General President ti Relief Society, a mangiturong iti daytoy a sesion. Dagiti masakbayan a sesion iti sardam ti Sabado mabalin nga iturong ti maysa kadagiti dadduma pay a Sapasap nga Opisial ti Simbaan, kas kadagiti miembro dagiti Sapasap a Panguluen ti Relief Society, Young Women, ken Primary, nga intuding ti Umuna a Panguluen.
Ita a sardam, ipamaysa ti sesion ti sardam ti Sabado ti sapasap a komperensia maipapan kadagiti pakaseknan dagiti babbai a Santo iti Ud-udina nga aldaw. Iraman ditoy ti doktrina ti Ti Simbaan ni Jesucristo dagiti Santo iti Ud-udina nga Aldaw, dagiti annuroten ti Simbaan a mainaig a naipangruna iti babbai, ken dagiti sapasap a pagrebbengan ken aramid dagiti organisasion a pakairamanan dagiti babbai ken babbalasitang ti Simbaan. Nupay daytoy a sesion ket nairanta a broadcast iti sapasap nga agbuybuya kas iti amin a sesion ti sapasap a komperensia, dagiti naawis nga agbuybuya nga umay iti Conference Center para iti daytoy a sesion ket dagiti babbai ken babbalasitang nga agtawen iti 12 ken natataengan. Inramanmi ti sumagmamano a priesthood leader a mangidaulo kadagiti makiramraman nga organisasion.
No ania ti rugrugianmi ditoy ket umawat iti pamataudan iti komunikasion nga agdama a magun-od iti kinadaulo ken kinamiembro iti sapasap a Simbaan ti Apo. Ti doktrina ti ebanghelio ni Jesucristo ket para iti amin, isu a dayta ti kangrunaan a motibotayo ken ti kadakkel ti diseminasion. Dayawenmi dagiti annak a babbai ti Dios iti daytoy espesial a sesion babaen ti panangipamaysa iti pakaseknanda ken dagiti adda iti organisasionda.
Agyamankami iti ited ti teknolohia ti broadcast itan kadagiti lider ti Simbaan a kabaelan nga ag-conduct iti detaliado a training babaen ti panangsungbat kadagiti maitudo nga agbuybuya ken dumdumngeg iti tay-ak. Awatenmi pay ti kinapudno nga umad-adun dagiti agdama a gundaway iti panagbiahe. Dayta ti mangipalubos a mangibaonkami kadagiti lider iti Simbaan nga ag-conduct iti kasapulan a regular face-to-face leadership training iti tay-ak.
Daytoy ti aramid ni Apo Jesucristo. Datayo ti katulonganna, nga inturong ti Espiritu Santo. Idawatmi dagiti bendision ti Apo kadagiti lider dagitoy nga organisasion ken kadagiti napudno a babbai ken babbalasitang nga agserbi iti Apo kadagitoy nga organisasion ken iti bukodda a biag. Iti nagan ni Jesucristo, amen.