Panangusar iti Umaykayo, Sumurot Kaniak—Para kadagiti Indibidual ken Pamilia

Para iti Siasino Daytoy a Resource?

Daytoy a resource ket para iti tunggal indibidual ken pamilia iti Simbaan. Naisangrat daytoy a mangtulong kenka nga agsursuro iti ebanghelio—bukbukodmo man wenno iti pamiliam. No saan a regular ti panagadalmo iti ebanghelio iti napalabas, daytoy a resource ket matulongannaka a mangirugi. No addaankan iti nasayaat nga ugali nga agadal iti ebanghelio, daytoy a resource ket makatulong kenka a maaddaan iti ad-adu a napnuan kaipapanan a padas.

Kasano ti Nasken a Panangusarko iti Daytoy a Resource?

Usarem daytoy a resource iti ania man a wagas a makatulong kenka. Mabalin a masarakam daytoy a makatulong a kas pangiwanwan wenno tulong para iti bukod ken sangapamiliaan a panagadal iti nasantuan a kasuratan. Mabalinmo pay nga usaren daytoy para iti family home evening. Dagiti balabala ket mangitampok kadagiti pagbatayan a masarakan iti Baro a Tulag, mangisingasing kadagiti kapanunotan iti panagadal ken aktibidad para kadagiti indibidual ken pamilia, ken mangted kadagiti lugar a pangisuratam kadagiti impresionmo.

Mabalin a sika ken ti pamiliam ket regular nga agad-adalen iti ebanghelio. Nalabit nga addaanka iti panggep a tun-oyen a mangbasa iti Libro ni Mormon. Wenno nalabit nga agbasbasaka iti sabali pay a libro ti nasantuan a kasuratan para iti klase ti seminary wenno institute.. Ti Umaykayo, Sumurot Kaniak ket saan a nairanta a mangsukat wenno makikompetensia kadagiti naimbag a banag nga ar-aramidem. Mabalin nga adda dagiti wagas a kanayon a masursuro manipud iti Baro a Tulag ken maipatungpalmo latta dagiti dadduma pay a panggepmo a tun-oyen nga agadal iti dadduma pay nasantuan a kasuratan. Kas pagarigan, mabalinmo nga ituloy ti panagbasbasam iti Libro ni Mormon para iti bukodmo a panagadal iti nasantuan a kasuratan ken mangbasa iti Baro a Tulag iti pamiliam (wenno vice versa). Wenno, bayat ti panangbasam iti Baro a Tulag, mabalinmo ti agsapul kadagiti binatog iti Libro ni Mormon a mangpatibker iti no ania ti sursuruem. Surotem ti pannarabay ti Espiritu a mangikeddeng no kasano ti pamay-am iti bukodmo a panagadal iti balikas ti Dios.

Kasano a MainaigDaytoy a Resource iti no Ania ti Mapasamak iti Simbaan?

Naurnos dagiti balabala iti daytoy a resource a mayannurot iti linawas nga iskediul iti panagbasa. Dagiti adalen nga isuro kadagiti klase ti Primary ken Sunday School ket sumurot iti isu met laeng nga iskediul. Tapno masuportaran dagiti panagkagumaanmo nga agsursuro ken agbiag iti ebanghelio iti pagtaengan, mangtedto kenka dagiti mannursurom kadagiti gundaway a pangibinglayam kadagiti padasmo, kapanunotan, ken dagiti saludsodmo maipapan kadagiti binatog iti nasantuan a kasuratan nga ad-adalem bayat dayta a lawas.

Ti Umaykayo, Sumurot Kaniak—Para iti Primary ken Ti Umaykayo, Sumurot Kaniak—Para iti Sunday School ket mangiraman kadagiti balabala para iti tunggal lawas ti tawen malaksid iti dua a Domingo no maangay ti sapasap a komperensia. No dagiti gagangay a miting ti Simbaan ket saan a maangay gapu iti komperensia ti stake wenno ania man a dadduma pay a gapu, maawiska a mangituloy iti panagadal iti Baro a Tulag iti pagtaengan. Mabalin a malibtawan dagiti klaseyo iti Simbaan dagiti adalen a nayiskediul para kadagita a petsa wenno pagtiponen ti dua nga adalen tapno makakamakam iti iskediul.

Nasken Kadi a Surotek ti Iskediul?

Ti iskediul ti mangtulongto kenka a makakamakam iti material a maisuro kadagiti klase iti Domingo, ngem saan a nasken a surotem daytoy; ta ti iskediul ket pangiwanwan laeng a mangtulong kenka a makagiddan. Ti napateg a banag ket ti pannakasursurom iti ebanghelio a kas indibidual ken kas maysa a pamilia.