Agbalin a Napudno, Addaan Pammati
Nasken nga adda panawentayo iti inaldaw a maidiskonekta iti lubong ket kumonekta iti langit.
Di unay nabayag nagriingak ket nagsagana nga agadal iti nasantuan a kasuratan. Innalak ti smartphoneko ket nagtugawak iti abay ti kamak a panggepko ti manglukat iti Gospel Library app. Linuktak ti selfonko ket rugiak koman iti agadal idi makitak ti kagudua dosena a notipikasion iti mensahe ti teks ken email a dimteng kadayta a rabii. Napanunotko, “itsekko daras dagita a mensahe, sakonto isublat a dagus dagiti nasantuan a kasuratan.” Kalpasan ti dua oras basbasaek pay laeng dagiti mensahe iti teks, email, news briefs, ken social media post. Idi naamirisko no ania ti orasen, inalistuak ti nagsagana para iti dayta nga aldaw. Dayta a bigat diak nakapagadal iti nasantuan a kasuratan ket diak nagun-od iti naespirituan a taraon a ninamnamak.
Naespirituan a Taraon
Siguradoak a kastoy met ti padas ti adu kadakayo. Mabendisionannatayo dagiti moderno a teknolohia iti adu a wagas. Maikonektadatayo iti gagayyem ken pamilia, impormasion, ken damdamag maipapan iti agdama a pasamak iti lubong. Nupay kasta, masingadatayo met iti kapatgan a koneksion: ti koneksiontayo iti langit.
Ulitek ti kinuna ni Presidente Russell M. Nelson: “Agbibiagtayo iti lubong a narikut ken umad-adu dagiti panangsusupanget. Ti kanayon a kaadda ti social media ken 24-oras a news cycle ti mangdarup kadatayo kadagiti awan sardayna a mensahe. No adda namnamatayo iti naannad a panangamiris iti adu nga agduduma nga opinion ken pilosopia ti tao a mangdarup iti kinapudno, nasken nga adalentayo ti umawat iti paltiing.”
Imballaag pay ni Presidente Nelson “kadagiti umay nga aldaw, dinto posible ti agbiag a naespirituan no awan pangiwanwan, pangiturong, pangliwliwa, ken agtultuloy nga impluensia ti Espiritu Santo.”1
Tawtawen ti naglabas, kinuna ni Presidente Boyd K. Packer maipapan ti arban ti ugsa a gapu iti napuskol a niebe, di nakastrek iti pagapunan ken nabisinan. Adda dagiti nasingpet a tao, iti panangikarigatanda a mangispal kadagiti ugsa, nangipanda iti sangatrak a garami iti lawlaw ti lugar—saan a daytoy ti kanen ti ugsa, ngem ninamnamada a makalasat ti ugsa iti lamiis. Naladingit, ta kaaduan nga ugsa ti natay. Kinnanda ti garami, ngem di nangtaraon daytoy kadakuada, ket nabisinanda a natay a sibubussog.2
Adu a mensahe itoy a panawen ti naespirituan a kapada ti panangpakan iti garami iti ugsa—makantayo daytoy iti agmalem, ngem dinatayo mataraonan.
Sadino a masarakantayo ti naespirituan a taraon? Masansan, a saan a nalatak iti social media. Makitatayo no “agtultuloytayo” iti dana ti katulagan, “agtultuloy a nakaiggem a naimbag iti landok a pagkapatan,” ket makiranud iti bunga ti kayo ti biag.3 Kaipapananna a nasken nga adda panawentayo iti inaldaw a maidiskonekta iti lubong ket kumonekta iti langit.
Iti tagainepna, nakita ni Lehi dagiti tao a nakiranud iti bunga ngem kalpasanna tinallikudanna daytoy a gapu ti impluensia ti dakkel ken nalawa a pasdek, ti pagtangsit ti lubong.4 Mabalin a mapatanor dagiti agtutubo iti pagtaengan ti Santo iti Ud-udina nga Aldaw, dumar-ay iti amin a miting ken klase ti Simbaan, makiraman kadagiti ordinansa iti templo, sa pumanaw a mapan “iti maiparit a dana ket mapukaw.”5 Apay a mapasamak daytoy? Idinto a mabalin nga ar-aramidenda dagiti banag a kasla naespirituan iti ruar, saanda a pudno a converted. Napakanda ngem saanda ai nataraonan.
Kasupadina, naam-ammok ti adu kadagiti agtutubo a Santo iti Ud-udina nga Aldaw a napigsa, nalaing, ken napudno. Ammoyo a dakayo dagiti annak ti Dios ken adda paaramidna kadakayo. Ayatenyo ti Dios iti amin a “puso, kabaelan, panunot, ken pigsayo.”6 Tungpalenyo dagiti katulaganyo ken agserbikayo iti dadduma, mangrugi iti pagtaengan. Mamati, agbabawi, ken dumur-askayo iti inaldaw, ket daytoy mangyeg iti manayon a rag-o. Agsaganakayo para kadagiti bendision ti templo ken dadduma pay a gundaway nga addanto kadakayo kas pudno a pasurot ti Mangisalakan. Ken tumultulongkayo a mangisagana iti lubong iti Maikadua a Yaay, nga aw-awisenyo ti amin nga umay ken Cristo ken umawat iti bendision ti Pannubbotna. Naikonektakayo iti langit.
Wen, sanguenyo dagiti karit. Kasta met ti tunggal henerasion. Dagitoy ti aldawtayo, nasken a napudnotayo, mamatitayo. Paneknekak nga ammo ti Apo maipapan kadagiti karittayo, ken babaen ti panangidaulo ni Presidente Nelson, isagsagananatayo a sumabat kadakuada. Mamatiak a ti kaudian nga awag ti propeta para iti simbaan a nakasentro iti pagtaengan, a suportado ti aramidentayo kadagiti pasdektayo,7 ket naisangrat a mangtulong kadatayo nga agbiag—uray dumur-as—itoy nga aldaw ti kaawan iti naespirituan a pannakataraon.
Naisentro iti Pagtaengan
Ania ti kayat a sawen ti simbaan a naisentro iti pagtaengan? Sabali unay ti mabalin a langa dagiti pagtaengan iti intero a lubong. Mabalin a kamengkayo ti pamilia a miembro ti Simbaan iti adu a henerasion. Wenno mabalin a sika laeng ti miembro ti Simbaan iti pamiliayo. Mabalin a naasawaankayo wenno saan, addaan wenno awanan annak iti pagtaengan.
Iti baet dagiti kasasaadyo, maaramidyo ti pagtaenganyo a sentro a pagsursuruan ken pagbiagan iti ebanghelio. Kaipapananna nga umawat iti pagrebbengan iti kumbersion ken naespirituan a panagdur-asyo. Kaipapananna ti panangsurot iti balakad ni Presidente Nelson nga “[aramidenyo] ti pagtaenganyo a santuario ti pammati.”8
Padasento ti kabusor nga allukoyennakayo a di kasapulan ti naespirituan a taraon, wenno nasiksikap, makapaguray dayta. Isu ti maestro ti panagsinga ken akin-aramid ti panagitantan. Iturongnanto ti imatangyo kadagiti banag a kasla kasapulan unay ngem, kinapudnona, awan pategda. Pagbalinennakayo a “mariribukan iti adu a banag” a maliwayanyo ti “maysa a banag [a] kasapulan.”9
Agyamanak kadagiti “nasayaat a nagannakko,”10 a nangpatanor iti pamiliada iti pagtaengan a kanayon nga addaan naespirituan a taraon, naayat a relasion, ken nasalun-at nga aramid a panagaliwaksay. Dagiti pannursuro nga intedda iti kinaagtutubok ket pagsayaatak. Nagannak, bangonenyo koma ti napigsa a relasion kadagiti annakyo. Kasapulanda ti ad-adu pay nga orasyo, awan kurangna.
Suportaran ti Simbaan
No aramidenyo, adtoy ti Simbaan a mangsuporta kadakayo. Dagiti padastayo iti simbaan ti makapapigsa iti naespirituan a taraon a mapasamak iti pagtaengan. Agingga itoy a tawen, nakitamin daytoy a kita ti suporta ti Simbaan iti Sunday School ken Primary. Ad-adunto pay ti makitami kadagiti miting ti Aaronic Priesthood ken Young Women. Mangrugi daytoy Enero, ti kurikulum para kadagitoy a miting mabalbaliwanto bassit. Maipokusto pay laeng daytoy kadagiti topiko a mainaig iti ebanghelio, ngem mai-align iti Umaykayo, Sumurot Kaniak—Para kadagiti Indibidual ken Pamilia. Bassit a panagbalbaliw daytoy, ngem makaaramid iti dakkel nga epekto iti naespirituan a pannakataraon dagiti agtutubo.
Ania dagiti dadduma pay a kita ti suporta nga ited ti Simbaan? Iti Simbaan makiranudtayo iti sakramento, a makatulong kadatayo a mangaramid iti panagkumittayo iti Mangisalakan iti linawas. Ket iti Simbaan makiummongtayo iti dadduma pay a kapammati a nagaramid kadagiti isu met la a katulagan. Ti naayat a relasion a patanorentayo kadagiti pada a disipulo ni Jesucristo ket makapabileg a suporta iti kinadisipulotayo a naisentro iti pagtaengan.
Idi 14 ti tawenko immakar ti pamiliak iti baro a sangakarrubaan. ita, mabalin a kasla saan a nakaro a trahedia kadakayo, ngem panagkunak, narigat unay dayta a panawen. Kaipapananna a napalawlawanak iti tattao a diak am-ammo. Kaipapananna nga agatendar iti sabali a pagadalan ti amin a dadduma pay a babbarito iti wardko. Kas agtawen iti 14, napanunotko, “Kasano a naaramid daytoy kaniak dagiti dadakkelko?” Nariknak a kasla nadadaelen ti biagko.
Nupay kasta, babaen kadagiti aktibidad iti Young Men, nabaelak ti nakilangen iti dadduma pay a miembro ti korum, ken nagbalinda a gagayyemko. Kasta met a nangrugi nga adda espesial nga interes iti biagko dagiti miembro ti bishopric ken Aaronic Priesthood adviser. Dinar-ayanda dagiti paskenko iti ay-ayam. Sinuratandak iti makaparegta a sursurat nga iduldulinko agingga iti daytoy nga aldaw. Intuloydak a kinasarita kalpasan ti panagkolehiok ken idi napanak agmision. Maysa kadakuada ti immay iti airport idi agawidakon. Agnanayonto nga agyamanak kadagitoy naimbag a kakabsat a lallaki ken ti nagkaykaysa nga ayat ken nangato a namnamada. Tinarabaydak nga agturong iti langit, ken nagbalin a nalawag, naragsak ti biagko.
Kas nagannak ken lider, tulonganyo dagiti agtutubo a mangammo a saanda a magna nga agmaymaysa iti dana ti katulagan? Kas nayon a pangbangon kadagiti bukod a pannakilangen, awisentayo ida kadagiti ummong dadakkel ken babassit—manipud ikadagiti komperensia ti Para iti Pigsa dagiti Agtutubo ken youth camp agingga iti linawas nga aktibidad iti korum ken klase. Diyo koma tagibassiten ti pigsa nga umay iti pannakiummong kadagiti dadduma a mangpadpadas pay a pumigsa. Dakayo a bishop ken dadduma pay a lider, agpokuskayo koma iti panangtaraon kadagiti ubbing ken agtutubo iti wardyo. Kasapulanda ti ad-adu pay nga orasyo, awan kurangna.
Maysaka man a lider, kaarruba, miembro ti korum, wenno pada a Santo, no adda gundawaymo a mangsagid iti biag ti maysa nga agtutubo, tulongam isuna a maikonekta iti langit. Mabalin a ti impluensiayo ti umisu a “suporta ti Simbaan” a kasapulan ti agtutubo.
Kakabsat, paneknekak a ni Jesucristo ti ulo daytoy a Simbaan. Paregtaenna dagiti lidertayo ken tarabayennatayo iti naespirituan a taraon a kasapulantayo nga agbiag kadagiti ud-udina nga aldaw. Dayta a naespirituan a taraon ti mangtulongto kadatayo nga agbalin a napudno ken addaan pammati. Iti nagan ni Jesucristo, amen.