Agtalek iti Apo
Ti awan duadua a panagtalektayo laeng ket agtalek iti Apo ken iti ayatna para kadagiti annakna.
Patpatgek a kakabsatko, ti surat a naawatko sumagmamano a panawen ti napalabasen ti mangyam-ammo iti topiko ti mensahek. Ut-utoben ti mannurat maipanggep iti kallaysa iti templo iti maysa a lalaki a natayen ti agnanayon a kaduana. Isu koma ti maikadua nga asawana [wife]. Daytoy ti saludsodna: addanto ngata bukodna a balay iti sumaruno a biag, wenno makadennananto ngata ti asawana [husband] ken ti umuna nga asawana [wife]? Imbagak kenkuana nga agtalek iti Apo.
Ituloyko iti padas a nangngegak manipud iti napateg a kadua, nga iburayko nga adda pammalubosna. Kalpasan ti ipupusay ti patpatgenna nga asawa ken ina dagiti annakna, nagasawa manen ti maysa nga ama. Simmupiat ti sumagmamano a nataengan nga annak iti panagasawana manen ket nagpabalakad iti maysa a nasinged a kabagyan a maysa a respetado a lider ti Simbaan. Kalpasan a nangngegna ti gapu dagiti panagsuppiatda, a naipokus iti kasasaad ken pagnaigan iti lubong dagiti espiritu wenno iti pagarian ti gloria kalpasan ti Maudi a Panangukom, kinuna daytoy a lider: “Madanaganka kadagiti biddut a banag. Nasken a madanaganka no inkanto met laeng kadagita a lugar. Ipamaysam dayta. No inka idiay, napimpintasto daytoy amin ngem iti maarapaapmo.”
Anian a makaliwliwa a sursuro! Agtalek iti Apo!
Kadagiti surat a naawatko, ammok nga adda nariribukan kadagiti saludsod maipapan iti lubong dagiti espiritu a pagyanantayto kalpasan a mataytayo ken sakbay nga agungartayo. Adda mangipapan nga agtultuloyto iti lubong ti espiritu ti adu a temporal a kasasaad ken dagiti banag a mapaspasarantayo ditoy mortal a biag. Ania ti talaga nga ammotayo maipapan iti kasasaad iti lubong dagiti espiritu? Mamatiak a husto ti sinurat ti religion professor ti BYU maipapan itoy a topiko: “No damagentayo iti bagitayo no ania ti ammotayo maipapan iti lubong dagiti espiritu manipud kadagiti pagrukodan a libro dagiti nasantuan a kasuratan, ti sungbat ‘saan a kas iti masansan nga ipagaruptayo.’”1
Siempre, ammotayo manipud kadagiti nasantuan a kasuratan a kalpasan a matay dagiti bagitayo agtultuloytayo nga agbiag kas espiritu iti lubong dagiti espiritu. Isuro pay dagiti nasantuan a kasuratan a nabingay daytoy a lubong dagiti espiritu iti nagbaetan dagiti nagbalin a “nalinteg” bayat ti panagbiag ken dagiti nagbalin a nadangkes. Iladawanda pay no kasano a a mangisuro iti ebanghelio ti dadduma a napudno nga espiritu kadagiti nadangkes ken nagalsa (kitaen iti 1 Pedro 3:19; Doktrina ken katulagan 138:19–20, 29, 32, 37). Ti kapatgan, ipalgak ti agdama a paltiing nga agtultuloy ti aramid ti pannakaisalakan iti lubong dagiti espiritu (kitaen iti Doktrina ken Katulagan 138:30–34, 58), ken nupay naallukoytayo a di mangitantan iti panagbabawitayo ditoy a biag (kitaen iti Alma 13:27), nasuruantayo a posible idiay ti panagbabawi (kitaen iti Doktrina ken Katulagan 138:58).
Ti aramid ti pannakaisalakan iti lubong dagiti espiritu ket mangwayawaya kadagiti espiritu a masansan nga iladawan dagiti nasantuan a kasuratan a “pannakaadipen.” Adda iti maysa a kita ti pannakaadipen ti amin nga adda iti lubong dagiti espiritu. Inlanad ni Presidente Joseph F. Smith iti naindaklan a paltiing, iti benneg 138 ti Doktrina ken Katulagan, a ti natay a nalinteg, nga adda iti kasasaad ti “talna” (Doktrina ken Katulagan 138:22) bayat ti panagurayda iti Panagungar (kitaen iti Doktrina ken Katulagan 138:16), “idi kimmita[da] iti nabayagen a pannakaisina dagiti espirituda manipud kadagiti bagida kas ti pannakaadipen” (Doktrina ken Katulagan 138:50).
Agsagaba met dagiti nadangkes iti nayon a pannakaadipen. Gapu iti saan a naibabawi a basol, addada iti intudo ni Apostol Pedro a “pagbaludan” ti espiritu (1 Pedro 3:19; kitaen met iti Doktrina ken Katulagan 138:42). Nailadawan dagitoy nga espiritu a “napungo” wenno “balud” (Doktrina ken Katulagan 138:31, 42) wenno “maipuruak iti akinruar a kasipngetan” ken addaan “panagsangit, panagasug, ken panangemkem” bayat ti panagurayda iti panagungar ken panangukom (Alma 40:13–14).
Manamnama ti panagungar iti lubong dagiti espiritu babaen ti Panangungar ni Jesucristo (kitaen iti 1 Taga Corinto 15:22), nupay mapasamak daytoy iti agduduma a panawen ken agduduma a ragup. Agingga dayta naituding a panawen, ibaga kadatayo ti scripture nga aramid ti pannakaisalakan ti maobra iti lubong ti espiritu. Bassit pay ti naipalgak. Naikasaba ti ebanghelio iti kuneng, di nagbabawi, ket dagiti nasukir tapno mawayawayaanda iti pannakaadipenda ket agtultuloy kadagiti bendision ti naayat a Nailangitan nga Ama kadakuada.
Ti pannakaadipen iti lubong dagiti espiritu a mayaplikar kadagiti nalinteg a napasurot a kararua ket kasapulanda nga urayen—ket nalabit nga ipariknada—ti pannakaannong dagiti ordinansa iti proxy iti daga tapno mabuniaganda ken mangnanam kadagiti bendision ti Espiritu Santo (kitaen iti Doktrina ken Katulagan138:30–37, 57–58).2 Dagitoy nga ordinansa iti proxy ti mangpabileg kadakuada a dumur-as babaen iti turay ti priesthood a mangpadakkel iti pangen dagiti nalinteg a makaikasaba iti ebanghelio kadagiti espiritu iti pagbaludan.
Iti baet dagitoy a pangrugian, naglaon ti nasantuan a kasuratantayo iti bassit laeng maipapan iti lubong dagiti espiritu kalpasan ti ipapatay ken mangyuna iti Maudi a Panangukom.3 Ngarud ania pay ti ammotayo maipapan iti lubong dagiti espiritu? Adu a miembro ti Simbaan ti addaan kadagiti parmata wenno dadduma pay a pammaregta a mangipakaammo kadagitoy maipapan no kasano a maipagna wenno mabukel dagiti banag iti lubong dagiti espiritu, ngem dagitoy personal a naespirituan a padas ket saan a maawatan wenno maisuro kas opisial a doktrina ti Simbaan. Ken, siempre, adu ti espekulasion dagiti miembro ken dadduma pay iti naipablaak a sources kas dagiti libro iti padpadas iti yaasideg ti patay.4
Iti amin dagitoy, napateg a lagipen dagiti masirib a pammallaag da Elder D. Todd Christofferson ken Neil L. Andersen iti immun-una a mensahe ti sapasap a komperensia. Insuro ni Elder Christofferson: “Nasken a lagipen a saan amin a sao nga insawang ti maysa a lider ti Simbaan, napalabas wenno agdama, ket nasken nga aglaon iti doktrina. Gagangay a maawatan iti Simbaan a ti sao nga insawang ti maysa a lider iti maysa a gundaway ket masansan a mangibagi iti personal, nupay nasayaat nga opinion, saan a nairanta nga agbalin nga opisial wenno iti intero a Simbaan.”5
Iti sumaganad a komperensia, insuro ni Elder Andersen daytoy a prinsipio: “Ti doktrina ket insuro ti amin a 15 a miembro ti Umuna a Panguluen ken Korum ti Sangapulo-ket-dua. Saan a nailemmeng iti nalidem a parapo ti maysa a mensahe.”6 Ti waragawag ti kaamaan, a pinirmaan ti amin a 15 a propeta, mammaltiing, kem mammadto, ket napintas a poanangiladawan iti dayta a prinsipio.
Iti likudan ti maysa a banag a pormal kas iti waragawag ti kaamaan, ti napadtuan a pannursuro dagiti Presidente ti Simbaan, a pinasingkedan dagiti dadduma pay a propeta ken apostol, ket maysa pay a pagarigan daytoy. Iti paspasamak iti lubong dagiti espiritu, inted ni Propeta Joseph Smith ti dua a pannursuro iti asideg ti gibus ti panagministrona a masansan nga insuro dagiti simmaruno kenkuana. Maysa kadagitoy ti insurona iti sermon iti King Follett nga agdedennanto dagiti nalinteg a miembro ti pamilia iti lubong dagiti espiritu.7 Sabali pay ti nadakamat iti tabon iti maudi a tawen ti biagna: “Maitan-okto ti espiritu dagiti nalinteg iti nain-indaklan ken nadaydayag nga aramid … [iti] lubong dagiti espiritu. … Saanda nga adayo kadatayo, ken ammo ken maawatanda dagiti panunot, rikna, ken tignaytayo, ken masansan nga agrigatda idiay.”8
Ngarud, ania ti saludsod kas immuna a dinakamatko no sadino ti pagnaedan dagiti espiritu? No kasla karkarna wenno awan kaes-eskanna dayta a saludsod kadakayo, ibilangyo ti adu a bukodyo a saludsod, wenno dagiti nakasulisoganyo a sungbatan batay iti maysa a banag a nangngeganyo iti sabali a tao iti napalabas. Iti amin a saludsod maipanggep ti lubong dagiti espiritu, isingasingko iti dua a sungbat. Umuna, laglagipen a patpatgen ti Dios dagiti annakna ken awan duadua nga aramidennanto ti kasayaatan para iti tunggal maysa kadatayo. Maikadua, laglagipen daytoy pamiliar a sursuro ti Biblia, a nakatulong unay kaniak iti adu a di nasungbatan a saludsod:
“Agtalek iti Apo iti amin a pusom; ket saan nga agpannuray iti bukod a pannakaawat.
“Iti amin a dalanmo isu ti bigbigem, ket isu iturongnanto dagiti desdesmo” (Proverbios 3:5–6).
Maipada, inggibus ni Nephi ti naindaklan a salmona kadagitoy a balikas: “O, Apo, nagtalekak kenka, ket agtalekakto kenka iti agnanayon. Diak pagkammatalkan ti pigsak” (2 Nephi 4:34).
Masdaawtayo amin a sililimed maipapan iti kasasaad iti lubong dagiti espiritu, wenno mailawlawag dagitoy wenno ti dadduma a saan a nasungbatan a saludsod iti pamilia wenno iti dadduma pay a pagtitiponan. Ngem ditay koma isuro wenno usaren kas opisial a doktrina no ania ti saan a makaipaay kadagiti pagrukodan ti opisial a doktrina. Ti panangaramid iti daytoy ket saan a mangpadur-as iti aramid ti Apo ken mangupay iti tattao iti panagsapsapulda iti bukodda a liwliwawenno pannakaitandudo babaen ti bukod a paltiing nga ited ti plano ti Apo para iti tunggal maysa kadatayo. Ti nalaus a panagtalek iti bukodl a sursuro wenno espekulasion ket mabalin a manglapped kadatayo a mangipamaysa iti panagsursuro ken panagkagumaan a mangpatanorto iti pannakaawattayo ket mangtulong iti panagtuloytayo iti dana ti katulagan.
Agtalek iti Apo ti pamiliar ken pudno a sursuro iti Ti Simbaan ni Jesucristo dagiti Santo iti Ud-udina nga Aldaw. Dayta ti pannursuro ni Joseph Smith idi napasaran dagiti nagkauna a Santo ti nakaro a pannakaidadanes ken dagiti kasla imposible a tubeng.9 Dayta pay la ti kapintasan a prinsipio a mausartayo no dagiti panagkagumaantayo nga agsursuro wenno gandattayo nga agsapul iti liwliwa ket maipasango kadagiti tubeng iti bambanag a di pay naipalgak wenno naaramat kas opisial a doktrina ti Simbaan.
Mayaplikar ti kasta met la a prinsipio kadagiti saan pay anasungbatan a saludsod maipapan kadagiti panaglantip iti sumaruno a biag gapu kadagiti pasamak wenno basbasol iti mortalidad. Adu ti ditayo ammo a ti laeng awan duadua a panagtalektayo ket agtalek iti Apo ken iti ayatna para kadagiti annakna.
Kas panggibus, no ania ti ammotayo maipapan iti lubong dagiti espiritu ket agtultuloy idiay ti aramid ti pannakaisalakan ti Ama ken ti Anak. Inrugi ti Mangisalakantayo ti aramid a mangipakdaar iti pannakawayawaya dagiti balud (kitaen iti 1 Pedro 3:18–19; 4:6; Doktrina ken Katulagan 138:6–11, 18–21, 28–37), ken agtultuloy dayta nga aramid no agtultuloy dagiti maikari a mensahero a mangikasaba iti ebanghelio, agraman ti panagbabawi, kadagiti agkasapulan pay laeng iti nasamay a pangdalusna (kitaen iti Doktrina ken Katulagan 138:57). Ti panggep ti amin a nailadawan iti opisial a doktrina ti Simbaan, a naited iti kabaruanan a paltiing.
“Masubbotto dagiti natay nga agbabawi, babaen ti panagtungpal kadagiti ordinansa iti balay ti Dios,
“Ket kalpasan ti panagbayadda iti dusa dagiti basolda, ken mabugguandan a nadalus, umawatdanto iti gunggona a maibatay kadagiti aramidda, ta agtawidda iti pannakaisalakan” (Doktrina ken Katulagan 138:58–59).
Pagrebbengantayo nga isuro ti doktrina ti naisubli nga ebanghelio, agtungpal kadagiti bilin, aggiinnayat ken agtitinnulongtayo, ken aramidentayo iti aramid ti pannakaisalakan kadagiti nasantuan a templo.
Paneknekak ti kinapudno dagiti insaritak ditoy ken dagiti kinapudno a maisuro ditoy a komperensia. Maaramid ti pannakaisalakan gapu iti Pannubbot ni Jesucristo. Kas iti ammotayo iti agdama a paltiing, Isu “mangitan-ok iti Ama, ken mangisalakan iti amin nga aramid ti imana”” (Doktrina ken Katulagan 76:43; nainayon ti panangyunay-unay). Iti nagan ni Jesucristo, amen.