Agingga ti Pannakasuot ti Pammatitayo
Bayat ti panangsurottayo iti sao ti Dios ken iti dana ti katulaganna, papigsaennatayo babaen kadagiti pannuboktayo.
Idi ubingak, ni Frank Talley, maysa a miembro iti Simbaan, indiayana nga ilugan ti pamiliak manipud Puerto Rico agingga iti Salt Lake City tapno mailantipkami iti templo, ngem iti di nagbayag mangrugin a nagtaud dagiti lapped. Ti maysa a kabsatko, ni Marivid, ket nagsakit. Nariribokanda, nagkararag dagiti dadakkelko ngem nariknada latta nga ituloy ti panagbiahe. Nagtalekda a no itultuloyda a tungpalen ti parikna ti Apo a mapan iti templo, masaluadan ken maparaburan ti pamiliami —ket kasta ngarud.
Uray pay no ania ti umay a lapped, agtalektayo a ni Jesucristo ti mangisagana iti wagas bayat pannagnatayo a sipapammati nga aramiden ti pagayatanna. Inkari ti Apo nga amin nga agbiag a napudno kadagiti katulagan nga inaramidda Kaniana, iti panawenna, maawatdanto amin dagiti inkarina a bendision. Insuro ni Elder Jeffrey R. Holland nga, “Adda dagiti bendision nga umay iti nasapa, adda dagiti umay a naladaw, ken adda dagiti saan nga umay agingga iti langit; ngem para kadagiti mangarakup iti ebanghelio ni Jesucristo, umay dagitoy1
Insuro ni Moroni a ti “pammati ket bambanag a namnamaen ken saan a makita; gapuna, saanyo a balusingsingen gapu ta diyo makita, ta awan ti maawatyo a saksi agingga iti pannakasuot ti pammatiyo.”2
Ti saludsodtayo, Ania ti kasayaatan nga aramidentayo a mangsango kadagiti pannubok nga umaykadatayo?
Iti immuna a panagsaritana kas Presidente ti Simbaan, insuro ni President Russell M. Nelson: “Kas baro nga Umuna a Panguluen, kayatmi ti mangrugi a sipapanunot iti gibusna. Iti daytoy a gapu, kasarsaritadakayo ita manipud iti templo. Ti gibus a panangikarigatan ti tunggal maysa kadatayo ket maaddaan iti bileg iti balay ti Apo, mailantip kas pamilia, napudno iti katulagan a naaramid iti templo a mangpaikari kadatayo iti kaindaklanan a sagut ti Dios—dayta ti agnanayon a biag. Dagiti ordinansa ti templo ken dagiti katulagan nga aramidenyo idiay ket tulbek iti panangpapigsa iti biagyo, panagasawa ken pamiliayo, ken ti kabaelanyo a mangparmek iti darup ti kabusor. Ti panagdaydayawyo iti templo ken ti serbisioyo idiay para kadagiti kapuonanyo ket mangparabur kadakayo iti nayon a bukod a paltiing ken talna ken mangpatibker iti kariyo nga agtalinaed iti dana ti katulagan.”3
Bayat ti panangsurottayo iti sao ti Dios ken iti dana ti katulaganna, papigsaennatayo babaen kadagiti pannuboktayo.
Ti panagbiahe ti pamiliami a mapan iti templo adu a tawen ti naglabas ket narigat, ngem idi asidegkamin iti Salt Lake Temple, inbaga ni nanangko a napnuan ragsak ken pammati “Nasayaat to met la ti amin; ti Apo ti mangsaluadkadatayo.” Nailantipkami kas pamilia, ken naimbagan ti kabsatko. Daytoy ket napasamak agingga iti pannakasuot ti pammati dagiti nagannakmi ken iti panagtungpalda ti parikna ti Apo.
Ti pagwadan dagiti nagannakko iti pammati ken kinapinget ket mangimpluensia latta kadakami agingga ita. Ti pagwadanda ti nangisuro kadakami iti apay ti doktrina ti ebanghelio ken tinulongandakam a nangawat ti kaipapanan, panggep, ken parabur nga ited ti ebanghelio. Ti panangawat ti apay ti ebanghelio ni Jesucristo ket makatulongkadatayo a mangsango kadagiti pannubok a sipapammati.
Kamaudiananna, amin nga idawat ken ibilin ti Apo nga aramidentayo ket maysa a panangipakita ti panangipategna kadatayo ken kalikagumna nga ited dagiti naisagana a bendision para kadagiti napudno. Saantayo a namnamaen a masursuro dagiti annaktayo nga ayaten ti ebanghelio iti kabukbukodanda; pagrebbengantayo kas nagannak nga isuro ida. Bayat iti panangtulongtayo kadagiti annaktayo no kasano nga usarenda a nalaing ti kinawaya nga agpili, ti nalinteg a pagwadantayo ket mangparegget kadakuada nga agaramid iti bukodda a nalinteg a pili. Ti napudno a panagbiagda ket makatulongto kadagiti annaktayo a mangammo ti kinapudno ti ebanghelio para iti bagbagida.
Babbarito ken babbalasitang, dumngeg iti propeta a makisarsarita kadakayo ita. Sapulenyo dagiti nasantuan a kinapudno ken awaten ti ebanghelio para iti bagbagiyo. Inballaag itay nabiit ni President Nelson: “Ania a pagsiriban ti kurang kadakayo? … Suroten ti pagwadan ni Propeta Joseph. Mangsapul iti maysa a naulimek a lugar. … Ipakumbabayo ti bagiyo iti sango ti Apo. Ibukbokyo ti pusoyo iti Nailangitan nga Amayo. Umasidegkayo Kenkuana para iti sungbat.”4 Bayat iti panangdawatmo ti pannarabay ti Nailangitan nga Ama, panagdengngeg iti pammalakad dagiti sibibiag a propeta, ken panangkita ti nalinteg a pagwadan dagiti nagannak, agbalinkanto met a natibker a pagwadan ti pammati iti pamilyam.
Dagiti nagannak nga addaan iti annak a saan a mangipappabiag dagiti pagbatayan ti ebanghelio, tulonganyo ida nga agsubli. Tulonganyo ida nga awatenda ti kinapudno ti ebanghelio. Rugian itan; saan pay a naladaw.
Ti pagwadantayo a nalinteg a panagbiag ket makaited iti dakkel a pagdumaan Kinuna ni President Nelson: “Kas Santo iti Ud-udina nga Aldaw, nakaugaliantayon a panunoten ti ‘simbaan’ kas banag a mapasamak iti meetinghousetayo, a danggayan ti mapasamak iti pagtaengantayo. Kasapulantayo ti pannakabalbaliw daytoy a pagtuladan. Panawenen iti Simbaan a maisentro iti pagtaengan, a suportaran ti mapaspasamak iti uneg dagiti pasdek ti branch, ward, ken staketayo.”5
Isuro ti nasantuan a kasuratan,“Iruammo ti ubing iti dalan a rebbengna a papanan: ket uray inton lakayen saannanto a pagpanawan.”6
Ibagada pay “Ket ita, iti kadakkel ti namnama nga iturong ti panangikasaba iti balikas dagiti tao nga agaramid iti maikanatad—wen, nabilbileg nga amang ti ibungana iti panunot dagiti tao ngem iti espada, wenno ania man a banag, a napasamak kadakuada—ngarud napanunot ni Alma a mainugot laeng a nasken a padasenda ti saguday ti balikas ti Dios.”7
Adda estoria maipanggep iti ina a maup-upay iti sobra a pannangan ti anakna ti nasam-it. Kasano man ti balakadna kenkuana, intuloyna latta ti nangan ti nasasam-it. Iti pannakaupayna, inkeddengna nga itugot ti anakna a mangkita iti masirib a lalaki a raraemenna.
Inasitganna ti nalaing a lider ket kinunana, “Apo, sobra ti pannangan ti anakko iti nasam-it. Balakadam koma nga agsardeng a mangan iti daytoy?”
Dimngeg a sipapasnek ti lalaki iti babai, ket kinunana iti anakna, “Agawidkayon ket agsublikayo kalpasan ti dua a lawas.”
Kinibinna ti ubing ket nagawidda, natikaw ti babai no apay a dina kiniddaw iti ubing nga agsardeng a mangan ti nasam-it.
Kalpasan ti dua a lawas, nagsublida. Kinita ti nasirib a lalaki ti ubing ket kinunana, “Barok, isardengmon ti mangan iti nasasam-it. Saan a nasayaat iti salun-atmo.”
Nagtung-ed ti ubing ket nagkari nga aramidenna.
Dinamag ti ina ti ubing “Apay a dimo imbaga dayta kenkuana dua a lawas ti napalabasen?”
Immisem ti masirib a lalaki “Daytoy naudi a dua a lawas nangnanganak met iti nasam-it.”
Nagbiag daytoy a lalaki iti kasta nga integridad ket ammona a ti balakadna ket nabilbileg no surotenna nga umuna daytoy.
Ti impluensiatayo kadagiti annaktayo ket nabilbileg kas makitadatayo a napudno a mangar-aramid kadagiti katulagantayo. Ni propeta Jacob iti Libro ni Mormon ti maysa a pagwadan ti kinalinteg. Insurat ti anakna a ni Enos ti impluensia ni Jacob iti biagna:
“Siak, ni Enos, siaammoak a nalinteg a tao ti amak—gapu ta insuronak iti pagsasaona, kasta met ti pannaripato ken pammagbaga ti Apo—ket maidaydayaw koma ti nagan ti Diosko gapu iti daytoy—
“… Ket naimula iti pusok dagiti balikas a masansan a mangngegko iti amak maipapan iti agnanayon a biag, ken ti ragsak dagiti santo, a simlep iti pusok.”8
Nagbiag iti ebanghelio ti inna dagiti agtutubo a mannakigubat iti wagas a nangipukkawan dagiti annakda nga addaan kombiksion. Inpadamag ti kapitanda:
“Insuro ida dagiti innada, a no saanda nga agduadua, isalakan ida ti Dios.
“Ket inulitda kaniak dagiti balikas dagiti innada, a kinunada: Saankami nga agduadua nga ammo dagiti innami daytoy.”9
Ni Enos ken dagiti Lamanita nga agtutubo a mannakigubat ket napapigsada babaen iti pammati dagiti nagannakda a nangtulong kadakuada a nangsango iti pannakasuot ti pammatida.
Naparaburantayo iti naipasubli nga ebanghelio ni Jesucristo iti panawentayo, a mangitag-ay kadatayo no maupay wenno mariribukantayo. Mapatalgedantayo a dagiti aramidtayo ket mabendisionanto iti panawen ti Apo no igaedtayo nga agtultuloy babaen iti pannakasuot ti pammatitayo.
Iti nabiit pay, kinuyogmi nga agassawa, ken ti Area Presidency, ni Elder David A. Bednar iti dedikasion ti Port-au-Prince Haiti Temple. Intugotmi ti anakmi a ni Jorge ket naisaritana maipanggep ti padasna: “Nakakaskasdaaw, Tatang! Idi irugi ni Elder Bednar ti dedicatory prayer, mariknak ti siled a napnuan iti bara ken lawag. Ti kararag ti nangnayon iti panangawatko iti panggep ti maysa a templo. Ti templo ti balay ti Apo.”
Iti Libro ni Mormon, insuro ni Nephi nga no kalikagumantayo nga ammuen ti pagayatan ti Apo, papigsaennatayo. Insuratna, “Siak, ni Nephi, gapu ta ubingak unay … ken addaan iti nasged a tarigagay a mangammo kadagiti kinadatdatlag ti Dios, gapuna, immawagak iti Apo; ket adtoy sinarungkarannak, ket pinaluknengna ti pusok a namatiak iti amin nga insawang ti amak; gapuna, saanak a simmuppiat kenkuana a kas kadagiti kakabsatko.”10
Kakabsat, tulungantayo dagiti annaktayo ken dagiti aglawlawtayo a surotenda iti dana ti katulagan ti Dios tapno ti Espiritu ket maisurona ida nga awaten ti ebanghelio ken agtarigagay nga agtungpal Kaniana iti tungpal biagda.
Iti panangpanunotko ti pagwadan dagiti dadakkelko, naamirisko a ti pammatik iti Apo ti mangipakita ti dalan a mangitudo kadatayo nga agsubli a natalged iti nailangitan a taengtayo. Ammok dagiti milagro ket sumangbay agingga iti pannakasuot ti pammatitayo.
Iburayko ti pammaneknekko ken ni Jesucristo ken ti pannubbot a sakripisiona. Ammok nga Isu ti Mangisalakantayo. Immay isuna ken ti Nailangitan nga Ama iti agsapa iti kalgaw ti 1820 iti ubing a Joseph Smith, ti propeta ti Pannakaipasubli. Ni Presidente Russell M. Nelson ti propeta iti panawentayo. Iti nagan ni Jesucristo, amen.