Ti Rag-o dagiti Santo
Umay ti rag-o manipud iti panagtungpal kadagiti bilin ni Cristo, panangparmek iti ladingit ken pagkapsutan babaen Kenkuana, ken panagserbi kas iti panagserbina.
Insurat ti propeta ti Libro ni Mormon a ni Enos, apoko ni Lehi, ti maysa a padas a napasamak idi agtutbo pay. Bayat ti panagan-anup nga is-isu iti kabakiran, inutob ni Enos dagiti sursuro ti amana, ni Jacob. Kinunana, “Naimula iti pusok dagiti balikas a masansan a mangngegko iti amak maipapan iti agnanayon a biag, ken ti ragsak dagiti santo, a simlep iti pusok.”1 Iti pannakabisin ti kararuana, nagparintumeng a nagkararag ni Enos, kararag a nagmalem ken nagpatnag, kararag a nangyeg kenkuana kadagiti paltiing, pammatalged, ken kari.
Adu dagiti masursuro manipud iti padas ni Enos, ngem ita diak pulos malipatan ti lagip ni Enos iti amana a masansan nga ibagbagana ti “rag-o dagiti santo.”
Itoy a komperensia tallo a tawen ti naglabas, nagsao ni Presidente Russell M. Nelson maipapan iti rag-o.2 Maibilang kadagiti dadduma a banag, kinunana:
“Bassit ti pakainaiganna ti rag-o a mariknatayo iti kasasaad ti biagtayo ken amin nga aramidentayo iti panangipokus iti biagtayo.
“No ti pokus ti biagtayo ti plano ti Dios iti pannakaisalakan … ken ni Jesucristo ken ebangheliona, mariknatayo ti rag-o ania man ti mapasamak—wenno saan a mapasamak—iti biagtayo. Umay ti rag-o manipud ken gapu Kenkuana. … Para kadagiti Santo iti Ud-udina nga Aldaw, ni Jesucristo ti rag-o!”3
Dagiti santo isu dagiti simreken iti katulagan ti ebanghelio babaen ti panagbuniag ken agkagumaan a sumurot ken ni Cristo kas disipulona.4 Ngarud, “ti rag-o dagiti santo” kaipapananna ti rag-o ti panagbalin a kas ken ni Cristo.
Isaritak ti rag-o a sumangbay iti panagtungpal iti bilinna, ti rag-o a tumaud iti panangparmek iti ladingit ken pagkapsutan babaen Kenkuana, ken ti rag-o iti panagserbi kas iti panagserbina.
Ti Rag-o ti Panagtungpal kadagiti Bilin ni Cristo
Agbibiagtayo iti panawen nga agpalalo ti kinailubongan nga adu ti agduadua iti kinapateg dagiti bilin ti Apo wenno di ikankano laeng dagitoy. Masansan, a dagiti tao a di mangikankano iti nadiosan a bilin kas iti linteg ti kinadalus ti dayaw, pagrukodan ti kinapudno, ken kinasantuan ti Sabbath, kasla agrang-ay ken agsagrapda iti nasayaat a bambanag ti biag, no dadduma ad-adda pay ngem dagiti agkagkagumaan nga agtulnog. Adda dagiti masdaaw no napateg ti aramid ken sakripisioda. Nagreklamo dagiti nagkauna nga umili ti Israel:
“Ubbaw ti panagserbi iti Dios: ket ania ti gunggonami iti panangaywanmi iti ordinansana, ken iti pannagnami a silaladingit iti saklang ti Apo ti pangen?
“Ket ita ibagatayo a naragsak dagiti natangsit; wen, dagiti agar-aramid iti kinadangkes ti narang-ay; wen, naisalakan dagiti nangsulisog iti Dios.”5
Urayenyo, kinuna ti Apo, agingga “iti aldaw nga aramidekto dagiti alahasko. … “Kalpasanna … mabigbigyonto ti paggidiatan dagiti nalinteg ken nadangkes, ti paggidiatan ti agserbi iti Dios ken ti saan nga agserbi kenkuana.”6 Mabalin dagiti nadangkes ti “agrag-o iti aramidda iti apagbiit,” ngem kanayon a temporario daytoy.7 Agpaut ti rag-o dagiti Santo.
Makita ti Dios dagiti banag iti pudno a panniriganda, ket ibinglayna dayta a pannirigan kadatayo babaen dagiti bilinna, a tarabayennatayo iti rigat ti mortalidad iti agnanayon a biag. Inlawlawag ni Propeta Joseph Smith: “No isuronatayo dagiti bilinna, daytoy ti pannirigan iti kinaagnanayon; gapu ta kitkitaennatayo ti Dios a kasla addatayo iti kinaagnanayon; agnaed ti Dios iti kinaagnanayon, ket saanna a kitaen dagiti banag kas iti aramidentayo.”8
Awan pay naam-ammok a nakasarak iti ebanghelio iti kamaudianan iti biagna a di nagtarigagay a nasapsapa koma. “O, naliklikak koma dagiti madi a pilik ken biddutko,” kunadanto. Dagiti bilin ti Apo ti tarabaytayo kadagiti nasaysayaat a pili ken naragragsak a pagbanagan. Nasken nga agrag-o ken agyamantayo Kenkuana iti panangipakitana kadatayo daytoy nasaysayaat a wagas.
Kas balasitang, ni Sister Kalombo Rosette Kamwanya manipud iti D.R. Congo, nga agserserbi itan iti Cote d’Ivoire Abidjan West Mission, nagayuno ken nagkararag iti tallo nga aldaw para iti turongen a kayat ti Dios nga alaenna. Iti maysa a sirmata iti rabii, naipakita kenkuana ti dua a pasdek, maysa a kapilia ken ti naammuanna itan a maysa a templo. Rinugianna a binirok ken di nagbayag nabirokanna ti kapilia a nakitana iti tagainepna. Naisurat ti karatula, “Ti Simbaan ni Jesucristo dagiti Santo iti Ud-udina nga Aldaw.” Nabuniagan ni Sister Kamwanya ket kalpasanna ti inana ken dagiti innem a kakabsatna a lallaki. Kinuna si Sister Kamwanya, “Idi inawatko ti ebanghelio, nariknak a kaslaak la natiliw a tumatayab a nawayawayaan. Napno ti pusok iti rag-o. … Adda namnamak nga ay-ayatennak ti Dios.”9
Ti panagtulnog kadagiti bilin ti Apo mangpabael kadatayo a nalaklaka ken naan-anay a mariknatayo ti ayatna. Ti nailet ken akikid a dana dagiti bilin nga agturong a direkta iti kayo ti biag, ken ti kayo ken ti bungana, ti kasam-itan ken “kangrunaan a makaay-ayo iti amin a banag,”10 ket mangibagi iti ayat ti Dios ken mangpunno iti kararua iti “aglaplapusanan a ragsak.”11 Kinuna ti Mangisalakan:
“No tungpalenyo dagiti bilbilinko, agtaengkayto iti ayatko; kasla iti panagtungpalko kadagiti bilbilin ni Amak, ket agtaengak iti ayatna.
“Dagitoy sinaok kadakayo, tapno ti rag-ok agtaeng koma kadakayo, ket ti rag-oyo mapno koma.”12
Ti Rag-o ti Panangparmek babaen ken ni Cristo
Uray no napudnotayo nga agtungpal kadagiti bilin, adda dagiti pannubok ken trahedia a manglapped ti rag-otayo. Ngem no ikarigatan a parmekentayo dagitoy a karit iti tulong ti Apo, taginayonenna ti rag-otayo ita ken ti rag-o nga ur-urayentayo. Nainanama ni Cristo dagiti disipulona, “Ditoy lubong addanto rigatyo: ngem mananginanamakayo; siak pinarmekko ti lubong.”13 Daytoy ti panagsubli Kenkuana, panagtungpal Kenkuana, pannakaibegkestayo Kenkuana, nga agbalin a rag-o dagiti pannubok ken liday. Dakamatek ti maysa a pagarigan.
Idi 1989, agserserbi ni Jack Rushton kas presidente ti Irvine California Stake iti Estados Unidos. Bayat ti panagbakasion ti pamilia iti California coast, nag-body surfing ni Jack idi induron ti dalluyon iti limned a bato, a narung-o ti tengngedna ken nakaro ti dunor ti durina. Kuna ni Jack, idi agangay “Idi natamaannak, ammok a naparalisadoak.”14 Saanen a makasao wenno makaanges pay iti bukodna.15
Simmuporta ti pamilia, gaggayem, ken dagiti miembro ti stake ken ni Brother Rushton ken ti asawana, ni Jo Anne, ken, maibilang iti dadduma pay a banag, binaliwanda ti maysa a paset ti balay para iti wheelchair ni Jack. Ni Jo Anne ti nangaywan ken ni Jack iti sumaruno a 23 a tawen. Iti panangdakamatna kadagiti pakaammuan iti Libro ni Mormon no kasano a binisita ti Apo dagiti taona iti rigatda ken pinalag-anna dagiti dagensenda,16 kinuna ni Jo Anne, “Nasdaawak iti kinalag-an ti pusok iti panangaywanko iti asawak .”17
Naisubli ti kabaelan ni Jack nga agsao idi binaliwan ti sistema ti panagangesna ket iti uneg ti makatawen, naawagan ni Jack a kas mannursuro iti Gospel Doctrine ken ken stake patriarch. No mangted iti patriarchal blessing, ipan ti sabali a priesthood holder ti ima ni Brother Rushton iti ulo ti tao nga umawat iti bendision ken suportaranra iti ima ken takiagna bayat ti panagbendision. Natay ni Jack iti Aldaw ti Paskua 2012, kalpasan ti 22 a tawen ti napasnek a serbisiona.
Iti maysa nga interbyu, napaliiw ni Jack: “Umay dagiti problema iti biagtayo; paset laeng daytoy ti panagyan ditoy daga. Adda tattao a a mangipapan a ti relihion wenno kaadda ti pammati iti Dios ti mangsaluad kenka iti dakes a banag. Panagkunak saan a dayta ti punto. Panagkunak napigsa ti pammatitayo, a no mapasamak dagiti dakes a banag, a dumtengto, mapagballigiantayo ida. … Di nagduadua ti pammatik, ngem di kayat a sawen nga awan ti nagladladingitak. Panagkunak idi damo iti biagko a maib-ibusen ti pasensiak, ket awan pagkamangak, ket inasitgak ti Apo, ket agingga ita, mariknak ti awan sardayna a rag-o.”18
Daytoy ti aldaw ti awan-asina a panangraut iti social media ken iti tao a maibusor kadagiti mangitandudo iti pagrukodan ti Apo mainaig iti panagkawes, pagaliwaksayan, ken seksual a kinadalus. Masansan a dagiti agtutubo ken young adult a Santo, kasta met dagiti babbai ken inna, nga agsagsagaba ken maidadanes. Narigat a mangparmek ti kasta a panagabuso, ngem laglagipen ti balikas ni Pedro: “No maumsikayo gapu iti nagan ni Cristo, nagasatkayo; ta ti espiritu ti dayag ken ti Dios agtaeng kadakayo.”19
Inosente da Adan ken Eva iti Minuyongan ti Eden, “kasasaad ti kinainosente, awanan iti ragsak, ta saanda nga ammo ti rigat.”20 Ita, kas adda sungsungbatanna, agrag-otayo a mangparmek iti kinaay-ay iti ania man a kita, basol man, pannubok, pagkapsutan man, wenno sabali a lapped ti kinaragsak. Daytoy ti rag-o ti panagdur-as iti dana ti kinadisipulo; ti rag-o ti “panangawat iti pannakaugas dagiti … basol, ken kinatalna ti pakinakemda”;21 ti rag-o ti rikna ti maysa a kararua a dumakkel ken dumur-as babaen ti parabur ni Cristo.22
Ti Rag-o ti Panagserbi kas iti panangserbi ni Cristo
Masarakan ti Mangisalakan ti rag-o a mangipatungpal iti saan nga ipapatay ken agnanayon a biag.23 Kinuna ni Presidente Russell M. Nelson maipapan iti Pannubbot ti Mangisalakan:
“Kas iti amin a banag, ni Jesucristo ti kangrunaan a pagwadantayo, ‘a gapu iti rag-o a naipakita iti imatangna nagibtur iti krus’ [Hebreo 12:2]. Panunoten dayta! Tapno maibturanna ti kasaeman a padas a naibturan iti daga, nagpokus ti Mangisalakantayo iti rag-o!
“Ken ania ti rag-o a nadatag iti sanguananna? Awan duadua a maibilang ti rag-o ti pannakadalus, pannakaagas, ken pannakapapigsatayo; ti rag-o ti panagbayad iti basbasol ti amin nga agbabawi; ti rag-o ti posible a panagawidtayo—nadalus ken maikari—a makipagnaed iti Nailangitan a Nagannak ken pamiliatayo.”24
Kapada ti rag-o a “naidatag kadatayo” isu ti rag-o ti panangtulong ti Mangisalakan iti aramidna iti panangsubbot. Kas bukel ken annak ni Abraham,25 makiramantayo a iti panangbendision iti amin a pamilia iti daga, “iti bendision ti Ebanghelio, a dagiti bendision ti pannakaisalakan, uray iti agnanayon a biag.”26
Panunotek dagiti balikas ni Alma:
“Daytoy ti idaydayawko, ta nalabit a siak ti ramit dagiti ima ti Dios a mamagbabawi iti sumagmamano a kararua.
“Ket adtoy, iti pannakakitak iti adu a kakabsatko a sipapasnek nga agbabawi a silaladingit, ken umasideg iti Apo a Diosda, iti dayta napno ti kararuak iti rag-o. …
“Ngem saanak nga agrag-o iti bukodko laeng a balligi, ngem ad-adda a naan-anay ti rag-ok gapu iti balligi dagiti kabsatko, nga idi pay nga adda iti daga ti Nephi. …
“Ita, iti panangpanunotko iti balligi dagitoy a kakabsatko naluyaan ti kararuak, a kas man iti pannakaisinana iti bagi, a kas idi, isu a napalalo ti rag-ok.”27
Dagiti bunga ti serbisiotayo iti tunggal maysa iti Simbaan ket paset ti rag-o a “naidatag kadatayo.” Uray iti panawen ti panakaupay wenno stress, makapagserbitayo no nakapokustayo iti rag-o a maparagsaktayo ti Dios ken mangyeg iti silaw, tulong, ken ragsak kadagiti annakna, a kakabsattayo.
Iti Haiti iti naglabas a bulan para iti dedikasion ti Port-au-Prince Temple, naam-ammo da Elder David ken Sister Susan Bednar ti maysa a kabsat a babai a natay ti lakayna iti mano laeng nga aldaw gapu iti nakaam-amak nga aksidente. Nakipagsangsangitda kenkuana. Ngem iti Domingo adda daytoy a naayat a babai iti lugarna kas usher iti serbisio ti dedikasion nga umis-isem iti amin a sumrek iti templo.
Patiek nga umay ti “rag-o dagiti santo” ti panakaammo nga ipakaasi ti Mangisalakan ti panggepda,28 “ken awan ti makarikna ti rag-o a [mangpunnonto] iti karuruatayo [kas] [mangngegantayo] ti kararag ni Jesus para kadatayo iti Ama.”29 Kadua ni Presidente Russell M. Nelson, paneknekak a sagut dayta a rag-o kadagiti napudno a Santo “a nagibtur kadagiti krus ti lubong”30 ken mangikarkarigan nga agbiag a nalinteg, a kas insuro ni Jesucristo.”31 Sapay koma ta naan-anay ti rag-oyo, ikararagko iti nagan ni Jesucristo, amen.