Saan a Maisin a Panagkumit ken ni Jesucristo
Awisennatayo ti Dios a mangikkat kadagiti daan a wagastayo ket rugiantayo ti baro a biag ken ni Cristo.
Itay napalabas nga Abril, naaddaannak iti gundaway a nangidaton iti Templo ti Kinshasa Democratic Republic of the Congo.1 Di mailadawan ti rag-o a nariknak ken ti narikna dagiti napudno a Congolese a maimatangan ti pannakaidaton ti maysa a templo iti pagilianda.
Nakita dagiti tao a sumrek iti Kinshasa Temple ti orihinal a naipinta a ladawan a napauluan iti Congo Falls.2 Ipalagipna kadagiti mapan iti templo ti di maisin a panagkumit a kasapulan a mangiturong kadakuada ken ni Jesucristo ken mangsurot iti dana ti katulagan iti plano ti Nailangitan nga Amatayo. Ti burayok a naipakita iti painting ket makaawis iti ugali a gagangay iti nasurok a maysa a siglo kadagiti nagkauna a napasurot iti Kristianidad iti Congo.
Sakbay ti kumbersionda, nagrukbabda kadagiti saan nga ammo, pagano a banag, a namatida nga addaan dagita a banag kadagiti supernatural a bileg.3 Kalpasan ti kumbersionda, adu ti simmuknal kadagiti di mabilang a burayok iti Karayan Congo, kas iti Nzongo Falls.4 Impuruak dagitoy a convert dagiti immuna a rinukbabda a banag kadagiti burayok kas simbulo ti Dios ken dadduma nga inikkatda a daan a kannawidanda ket inawatda ni Jesucristo. Inrantada a saan nga impuruak dagiti banagda iti natalna, ababaw a danum; impuruakda ida iti nagaraw a danum ti dakkel a burayok, a saanto a pakaisublian pay dagiti banag. Dagitoy a tignay ti simbolo ti baro ngem saan a maisin a panagkumitda ken ni Jesucristo.
Impakita dagiti tao kadagiti sabali a lugar ken tawen ti panagkumitda ken ni Jesucristo kadagiti isu met la a wagas.5 Dagiti tao iti Libro ni Mormon a maam-ammo nga Anti-Nephi-Lehi “imbabada dagiti igamda iti yaalsa,” inkalida ida iti “tukot ti daga” kas “pammaneknek iti Dios … a didanton usaren dagiti igam[da].”6 Iti panangaramidda iti kastoy, inkarida ti sumurot kadagiti panursuro ti Dios ket didan agsubli pay iti panagkumitda. Daytoy a tignay ti rugi ti “pannakapasurotda iti Apo” ket didanton tumallikud pay.7
Ti “pannakapasurot iti Apo” kaipapanan ti panagpanaw ti aramid, nga iturong ti daan a sistema ti pammati, ken mangawat iti baro a pammati iti plano ti Nailangitan nga Ama ken ni Jesucristo ken ti Pannubbotna. Ad-adda pay daytoy a panagbalbaliw ngem iti nainsiriban a panangawat kadagiti pannursuro ti ebanghelio. Tubayenna ti kinataotayo, baliwanna ti pannakaawattayo iti kaipapanan ti biag, ken mangiturong iti di agbalbaliw a panagtalek iti Dios. Dagiti bukod a tarigagay a maisupiat iti pannakaiturongtayo iti Mangisalakan ken panangsurot iti dana ti katulagan ket mapukaw ken masuktan iti determinasion nga agtulnog iti pagayatan ti Nailangitan nga Ama.
Ti pannakapasurot iti Apo ket mangrugi iti saan a maisin a panagkumit iti Dios, a sarunuen ti panangaramat iti dayta a paset ti kinasiasinotayo. Ti panangipamaysa iti dayta a panagkumit ket tungpal biag a proseso a kasapulan ti anus ken agtultuloy a panagbabawi. Iti agangay, agbalin daytoy a panagkumit a paset ti kinasiasinotayo, a nailikmut iti bagitayo, ken kanayon nga adda iti biagtayo. Kas iti ditay pannakalipat iti nagantayo uray pay no ania ti pampanunotentayo, ditayo pulos malipatan ti panagkumit a naimula iti puspusotayo.8
Awisennatayo ti Dios a mangikkat kadagiti daan a wagastayo ket rugiantayo ti baro a biag ken ni Cristo. Mapasamak daytoy no adda pammatitayo iti Mangisalakan, a mangrugi iti idedengngeg iti pammaneknek dagiti addaan iti pammati.9 Kalpasan dayta, umuneg ti pammati no agtignaytayo kadagiti wagas a mangiturong kadatayo a sititibker Kenkuana.10
Ita, nasayaat no mayakar ti napapigsa a pammati kas iti trangkaso wenno gagangay a panateng. Ti gagangay a “naespirituan a baeng” ket mangpapigsa iti pammati kadagiti dadduma. Ngem saan a maitrabaho iti kasta a wagas. Ti laeng wagas a pakapapigsaan iti pammatina ti maysa a tao ket agtignay iti pammatina. Masansan a maiparikna dagitoy a tignay babaen dagiti awis ti dadduma, ngem ditay “mapapigsa” ti pammati ti sabali a tao wenno agpannuray iti sabali a mangpapigsa iti bukodtayo a pammati. Tapno pumigsa ti pammatitayo, nasken a pilientayo dagiti makatulong a tignay iti panangbukel iti pammati, kas iti panagkararag, panagadal kadagiti nasantuan a kasuratan, pannakiranud iti sakramento, panagtungpal kadagiti bilin, ken panagserbi iti dadduma.
Bayat ti panangpapigsa iti pammatitayo ken Jesucristo, awisennatayo ti Dios nga agkari Kenkuana. Dagitoy a katulagan, a naipakaammo kadagiti kari, ket parangarang ti kumbersiontayo. Mangparnuay pay dagiti katulagan iti awan duadua a pundasion para iti naespirituan a panagdur-as. No pilinentayo ti mabuniagan, rugiantayo nga awaten iti bagbagitayo ti nagan ni Jesucristo11 ken pilientayo ti mabigbig Kenkuana. Ikaritayo nga agbalin kas Kenkuana ken tuladentayo dagiti kababalinna.
Dagitoy a katulagan ti mangyasideg kadatayo iti Mangisalakan ken mangiduron kadatayo iti dana nga agturong iti nailangitan a pagtaengantayo. Ti bileg dagiti katulagan ti mangtulong kadatayo a mangpatalinaed iti dakkel a panagbalbaliw ti puso, mangpauneg ti kumbersionatayo iti Apo, ken umawat iti ladawan ni Cristo iti langatayo.12 Ngem ti sinsinan panagkumit kadagiti katulagantayo ket saan a mangikari kadatayo iti ania man a banag. kadatayo.13 Mabalin nga agsaotayo iti saan a nalawag tapno mangyaw-awan, ipuruaktayo dagiti daan a wagasyo iti natalna a danum, wenno ikalitayo dagiti igamyo iti yaalsa a nakaparang dagiti putanna. Ti panagkumittayo kadagiti katulagantayo ket saanto a manglukat iti ridaw ti pangpasanto a bileg ti Nailangitan nga Ama ken ni Jesucristo.
Saan koma a sinsinan ti panagkumittayo a mangtungpal kadagiti katulagan wenno maiduma kadagiti agbalbaliw a kasasaad iti biagtayo. Ti kinapasnektayo iti Dios kas koma iti Karayan Congo nga agayus iti asideg ti Templo tii Kishasa. Daytoy a karayan, a maigiddiat kadagiti karayan iti lubong, ket agtultuloy nga agayus iti unos ti makatawen14 ken mangyayus iti 11 milion a galon (41.5 million L) a danum tunggal segundo iti Taaw Atlantiko.
Inawis ti Mangisalakan dagiti disipulona nga agbalin a matalek ken natibker. Kinunana, “Gapuna, imulayo iti puspusoyo, nga aramidenyo dagiti isurok, ken bilinko.”15 Ti “naikari” a determinasion nga agtungpal kadagiti katulagan ti mangpalugod iti naan-anay a pannakaipatungpal ti kari ti Dios ti manayon a rag-o.16
Adu ti napudno a Santo iti Ud-udina nga Aldaw ti nangipakita iti “karida” nga agtungpal iti katulaganda iti Dios ti agnanayon nga agbalbaliw. Isaritak maipapan ti tallo akasta a tao—da Brother Banza Mucioko, Sister Banza Régine, ken Brother Mbuyi Nkitabungi.
Idi 1977 nagnaed dagiti Banza iti Kinshasa iti Zaire, nga ammo itan kas Democratic Republic of the Congo. Madaydayawda unay iti komunidad ti simbaan a Protestante. Gapu iti talentoda, inurnos ti simbaanda a mapan ti ubing a pamiliada iti Switzerland tapno agadal ken maikkan iti iskolarship iti unibersidad.
Iti kaaddada idiay Geneva, iti panagturongda iti eskuela, masansan a makita ni Brother Banza ti bassit a meetinghouse nga agnagan iti “The Church of Jesus Christ of Latter-day Saints.” Masmasdaaw, “Adda kadin Santo ni Jesucristo, iti ud-udina nga aldaw?” IInkeddengna a mapanna kitaen.
Nabara ti pannakaawat da Brother ken Sister Banza iti branch. Nagdamagda kadagiti saludsod maipanggep iti kinatao ti Dios, kas iti, “No espiritu ti Dios, kas iti angin, kasano a naparsuanatayo iti kalalangana? Kasano a makapagtugaw iti trono?” Dida nakaawat iti makapnek a sungbat agingga nga inlawlawag dagiti misionario ti naisubli a doktrina iti ababa a leksion. Idi nakapanaw dagiti misionario, nagkinnita dagiti Banza ket kinunada, “Di kadi daytoy ti pudno a nangngegta?” Intuloyda ti nakimisa ken nakipagkita kadagiti misionario. Ammoda nga addanto bunga ti panagbuniag iti naisubli a Simbaan ni Jesucristo. Maibabawi kadakuada ti iskolarshipda, ma-revoke ti visada, ken maidawat kadakuada ken ti dua nga ubbing nga annakda a pumanaw iti Switzerland. Inkeddengda ti nabuniagan ken nakumpirmaan idi Oktubre 1979.
Dua a lawas kalpasan ti panagbuniagda, nagsubli da Brother ken Sister Banza idiay Kinshasa kas umuna ken maikadua a miembro ti Simbaan iti pagilianda. Intultuloy dagiti miembro iti Geneva Branch a kinontak ida ken inyam-ammoda kadagiti lider ti Simbaan. Naparegtada a naguray a sipapammati iti kari ti Dios a panawen a pannakabangon ti Simbaanna idiay Zaire.
Kabayatanna, sabali pay nga exchange student manipud Zaire, ni Brother Mbuyi, a nagad-adal iti Belgium. Nabuniagan idi 1980 iti Brussels Ward. Di nagbayag kalpasanna, nagserbi iti full-time mision idiay England. Ket inaramid ti Dios dagiti milagrona. Nagsubli ni Brother Mbuyi idiay Zaire kas maikatlo a miembro ti Simbaan iti pagilianna. Iti pammalubos dagiti dadakkelna, naangay idi damo dagiti miting ti Simbaan iti balay ti pamiliana. Idi Pebrero 1986 naaramid ti petision para iti opisial a panangbigbig ti gobierno iti Simbaan. Masapul ti pirma dagiti tallo a makipagili iti Zaire. Da Brother Banza, Sister Banza, ken Brother Mbuyi dagiti tallo a naragsak a nagpirma iti petision.
Ammo dagitoy natibker a miembro ti kinapudno idi nangngegda daytoy; nakitulagda idi mabuniaganda a nangiturong kadakuada iti Mangisalakan. Impuruakda dagiti daan a wagasda iti gay-ayus a danum ti burayok nga awan ti panggepda a mangisubli pay kadagitoy. Saan a kaano man nalaka ti dana ti katulagan. Ti parikut iti politika, manmano a kontak kadagiti lider ti Simbaan, ken karit a nagtaud iti pannakabangon ti komunidad dagiti Santo ti mabalin koma a napasamak kadagiti manmano a nagkumit nga indibidual. Ngem napasnek da Brother ken Sister Banza ken Brother Mbuyi iti pammatida. Addada idi maidaton ti Templo ti Kinshasa, 33 a tawen kalpasan ti panagpirmada iti petision a nagbanag iti pannakabigbig ti Simbaan idiay Zaire.
Adda dagiti Banza ditoy a Conference Center ita. Kinadua ida ti dua nga annakda, da Junior ken Phil, ken dagiti manugangda, da Annie ken Youyou. Idi 1986, da Junior ken Phil ti immuna a dua a tao a nabuniagan iti Simbaan idiay Zaire. Agbuybuya ni Brother Mbuyi kadagitoy a pasken manipud Kinshasa a kaduana ti asawana, ni Maguy, ken ti lima nga annakda.
Naawatan dagitoy a pioneer ti kaipapanan ken dagiti bunga ti katulagan a nakayasideganda “iti pannakaammo iti Apo a Diosda, ken agrag-o ken ni Jesucristo a Mannubbotda.”17
Kasano a maiturongtayo ti bagitayo iti Apo ket agtalinaed a napudno kas iti adu a sangsangapulo a rinibu a Santo iti Congo a simmurot kadakuada ken minilion a dadduma pay iti intero a lubong? Sinuruannatayo ti Mangisalakan no kasano. Linawas a makiranudtayo iti sakramento ket makitulag iti Nailangitan nga Amatayo. Ikaritayo nga isilpo ti pakabigbigantayo iti Mangisalakan babaen ti panagkari iti kinatallugodtayo nga umawat iti naganna, kanayon a manglagip Kenkuana, ken agtungpal kadagiti bilinna.18 Mangnamnama a mangisagana a maikari kadagitoy a katulagan iti linawas a mangiturong kadatayo iti Mangisalakan, tulongannatayo nga agtungpal iti panangkumittayo,19 ken nabileg nga iduronnatayo iti dana ti katulagan.
Awisenkayo nga agkumit iti tungpal biag a wagas ti kinadisipulo. Agaramid ken agtungpal kadagiti katulagan. Ipuruakyo dagiti daan a wagasyo iti adalem, agay-ayus a danum ti burayok. Naan-anay nga ikaliyo dagiti igamyo iti yaalsa nga awan putanna nga agparang. Gapu iti Pannubbot ni Jesucristo, ti pannakitulag nga addan iti pudno a panggep a mangdayaw kadagitoy ket mangparaburto iti biagyo iti agnanayon. Agbalinkayonto nga ad-adda a kas iti Mangisalakan no kanayon a manglaglagip kenkuana, mangsurot ken mangdayaw Kenkuana. Paneknekak nga Isu ti natibker a pamuon. Mapagtalkan, ken awan duadua dagiti karina. Iti nagan ni Jesucristo, amen.