Dagiti Saksi, Dagiti Korum iti Aaronic Priesthood, ken Dagiti Klase ti Young Women
Naisangrat dagiti panagbalbaliw nga ipakaammomi ita a mangtulong kadagiti babbarito ken babbalasitang a mangpadur-as iti sagrado a potensialda.
Patpatgek a kakabsat, naragsak a makaduakayo manen ditoy a sapasap a komperensia. Nasapsapa daytoy a lawas, naipakaammo kadagiti miembro ti Simbaan dagiti pagbalbaliwan iti annuroten maipanggep no asino ti mabalin nga agserbi a saksi kadagiti ordinansa ti panagbuniag ken panaglantip. Kayatko a yunay-unay dagita a tallo a banag.
-
Ti panagbuniag iti proxy para iti tao a pimmusayen mabalin a saksian ti asino man nga agig-iggem iti agdama a temple recommend, agraman iti limited use recommend.
-
Asino man a na-endow a miembro nga addaan agdama a temple recommend ket makapagserbi a saksi kadagiti ordinansa iti panaglantip, sibibiag ken proxy.
-
Asino man a nabuniagan a miembro ti Simbaan ket makapagserbi a saksi ti panagbuniag ti maysa a sibibiag a tao. Maipanggep daytoy a panagbalbaliw iti amin a panagbuniag iti ruar ti templo.
Mainaig iti wagas dagitoy a panagbalbaliw iti annuroten. Saan a nabalbaliwan ti pinagbatayan a doktrina ken dagiti katulagan. Agpadada a nasamay iti amin nga ordinansa. Nasken a dagitoy a panagbalbaliw ti mangpaad-adda iti pannakiraman ti pamilia kadagitoy nga ordinansa.
Kayatko pay a makasaokayo ita tapno yam-ammok dagiti panagbalbaliw a mainaig kadagiti agtutubotayo ken dagiti liderda.
Malagipyo nga inawisko dagiti agtutubo ti Ti Simbaan ni Jesucristo dagiti Santo iti Ud-udina nga Aldaw nga agpailista iti buyot dagiti agtutubo ti Apo a makiraman iti kadakkelan a panggep iti daga ita—ti pannakaummong ti Israel.1 Inyawisko daytoy kadagiti agtutubotayo gapu ta naipangpangruna ti laingda iti pannakisarita iti dadduma panangibiglayda no ania ti pammatida iti makaawis a wagas. Ti panggep ti panagguummong ket napateg a paset ti panangtulong a mangisagana iti lubong ken iti tattaona para iti Maikadua a Yaay ti Apo.
Iti tunggal ward, ti buyot dagiti agtutubo ti Apo ket idauluan ti maysa a bishop, ti napasnek a katulongan ti Dios. Umuna ken kangrunaan a pangrebbenganna ti mangaywan kadagiti babbarito ken babbalasitang ti wardna. Ti bishop ken dagiti mamagbagana ti mangiturong iti aramid dagiti korum ti Aaronic Priesthood ken dagiti klase ti Young Women iti ward.
Naisangrat dagiti panagbalbaliw nga ipakaammomi ita a mangtulong kadagiti babbarito ken babbalasitang a mangpadur-as iti sagrado a potensialda. Kayatmi pay a papigsaen dagiti korum ti Aaronic Priesthood ken dagiti klase ti Young Women ken mangted suporta kadagiti bishop ken dadduma pay a nataengan a lider bayat ti panagserbida iti daytoy a tumantanor a kaputotan.
Ilawlawagto ni Elder Quentin L. Cook dagiti panagbalbaliw a mainaig kadagiti babbarito. Ket ita, iti sapasap a sesion dagiti babbai, ilawlawagto ni Sister Bonnie H. Cordon, Young Women General President, dagiti panangbalbaliw a mainaig kadagiti babbalasitang.
Agkaykaysa ti Umuna a Panguluen ken ti Sangapulo-ket-dua iti panangayon kadagitoy nga aramid a mangpapigsa kadagiti agtutubotayo. O, anian nga ay-ayatenmi ida ken ikararaganmi ida! Isuda ti “namnama ti Israel, buyot ti Zion, annak ti naikari nga aldaw.”2 Yebkasmi ti naan-anay a panagtalekmi kadagiti agtutubotayo ken panagyamanmi kadakuada. Iti sagrado a nagan ni Jesucristo, amen.