Umaykayo, Sumurot Kaniak—ti Plano ti Apo a Pangsuppiat iti Istratehia ken Pangtulong a Mangliklik iti Parikut
Isagana ti Apo dagiti taona maisuppiat kadagiti darup ti kabusor. Umaykayo, Sumurot Kaniak ti plano ti Apo iti counterstrategy ken proactive.
Agrag-otayo iti panagtataripnong iti daytoy sapasap a komperensia ti Ti Simbaan ni Jesucristo dagiti Santo iti Ud-udina nga Aldaw. Daytoy ti bendision nga umawat iti panunot ken pagayatan ti Apo babaen dagiti pannursuro dagiti propeta ken apostolna. Ni Presidente Russell M. Nelson ti sibibiag a propeta ti Dios. Agyamantayo iti naparegta a balakad ken direksionna a naawat ita nga aldaw.
Inayonko ti panagsaksik kadagiti naibinglay a nasapsapa. Paneknekak ti Dios, ti Agnanayon nga Amatayo. Sibibiag ken patpatgennatayo ken bantayannatayo. Ti planona iti ragsak ti mangted iti bendision daytoy mortal a biag ken ti panagsublitayo iti sidongna.
Paneknekak pay ni Jesucristo. Isu ti Bugbugtong nga Anak ti Dios. Insalakannatayo manipud iti patay, ken subbotennatayo manipud iti basol no mamatitayo Kenkuana ken agbabawi. Ti agnanayon a pangsubbot a sakripisiona para kadatayo ti mangyeg kadagiti bendision ti imortalidad ken agnanayon a biag. Kinapudnona, “Agyamanantayo iti Dios iti awan umarpad a sagut ti nadiosan nga anakna” (“The Living Christ: The Testimony of the Apostles,” Liahona, Mayo 2017, uneg ti akinsango nga akkub).
Mabendisionan dagiti Santo iti Ud-udina nga Aldaw nga agdaydayaw ken ni Jesucristo kadagiti templona. Maysa kadagita a templo ti agdama a maipatpatakder iti Winnipeg, Canada. Adda gundawaymi iti asawak, ni Anne Marie, a bumisita iti disso a pagpatakderan itay Agosto itoy a tawen. Napintas a dinisenio ti templo ken awan duadua ti kinangayedna intono malpas. Nupay kasta, dikayo maaddaan iti nangayed a templo a Winnipeg, wenno iti sadino man, no awanan iti natibker a pundasion.
Ti panagyelo ken panagtunaw a kondision ti daga iti Winnipeg ti mapannubok a pangisagana iti pundasion ti templo. Ngarud, naikeddeng a ti pundasion daytoy a templo buklen ti 70 a biga a landok a nabalut iti kongkreto. Dagitoy a biga ket 60 kadapan (18 m) ti kaatiddog ken 12 agingga 20 a pulgada (30 agingga iti 50 cm) iti diameter. Maikalida iti uneg ti daga agingga iti natibker a pamuon, agarup 50 (15 m) kadapan ti kaunegna. Iti kastoy, mangted ti 70 a biga iti solido, natibker a pundasion iti agbalinto a napintas a templo ti Winnipeg.
Kas Santo iti Ud-udina nga Aldaw, kalikagumantayo ti kasta met a natibker ken awan duadua a pamuon iti biagtayo—naespirituan a pundasion a kasapulan iti panagdaliasattayo iti mortalidad ken agsubli iti nailangitan a pagtaengantayo. Naipasdek dayta a pundasion iti natibker a pamuon ti kumbersiontayo ken ni Apo Jesucristo.
Lagipentayo dagiti pannursuro ni Helaman manipud iti Libro ni Mormon: “Ket ita, annakko, laglagipenyo, laglagipenyo a babaento ti bato ti Mannubbottayo, nga isu ni Cristo, ti Anak ti Dios, a nasken a bangonenyo ti pamuonyo; tapno no yeg ti sairo ti nabileg nga anginna, wen, dagiti gayang iti alipugpog, … awanto ti bilegna kadakayo a mangirarem, iti taaw ni ladingit ken awan inggana a kinaay-ay-ay, gapu iti bato a binangonyo, nga awan duadua a pamuon, ti pamuon a no bangonen dagiti tao saanda a matuang” (Helaman 5:12).
Siyayaman, agbibiagtayo iti panawen a suruandatayo dagiti propeta ken apostol maipapan iti Mangisalakan a ni Jesucristo. Ti panangsurot iti balakadda ti mangtulong a mangbangon iti natibker a pamuon ken ni Cristo.
Maysa a tawen ti napalabas, iti panglukat a mensahena iti sapasap a komerensia ti Oktubre 2018, inted ni Presidente Russel M. Nelson daytoy a palawag ken pammallaag: “Ti nabayagen a panggep ti Simbaan ket ti itutulong iti amin a miembro a mangpatibker iti pammatida iti Apotayo a ni Jesucristo ken ti Pannubbotna, a mangtulong kadakuada nga agaramid ken agtungpal kadagiti katulaganda iti Dios, ken mangpatibker ken mangilantip iti pamiliada. Iti kastoy a karikut ti lubong ita, saan a nalaka daytoy. Pumigpigsa ti idadarup ti kabusor iti pammati ken kadatayo ken iti pamiliatayo iti naparpardas pay. Tapno agbiag a naespirituan, kasapulantayo Dagiti plano a pangsuppiat iti istratehia ken pangtulong a mangliklik iti parikut” (“Opening Remarks,” Liahona, Nob. 2018, 7; nainayon ti panangyunay-unay).
Kalpasan ti mensahe ni Presidente Nelson, inyam-ammo ni Elder Quentin L. Cook ti Korum ti Sangapulo-ket-dua nga Apostol ti Umaykayo, Sumurot Kaniak resource para kadagiti indibidual ken pamilia. Iraman ti mensahena dagiti sumaganad a palawag:
-
“Ti baro a home-study Umaykayo, Sumurot Kaniak resource … nasangrat a mangtulong kadagiti miembro nga agadal iti ebanghelio iti pagtaengan.”
-
“‘Daytoy a resource ket para iti tunggal indibidual ken pamilia iti Simbaan’ [Umaykayo, Sumurot Kaniak—Para kadagiti Indibidual ken Pamilia (2019), vi].”
-
“Panggepmi nga ibalanse ti Simbaan ken dagiti padas iti pagtaengan iti wagas a mangpapigsanto iti pammati ken kinaespirituan ken mangpauneg iti kumbersion iti Nailangitan nga Ama ken ni Apo Jesucristo.” (“Deep and Lasting Conversion to Heavenly Father and the Lord Jesus Christ,” Liahona, Nob. 2018, 9–10.)
Nangrugi idi Enero itoy a tawen, narugian dagiti Santo iti Ud-udina nga Aldaw iti sangalubongan ti panagadal iti Baro a Tulag, iti Umaykayo, Sumurot Kaniak a resource kas pangiwanwantayo. Iti linawas nga iskediul, ti Umaykayo, Sumurot Kaniak tulongannatayo nga agadal kadagiti nasantusan a kasuratan, ti doktrina ti ebanghelio, ken dagiti pannursuro dagiti propeta ken apostol. Daytoy ti datdatlag a resource para kadatayo amin.
Kalpasan ti siam a bulan a panagkagumaan a panagadal iti nasantuan a kasuratan iti sangalubongan, ania ti makitatayo? Makitatayo dagiti Santo iti Ud-udina nga Aldaw iti sadino man a dumurdur-as iti pammati ken kinapasnek ken ni Apo Jesucristo. Makitatayo dagiti indibidual ken pamilia a mangilatang iti orasda iti makalawas nga agadal iti balikas ti Apo. Makitatayo ti panagdur-as ti panangisuro iti ebanghelio kadagiti klase ti Domingo bayat ti panagadaltayo kadagiti nasantuan a kasuratan iti pagtaengan ken panangibinglaytayo kadagiti nalawag a pannakaawattayo iti simbaan. Makitatayo ti naragrag-o ken nakaykaysa a pamilia iti yaakartayo manipud panagbasa laeng kadagiti nasantuan a kasuratan iti panagadal kadagiti nasantuan a kasuratan iti napaspasnek a wagas.
Gundawayko a bisitaen ti adu a Santo iti Ud-udina nga Aldaw ket denggen ti umuna a padasda iti Umaykayo, Sumurot Kaniak. Dagiti panangipeksada iti pammati ti mangparag-o iti pusok. Dagitoy ti sumagmamano laeng a masao a nangngegko iti manipud kadagiti agduduma a miembro ti Simbaan iti nadumaduma a paset ti lubong:
-
Imbinglay ti maysa nga ama, “Magustuak ti Umaykayo, Sumurot Kaniak ta mangted daytoy iti gundaway nga agpaneknek kadagiti annakko maipapan iti Mangisalakan.”
-
Iti sabali a pagtaengan, kinuna ti maysa nga ubing, “Daytoy ti gundaway a denggek nga agpaneknek dagiti dadakkelko.”
-
Kinuna ti maysa nga ina: “Naparegtakami no kasano nga unaenmi ti Dios. Iti kanito a [napanunotmi] nga ‘awananakami’ [napnuan] iti namnama, rag-o, talna, ken balligi iti wagas a dimi ammo a posible.”
-
Napaliiw ti agassawa: “Basbasaenmi dagiti nasantuan a kasuratan a maiduma unay ngem iti panagbasami kadagitoy kasakbayanna. Ad-adu nga amang ti nasursuromin ngem iti nasursuromi kasakbayanna. Kayat ti Apo a makitatayo dagiti sabali a bambanag. Isagsagananatayo ti Apo.”
-
Kinuna ti maysa nga ina: “Magustuak nga aggigiddankami a mangsursuro iti maysa a banag. Idi, basbasaenmi daytoy. Itan, sursuruenmi daytoy.”
-
Imbinglay ti maysa a kabsat a babai daytoy a pannirigan: “Idi, adda lessonmo sa nayonan dagiti nasantuan a kasuratan daytoy. Itan, addaankan iti nasantuan a kasuratan ket nayonan daytoy iti lesson.”
-
Kinuna ti maysa pay a kabsat a babai: “Mariknak ti pagdumaan no aramidek [a maidilig iti] no diak aramiden. Nalaklaka a kasaok dagiti dadduma maipapan ken ni Jesucristo ken ti pammatitayo.”
-
Kinuna ti maysa a lelang, “Awagak dagiti annakko ken appokok iti Domingo, ket agbibinninglaykami iti insights manipud iti Umaykayo, Sumurot Kaniak a sangkamaysa.”
-
Napaliiw ti maysa a kabsat a babai: ti “Umaykayo, Sumurot Kaniak kasla agserserbi kaniak ti Mangisalakan mismo. Pinaregta ti langit daytoy.”
-
Kinuna ti maysa nga ama, “No usarenmi ti Umaykayo, Sumurot Kaniak, kaslakami dagiti annak ti Israel, a mangmarmarka kadagiti adigi ti ridawmi, a mangsalsaluad iti pamiliami manipud iti impluensia ti manangdadael.”
Kakabsat, pakaragsakanmi a bisitaenkayo ket denggen no kasano a bendision dagiti panangkagumaanyo iti Umaykayo, Sumurot Kaniak iti biagyo. Agyamankami iti kinapasnekyo.
Ti panagadal iti nasantuan a kasuratan iti Umaykayo, Sumurot Kaniak kas pangiwanwan ket mangpappapigsa iti kumbersiontayo ken ni Jesucristo ken iti ebangheliona. Ditayo laeng isukat ti maysa oras iti simbaan iti Domingo para iti maysa oras a panangadal iti nasantuan a kasuratan iti pagtaengan. Ti panagsursurol iti ebanghelio ket agtultuloy nga aramid iti intero a makalawas. Kuna ti maysa a kabsat a babai kaniak, “Ti panggep a tun-oyen ket saan a pabassiten iti maysa nga oras ti simbaan; daytoy ti panangaramid a napapaut iti innem nga aldaw ti simbaan!”
Ita, panunoten manen ti ballaag ti propetatayo, ni Presidente Nelson, nga intedna iti pananglukatna iti sapasap a komperensia ti Oktubre 2018:
“Pumigpigsa dagiti idadarup ti kabusor iti pammati ken kadatayo ken iti pamiliatayo iti naparpardas pay. Tapno agbiag a naespirituan, masapultayo dagiti plano a pangsuppiat iti istratehia ken pangtulong a mangliklik iti parikut” (Opening Remarks,” 7).
Kalpasanna (mapattapatta a kalpasan ti 29 nga oras) iti malem ti Domingo, inggibusna nga addaan iti daytoy a kari: “No napasnekkayo a mangbalbaliw iti pagtaenganyo iti sentro a pagsursuruan iti ebanghelio, … bumassitto ti impluensia ti kabusor iti biagyo ken iti pagtaenganyo”(“Becoming Exemplary Latter-day Saints,” Liahona, Nob. 2018, 113).
Kasano a pumardas ti panagadu ti idadarup ti kabusor idinto a talaga a bumassit ti impluensia ti kabusor iti isu met la a gundaway? Mabalin a mapasamak daytoy, ken mapaspasamaken iti intero a Simbaan, gapu ta isagana ti Apo dagiti taona iti idadarup ti kabusor. Umaykayo, Sumurot Kaniak ti plano ti Apo iti pangsuppiat iti istratehia ken pangtulong a mangliklik iti parikut. Kas iti insuro ni Presidente Nelson, “Ti baro a home-centered, Church-supported integrated curriculum addaan iti potensial a mangpaluspos iti bileg ti pamilia.” Nupay kasta, agkasapulan daytoy iti kasayaatan a panagkagumaantayo; nasken a “[surotentayo] a sipupudno ken siaannad a pagbalinentayo ti pagtaengan[tayo] a pagkamangan ti pammati” (“Becoming Exemplary Latter-day Saints,” 113).
Kalpasan ti amin, kinuna pay ni Presidente Nelson, “Pagrebbengantayo ti bukod ken naespirituan a panagdur-astayo” “Opening Remarks,” 8).
Iti Umaykayo, Sumurot Kaniak a resource, isagsagananatayo ti Apo “iti napeggad a panawen a sangsanguentayo ita” (Quentin L. Cook, “Deep and Lasting Conversion,” 10). Tultulongannatayo a mangbangon iti dayta “awan duadua a pamuon, ti pamuon a no bangonen dagiti tao tapno dida matuang” (Helaman 5:12)—nakaangkla a sititibker ti pundasion ti pammaneknek iti natibker a pamuon ti kumbersiontayo ken ni ApoJesucristo.
Mapatibkernatayo koma ti inaldaw a panagadatayo kadagiti nasantuan a kasuratan ken maikaritayo koma kadagitoy naikari a bendision. Ikararagko iti nagan ni Jesucristo, amen.