Dua a Dakkel a Bilin
Ikarigatantayo koma a tungpalen ti agpada a dakkel a bilin. Tapno maaramid, magnatayo iti natimbeng a linteg ken ayat.
Patpatgek a kakabsatko a babbai iti ebanghelio ni Jesucristo, kablaawankayo kas nadutokan nga agbambantay ti agnanayon a pamilia. Sinuruannatayo ni Presidente Russell M. Nelson, “Naisubli daytoy a Simbaan tapno mabukel, mailantip, ken maitan-ok dagiti pamilia iti agnanayon.”1 Adda napateg nga implikasion dayta a sursuro kadagiti tao a mabigbig a lesbian, gay, bisexual, wenno transgender, a gagangay a makuna nga LGBT.2 Impalagip pay kadatayo ni Presidente Nelson a ditayo “nasken a [kanayon] nga aginnamong tapno aggiinnayat.”3 Napateg dagitoy a napadtuan a pannursuro kadagiti saritaan ti pamilia a mangsungbat iti saludsod dagiti ubbing ken agtutubo. Nainkararagan a sinapulko ti pammaregta nga agsao iti daytoy nga ummong gapu ta naidumduma nga inaringannakayo dagitoy a saludsod, a direkta wenno saan a direkta a mangapekto iti tunggal pamilia iti Simbaan.
I.
Rugiak iti insuro ni Jesus a dua a dakkel a bilin.
“Ayatem ti Apo a Diosmo iti amin a pusom, ken iti amin a kararuam, ken iti amin nga isipmo.
“Daytoy ti umuna ken dakkel a bilin.
“Ket ti maikadua isu umasping kenkuana, Ayatem ti padam a tao a kas iti bagim.”4
Kaipapanan daytoy a nabilintayo nga ayaten ti tunggal maysa, gapu ta isuro ti pangngarig ni Jesus iti naimbag a Samaritano a kaarrubatayo ti tunggal maysa.5 Ngem ti regtatayo nga agtungpal iti daytoy maikadua a bilin ket saan koma a gapu a lipatentayo ti umuna, ayatentayo ti Dios iti amin a puso, kararua, ken isiptayo. Ipakitatayo dayta nga ayat babaen ti “[panag]tungpal kadagiti bilin[na].”6 Idawat ti Dios a tungpalentayo dagiti bilinna gapu ta babaen laeng iti dayta a panagtungpal, agraman panagbabawi, makasublitayo nga agbiag iti sidongna ket agbalin a perpekto kas Kenkuana.
Iti kallabes a bitlana kadagiti young adult ti Simbaan, insarita ni Presidente Russell M. Nelson ti inawaganna iti “napigsa a koneksion ti ayat ti Dios ken dagiti lintegna.”7 Ti linteg a kangrunaan a mayaplikar iti isyu a mainaig iti mabigbig a kas LGBT ket linteg ti Dios iti kallaysa ken ti kaduana a linteg ti kinadalus ti dayaw. Agpada a napateg iti plano ti Amatayo iti Langit iti pannakaisalakan dagiti annakna. Kas insuro ni Presidente Nelson, “Dagiti linteg ti Dios ket paregtaen ti awan patinggana nga ayatna para kadatayo ken ti tarigagayna nga agbalintayo iti amin a kabaelantayo a pagbalinan.”8
Insuro ni Presidente Nelson:“Adu a pagilian … ti namagbalin a legal ti kallaysa ti agpada a lalaki/agpada a babai wenno same-sex marriage. Kas miembro ti Simbaan, dayawentayo ti linteg ti daga … , agraman ti kallaysa a sibil. Nupay kasta, kinapudnona, nga idi punganay … inordenan ti Dios ti kallaysa! Ket agingga itoy nga aldaw inlawlawagna a nagbaetan ti lalaki ken babai. Saan a binaliwan ti Dios ti panangilawlawagna iti kaipapananna iti kallaysa.
Intuloy ni Presidente Nelson: “Saan pay a binaliwan ti Dios ti lintegna ti kinadalus ti dayaw. Saan a nabalbaliwan dagiti naidawat a kasapulan tapno sumrek iti templo.”9
Impalagip ni Presidente Nelson kadakami amin a “ti pagrebbenganmi kas Apostol ti mangisuro laeng iti kinapudno. Dayta a pagrebbengan saan a mangted kadakami iti turay a mangbaliw iti nadiosan a linteg.”10 Ngarud, kakabsatko a babbai, nasken a kanayon nga isuro dagiti lider ti Simbaan ti naidumduma a pateg ti kallaysa ti nagbaetan ti lalaki ken babai ken ti mainaig a linteg ti kinadalus ti dayaw.
II.
Ti aramid ti Ti Simbaan ni Jesucristo dagiti Santo iti Ud-udina nga Aldaw ket mainaig iti panangisagana kadagiti annak ti Dios para iti celestial a pagarian,ken kangrunaanna para iti kangatuan a gloriana, ti pannakaitan-ok wenno agnanayon a biag. Posible laeng ti kangatuan a pagtungpalan babaen ti kallaysa para iti kinaagnanayon.11 Iraman ti agnanayon a biag dagiti bileg nga agpartuat a napateg iti panagtipon ti lalaki ken babai12—nga iladawan ti agdama a paltiing a “panagtuloy dagiti bukel iti agnanayon.”13
Iti mensahena kadagiti babbaro ken babbalasang, insuro ni Presidente Nelson, Ti panagtungpal kadagiti linteg ti Dios ket mamagtalinaedto kadakayo a natalged bayat ti panangdur-asyo nga agturong iti pannakaitan-ok”14—a dayta ti, agbalin a kas iti Dios, addaan iti naitan-ok a biag ket nadiosan a potensial dagiti Nailangitan a Nagannaktayo. Dayta ti pagtungpalan a tarigagayantayo para iti amin nga ay-ayatentayo. Gapu iti dayta nga ayat, ditay mabalin a sukatan iti dayta nga ayat dagiti bilin kenti plano ken aramid ti Dios, nga ammotayo a mangyegto kadagiti ipatpategtayo iti kaindaklan a ragsakda.
Ngem adu dagiti ipatpategtayo, agraman dagiti ssumagmamano nga addaan iti naisubli nga ebanghelio, dagiti saan a mamati wenno mangpili a sumurot kadagiti bilin ti Dios maipapan iti kallaysa ken ti linteg ti kinadalus ti dayaw. Ania ti mapasamak kadakuada?
Ipakita ti doktrina ti Dios nga annaknatayo amin ket pinarsuanatayo tapno agragsak.15 Isuro ti agdama a paltiing a nangted ti Dios iti plano iti mortal a padas a pakapagpilian ti amin nga agtulnog a mangsapul iti kangatuan a bendisionna wenno agpili a mangiturong iti maysa iti babassit ti dayagna a pagarian.16 Gapu iti ayat ti Dios iti amin nga annakna, nasaysayaat pay laeng dagiti nababbaba a pagarian ngem iti panagawat dagiti tao.17 Ti Pannubbot ni Jesucristo ti mamagbalin amin daytoy, bayat ti “panangitan-okna iti Amana, ken isalakanna amin nga aramid ti imana.”18
III.
Naisaok maipapan iti umuna a bilin, ngem ania ti maikadua? Kasano a matungpaltayo ti bilin nga ayaten ti padatayo a tao? Allukoyenmi dagiti miembrotayo a dagiti sumurot iti sursuro ken tignay ti lesbian, gay, bisexual, wenno transgender nasken a matratoda iti ayat nga imbilin ti Mangisalakan nga ipakitatayo iti amin a padatayo a tao. Iti kasta, idi maipakaammo a legal ti kallaysa ti agpada a lalaki/agpada a babai wenno same-sex marriage iti Estados Unidos, impakdaar ti Umuna a Panguluen ken ti Korum dagiti Sangapulo-ket-dua nga Apostol: Isuronatayo ti ebanghelio ni Jesucristo nga ayaten ken tratuentayo ti amin a tao iti kinaimbag ken panagdayaw—uray pay no sumuppiattayo. Pasingkedanmi a dagiti agusar iti linteg wenno annuroten iti korte a mangpalpalugod iti same sex marriage ket saan koma matrato iti kinaawan respeto.”19
Kasta met a, nasken a ditayo idadanes dagiti ditayo kapada iti pammati ken panagkumit.20 Makapaliday ta adda dagiti tao a maipaspasango kadagitoy nga isyu ti agtultuloy a makarikna nga awan pategda ken saan a maawat ida ti sumagmamano a miembro ken lider iti pamilia, ward, ken staketayo. Nasken nga ikarigatantayo amin ti agbali a nasaysayaat ken nadaydayaw.
IV.
Para kadagiti gapu a ditayo maawatan, addaantayo iti agduduma a karit kadagiti mortal a padastayo. Ngem ammotayo a tulongan ti Dios ti tungal maysa kadatayo a mangparmek kadagitoy a karit no sipupudno nga agpatulongtayo Kenkuana. Kalpasan ti panagsagaba ken panagbabawi iti panaglabsing iti linteg a naisuro kadatayo, nailatangtayo amin iti pagarian ti gloria. Ti maudi a panangukom aramidento ti Apo, nga isu laeng ti addaan iti kasapulan a pannakaammo, sirib, ken parabur a mangukom iti tunggal maysa kadatayo.
Nasken nga ikarigatantayo a tungpalen ti agpada a dakkel a bilin. Tapno magnatayo iti natimbeng a linteg ken ayat—ti panagtungpal kadagiti bilin ken pannagna iti dana ti katulagan, bayat ti panagayattayo iti padatayo a tattao. Agkasapulan daytoy a pannagna nga agsapultayo iti nadiosan a pammaregta no ania ti suportaran ken suppiaten ken no kasano nga ayaten ken denggen a sidadayaw. Idawat ti pannagnatayo a ditayo agikompromiso kadagiti bilin ngem ipakitatayo ti naan-anay a pannakaawat ken ayat. Nasken nga ibilang iti pannagnatayo dagiti ubbing nga agduadua iti seksual nga orientasionda, ngem di mangpalugod iti nasapa a pakabigbigan gapu ta, iti kaaduan nga ubbing, maawan ti kasta a duadua iti agangay.21 Suppiaten ti pannagnatayo ti mangyadayo iti dana ti katulagan, ken di mangsuporta iti asino man a mangyadayo iti tao iti Dios. Iti amin daytoy laglagipentayo nga ikari ti Dios ti namnama ken rag-o ken bendision iti amin nga agtungpal iti bilinna.
V.
Pagrebbengan dagiti inna ken amma ken datayo amin nga isuro ti agpada a dua a dakkel a bilin. Para kadagiti babbai ti Simbaan, inladawan ni Presidente Spencer W. Kimball dayta a pagrebbengan iti daytoy naindaklan a pammadtona: “Kaaduan ti kadakkelan a panangdur-as nga umay iti Simbaan kadagiti maudi nga aldaw ket dumtengto gapu iti adu a nasasayaat a babbai ti lubong … ti kumappengto iti Simbaan iti dadakkel a bilang. Mapasamakto daytoy iti tukad a dagiti babbai ti Simbaan mangyanninawda iti kinalinteg ken kinasaririt iti biagda ken iti tukad a dagiti babbai ti Simbaan ket makita a naidumdumada … kadagiti babbai ti lubong. … Dagita pagulidanan a babbai ti Simbaan ti agbalinto a napateg a puersa iti agpada a panagdur-as ti bilang ken naespirituan a panagdur-as ti Simbaan kadagiti maudi nga al-aldaw.”22
Iti panangisaona iti dayta a padto, impakdaar ni Presidente Russell M. Nelson nga “ita ngai aldaw ti nasirmata ni Presidente Kimball. Dakayo dagiti babbai a nasirmatana!”23 Datayo a nakangngeg iti padto 40 a tawen ti naglabasen ditayo maamiris a maispal dagiti babbai ditoy Simbaan ti bukodda a gagayyem ken pamilia nga agdama a maaringan iti ipangpagruna ti lubong ken pangallilaw ti sairo. Ti kararagko ken bendisionko ket mangisuro ken agtignaykayo a mangipatungpal iti dayta a padto, iti nagan ni Jesucristo, amen.