Dagiti Pudno a Disipulo ti Mangisalakan
Mariknatayo ti agnanayon a rag-o no ti Mangisalakantayo ken ti ebangheliona ti agbalin a kapatgan a pangbangonantayo iti biagtayo.
Kasla nailemmeng iti libro ni Haggai iti Daan a Tulag ti panangiladawan ti grupo dagiti tao a nangusar koma iti balakad ni Elder Holland. Nagbiddutda iti dida panangipangruna ken ni Cristo iti biagda ken iti serbisioda. Impinta ni Haggai dagiti ladawan ti balikas a makaabbukay-panunot idi ballaaganna dagitoy a tao nga agtalinaed iti nagin-awa a balayda imbes a mangbangon iti templo ti Apo:
“Panawen kadakayo nga agtaeng iti nabobedaan a balbalayyo, idinto a daytoy a balay agwalangwalang?”
“Gapuna a kastoy ti kuna ti Apo ti pangen; Utobenyo dagiti dalanyo.
“Nagmulakayo iti adu, ket agapitkayo iti bassit; mangankayo ngem dikay mabsog; uminumkayo ngem dikay mapnek; agkaweskayo ngem dikay mapapudot; ket daydiay manggun-od iti tangdan a maipisok iti supot nga adda buttawna.
“Kinuna ngarud ti Apo ti pangen; Utobenyo dagiti dalanyo.”1
Magustuanyo kadi dagita a panangiladawan ti awan kaes-eskanna a pangipangruna iti bambanag a di agnanayon ti bungana ngem iti bambanag ti Dios?
Iti kallabes a miting ti sakramento a dinar-ayak, inadaw ti nagsublin a misionario ti maysa nga ama nga addaan itoy nga ideya idi kinunana kadagiti annakna, ”Ti kasapulantayo ditoy ket ditay unay agusar iti Wi-Fi ngem ad-adda a tuladentayo ni Nephi!”
Nagnaedak iti West Africa iti lima a tawen, nakitak ti adu a pagarigan dagiti tao a saan a mangibain a mangipangpangruna iti ebanghelio. Maysa ti kasta a pagarigan ti nagan ti maysa a negosio pagpatarimaanan iti ligay ken panangbalanse iti pilid idiay i Ghana. Ninaganan ti akinkukua iti “Thy Will Alignment.”
Mariknatayo ti agnanayon a rag-o2 no ti Mangisalakanttayo ken ti ebangheliona ti agbalin a kapatgan a pangbangonantayo iti biagtayo. Nupay kasta, agbalin a kapatgan dagiti banag ti lubong no tagilag-anen ti ebanghelio, wenno idadar-ay laeng iti simbaan iti dua nga oras iti Domingo. No daytoy ti kaso, maipada daytoy iti panangipisok ti sueldotayo iti “supot nga adda buttawna.”
Ibagbaga ni Haggai nga agkumittayo—kas kunami iti Australia, “fair dinkum” maipapan ti panagbiag iti ebanghelio. Fair dinkum dagiti tao no aniada no ania ti isaoda no aniada.
Naadalko bassit ti panagbalin a fair dinkum ken ti panagkumitko iti panagay-ayam iti rugby. Naadalko a no inaramidko ti amin a kabaelak, intedko ti aminko, kapatgan ti ragsakko iti ay-ayam.
Paboritok a tawen iti salisal ti rugby ti tawen kalpasan ti haiskul. Agpada a talented ken commited ti team a nakaikamengak. Dakami ti champion team dayta a tawen. Nupay kasta, maysa nga aldaw kinay-ayammi ti team a nakapsut, ket kalpasan ti ay-ayam adda pasken a dinar-ayanmi, tinawen a pasala ti kolehio. Impapanko a gapu ta nalaka nga ay-ayam daytoy, nasken a saluadak a di madunor ti bagik tapno ma-enjoyko a husto ti panagsala. Iti dayta nga ay-ayam, dikami nakakumit a mabangga kas ninamnama, ket naabakkami. Ti madi pay a napasamak, nalpas ti ay-ayam a limteg ti bibigko, a gapu ti diak nagpakitaan iti dakkel a pasken. Nalabit a kasapulak a sursuruen ti maysa a banag.
Adda sabali pay a padas a simmaruno a nagay-ayamak a naan-anay a nagkumitak. Iti maysa a punto nagtarayak a sipupudno iti panggepko a makidungpar; dagus a nariknak ti sakit iti rupak. Gapu ta insuronak ti amak a nasken a diak pulos ipakaammo iti kalaban no nasaktannak, intuloyko ti nagay-ayam. Dayta a sardam, iti pannanganko, diak makagat ti kanek. Kabigantanna, napanak iti ospital, ket pinaneknekan ti X-ray a natukkol ti pangak. Napno ti dait ti ngiwatko iti sumuno nga innem a lawas.
Dagiti leksion a naadal iti daytoy a pangngarig ti nadunor a bibig ken ti natukkol a panga. Iti baet ti lagipko iti di mapatgan a bisinko iti makan iti innem a lawas, a likido laeng ti maipaunegko, diak nagbabawyan ti natukkol a pangak gapu ta daytoy ti bunga ti panangtedko iti aminko. Ngem nagbabawyak ti nadunor a bibigko gapu ta isimbolona ti panagkedkedko.
Ti panangted ti amintayo ket dina kayat a sawen nga agtultuloy a mabendisionan ken kanayon nga agballigitayo. Ngem kayatna a sawen maaddaantayo iti rag-o. Ti rag-o ket saan a mapukaw a ragsak wenno uray temporario a ragsak. Ti rag-o ket panagandur ken nabuangay kadagiti aramidtayo nga inawat ti Apo.3
Ti pagarigan ti kasta a panangawat ket ti estoria ni Oliver Granger. Kas iti kinuna ni Presidente Boyd K Packer: “Idi napapanaw dagiti Santo iti Kirtland, … nabati ni Oliver a mangilako iti sanikuada iti bassit a kabaelanna. Awanan iti adu a gundaway a makapagballigi isuna. Ket, talaga, a saan a nagballigi!”4 Dinutokan ti Umuna a Panguluen tapno aramidenna ti narigat a trabaho, no saan nga imposible. Ngem dinayaw ti Apo iti makita a saan a naballigian a panagkagumaanna kadagitoy a bailkas:
“Malagipko ni katulongak nga Oliver Granger; adtoy, pudno kunak kenkuana nga addanto sagrado a pakalaglagipan ti naganna kadagiti sumarsaruno a kaputotan, iti agnanayon nga awan inggana, kinuna ti Apo.
“Ngarud, irupirna koma a sipapasnek ti pannakasubbot ti Umuna a Panguluen ti Simbaanko, … ket no madaleb bumangonto manen, ta nasagsagradonto kaniak ti sakripisiona ngem ti matgedanna, kinuna ti Apo.”5
Mabalin a pudno dayta kadatayo amin—saan nga iti balligitayo no di ti sakripisio ken ti panagkagumaantayo ti napateg iti Apo.
Maysa pay a pagwadan ti pudno a disipulo ni Jesucristo ti maysa a gayyemmi iti Côte d’Ivoire iti West Africa. Nagsagaba daytoy napudno a kabsat a babai iti nakaro nga abuso iti rikna ken bagi, manipud iti asawana iti napaut a panawen, ket idi agangay nagdiborsioda. Di pulos nagduadua iti pammati ken kinaimbagna, ngem gapu iti panangranggas ti asawana kenkuana, napaut a panawen ti nakaro ti pannakadangranna. Iti bukodna a balikas, inladawanna ti napasamak:
“Nupay kinunak a pinakawankon isuna, kanayon a maturogak nga adda sugatko; binubosko dagiti aldawko nga adda sugatko. Kasla maur-uram ti pusok. Namin-adu a nagkararagak iti Apo nga ikkatenna daytoy kaniak, ngem napalaus unay ti sakitna ta pinatik a bubosek ti nabati pay a biagko iti daytoy. Nasaksakit daytoy ngem idi natay ti inak idi ubingak; nasaksakit pay daytoy ngem idi agpada a natay ti amak ken ti anakko a lalaki. Kasla dumakkel ken lukobanna ti pusok, a nangiparikna kaniak a matayak iti ania man nga oras.
“Adda kanito a damagek iti bagik no ania koma ti inaramid ti Mangisalakan iti situasionko, kek kaykayatko a kunaen, ‘Sobra daytoyen, Apo.’
“Kalpasanna iti maysa a bigat kinitak ti sakit a nagtaud amin ditoy iti pusok ken iti kaunggak, ken kinitak daytoy iti kararuak. Diakon marikna pay ti sakit. Dagus a nautobko ti amin a gapu a [nasken] a riknaek ti sakit, ngem diak narikna ti saem. Inurayko ti agmalem a mangkita no mariknak ti saem iti pusok; diak narikna daytoy. Kalpasanna nagparintumengak ket nagyaman iti Dios iti panangusarna iti pangsubbot a sakripisio ti Apo para kaniak.”6
Siraragsak itan a nailantip daytoy a kabsat a babai iti nasayaat ken napudno a lalaki a mangipatpateg unay kenkuana.
Ania koma ti nasken a galadtayo no pudnotayo a disipulo ni Cristo? Ken ania ti pateg ti ebanghelio kadatayo no “utobentayo dagiti dalan[tayo]” kas insingasing ni Haggai?
Magustuak ti pagwadan ti umno a galad nga impakita ti ama ni Ari Lamoni. Malagipyo idi damo nga agpungtot idi makitana ti anakna a kakuyog ni Ammon, maysa a Nephite—tao a kagura dagiti Lamanite. Inasutna ti espadana a makiranget ken ni Ammon ngem inunnaan ti espada ni Ammon ket dagus a naiturong iti bukodna a karabukob. “Ita kinuna ti ari, iti butengna a makapukaw iti biagna: No dimo gudasen ti biagko itdek ti ania man a dawatem, uray pay ti kagudua ti pagarian.”7
Kitaen ti diayana—gudua ti pagarianna para iti biagna.
Ngem idi agangay, kalpasan a naawatanna ti ebanghelio, nangidiaya iti sabali. “Kinuna ti ari: Ania ti aramidek tapno maaddaanak iti agnanayon a biag a kas iti imbagam? Wen, ania ti aramidek tapno maipasngayak iti Dios, iti baet ti kaadda daytoy nadangkes nga espiritu a nagramut iti barukongko, ket maawatko ti Espirituna, tapno mapnoak iti rag-o, tapno saanak a maisina iti maudi nga aldaw? Adtoy, kinunana, itedko amin a kukuak, wen, tallikudak ti pagariak, tapno maawatko daytoy naindaklan a rag-o.”8
Daytoy a kanito, nakasaganan a mangisuko iti amin ti pagarianna, ta napatpateg ti ebanghelio ngem amin a kukuana! Isu ti fair dinkum iti ebanghelio.
Damagek ti tunggal maysa kadatayo, fair dinkumtayo kadi met iti ebanghelio? Ta no dikayo unay managkumit saankayo a fair dinkum! Ket di dayawen ti Dios dagiti saan a naan-anay a managkumit.9
Awan ti gameng, wenno ania man nga ugali, wenno ania man a kasasaad, wenno ania man a social media, wenno ania man a video games, wenno ania man nga ay-ayam, wenno ania man a timpuyog, wenno celebrity, wenno ania man a banag iti daga a napatpateg pay ngem iti agnanayon a biag. Isu a daytoy ti balakad ti Apo iti tunggal tao ti “utobenyo dagiti dalanyo.”
Kasayaatan a maipeksak dagiti riknak iti balikas ni Nephi: “Agdayawak iti kinapudno; agdayawak ken ni Jesusko, gapu ta sinubbotna ti kararuak manipud iti impierno.”10
Pudnotayo kadi a pasurotna nga nagted ti aminna para kadatayo? Isu a Mannubbottayo ken Mangibabaettayo iti Ama? Isu Mismo ti naan-anay a nagkumit iti pangsubbot a sakripisiona ken itan iti ayatna, asina, ken tarigagayna a maaddaantayo iti agnanayon a rag-o? Ipakaasik ti amin a dumngeg ken mangbasa kadagitoy a balikas: Diyo koma isardeng ti naan-anay a panagkumityo agingga a nairuamkayon iti daytoy, iti masakbayan a panawen. Mangala iti fair dinkum itan ket agrag-o! Iti nagan ni Jesucristo, amen.