Agtultuloy a Panagannad babaen iti Kararag (Alma 34:39; Moroni 6:4; Lukas 21:36)
Kasapulan ti kanayon a panagsiput kontra iti panangyaleng-aleng ken panagtagilag-an.
Sipapasnek nga ikararagko a tulongannatayo ti Espiriu Santo bayat ti panagrag-o ken panagdaydayawtayo a sangkamaysa.
Idi Abril ti 1976, nagsao ni Elder Boyd K. Packer kadagiti agtutubo ti Simbaan iti sapasap a komperensia. Iti mensahena a napauluan ti “Spiritual Crocodiles,” inladawanna no kasano a bayat ti assignmentna iti Africa napaliiwna dagiti buaya a nalaing a manglimlimo a manganup kadagiti inosente a biktima. Inyarigna dagiti buaya ken ni Satanas, a manganup kadagiti agtutubo babaen ti pananglimo iti makapatay a kita ti basol.
Agtawenak ti 23 idi inted ni Elder Packer dayta a bitla, ket padpadaananmi ken Susan ti pannakayanak ti inauna nga anakmi. Rinaemmi ti linaon ti mensahena maipapan ti panangliklik ti basol ken nalaing a panangusarna iti galad ti ayup a mangisuro ti napateg a naespirituan nga adal.
Nagbiahekami pay ken Susan iti Africa gapu ti adu nga assignment. Ket adda gundawaymi a makakita iti dadakkel nga ayup nga agnaed kadayta a kontinente. Iti pananglagip iti epekto ti mensahe ni Elder Packer iti biagmi, pinaliiw ken sinursuromi dagiti adal iti kababalin ti atap nga ayup ti Africa.
Kayatko nga iladawan ti ugali ken taktika ti dua a cheetah a nakitami ken Susan iti panaganup iti tiliwda ket inaigmi ti napaliiwmi iti inaldaw a panagbiag iti ebanghelio ni Jesucristo.
Dagiti Cheetah ken Topi
Dagiti cheetah ti kapardasan nga ayup ditoy daga ket matarayda ti pegges a 75 mph (120 km/h). Dagitoy napintas nga ayup ket makataray manipud ti panagtakderda iti pegges nga 68 mph (109 km/h) iti kurang a tallo segundo. Kanen dagiti cheetah ti padada nga ayup nga agsiim iti asideg sa kumamat ken gumammatda.
Binuybuyami ken Susan iti dumani dua oras ti dua a cheetah a nangsursurot ti dakkel a grupo ti topi, dagiti nasaknap nga antelop ti Africa. Ti natayag, namaga a ruot iti tantanap ti Africa ket dumani nanglinged kadagiti predator bayat ti panangsursurotda ti grupo dagiti topi. Nagsisina dagiti cheetah ket agaddayoda iti agarup 100 a yarda (91 m) ngem nagtintinnulongda.
Maysa a cheetah ti nakatugaw iti ruot a di naggargaraw, maysa met a cheetah ti nagrukob ket nainnayad a kumaradap nga umas-asideg iti di agsuspetsa a topi. Ti cheetah a nakatugaw nagpukaw iti karuotan iti isu met la a kanito a panagtugaw met ti sabali a cheetah. Nabayag a nagtultuloy daytoy agsinnublat a pagtuladan a panagrukob ken panagkaradap nga umasideg ti maysa a cheetah idinto a nakatugaw iti karuotan ti sabali a cheetah. Daytoy nasikap nga estratehia nairanta a pangsinga ken pangallilaw iti topi ken mangyaw-awan ti atensionda iti umas-asideg a peggad. Siaanus ken nagtultuloy, nagtinnulong ti dua a cheetah tapno adda taraonda.
Iti nagbaetan ti dakkel a grupo ti topi ken ti umas-asideg a cheetah, nakatakder dagiti natataeng ken napigpigsa a topi a kas bantay dagiti bunton ti anay. Daytoy a buya ti karuotan manipud iti babassit a turod ti nangpabael kadagiti bantay a topi a makakita iti pagilasinan ti peggad.
Ket kellaat, iti panagparang dagiti cheetah iti asideg, tumaray nga umadayo ti sibubukel a grupo dagiti topi. Diak ammo no kasano a kasao dagiti bantay a topi iti dakdakkel a grupo, ngem maballaaganda, ket mapan ti amin a topi iti pagtalgedanda.
Ket ania ti simmaruno nga inaramid dagiti cheetah? Di nagtantan inulit nga inaramid ti dua a cheetah ti agsinnublat a pagtuladanda a panangrukob ken panagkaradap nga umasideg ti maysa a cheetah idinto ta nakatugaw ti sabali a cheetah iti karuotan. Nagtultuloy ti pagtuladan a kastoy. Saanda a nagsardeng. Saanda a naginana. Awan sardayda a nangsurot iti estratehiada a pangsinga ken pangyaw-awan. Binuyami ken Susan dagiti cheetah nga agpukaw iti adayo, kanayon nga umas-asidegda iti grupo ti topis.
Dayta a rabii, napagsaritaanmi ken Susan maipapan iti napaliiw ken nasursuromi. Insaritami pay daytoy a padas kadagiti annak ken appokomi ket naammuanmi dagiti adu a napapateg nga adalen. Iladawak ita ti tallo kadagita nga adalen.
Adalen #1—Agannad kadagiti Pananglimlimo ti Dakes
Para kaniak, nalamuyot, makaay-ayo, ken makaallukoy a parsua dagiti cheetah. Ti amarilio a kimmayumanggi ken dimmapu a puraw nga addaan nangisit a labang ti cheetah ti agserbi a napintas a pammarang a dumani di makita no kamatenda dagiti tiliwda iti karuotan ti Africa.
Iti isu met la awagas, dagiti ideya ken aramid a mangpapeggad iti kinaespirituan ken masansan a kasla makaallukoy, makaay-ayo, wenno makaparagsak. Gapuna, iti lubongtayo, nasken nga agannadtayo iti makaallilaw a dakes a kasla nasayaat. Kas imballaag ni Isaias, “Ay-ay pay dagiti agkuna a nasayaat ti dakes, ken dakes ti nasayaat, a mangikabil iti sipnget iti lawag, ken ti lawag iti sipnget, a mangikabil iti napait iti nasam-it, ken nasam-it iti napait!”
Iti panawen a maiwaragawag nga umno ti panaglabsing iti kinasagrado ti biag ti tao ken mailadawan ti riribuk a wayawaya, nagasattayo nga agbiag ditoy a dispensasion iti ud-udina nga aldaw a pakapaglawagan ti naisubli a silaw ti ebanghelio iti biagtayo ket tulongannatayo a mangilasin iti nalidem a pangallilaw ken pangsinga ti kabusor.
“Ta isuda a masirib ken nangawat iti kinapudno, ken nangala iti Nasantuan nga Espiritu a bagnosda, ken saan a pinaallilaw—pudno kunak kadakayo, saandanto a mapukan ken maipuruak iti apuy, ngem mailusotandanto ti aldaw.”
Adalen #2—Agtalinaed a Siriring ken Agalibtakkayo
Para iti topi, ti apagkanito a kinaliway ken di panangikankano ti mangpaalisto iti idadarup ti cheetah. Kasta met, ti naespirituan a panangyaleng-aleng ken panangtagilag-an aramidennatayo a nalaka a masulisog ti kabusor. Ti naespirituan a kinadarasudos ti mangpapeggad iti biagtayo.
iStock.com/Angelika
Inladawan ni Nephi no kasano nga iti maudi nga aldaw sulisogen ken allilawen ni Satanas dagiti annak ti Dios nga iturong iti “nailubongan a talged, tapno kunadanto: Nasayaat amin iti Zion; wen, dumur-as ti Zion, nasayaat amin—ket kasta ti panangkusit ti sairo iti kararuada, ket siaannad a mangiturong kadakuada iti impierno.”
Kasapulan ti kanayon a panagsiput kontra iti panangyaleng-aleng ken panangtagilag-an. Ti panagsiput ket kasasaad wenno aramid ti panagannad nga agbantay iti posible a peggad wenno rigat. Ti panagbantay mangipakita iti tignay ti panagtalinaed a siririing a mangsaluad ken mangsalaknib. Iti naespirituan a pannao, masapul a siririing ken naalibtaktayo kadagiti parikna ti Espiritu Santo ken dagiti pagilasinan manipud kadagiti agbambantay ti Apo kadagiti torre.
“Wen, ket balakadankayo met … nga agannadkayo iti di mabubos a panagkararagyo, tapno saankayo a mayadayo babaen ti pannulisog ti sairo, … ta adtoy, gapu ta awan ti gunggona a maitedna kadakayo.”
Ti panangipamaysa iti biagtayo iti Apo ken ti ebangheliona mangpaparmek kadatayo iti kinataotayo nga agbalin a naespirituan a nasadut. iti pannakaparaburtayo iti mata a kumita ken lapayag a dumngeg, mapadakkel ti Espiritu Santo ti kabaelantayo a kumita ken dumngeg no ditay mapanunot a nasken a kumita ken dumngegtayo wenno ditay mapanunot a makita wenno mangngeg ti ania man.
Adalen #3—Maawatan ti Panggep ti Kabusor
Gagangay a kanen ti cheetah ti tiliwna a dadduma pay nga ayup. Iti agmalem, inaldaw, kanen ti cheetah ti tiliwna nga ayup.
Ni Satanas “ket kabusor ti kinalinteg ken dagiti agaramid iti pagayatan ti Dios.” Agmalem, inaldaw a panggepna laeng nga aramiden a nakaay-ay-ay dagiti annak iti Dios a kas kenkuana.
Ti plano ti ragsak ti Ama ket naisangrat a mangiwanwan kadagiti annakna, a mangtulong kadakuada a mangpadas iti rag-o, ken mangyawid kadakuada iti dennana nga addaan nagungar, naitan-ok a bagi. Aramiden ti sairo a matikaw ken naliday dagiti annak ti Dios ken lapdanna ti agnanayon a panagdur-asda. Ipasnek ti kabusor ti mangdarup kadagiti kangrunaan a banag iti plano ti Ama a kagurana unay.
Awan bagi ni Satanas, ket naisardeng ti agnanayon a panagdur-asna. Kas iti agay-ayus a danum ti karayan a nilapdan ti dam, napaay ti agnanayon a panangdur-as ti kabusor gapu ta awan pisikal a bagina. Gapu ti yaalsana, naawanan ni Lucifer iti bendision ken padas a maaramid laeng babaen ti tabernakulo ti lasag ken tulang. Maysa kadagiti kaipapanan iti nasantuana a kasuratan ti balikas a nailunod ket mailadawan iti kaawan kabaelanna nga agtultuloy a dumur-as ken agbalin a kas iti Amatayo iti Langit.
Gapu ta napateg unay iti pisikal a bagi iti plano ti Ama iti ragsak ken iti naespirituan a panagdur-astayo, paayen ni Lucifer ti panagdur-astayo babaen ti panangsulisogna nga usarentayo ti bagitayo iti di umno a wagas. Insuro ni President Russel M. Nelson nga agpannuray ti naespirituan a talged iti “‘saan apanangaramid iti umuna a manggargari nga addang iti diyo nasken a papanan ken aramiden.’ … Kas tattao addaantayo amin iti pagganasan ti [bagi] a kasapulan tapno agbiagtayo. ‘Kasapulan unay dagitoy a pagganasan tapno mataginayon ti biag. Ania ngarud ti aramiden ti kabusor? … Rautennatayo babaen ti pagganasantayo. Sulisogennatayo a mangan iti banag a di nasken a kanentayo, uminum iti banag a di nasken nga inumentayo, ken ayaten ti di nasken nga ayatentayo!’”
Maysa kadagiti kangrunaan nga ironia ti kinaagnanayon ket, ti kabusor, a miserable gapu ta awanan iti pisikal a bagi, aw-awisen ken al-allilawennatayo a mangusar iti bagitayo iti saan nga umisu a wagas. Ti ramit nga awan kenkuana ken dina mausar ket ti umuna a gandatna a mangsulisog kadatayo iti pisikal ken naespirituan a pakadadaelantayo.
Ti pannakaawat ti panggep ti kabusor ket nasken iti nasamay a panagsagana iti posible nga idadarupna. Gapu ta ammo ni Kapitan Moroni ti panggep dagiti Lamanite, nakasagana a nangsabat kadakuada iti yaayda ket nagballigida. Daytoy met laeng ti prinsipio ken kari a mayaplikar iti tunggal maysa kadatayo.
“No nakasaganakayo, saankayo nga agbuteng.
Awis, Kari, ken Pammaneknek
Kas ti pannakaadaltayo iti napapateg a leksion babaen ti panangpaliiwtayo iti ugali dagiti cheetah ken topi, nasken a kitaentayo dagiti leksion ken ballaag iti paspasamak ti inaldaw a biag. No nakasagana ti panunot ken puso nga umawat iti nailangitan a direksion babaen ti bileg ti Espiritu Santo, ngarud adda dagiti kangrunaan a pangiturong a maawattayo ken adu dagiti kabilgan a ballaag a mangsaluad kadatayo ti aggapu iti gagangay a padpadastayo. Dagiti nabileg a pangngarig ket agpada a linaon dagiti nasantuan a kasuratan ken iti inaldaw a biagtayo.
Intampokko ti tallo laeng ti adu a leksion a mabigbig iti panagsukisokmi ken ni Susan iti Africa. Utobenyo koma daytoy nga estoria dagiti cheetah ken topi ket ammuenyo dagiti nayon nga adalen para kadakayo ken ti pamiliayo. Laglagipen a ti pagtaenganyo ti pudno a sentro ti panagsursuro ken panagbiag iti ebanghelio.
No awatenyo a sipapammati daytoy nga awis, umayto dagiti kapanunotan iti isipyo, dumakkel iti pusoyo ti naespirituan a rikna, ket mabigbigyo ti nasken nga aramidenyo tapno ”ikabilyo ti sibubukel a kalasag [ti Dios], tapno kabaelanyo a sarangten ti dakes nga aldaw, kalpasan nga inaramidyo amin, tapno kabaelanyo nga itakderan.”
Ikarik nga agayusto iti biagyo dagiti bendision ti nasamay a panagsagana ken naespirituan a saluad no agannadkayo babaen ti kararag a managsiput ken agtultuloy.
Paneknekak a ti panagtultuloy iti dana ti katulagan ket mangted iti naespirituan a talged ken agnanayon a rag-o iti biagtayo. Paneknekak a tulongan ken papigsaennatayo ti nagungar ken sibibiag a Mangisalakan iti panawen ti rigat ken nam-ay. Paneknekak dagitoy a kinapudno iti sagrado a nagan ni Apo Jesucristo, amen.