Ti Mensahe, ti Kaipapanan, ken ti Ummong
Babaen ti agtultuloy nga ariwawa ken pannakasinga ti aldawtayo, ipasnektayo koma ti kumita ken ni Cristo iti sentro ti biagtayo, pammatitayo, ken serbisiotayo.
Kakabsat, daytoy ni Sammy Ho Ching, pito a bulan, agbuybuya iti sapasap a komperensia iti telebision iti pagtaenganna idi napalabas nga Abril.
Idi oras nga asidegen a panangkanunong ken ni Presidente Russel M. Nelson ken ti dadduma pay a General Authority, iggem ni Sammy ti boteliana. Inaramidna ti sumaruno a kapatgan a banag.
Inted amin ti Sammy ti baro a kaipapanan ti konsepto a panagbutos babaen iti sakayo.
Kablaawankayo ditoy semiannual a komperensia ti Ti Simbaan ni Jesucristo dagiti Santo iti Ud-udina nga Aldaw. Tapno mangted pagtaudan iti panangisaritak iti kaipapanan dagitoy a mamindua ti makatawen a panagguummong, kayatko nga utobenyo daytoy a pakasaritaan iti Lucas iti Baro a Tulag:1
“Ket napasamak, nga idi lumabas ni [Jesus] iti Jerico, adda bulsek a lalaki nagtugaw iti igid ti dalan:
“… Idi nangngegna a lumabas ti ummong, dinamagna.
“… Imbagada kenkuana, a limmabas ni Jesus a Nazareno.
“Ket impukkawna, Jesus, sika nga Anak ni David, kaasiannak.”
Nasdaawda iti kinaturedna, pinadas ti ummong a pagsardengen ti lalaki, ngem “ad-adda a nagpukkaw,” kinunana. Kas bunga ti pammilitna, nayeg ken ni Jesus, a nakangngeg iti dawatna a napnuan pammati a maisubli ti panagkitana ket maimbagan.2
Maparegtaak itoy nalawag nga ababa a padas tunggal basaek daytoy. Maawatantayo ti parikut ti lalaki. Mangngegtayo nga agpukpukkaw a mangawis iti imatang ti Mangisalakan. Isemantayo ti saanna a panagulimek—kinapudnona, ad-adda ketdi nga impigsana ti pukkawna idi ibagbaga ti tinggal maysa kenkuana nga agulimek. Daytoy ti makaay-ayo nga estoria ti deteminado unay a pammati. Ngem kas iti amin a nasantuan a kasuratan, no ad-adda a basaentayo daytoy, ad-adu met ti masarakantayo ditoy.
Itay kallabes naguyugoyak iti nasayaat a pammateg daytoy a tao iti kaadda dagiti naespirituan a managrikna a tao iti aglawlawna. Ti sibibubukel a pateg daytoy nga estoria agbatay iti adu a di am-ammo a babbai ken lallaki a no damagen kaduada, “Ania ti kaipapanan daytoy nga ariwawa?” iti pannirigan no nasken a bigbigenyo ni Cristo a gapu ti panagariwawa; Isu ti “mismo a Kaipapanan.” Adda leksion daytoy ababa a panagpatang para kadatayo amin. No maipapan iti pammati ken konbiksion, makatulong a mangiturong ti saludsodmo kadagiti talaga nga addaan! “Maiturong kadi ti bulsek ti bulsek?” Kinuna ni Jesus. “[No kasta,] di kadi agpadada a matnagto iti abot?”3
Ti kasta a saludsod iti pammati ken konbiksion ti panggeptayo kadagitoy a komperensia, ken babaen ti panangkaduayo kadakami ita, maamirisyonto a daytoy ti panggep a pagbibinninglayan. Kumitakayo iti aglawlawyo. Ditoy a lugar ti aglawlaw makitayo dagiti pamilia iti amin a rukod a sumangpet manipud iti tunggal direksion. Naragsak a panagtitipon dagiti nabayagen nga aggagayyem, agsagsagana nga agkanta ti koro, ken agpukkaw dagiti sumupsupiat manipud iti paboritda a pagtaktakderan. Sapulen dagiti nakapagserbin a missionary dagiti sigud a kompanionda, idinto a sapulen dagiti kasubsubli a missionary dagiti baro a kompanion (no ammoyon ti kayatko a sawen!). Ken dagiti ladawan? Nakaad-adu! Gapu ta adda celfon ti amin, nagbaliw ti panggeptayo manipud iti “misionario ti tunggal miembro” iti “retratista ti tunggal miembro.” Iti baet ti amin daytoy a naragsak nga ariwawa, makapagdamag ti maysa iti ”Ania ti kayat a sawen daytoy?”
Kas iti estoria iti Baro a Tulag, mabigbig dagiti maparaburan iti panagkita nga, iti baet ti amin a banag a maidiaya kadatayo daytoy a tradision ti komperensia, bassit wenno awan ti kaipapananna malaksid no makitatayo ni Jesus ti sentro ti amin daytoy. Tapno maawatantayo ti sapsapulentayo, ti pangpaimbag nga inkarina, adtoy ti pateg a no kaskasano ammotayo, nasken a dita koma masinga iti ariwawa—naragsak man—ket ipamaysa ti imatangtayo Kenkuana. Ti kararag ti tunggal agsarita, ti namnama amin nga agkanta, ti panagraem ti tunggal sangaili—napasnek amin a mangawis iti espiritu ti Akinkukua itoy a Simbaan—ti sibibiag a Cristo, ti Kordero ti Dios, ti Prinsipe ti Kappia.
Ngem saan a nasken nga addatayo iti conference center a mangsapul Kenkuana. No damo a basaen ti maysa nga ubing ti Libro ni Mormon ket nagustuanna ti tured ni Abinadi wenno ti martsa ti 2000 nga agtutubo a mannakigubat, mainayontayo a ni Jesus ti kangrunaan a pokus daytoy a libro, nga Isu ti impluensia ken inspirasion ti intero a libro ken mangisilpo kadagiti amin a dadduma a bambanag a makaitandudo iti pammati.
Kasta met no agadal ti maysa a gayyem maipapan iti pammatitayo, marigatan kadagiti naidumduma ken di pamiliar a kannawidan iti relihiontayo—panagiget iti makan, abasto iti panangpannuray iti bukod a kabaelan, panagdaliasat dagiti pioneer, digitized family tree, nga addaan iti saan a naibaga a bilang dagiti sentro ti stake nga adu dagiti mangnamnama a maserbian iti naimas a charbroiled sirloin, a medium-rare. Makita ken mangngeg dagiti baro a gagayyemtayo dagiti banag a baro kadakuada, nasken nga ipaawattayo kadakuada ti kaipapanan ken panggep dagiti ariwawa ken makasinga kadakuada a napateg a pokus ti agnanayon nga ebanghelio—ti ayat dagiti Nailangitan a Nagannak, ti pangsubbot a sagut ti nadiosan nga Anak, ti makaliwliwa a tarabay ti Espiritu Santo, ti pannakaisubli amin dagitoy a kinapudno iti maudi nga aldaw ken adu pay.
No damo a mapan ti maysa iti nasantuan a templo, nalabit a matikaw isuna iti dayta a padas. Trabahotayo a penken a dagiti sagrado a simbolo ken naipalgak a ritual, ti kawes iti seremonia ken pabuya a ladawan, saanda a mangsinga ngem mangiturongda ketdi iti Mangisalakan, a pagdaydayawantayo. Ti templo ti balayna, ken nasken nga Isu ti kapatgan iti panunot ken pusotayo—punnuen ti nangayed a doktrina ni Cristo ti kinataotayo a kas iti panangpunnona kadagiti ordinansa iti templo—manipud iti panawen a nabasatayo ti inskripsion iti sango ti ridaw iti mismo agingga iti maudi a kanito a bubosentayo iti pasdek. Iti laksid ti amin a panagsiddaawtayo, makitatayo koma, kangrunaan iti amin, ti kaipapanan ni Jesus iti templo.
Panunoten ti dakkel a bilang dagiti inisiatibo ken baro a pakaammo iti Simbaan kadagitoy kallabes la unay a bulan. Bayat ti panagserbitayo ti tunggal maysa, wenno pasayaatentayo ti padas iti Sabbath, wenno umawat iti baro a programa para kadagiti ubbing ken agtutubo, malibtawantayo ti pudno a gapu kadagitoy naipaltiing a panagbalbaliw no makitatayo ida a naisina, di mainaig nga elemento imbes a panagkagumaan a makatulong kadatayo a sititibker a mangbangon iti Bato iti Pannakaisalakantayo.4 Awan duadua, daytoy ti panggep ni Presidente Russell M. Nelson iti panangpausarna kadatayo iti naipalgak a nagan ti Simbaan.5 No ni Jesus—ti naganna, ti doktrinana, ti pagwadanna, ti kinadiosna—mabalin a sentro iti panagrukbabtayo, a mangpappapigsa iti kinapudno nga insuro ni Alma: “Adu a banag a dumteng; [ngem] adtoy, adda maysa a banag a kapatgan ti amin— … ti Mannubbot [a] sibibiag ken umay kadagiti tattaona.”6
Maysa a panggibus a kapanunotan: Ti maika-19 a siglo a pagyanan ni Joseph Smith napno iti saksi a tattao a Kristiano nga agbibinnalubal.7 Ngem ti ariwawa a pinarnuayda, ilemlemmeng dagitoy napasnek a revivalist ti mismo a Mangisalakan a sireregta a sinapul ni ubing a Joseph. Iti pannakirangetna iti “kinalidem ken pannakatikaw,”8 napan iti kakaywan a nakakitaan ken nakangngeganna iti nadaydayag a saksi ti kinapateg ti Mangisalakan iti ebanghelio ngem iti ania man a nadakamattayo ditoy ita a bigat. Addan iti sagut a di impagarup ken ninamnama, nakita ni Joseph iti parmata ti Nailangitan nga Amana, ti naidaklan a Dios ti lubong, ken ni Jesucristo, ti naan-anay a Bugbugtong nga Anakna. kalpasanna impakita ti Ama ti pagwadan nga ilawlawagmi ita a bigat: intudona ni Jesus, a kunkunana, “Daytoy ti Patpatgek nga Anakko. Dumngegkayo Kenkuana!”9 Awan ti nain-indaklan a panangipeksa iti nadiosan a pakabigbigan ni Jesus, ti pategna iti plano ti pannakaisalakan, ken ti sasaadenna iti imatang ti Dios ti makarimbaw iti dayta nga ababa a pito a balikas a waragawag.
Ariwawa ken pannakatikaw? Ummong ken panagsusupiat? Adu pay ti kasta ti amin nga adda iti lubongtayo. Kinapudnona, agsuppiat pay la dagiti agduadua iti kastoy a parmata kenkinapudnona ti amin a dinakamatko ita nga aldaw. No kas pagarigan nalabit nga ikarkarigatanyo a makakita a nalawlawag ken mangsapul iti kaipapanan iti baet ti agduduma a kapanunotan, itudok kadakayo ti isu met la a Jesus ket paneknekak kas apostol ti padas ni Joseph Smith, umay agarup 1800 a tawen kalpasan nga inawat ti bulsek a gayyemtayo ti panagkitana iti nagkauna a Kalsada ti Jerico. Paneknekak daytoy dua ken adu a dadduma pay nga awan duadua a ti karagsakan a makita ken mangngegan iti biag ket ni Jesus saan laeng a ti panaglabasna10 no di ti yaayna kadatayo, agsardeng iti abaytayo ken agtalinaed kadatayo.11
Kakabsat, babaen ti agtultuloy nga ariwawa ken pannakasinga iti aldawtayo, ipasnektayo koma ti kumita ken ni Cristo iti sentro ti biagtayo, ti pammatitayo, ken ti serbisiotayo. Dayta ti pudno a kaipapananna. No iti maysa nga aldaw ket limitado ti pannirigantayo, ken bumassit ti panagtalektayo wenno masubok ken masukog ti pammatitayo—awan duadua a kastoyto—a mabalin nga ipukkawtayo a napigpigsa ti “Jesus, anak ni David, kaasiannak.”12 Ikarik nga addaan namnama ken konbiksion kas apostol ken propeta a denggennakayto ket sawenna ti, “Awatem ti panagkitam: insalakannaka ti pammatim.”13 Naragsak nga isasangbay iti sapasap a komperensia. Iti nagan ni Jesucristo, amen.