Panangdayaw ti Naganna
Babaen ti pakabigbigan ken pannakipaset iti katulagan, naawagantayo iti nagan ni Jesucristo.
Kabayatan ti panangur-uray dagiti nagannak iti pannakayanak ti ti maysa nga anakda, pagrebbenganda ti mangpili iti nagan ti baro a maladagada. Nalabit nga idi nayanakkayo, inawatyo ti nagan a nayusaren iti pamiliayo iti adun a kaputotan. Wenno nalabit a naikkankayo iti nagan a nalatak kadaydi a tawen wenno iti lugar a nakayanakanyo.
Nangted ni propeta Helaman ken ti asawana iti napateg a nagan kadagiti maladaga nga annakda a Nephi ken Lehi. Idi agangay imbaga ni Helaman kadagiti annakna:
“Adtoy, naitedkon kadakayo ti nagnagan dagiti immuna a nagannak kadatayo … tapno no malagipyo dagiti naganyo malagipyo ida; ken no malagipyo ida malagipyo dagiti aramidda … ti pannakaisaona, ken kasta met ti pannakaisuratna, a nasayaatda.”
”Ngarud, annakko a lallaki, kayatko a naimbag koma ti aramidenyo.”1
Nakatulong kada Nephi ken Lehi dagiti naganda tapno malagipda dagiti naimbag nga inaramid dagiti kapuonanda ken tapno kasta met ti aramidenda.
Kakabsat, sadino man ti pagnanaedantayo, ania man ti pagsasaotayo, 8 wenno 108 man ti tawentayo, naikkantayo iti nagan a kapada dagitoy ti panggepna.
”Ta adu kadatayo a nabuniagan ken Cristo ti nangikawes ken Cristo … gapu ta maymaysa[tayo] amin ken Cristo Jesus.”2
Kas miembro ti Simbaan ni Jesucristo dagiti Santo iti Ud-udina nga Aldaw, “umuna nga ikaritayo a siaayattayo nga umawat ti nagan ni Cristo … babaen ti ordinansa ti panagbuniag.”3 Babaen daytoy a katulagan, nagkaritayo a laglagipentayo Isuna a kanayon, agtungpal iti bilinna, ken agserbi iti dadduma. Ipabarotayo daytoy a katulagan tunggal makiramantayo iti sakramento ti aldaw ti Sabbath ken agragsak maminsan pay iti bendision “a pannagna iti baro a panagbiag.”4
Ti nagan a naited kadatayo idi nayanaktayo mangibagi iti pakabigbigan ken pannakipasettayo iti pamiliatayo. Idi “nayanak[tayo] manen” iti panagbuniag, ad-adda a naawatantayo ti kinasiasinotayo. “Gapu iti katulagan nga inaramidyo maawagankayo nga annak ni Cristo, … ta adtoy, … impasngaynakayo a naespirituan; gapu ta kinunayo a nangabaruanan dagiti pusoyo gapu iti pammatiyo iti naganna; ngarud, naipasngaykayo kenkuana.”5
Babaen ti pakabigbigan ken pannakipaset iti katulagan, naawagantayo iti nagan ni Jesucristo. Ken “awan ti sabali a nagan a maited uray ania a dalan wenno wagas para iti pannakaisalakan dagiti annak ti tao, no di laeng babaen ti nagan ni Cristo, ti Apo a Mannakabalin.”6
Nabayag a naam-ammon ti nagan ni Jesus sakbay ti pannakayanakna. Ken ni Ari Benjamin, impadto ti anghel, “Ket maawaganto iti Jesucristo, ti Anak ti Dios, … ket maawaganto ti inana iti Maria.”7 Naipakaammo pay ti aramidna a “pangsubbot nga ayat”8 iti annak ti Dios sadino man ti kaadda ti ebanghelio iti daga, manipud iti aldaw da Adan ken Eva agingga iti aldawtayo, tapno maammuanda “ti pamuidanda a mangkita iti pakaugasan ti basbasolda.”9
Itay napalabas a tawen, indanon ni Presidente Russell M. Nelson ti napadtuan a pakaasina kadagiti kakabsat a babbai a “sukogen ti masakbayan babaen ti panangtulong a mangummong iti nawarawara nga Israel.” Inawisnatayo a mangbasa ti Libro ni Mormon ken “mangmarka iti tunggal bersikulo a mangdakamat wenno mangitudo iti Mangisalakan.” Indawatna nga, “irantatayo nga isao maipapan ken ni Cristo, agrag-otayo ken Cristo, ken ikasabatayo ni Cristo iti [pamiliatayo] ken gagayyem.” Nalabit a nakitayon ti bunga ti karina nga “umas-asidegkayo iti Mangisalakan … Ket mangrugi a mapasamak dagiti panagbalbaliw, uray dagiti milagro.”10
Ti karitayo a kanayon a manglaglagip iti Mangisalakan patibkerennatayo a mangitakder ti kinapudno ken kinalinteg—sadinotayo man nangruna iti lugar nga awan ti makaammo iti tingnaytayo malaksid ti Dios. No manglagiptayo Kenkuana ken ti naganna nga adda kadatayo, awan panawentayo mangibaba ti bagbagitayo wenno manghusga iti sabali. Sikikitatayo iti Mangisalakan, makitatayo no siasinotayo—ti maipatpateg nga anak ti Dios.
Ti pananglagiptayo iti katulagan pagsardengenna ti danag, duadua agbalin a tured, ken mangted namnama no adda pannubok.
No maitibkol ken mapaaytayo iti panagdur-astayo iti kaaddatayo iti dana ti katulagan, nasken a lagipentayo laeng ti nagan ken naayat nga asina kadatayo. “Ta adda kenkuana amin a bileg, amin a nainsiriban; ken amin a pannakaawat; matukodna amin a banag, ket manangngaasi a Nabiag … kadagiti agbabawi ken mamati iti naganna.”11 Awanen nasamsam-it pay ngem iti uni ti nagan ni Jesus kadagiti amin nga addaan nasneban a puso ken napnuan babawi nga espiritu, nga “agaramid ken agbalin a nasaysayaat.”12
Insuro ni Presidente Nelson: “Limmabasen ti aldaw a makapagbalinka a a naulimek ken nagin-awa a Kristiano. Ti relihion saan laeng a panagpakita iti simbaan iti Domingo. No di ket panagpakita kas pudno a disipulo manipud bigat ti Domingo agingga ti rabii ti Sabado. … Awan ti makunkuna a ‘part-time’ a disipulo ni Apo Jesucristo.”13
Ti panagtudiotayo a mangawat iti nagan ni Cristo ket ad-adda pay ngem iti pormal a panagsinnungbat iti balikas. Saan a basta kari laeng wenno partuat ti kultura. Saan a seremonia wenno name tag a yusongtayo. Saan a pagsasao nga idulintayo wenno ibitintayo iti diding. Ti naganna ket nagan nga “ikawes,”14 a naisurat iti pusotayo, ken naikitikit iti langa[tayo].”15
Ti pangsubbot a sakripisio ti Mangisalakan lagipen koma, a kanayon, babaen iti panunot, aramid, ken pannakilangentayo iti dadduma. Di laeng manglagip kadagiti nagantayo, ngem manglagip kadatayo a kanayon. Kinuna ti Mangisalakan:
“Ta malipatan kadi ti babai ti agsussuso nga anakna, nga awan ti kaasina iti anak a nagtaud iti saklulona? Wen, mabalin a malipatanda, ngem dikanto malipatan, O balay ti Israel.
“Adtoy, naikitikitkan kadagiti dakulapko.”16
Insuro ni President George Albert Smith, “Dayawenyo dagiti naganyo, ta dumtengto ti aldaw nga ag-report kayo … iti Amayo sadi langit … no ania ti inaramidyo [kadagita] a nagan.”17
Kas iti naannad a pannakapili ti nagan da Nephi ken Lehi, maibaga ken maisurat kadi a pudnotayo a disipulo ti Apo Jesucristo? Dayawentayo kadi ti nagan ni Jesucristo a siaayat nga inawattayo iti bagbagitayo? Agpada kadi a “ministro ken saksitayo”18 iti managayat nga asi ken manangsubbot a bilegna?
Iti di pay a nabayag, dumdumngegak iti Libro ni Mormon. Iti maudi a kapitulo iti 2 Nephi, nangngegko a kinuna ni Nephi a diak pay nagbasa iti kasdiay idi. Iti unos ti kasuratanna, isuro ken paneknekanna ti “Mannubbot, ti “Nasantuan ti Israel,” ti “Kordero ti Dios,” ken ti “Mesias.” Kas panggibusna, nangngegko nga insaona dagitoy: “Agdayawak iti kinalawag; agdayawak iti kinapudno; agdayawak ken ni Jesusko, gapu ta sinubbotna ti kararuak.”19 Idi nangngegko dagitoy a balikas, nagrag-o toy pusok ken inuli-ulit ko a dinengngeg. Binigbig ken singungbatak dayta a bersikulo kas iti panangbigbig ken panangsungbatko iti bukodko a nagan.
Kinuna ti Apo, “Wen, nagasat dagitoy a tao a siaayat nga umawat iti naganko; ta maawagandanto iti naganko; ket kukuak ida.”20
Kas miembro ti Simbaan ni Jesucristo dagiti Santo iti Ud-udina nga Aldaw, “siraragsaktayo koma a [mangawat iti bagitayo] ti nagan ni Cristo”21 babaen ti panangdayaw ti naganna nga addaan ayat, pasnek, ken naimbag nga aramid. Paneknekak nga Isu “ti Kordero ti Dios, wen, a kas Anak ti Agnanayon nga Ama.”22 Iti nagan ti nasantuan nga anakna, ni Jesucristo, amen.