Di Agbalbaliw ken Naandur a Panagtalek
Iraman ti panagtalek iti Apo ti panagtalek iti panagorasna ken agkasapulan iti panaganus ken panagandur a mangpaksiat iti kadagiti rigat ti biag.
Ni Daniel nga anakmi nagsakit iti misionna idiay Africa ket naipan iti pagagasan a bassit laeng dagiti kagamitan. Idi binasami ti umuna a suratna kalpasan a nagsakit, ninamnamami a maupay, ngem insuratna ketdi, “Uray no nakaiddaak iti emergency room, nariknak ti talna. Diak pay pulos naaddaan iti agtultuloy ken napaut a ragsak iti biagko.”
Idi nabasami iti asawak dagitoy a balikas, nagbalinkami nga emosional. Nagtultuloy ken napaut a ragsak. Dimi kaano man nangngegan ti kinaragsak a nailadawan iti kasta a wagas, ngem pudno dagiti balikasna. Di gagangay a ragsak ti impakitana, wenno nalag-an a karirikna, ngem talna ken rag-o ti sumangbay no umasidegtayo iti Dios ken agtalek Kenkuana iti amin a banag.1 Napasamak met dagita a panawen iti biagtayo idi imbaga ti Dios ti kappia iti kararuatayo ket intedna kadatayo ti namnama ken ni Cristo uray narigat ken di sigurado ti biag.2
Isuro ni Lehi a no di natnag da Adan ken Eva, “gapuna nagtalinaedda koma iti kasasaad ti kinainosente, nga awanan iti ragsak, ta saanda nga ammo ti rigat; …
“Ngem adtoy, amin a banag naaramid iti kinasariritna isu a makaammo iti amin a banag.
“Natnag ni Adan tapno adda tao; ket ti panggep dagiti tao, ket tapno maaddaanda iti ragsak.”3
Iti kasla maisupadi a wagas, isagananatayo dagiti rigat ken ladingit nga agrag-o no agtalektayo iti plano ti Apo kadatayo. Impeksa ti mannaniw ti maika-13 a siglo daytoy a kinapudno: “Isagananaka ti ladingit para iti rag-o. Ikkatenna amin awan kaes-eskanna a banag iti biagmo, tapno sumangbay ti baro a rag-o. Wagwagenna ti amarilio a bulbulong manipud iti sanga ti pusoyo, tapno agrusing dagiti nalangto, berde a bulong. Gabutenna dagiti nalungsot a ramut, tapno agtubo dagiti nakalemmeng a ramut. Ania man a ladingit a nawagwag dita pusom, nasaysayaat nga amang a banag ti mangsukat kadagitoy.”4
Insuro ni Presidente Russell M. Nelson, “Ti rag-o nga idiaya ti Mangisalakan [kadatayo] … ket agtultuloy, mangipanamnama kadatayo a dagiti ‘panagtutuokna ket apagkanito laeng’ [Doktrina ken Katulagan 121:7] ken makonsagrar para iti pagimbagantayo.”5 Dagiti pannubok ken rigattayo makaaramid iti lugar para iti dakdakkel a rag-o.6
Ti naimbag a damag ti ebanghelio saan a kari ti biag a nawaya iti ladingit ken tuok no di ketdi biag a napnuan panggep ken kaipapanan—biag a ti ladingit ken rigat ket “alimonen ti rag-o ken ni Cristo.”7 Kinuna ti Mangisalakan, “Ditoy lubong addanto rigatyo: ngem mananginanamakayo; siak pinarmekko ti lubong.”8 Ti ebangheliona ti mensahe ti namnama. Ladingit a buyogan ti namnama ken Jesucristo ti kari ti manayon a rag-o.
Mayasping ti salaysay iti panagdaliasat dagiti Jaredite iti naikari a daga iti baybay iti panagdaliasattayo iti mortalidad. Inkari ti Apo iti kabsat ni Jared ken tattaona a “kuyogennanto [ida] a mapan iti daga a naisalsalumina iti amin a daga.”9 Binilinna ida nga agaramid kadagiti bilog, ket situtulnog a binangonda dagitoy a maibatay iti pangiturong ti Apo. Nupay kasta, iti panagaramidda, adda pakaseknan ti kabsat ni Jared a di umdas iti disenio ti Apo para kadagiti bilog. Impukkawna:
“O Apo, naaramidkon ti trabaho nga imbilinmo kaniak, ket naaramidkon dagiti bilog a maibatay iti imbagam kaniak.
“Ket adtoy, O Apo, awan ti silawda.”10
“O Apo, ipalubosmo kadi a daliasatenmi daytoy dakkel a danum iti kasipngetan?”11
Immararaw kadin ti kararuayo iti Dios iti kasta a wagas? No ditay maikarigatan nga agbiag iti wagas nga ibilin ken namnamaen ti Apo, nasdaawkayo kadi no nasken a pagpasaranyo daytoy a biag iti kasipngetan?12
Impeksa ti kabsat ni Jared ti dakdakkel a pakaseknan iti kabaelanda nga agbiag iti uneg ti bilog. Impukkawna, “Ken kasta met a mapukawkami, ta iti unegda a saankami a makaanges, malaksid iti angin nga adda iti unegda.”13 Parigatennaka kadi nga umanges ti rigrigat ti panagbiag ket bay-annaka nga agpanunot no kasanoka a makapagtuloy, nga agsubli iti nailangitan a pagtaengam?
Kinadua ti Apo ti kabsat ni Jared a mangrisut ti tunggal pakaseknanna, kalpasanna inlawlawagna, “Saanyo a maballasiw daytoy dakkel a taaw malaksid no isaganak ti [wagas para] kadakayo a mangbusor kadagiti dalluyon ti baybay, ken dagiti lumabas nga angin, ken dagiti dumteng a layus.”14
Nalawag nga imbaga ti Apo a di makapan dagiti Jaredite iti naikari a daga no awan Isuna. Awan ti kontrolda, ti laeng wagas tapno makaballasiwda iti nauneg a taaw ket ti agtalek Kenkuana. Dagitoy a padas ken panangisuro ti Apo ti nangpatibker iti pammati ti kabsat ni Jared ken nangpapigsa iti talekna iti Apo.
Kitaen no kasano a nagbaliw ti kararagna manipud saludsod ken pakaseknan agingga iti panangipeksa iti pammati ken talekna:
“Ket ammok, O Apo, nga adda kenka ti amin a bileg, ket maaramidmo ti amin a kayatmo a pagimbagan ti tao; …
“Adtoy, O Apo, maaramidmo daytoy. Ammomi a kabaelam nga ipakita ti naindaklan a bilegmo, a kasla bassit iti pannakaawat dagiti tao.”15
Naisurat a dagiti Jaredite kalpasanna “nagluganda kadagiti … bilogda, ket inturongda iti baybay, nga intalekda ti bagbagida iti Apo a Diosda.”16 Ti italek kayatna a sawen ti agtalek wenno isuko. Saan a limmugan dagiti Jaredite iti bilog gapu ta ammoda ti mapasamak iti panagdaliasatda. Limmuganda gapu ta nasursuroda ti agtalek iti bileg, kinaimbag, ken kaasi ti Apo, ket ngarud siaayatda nga isuko ti bagbagida ken ania man a duadua wenno buteng a nalabit nga adda kadakuada iti Apo.
Itay kallabes nagbuteng ti apokomi a ni Abe nga aglugan iti maysa kadagiti tiobibo nga ayup nga agpangato ken agpababa. Kaykayatna ti maysa a saan nga aggunay. Iti kamaudianan naallukoy met laeng isuna ti lelangna nga agbalinto a natalged daytoy, iti kasta iti panangtalekna kenkuana, limmugan daytoy. Kalpasanna kinunana nga umis-isem, “Diak marikna ti talged, ngem natalgedak.” Nalabit a kasta ti narikna dagiti Jaredite. Ti panagtalek iti Dios mabalin a saan a kanayon a natalged iti damo, ngem sumaruno ti rag-o.
Saan a nalaka kadagiti Jaredite ti panagdaliasat. “Namin-adu a nairarebda iti tukot ti baybay, gapu kadagiti bantay a dalluyon a naiburak kadakuada.”17 Ket naisurat a “saan nagsardeng ti angin a nangipugso [kadakuada] nga agturong iti naikari a daga.”18 Narigat a maawatan daytoy, nangruna iti panawen ti biagtayo a napigsa dagiti sumupsuppiat, maliwliwatayo iti pannakaammo nga iti awan patinggana a kinaimbag ti Dios iturongnatayo a kanayon iti pagtaengan.
Ituloy ti kasuratan, “Ket kasta ti pannakayabogda; ket awan ti nakaam-amak nga ayup ti baybay a nakaburak, wenno baliena a nakadadael kadakuada; ket nagtultuloy nga adda silawda, addada man iti rabaw wenno iti uneg ti danum.”19 Agnaedtayo iti lubong a ti dadakkel a dalluyon ti patay, sakit ti bagi ken panunot, ken rigat ti amin a kita ket maiburak kadatayo. Ngem, babaen ti pammati ken niJesucristo ken panagtalek Kenkuana, maaddaantayo iti silaw iti rabaw wenno iti uneg ti danum. Maaddaantayo iti namnama a di agsardeng ti Dios a mangiturong kadatayo iti naiangitan a pagtaengantayo.
Kabayatan ti panagrigatda iti bilog, dagiti Jaredite, “nagkantada iti panagdayaw iti Apo; … ket nagyaman[da] ken nagdaydayaw iti Apo iti nagmalem; ket idi dumteng ti rabii, saanda a nagsardeng a nagdaydayaw iti Apo.”20 Nariknada ti rag-o ken panagyaman iti baet ti rigrigatda. Dida pay nakadanon iti naikari a daga, ngem agragragsakdan iti naikari a bendision gapu iti di agbalbaliw ken naandur a panagtalekda Kenkuana.21
Nagtalinaed dagiti Jaredite iti danum iti 344 nga aldaw.22 Mapanunotyo kadi dayta? Iraman ti panagtalek iti Apo ti panagtalek iti panagorasna ken agkasapulan iti panaganus ken panagandur a mangpaksiat kadagiti rigat ti biag.23
Kamaudiananna, dagiti Jaredite “simmangladda iti igid ti naikari a daga. Ket idi maibaddekda dagiti sakada iti igid ti baybay ti naikari a daga nagpaklebda iti rabaw ti daga, ket impakumbabada ti bagbagida iti Apo, ket nagarubos ti luada iti ragsakda iti Apo, gapu iti kaadu ti naumbi a kaasina kadakuada.”24
No napudnotayo iti katulagantayo, iti maysa nga aldaw agawidtayonto a sitatalged ken agtamed iti sango ti Apo ket aglua gapu iti rag-o gapu iti naruay nga asina, agraman dagiti liday a mangyeg iti ad-adu pay a rag-o.25
Paneknekak a no pilientayo ti di agbalbaliw ken naandur nga agtalek ken Jesucristo ken dagiti nadiosan a panggepna iti biagtayo, bisitaennatayonto nga addaan namnama, mangisao iti kappia iti kararuatayo, ken “mangnamnama nga ilisinatayo.”26
Paneknekak a ni Jesus ti Cristo. Isu ti pagtaudan ti amin a rag-o.27 Umdasen ti paraburna ken Isu ti nabileg a mangisalakan.28 Isu ti silaw, ti biag, ken ti namnama ti lubong.29 Dina ipalubos a mapukawtayto.30 Iti nagan ni Jesucristo, amen.