Naitulag a Babbai iti Pannakikadua iti Dios
Ti panagbalin a naitulag a babai iti pannakikadua iti Dios ket anian a nagindaklan ken nagsayaat nga annak a babbai ti Dios kas ina a nagaywan, nangiturong, ken nagserbi.
Agyamanak iti bendision a makasaokayo, naitulag nga annak a babbai ti Dios. Ita a rabii, panggepko nga allukoyenkayo iti naindaklan a panagserbi a nakaawaganyo. Wen, tunggal anak a babai ti Dios a dumdumngeg iti timekko ket immawaten iti awag manipud iti Apo a Jesucristo.
Nangrugi ti awagyo idi insaadnakayo iti mortalidad, iti lugar ken panawen a pinili kadakayo ti Dios a naan-anay nga am-ammo ken ipatpategnakayo kas anakna a babai. Iti lubong dagiti espiritu, am-ammo ken insuro ken insaadnakayo a maadaankayo ti gundaway, a manmamo iti pakasaritaan ti lubong, a maawis iti puente a pagbuniagan. Sadiay, mangngeganyo dagitoy a balikas nga insao ti naawagan a katulongan ni Jesucristo: “Babaen ti pannakabalin nga inted ni Jesucristo kaniak, buniaganka iti nagan ti Ama, ken ti Anak, ken ti Espiritu Santo. Amen.”1
Idi lumung-awkayo iti danum, inawatyo ti sabali pay nga awag nga agserbi. Kas baro a naitulag nga anak a babai ti Dios, nagkari ken immawatka iti rebbengen iti Ti Simbaan ni Jesucristo dagiti Santo iti Ud-udina nga Aldaw, a nakakompirmaam a miembro. Nakitulagka iti Dios nga awatem iti bagim ti nagan ni Jesucristo, tungpalen dagiti bilinna, ken agserbi Kenkuana.
Iti tunggal maysa nga agaramid kadagitoy a katulagan, ti serbisio nga ipaaramid kenkuana ti Apo ket naan-anay a maitutop iti dayta a tao. Nupay kasta, agkaykaysa dagiti naitulag nga annak ti Dios, iti maysa a napateg ken naragsak nga awag. Daytoy ti agserbi iti dadduma para Kenkuana.
Iti pannakisaona iti kakabsat a babbai, napintas a ginupgop ni Presidente Russell M. Nelson ti awag ti Apo a makikaduakayo Kenkuana iti trabahona. Inladawan ni Presidente Nelson ti awagyo iti kastoy: “Kinuna ti Apo, ‘Daytoy ti aramidko ken gloriak [ti] mangipatungpal iti saan nga ipapatay ken agnanayon a biag ti tao. ’ (Moises 1:39.) Isu a pudno a makuna ti napasnek a balasangna, ‘Ti aramidko ken gloriak ti mangtulong kadagiti ipatpategko a manggun-od iti nailangitan a panggep a tun-oyen.’
“Ti mangtulong iti sabali a tao a magun-od ti celestial a potensialna ket paset ti nadiosan a mision ti babai. Kas ina, maestra, ken agay-aywan a Santa, tumulong a mangimpluensia iti biag ti dadduma. Iti pannakikaduana iti Dios, nadiosan a misionna ti tumulong a mangbiag kadagiti espiritu ken mangitag-ay kadagiti kararua. Daytoy ti panggep ti nakaparsuaanna. Makapangayed, makaitandudo, ken makaitan-ok daytoy.”2
Diyo maammuan no kaano, wenno ti kapaut, ti personal a misionmo ket maipokusto iti panagserbim kadagiti awag kas ina, lider, wenno ministering sister. Ti Apo, gapu iti ayat, dinatayto pagpilien iti panagoras, kapaut, wenno panagsasaruno dagiti rebbengentayo. Ngem ammoyo manipud iti nasantuan a kasuratan ken kadagiti sibibiag a propeta nga umayto amin dagitoy a rebbengen, ditoy a biag ken iti sumaruno, iti tunggal anak a babai ti Dios. Ket amin dagitoy ket panagsagana iti agnanayon a biag kadagiti managayat a pamilia—”ti kapatgan iti amin a sagut ti Dios.”3
Agbalinkanto a masirib a mangikagumaan nga agsagana itan a pampanunotem ti kamaudianan. Maaramid a nasimsimple dayta nga aramid gapu ta agkasapulan unay dagitoy a rebbengen iti isu met la a panagsagana.
Rugiantayo ti rebbengen nga agbalin a ministering sister. No adda kenka dayta a rebbengen kas agtawen iti10 nga anak a babai iti pamilia a natayen ti ama, wenno presidente ti Relief Society a nauraman iti ili, wenno naospitalka manipud iti surgery—addaanka ti gundaway a mangtungpal iti awagmo manipud iti Apo nga agbalin nga agserserbi nga anakna a babai.
Kasla maigiddiat unay dagita kadagiti rebbengen iti ministering. Ngem agkasapulanda amin iti panagsagana ti nabileg, naayat a puso, natured a pammati a di mangted ti Apo iti bilin malaksid no naisagananan ti wagas, ken ti tarigagay a mapan ket agaramid para Kenkuana.4
Gapu ta nakasaganan, arakupen ti agtawen iti 10 nga anak a babai ti balo nga inana ken agkararag a mangammo no kasano a tulonganna ti pamiliana. Ket tungpalenna daytoy.
Nakasaganan ti presidente ti Relief Society nga agminister sakbay a napasamak ti uram iti lugarna. Naam-ammo ken impategna dagiti tao. Dimakkel ti pammatina ken ni Jesucristo iti naglabas a tawtawen idi nasungbatan ti kararagna a tulongan ti Apo iti babassit a serbisiona para Kenkuana. Gapu iti napaut a panagsaganana, nakasaganan ken nagagaran a mangurnos kadagti kakabsatna a babbai nga agminister kadagiti tao ken pamilia a marigrigatan.
Ti agpapaimbag a kabsat a babai iti ospital ket naisagana nga agminister kadagiti padana a pasiente. Binubosna ti sibubuket a biagna nga agminister para iti Apo iti tunggal ganggannaet a kasla isu ti kaarruba ken gayyemna. Idi nariknana iti pusona ti awag nga agminister iti ospital, natured ken naayat a nagserbi iti dadduma ken addaan iti kasta nga ayat a nangrugi a ninamnama dagiti pasiente a saan a dagus a maimbagan.
Kasta met ti panagsaganayo nga agminister, kabaelanyo ken nasken nga agsaganakayo para iti awagyo nga agbalin a lider para iti Apo no dumteng daytoy. Agkasapulan daytoy iti pammati ken ni Jesucristo, a nagramut iti nauneg nga ayat kadagiti nasantuan a kasuratan, a mangiturong kadagiti tao ken natured a mangisuro iti balikasna. Nakasaganakanto nga umawat iti agtultuloy a pannarabay ti Espiritu Santo. Magagarankanto a mangisao iti, “Siakto,” no kuna ti mammagbaga ti panguluen ti Young Women iti matartaranta a timekna, “Masakit ni Sister Alvarez ita. Asino ti mangisuronto iti klasena?”
Masapul ti adu a panagsagana para iti nakaskasdaaw nga aldaw no awagannaka ti Apo iti rebbengen a kas maysa nga ina. Ngem kasapulanna pay ti managayat a puso ngem iti immuna a kasapulam. Kasapulanna ti pammati ken ni Jesucristo iti labes ti sigud nga adda iti pusom. Ken kasapulanna ti kabaelan nga agkararag para iti impluensia, direksion, ken liwliwa iti Espiritu Santo iti labes iti nariknam a posible.
Nalabit masaludsodmo no kasano a maammuan ti tao no ania ti kasapulan dagiti inna. Maitutop daytoy a saludsod. Saan a maammuan ti tattao ti amin, ngem maadaltayo ti sumagmamano a leksion babaen iti paltiing manipud iti Dios. Ket adu met ti maadaltayo babaen ti panagpaliiw, no agpatulongtayo iti Espiritu nga ipaawatna kadatayo ti mapaliiwtayo.
Pinalpaliiwko ni Kathleen Johnson Eyring iti 57 a tawen a panagdennami kas agassawa. Isu ti ina ti uppat a lallaki ken dua a babbai. Agingga ita, inawatna ti awag nga agbalin nga ina a mangimpluensia iti nasurok a sangagasut a miembro ti pamilia ken sangagasut pay nga inadaptarna iti pusona kas ina.
Malagipyo ti naan-anay a panangiladawan ni Presidente Nelson iti nadiosan a mision ti maysa a babai—agraman ti misionna kas ina: “Kas ina, maestra, ken agay-aywan a Santa, tumulong a mangimpluensia iti biag ti dadduma. Iti pannakikaduana iti Dios, nadiosan a misionna ti tumulong a mangbiag kadagiti espiritu ken mangitag-ay kadagiti kararua. Daytoy ti panggep ti nakaparsuaanna.”5
Segun iti nakitak, sinurot ti asawak a ni Kathleen dayta a pagrebbengan, a naited iti annak a babbai ti Amatayo. Kapatgan kaniak dagiti balikas a “tumulong a mangimpluensia iti biag ti dadduma … iti panakikadua ti Dios.” Dina pinilit. Inimpluensiaanna. Adda panggepna kadagiti namnamaenna , a nangimpluensiaanna kadagiti impateg ken inaywananna. Panggepna a tun-oyen ti ebanghelio ni Jesucristo—kas makitak babaen ti nainkararagan a panangpaliiwko iti naglabas a tawtawen.
Ti panagbalin a naitulag a babai iti pannakikadua iti Dios isu ti naindaklan ken nasayaat nga annak a babbai ti Dios kas ina a nagay-ayawan, nangiturong, ken nagminister ken nagserbi iti ania man a wagas ken lugar nga insagana ti Dios kadakuada. Ikarik nga agragsakkayto iti panagdaliasatyo iti nailangitan a pagtaengan nga agsubli Kenkuana kas annak a babbai ti Dios nga agtungtungpal iti katulagan.
Paneknekak a sibibiag ti Dios nga Ama ken patpatgennakayo. Sungbatannanto dagiti kararagyo. Idauluan ti Patpatgenna nga Anak, ti Ti Simbaan ni Jesucristo dagiti Santo iti Ud-udina nga Aldaw. Ni Presidente Russell M. Nelson ti sibibiag a propetana. Nakita ken nakasao ni Joseph Smith ti Dios nga Ama ken Jesucristo iti kakaywan iti Palmyra, New York. Ammok a pudno daytoy. Paneknekak pay a ni Jesucristo ti Mangisalakanyo; patpatgennakayo. Ket babaen ti Pannubbotna, mabalin a mapatarnaw ken maitag-aykayo iti nangato ken nasantuan nga awag nga umayto kadakayo. Ipaneknekko iti sagrado a nagan ni Jesucristo, amen.