Nasarakan babaen ti Bileg ti Libro ni Mormon
Nasken a mapadasan ti amin ket masarakan ti bileg dagiti kinapudno a linaon ti Libro ni Mormon.
Idi nagbisitaak iti pagtaengan dagiti convert, maysa kadagiti saludsod a masansan a damagek kadakuada ket no kasano a naammuanda ken ti pamiliada maipapan ti Simbaan ken no kasano a nabuniaganda. Saan a nasken daytoy no ti tao iti dayta a kanito ket aktibo a miembro wenno saan a nakimisa iti adu a tawen. Kanayon a maymaysa laeng ti sungbat: umis-isem ken naragsak ti rupada, insaritada no kasano a nasarakan ida. Kinapudnona, kasla ti estoria ti kumbersion ti kanayon nga estoria no kasano a nasarakandatayo.
Ni Jesucristo Mismo ti Apo dagiti napukaw a banag. Maseknan kadagiti napukaw. Dayta ti gapu no apay nga insurona ti tallo a pangngarig iti maika-15 a kapitulo ti Lucas: ti pangngarig ti napukaw a karnero, ti napukaw a sensilio, ken ti nayaw-awan nga anak. Amin dagitoy nga estoria ket maymaysa ti temada: Saan a nasken no apay a napukawda. Saan a nasken daytoy no ammoda a napukawda. Adda nalaus a rag-o nga agturay a mangipukkaw, “Makipagrag-okayo kaniak; gapu ta nasarakak [dayta] napukaw.” Iti udina, awan ti pudno a napukaw Kenkuana.
Ibinglayko man kadakayo itoy a malem ti maysa a kadagiti kapatgan a banag kaniak—ti estoria no kasano a nasarakandak.
Sakbay a nagtawenak iti 15, inawisnak ti ulitegko a ni Manuel Bustos nga agbakasion a kaduana ken ti pamiliana ditoy Estados Unidos. Napintas daytoy a gundaway kaniak a makasursuro iti sumagmamano nga Ingles. Na-convert ti ulitegko iti Simbaan adun a tawen ti naglabas, ken adda kenkuana ti naindaklan nga espiritu ti misionario. Nalabit a daytoy ti gapu no apay, a diak am-ammo, a nakisao ti inak kenkuana ket kinunana nga awatenna ti awis iti maysa a kondision: a dinak pinadas a kumbinsiren nga agkameng iti Simbaanna. Katolikokami iti adun nga kaputotan, ket awan ti rason tapno agbaliwkami. Nakitulag a nasayaat ti ulitegko ket tinungpalna ti saona a dina kayat a sungbatan uray dagiti simple a saludsod maipapan iti Simbaan.
Siempre, ti saan a maliklikan ti ulitegko ken ti makaay-ayo nga asawana, ni Marjorie, ket no asinoda.
Naikkannak iti siled a naglaon iti dakkel a biblioteka dagiti libro. Nakitak ditoy a biblioteka ti agarup 200 a kopia ti Libro ni Mormon iti nadumaduma a pagsasao, 20 kadagitoy iti Espaniol.
Maysa nga aldaw, iti kinausiosok, innalak ti maysa a kopia ti Libro ni Mormon nga Espaniol.
Maysa daytoy kadagiti kopia a napusyaw nga asul ti akkubna, nga adda ladawan ni anghel Moroni iti sangona. Idi lukibek daytoy, iti umuna a panid mabasa ti sumaganad a kari: “Ket inton awatenyo dagitoy a banag, igunamgunamko a dawatenyo iti Dios, ti Agnanayon nga Ama, iti nagan ni Cristo, no saan a pudno dagitoy a banag; ket no naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona kadakayo, babaen ti pannakabalin ti Espiritu Santo.”
Innayonna pay: “Babaen ti pannakabalin ti Espiritu Santo maammuanto ti kinapudno ti amin a banag.”
Narigat nga ilawlawag ti epekto dagitoy a scripture iti panunotko ken pusok. Kinapudnona, diak agsapsapul iti “kinapudno.” Baritoak, naragsakak, kaay-ayok daytoy baro a kultura.
Nupay kasta, sipapanunot iti dayta a kari, rinugiak a binasa ti libro. Bayat ti panagbasak iti ad-adu pay, naawatak a no talaga a kayatko a mangala iti ania man a banag manipud iti daytoy, nasaysayaat a rugiak ti agkararag. Ken ammotayo amin no ania ti mapasamak no ikeddengyo saan laeng a mangbasa ngem ikararagam pay ti maipapan iti Libro ni Mormon. Kinaagpaysona, dayta laeng ti napasamak kaniak. Maysa a banag nga espesial ken naidumduma—wen, kas met laeng iti napasamak iti minilmilion a dadduma pay iti intero a lubong. Naammuak a babaen ti bileg ti Espiritu Santo maammuan a pudno ti Libro ni Mormon.
Kalpasanna napanak iti ulitegko tapno ilawlawag kenkuana no ania ti napasamak ken nakasaganaakon a mabuniagan. Saan a mailimed ti ulitegko ti siddaawna. Naglugan iti kotsena, napan iti airport, sa nagsubli nga iggemna ti tiketko iti eroplano nga agawid, a nakaragpin ti surat iti inak a mabasa, “Awan biangko iti daytoy!”
Husto ti imbagana. Nasarakandak babaen ti bileg ti Libro ni Mormon.
Nalabit nga adu dagiti nasarakan babaen kadagiti napasnek a misionario iti intero a lubong, iti tunggal kasasaad babaen kadagiti namilagruan a wagas. Wenno nalabit a nasarakanda babaen kadagiti gagayyem nga inranta nga inkabil ti Dios iti dalanda. Mabalin a nasarakanda babaen iti maysa a tao manipud ti daytoy a henerasion wenno babaen ti maysa kadagiti kapuonanda. Ania man ti kasasaad, tapno dumur-as iti pudno a kumbersion, nasapsapa imbes a naladladaw, nasken a mapadasanda amin ken masarakanda babaen ti bileg dagiti kinapudno a linaon ti Libro ni Mormon. Iti isu met la a kanito, nasken a personal nga keddengda a napasnek nga agkumit iti Dios nga ikarigatandanto ti agtungpal kadagiti bilinna.
Idi agsubliak iti Buenos Aires, naamiris ni nanangko a talaga a kayatko ti mabuniagan. Gapu ta adda ugalik a managsukir, imbes a supiatennak, sinuportarannak. Ket diak pay ket ammo, a dinamagna kaniak dagiti saludsod a kapada iti interbyu iti panagbuniag. Pudno, a mamatiak a naun-uneg nga amang ti interbyuna ngem iti interbyu nga iteddagiti misionario. Kinunana kaniak: “No kayatmo’t agpabuniag, suportarankanto. Ngem agsaludsodak nga umuna kenka ket kayatko a panunotem a naimbag ken sungbatannak a sipupudno. Ikarim kadi ti makimisa nga awan liwatmo iti tunggal Domingo?”
Kinunak kenkuana, “Wen siempre, aramidekto dayta.”
“Ammom kadi no kasano ti kapaut ti misa?”
“Wen, ammok,” kinunak.
Insungbatna, “No agpabuniagka, siguraduekto a dumar-ayka.” Dinamagna kaniak no pudno a natallugodak a diakon agbartek ken agsigarilio pay.
Insungbatko kenkuana, “Wen, siempre, tungpalekto pay dayta.”
Ket innayonna, “No agpabuniagka, siguraduekto a talaga a daytanto ti mapasamak.” Ket intuloyna a nagdamag iti kasta a wagas iti dumani tunggal bilin.
Tinawagan ti ulitegko ni nanangko tapno ibaga a saan nga agdanag, a marimbawakto met la amin dagitoy iti kabiitan. Kalpasan ti uppat a tawen, idi naawatko ti awagko nga agserbi iti Uruguay Montevideo Mission, tinawagan ni nanangko ti ulitegko ket dinamagna no kaanonto a marimbawak amin dagitoy. Kinapudnona manipud iti kaniot a nabuniaganak, nagbalinen a maysa a naragragsak nga ina.
Naammuak a napateg ti Libro ni Mormon iti proseso ti kumbersion babaen ti panangpadas nga umuna iti kari nga “as-asideg ti tao iti Dios babaen ti panangsurotna kadagiti linaonna.”
Inlawlawag ni Nephi ti kangrunaan a panggep ti Libro ni Mormon iti kastoy:
“Ta sireregta a nagtuoktayo a nagsurat, tapno magutugot dagiti annaktayo, ken kasta met dagiti kakabsattayo, a mamati ken ni Cristo, ken makikinnaawatan iti Dios. …
“Ken agsaotayo iti maipanggep ken ni Cristo, agrag-otayo ken ni Cristo, ikasabatayo ni Cristo [ken] ipadtotayo ni Cristo, … tapno maammuan dagiti annaktayo ti pamuidanda a mangkita iti pakaugasan ti basbasolda.”
Napno ti intero a Libro ni Mormon iti kasta met la a sagrado a panggep.
Gapu iti daytoy, asino man nga agbasbasa nga agkumit iti napudno a panagadal iti daytoy, nga addaan iti espiritu ti panangkararag, saanto laeng a makasursuro maipapan ken ni Cristo ngem masursurodanto manipud ken ni Cristo—nangnangruna no agaramidda kadagiti pangngeddeng a “padasen ti saguday ti balikas” ken saanda a tallikudan gapu iti palso a pammati iti no ania ti kinuna ti dadduma maipapan kadagiti banag a dida kaano man nabasa.
Kinuna ni Presidente Russell M. Nelson: “No panunotek ti Libro ni Mormon, panunotek ti balikas a bileg. Addaan kadagiti kinapudno ti Libro ni Mormon iti bileg a mangagas, mangliwliwa, mangisubli, mangtulong, mangpatibker, manglinglingay, ken mangparagsak kadagiti kararua.”
Ita a malem awisek ti tunggal maysa kadatayo, kasano man ti kabayagtayo a miembro ti Simbaan, a palugodantayo koma ti bileg dagiti kinapudno ti Libro ni Mormon a mangsapul ken umawat kadatayo manen, ken inaldaw bayat ti napasnek a panagsapultayo iti bukod a paltiing. Maaramidto daytoy no ipalubostayo.
Paneknekak a linaon ti Libro ni Mormon ti pakabuklan ti ebanghelio ni Jesucristo ken ti Espiritu Santo ti mangpasingked iti kinapudno iti asino man nga addaan napudno a puso, nga agsapsapul iti pannakaammo iti pannakaisalakan ti kararuada. Iti nagan ni Jesucristo, amen.