Maipatpateg nga Annak a Babbai

Ni Bonnie H. Cordon

Sapasap a Presidente ti Young Women

Iti sentro ti amin nga aramidentayo iti Young Women ket tarigagaymi a makatulong kadakayo a manggun-od iti di maisin a pammati ken ni Apo Jesucristo.

Patpatgek a kakabsatko a babbai, naragsak a makaduadakayo! Saksaksianmi ti pannakaibukbok ti paltiing nga agpada a naespirituan ken mangparparegta.

Iti panangrugitayo, kayatko a yam-ammo kadakayo ti sumagmamano a gagayyem; isuda dagiti babbalasitang a naidumduma iti talento, galad, ken kasasaad iti bukod ken pamilia. Tunggal maysa kadakuada, kas kadakayo amin, ket nangparegta iti pusok.

Bella

Umuna, yam-ammok ni Bella. Napigsa nga agmaymaysa a balasitang iti branchna iti Iceland.

Josephine

Yam-ammok ti napasnek a ni Josephine iti Africa, a nagkumit nga agadal iti Libro ni Mormon iti inaldaw. Taktakuatenna ti bileg ken dagiti parabur manipud iti daytoy simple, napudno a tignay.

Ashtyn

Ket kaudianna, yam-ammok ti ay-ayatek a gayyem a ni Ashtyn, nakaskasdaaw a balasitang a pimmusay kalpasan ti innem a tawen a pannakirangetna iti kanser. Ti napigsa a pammaneknekna iti Pannubbot ni Jesucristo ket mangar-aring pay laeng iti pusok.

Nakaskasdaawkayo amin a babbalasitang. Naidumdumakayo, addaankayo iti bukod a sagut ken padas ngem agpapadakayo iti nakapatpateg ken agnanayon a wagas.

Dakayo ti literal nga espiritu nga annak dagiti Nailangitan a Nagannak, ket awan ti makaisina kadakayo iti ayatda ken ti ayat ti Mangisalakanyo.¹ No umasidegkayo Kenkuana, uray mangalakayo iti kabassitan nga addang ti maladaga, takuatenyo ti manayon a talna nga agtalinaed iti kararuayo kas napudno a disipulo ti Mangisalakan, ni Jesucristo.

Kiniddaw ni Presidente Russell M. Nelson, ti ay-ayatentayo a propeta, nga ibinglayko ti sumagmamano a naparegta a panagbalbaliw a makatulongto kadakayo a “mangpadur-as iti sagrado a bukod[yo] a potensial”² ken padur-asenyo ti nalinteg nga impluensiayo. Isaritak ti uppat a tay-ak ti panagbalbaliw ita a rabii.

Tema ti Young Women

Umuna, iti sentro ti amin nga aramidentayo iti Young Women ket tarigagaymi a makatulong kadakayo a manggun-od iti di maisin a pammatiyo ken ni Apo Jesucristo³ ken ti awan duadua a pannakaammo iti nadiosan a pakabigbiganyo kas babai nga anak ti Dios.

Ita, kayatko nga ipakaammo ti rebision ti tema ti Young Women. Ikararagko a mariknayonto ti Espiritu Santo a mamaneknek iti kinapudno dagitoy a balikas bayat ti panangisaok iti baro a tema:

Maysaak a maipatpateg nga anak a babai dagiti nailangitan a nagannak,⁴ nga addaan iti nadiosan a kababalin ken agnanayon a pagtungpalan.⁵

Kas disipulo ni Jesucristo,⁶ ikarigatak ti agbalin a kas Kenkuana.⁷ Agsapul ken agtignayak a mayannurot iti bukod a paltiing⁸ ken agserbi iti dadduma babaen ti nasantuan a naganna.⁹

Agtakderakto a kas saksi ti Dios iti amin a panawen ken iti amin a banag ken iti amin a lugar.¹⁰

Bayat ti panangikarigatak tapno maikari iti pannakaitan-ok,¹¹ ipategko ti sagut ti panagbabawi¹² ket agkalikagum a dumur-as iti inaldaw.¹³ Addaanak iti pammati,¹⁴ papigsaek ti pagtaengak ken pamiliak,¹⁵ agaramid ken agtungpalak kadagiti sagrado a katulagan,¹⁶ ken umawatak kadagiti ordinansa¹⁷ ken bendision ti nasantuan a templo.¹⁸

Kitaen ti panagsukat ti “tayo” iti “siak.” Dagitoy a kinapudno mayaplikar kenka kas indibidual. Maysaka a a maipatpateg nga anak dagiti Nailangitan a Nagannak. Maysaka a naitulag a disipulo ti Mangisalakantayo, ni Jesucristo. Awisenka nga agadal ken agutob kadagitoy a balikas. Ammok a no aramidem, magun-odmonto ti pammaneknek ti kinapudnoda. Ti pannakaawat kadagitoy a kinapudno ket mangbalbaliwto iti wagas a pakaipasanguam kadagiti karit. Ti pannakaammom iti pakabigbigam ken panggepmo ket mangtulongto kenka a mangisilpo iti pagayatam ken ti pagayatan ti Mangisalakan.

Kukuamto ti kappia ken pannarabay no surotem ni Jesucristo.

Dagiti Klase ti Young Women

Ti maikadua a tay-ak ti panagbalbaliw ket mangapekto kadagiti klase ti Young Women. Kinuna ni Elder Neal a. Maxwell, “Masansan a ti kasapulan unay ti tao ket addaan pagkamangan kadagiti bagyo ti biag iti santuario ti pakaibilangan.”¹⁹ Dagiti klasetayo ti nasken a pagkamangan manipud kadagiti bagyo, natalged a lugar ti ayat ken pakaibilangan. Iti panagkagumaan a mangbangon iti dakdakkel a panagkaykaysa, mangpapigsa panaggagayyem, ken mangpapigsa iti dayta a rikna ti pannakaibilang iti uneg ti Young Women, agar-aramidtayo iti sumagmamano a panagbalbaliw iti istruktura ti klase.

Iti nasurok a100 a tawen, nabingay dagiti agtutubo a babbai iti tallo a klase. Iti panangrugi a dagus, awisenmi dagiti lider ti Young Women ken dagiti bishop a nainkararagan nga ibilangda dagiti kasapulan ti tunggal agtutubo a babai ket urnosen ida babaen ti edad a maibataykadagiti masinunuo a kasasaad ti ward. Dagitoy ti sumagmamano a pagarigan ti mabalin a langa daytoy.

• No addaankayo iti manmano nga agtutubo a babbai, maaddaankayo iti maysa a klase ti Young Women iti miting ti amin.

• Nalabit nga addaankayo iti dakkel a grupo dagiti agtutubo a babbai agtawen iti 12 sa maysa a bassit a grupo dagiti agtutubo a babbai nga in-inauna. Maikeddengyo nga adda dua a klase: Young Women 12 ken Young Women 13–18.

• Wenno no addaankayo iti dakkel a ward ti 60 nga agtutubo a babbai a dumardar-ay, maaddaankayo iti innem a klase, maysa a para iti tunggal tawen, a maurnos babaen ti tawen.

Nupay kasta nabukel dagiti klaseyo, napategkayo nga agtutubo a babbai iti panangbangon iti panagkaykaysa. Agbalinkayo a silaw kadagiti aglawlawyo. Agbalinkayo a pagtaudan ti ayat ken pammateg a namnamaemyo nga awaten manipud iti dadduma. Addaan kararag iti pusoyo, agtultuloy a tumulong ken agbalin a puersa iti nasayaat. No aramidenyo, mapnonto ti pusoyo iti kinaimbag. Maaddaankayo iti nasaysayaat a rikna iti dadduma ket mangrugi a makitayo ti kinaimbagda a kas supapak.

Dagiti Nagan ti Klase ti Young Women

Maikatlo, iti daytoy baro nga organisasion ti klase, maibasarto ti amin a klase babaen ti nakaykaysa a nagan ti “Young Women.”²⁰ Isardengtayonton ti nagan ti “Beehive,” “Mia Maid,” ken “Laurel.”

Panangpapigsa kadagiti Panguluen ti Klase

Ti maudi a tay-ak a kayatko nga isarita ket ti pateg dagiti panguluen ti klase. Kasano man ti pannakabukel dagiti klase ti Young Women, nasken a maaddaan ti tunggal klase ti panguluen ti klase!²¹ Babaen ti nadiosan a plano a maawagan dagiti agtutubo a babbai a mangidaulo kadagiti agtutuboda.

Ti akem ken panggep dagiti panguluen ti klase ket napapigsa ken ad-adda a nailawlawag. Ti aramid ti pannakaisalakan ket maysa kadagitoy napapateg a pagrebbengan, nangnangruna iti tay-ak ti ministering, aramid ti misionario, panagpaaktibo, ken aramid iti iti templo ken pakasaritaan ti pamilia.²² Wen, kastoy ti panangummongtayo iti Israel²³—maysa a nagloriaan nga aramid para iti amin nga agtutubo a babbai kas miembro ti buyot dagiti agtutubo ti Mangisalakan.

Kas ammoyo, iti tunggal lebel ti Simbaan, awagan ti Apo dagiti panguluen a mangidaulo kadagiti taona. Dakayo a babbalasitang, ti panagbalin a miembro ti panguluen ti klase ket mabalin nga umuna a gundawayyo a makiraman iti daytoy naparegta a pagtuladan ti panangidaulo. Dakayo nga adult leader, aramidenyo ti takem dagiti panguluen ti klase a prioridad ket kalpasanna idauluan ida a side by side, suruan ken tarabayen ida tapno makapagballigida.²⁴ Ania man ti lebel ti padas iti panangidaulo ti panguluen ti klase, mangrugi no sadinoda ken tulongan ida a dumur-as ikadagiti panglaingan ken panagtalek a mangparaburto kadakuada kas lider. Agtalinaedkayo nga asideg kadakuada, ngem diyo pengdan ida. Tarabayennakayto ti Espiritu bayat ti panangtarabayyo kadakuada.

Chloe

Tapno mailadawan iti napateg nga akem dagiti nagannak ken lider kas mannursuro, bay-andak a mangisarita ti maysa nga estoria. Naawagan ni Chloe nga agserbi a kas presidente ti klase. Inallukoy isuna ti masirib a priesthood liderna nga agpatulong iti Apo iti panangirekomendana iti nagnagan para iti panguluenna. Nagkararag ni Chloe ket immawat iti pammaregta no asino ti irekomendana kas mamagbagana iti nadaras. Idi intuloyna ti agutob ken agkararag maipapan iti maysa a sekretaria, inulit nga inturong ti Espiritu ti pokusna iti balasitang a namagsiddaawan kenkuana—maysa a tao a manmano a makimisa wenno dumar-ay iti aktibidad.

Nariknana a di sierto iti parikna, kinasao ni Chloe ti inana, a nangilawlawag a maysa kadagiti wagas a pakaawatantayo iti paltiing ket babaen ti di agbalbaliw a pampanunot. Addaan iti napabaro a panagtalek, narikna ni Chloe a nasken nga irekomendana daytoy nga agtutubo a babai. Inted ti bishop ti takem, ket inawat ti agtutubo a babai. Kalpasan a na-set apart, kinuna daytoy nasingpet a sekretaria, “Ammom, diak pulos narikna a kasla adda lugarko wenno kasapulandak. Diak narikna idi a maibagayak. Ngem iti daytoy nga akem, mariknak a kasla adda panggep ti Nailangitan nga Ama ken lugar para kaniak.” Iti pimmanaw Chloe ken ti inana iti miting, sinango ni Chloe ti inana ket kinunana nga aglulua, “Pudno ti paltiing! Talaga nga agaramid ti paltiing!”

Dakayo a panguluen ti klase, inawagannakayo ti Dios ken nagtalek a mangidaulokayo iti grupo dagiti annakna a babbai. “Am-ammonakayo ti Apo. … Pinilinakayo.”²⁵ Dakayo ket sinet apart ti maysa nga addaan turay ti priesthood; kayatna a sawen nga aramidenyo dagiti pagrebbengan ti takemyo, usarenyo ti turay ti priesthood. Addaankayo iti napateg a trabaho nga aramiden. Managriknakayo koma kadagiti pannignay ti Espiritu Santo. No aramidenyo, makapagserbikayo nga addaan panagtalek, gapu ta dikayo agserbi a dakdakayo!

Dakayo a presidente ti klase, kasapulanmi ti sirib, timek, ken pigsayo iti baro a youth council ti ward nga impakaammo ni Elder Quentin L. Cook itay laeng. Napategkayo a paset ti pangrisut iti panangipaay iti kasapulan dagiti kakabsatyo.²⁶

Dagita a panagbalbaliw iti organisasion ken panangidaulo iti klase mairugi a dagus no nakasaganan dagiti ward ken branch ngem nasken a marugian iti Enero 1, 2020.

Patpatgek a kakabsatko a babbai, paneknekak a dagitoy a panagbalbaliw a nasaokon ket naparegta a pangiturong manipud ti Apo. No sipapasnek nga ipatungpaltayo dagitoy a panagbalbaliw, ditay koma liplipatan ti panggeptayo: papigsaentayo ti pangngeddengtayo a mangsurot ken ni Jesucristo ket tulongantayo dagiti dadduma nga umasideg Kenkuana. Paneknekak a Simbaanna daytoy. Agyamanak ta pinalugodannakami nga agbalin a napateg unay a paset ti sagrado nga aramidna.

Sapay koma ta trabayennakayo ti isu met la nga Espiritu a nangtarabay kadagitoy a panangbalbaliw bayat ti panagtultuloyyo iti dana ti katulagan. Paneknekak iti nagan ni Jesucristo, amen.

Dagiti Nagadawan

1. Kitaen iti Taga Roma 8:35–39.

2. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nob. 2019, 39.

3. Kitaen iti Dagiti Proverbio 3:5–7; Jacob 7:5.

4. Kitaen iti Romans 8:16–17; Doctrine and Covenants 76:24; “The Family: A Proclamation to the World,” Liahona, Mayo 2017, 145.

5. Kitaen iti 2 Pedro 1:3–4; Alma 37:44; Doktrina ken Katulagan 78:18; “The Family: A Proclamation to the World.”

6. Kitaen iti Juan 13:14–15, 35.

7. Kitaen iti Mateo 22:37–39; 25:40; 3 Nephi 12:48.

8. Kitaen iti Juan 16:13; 3 Nephi 14:7–8; Moroni 7:13; 10:5; Doktrina ken Katulagan 8:2; 9:8; 11:13.

9. Kitaen iti Mateo 20:26–28; 22:37–39; 25:34–40; 3 Nephi 26:19.

10. Kitaen iti Isaias 43:10; Mosiah 18:9; Doktrina ken Katulagan 14:8.

11. Kitaen iti Taga Roma 8:17; 2 Nephi 9:18; 31:20; Doktrina ken Katulagan 84:38; 132:49; Moises 1:39.

12. Kitaen iti Helaman 12:23; Moroni 10:33; Doktrina ken Katulagan 58:42.

13. Kitaen iti Alma 34:33; Doktrina ken Katulagan 82:18.

14. Kitaen iti Hebreo 11; 2 Nephi 31:19–20; Alma 32:21.

15. Kitaen iti Joshue 24:15; Alma 34:33109:8; 132:19.

16. Kitaen iti Exodo 19:5; 1 Nephi 14:14; 2 Nephi 11:5; Alma 34:33 54:6; 66:2; 90:24.

17. Kitaen iti Mosiah 13:30; Alma 30:3; Alma 34:33 84:20–22; Pagannurotan ti Pammati 1:3.

18. Kitaen iti Salmo 24:3; Isaias 2:3; Ezekiel 37:26.

19. Neal A. Maxwell, All These Things Shall Give Thee Experience (1979), 55.

20. Nasken a maibasar dagiti klase babaen ti napagkaykaysa a pangawag ti “Young Women.” Tapno mailasin ti maitudo a klase, iraman ti edad—kas pagarigan, “Young Women 12–14”; “Young Women 15–18” (kitaen iti Handbook 2: Administering the Church, 10.1.5, ChurchofJesusChrist.org).

21. Nasken a maawagan ti panguluen ti klase para iti tunggal klase ti Young Women. Iti lugas a mabalin, nasken a maawagan ti sibubukel a panguluen, nga addaan iti presidente, dua a mamagbaga, ken sekretaria. No kasapulan, mabalin nga awagan ti saan a kumpleto a panguluen (kitaen iti Handbook 2, 10.3.5).

22. Kitaen iti Handbook 2, 10.3.5.

23. Kitaen iti Russell M. Nelson “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

24. Adda a magun-od ti nayon a pangiturong para kadagiti adult Young Women leader iti Handbook 2, chapter 10.

25. Henry B. Eyring, “Rise to Your Call,” Liahona, Nob. 2002, 76.

26. No addaankayo iti maysa laeng a klase ken maysa a panguluen ti klase, mabalin a makiraman iti ward youth council ti sibubukel a panguluen kadua dagiti presidente ti korum ti Aaronic Priesthood isu nga adda balase dagiti agtutbo a babbai ken agtutubo a lallaki (kitaen iti Handbook 2, 18.2.9).