Dagiti Kapanunotan tapno Mapadur-as ti Bukodmo a Panagadal iti Nasantuan a Kasuratan

Dagitoy ti sumagmamano a simple a wagas a mangpadur-as ti panagadalmo iti balikas ti Dios kadagiti nasantuan a kasuratan:

Sapulem dagiti Kinapudno maipapan ken ni Jesucristo

Isuronatayo dagiti nasantuan a kasuratan a paneknekan ti amin a banag maipapan ken ni Cristo (kitaen iti 2 Nephi 11:4; Moises 6: 63), isu a sapulem Isuna kadagiti pasamak, estoria, ken pannursuro ti Baro a Tulag. Ibilangmo ti panagsurat wenno panangmarka kadagiti bersikulo a mangisuro maipapan iti Mangisalakan ken no kasano ti mangsurot Kenkuana.

Sapulen dagiti Makaparegta a Balikas ken Ragup dagiti Balikas

Mabalin a makakitaka kadagiti sumagmamano a balikas ken ragup dagiti balikas kadagiti nasantuan a kasuratan a mangawis iti pasnekmo, a kasla naipangpangruna a naisurat dagitoy a para kenka. Marikna dagitoy a personal ti pannakainaigna ken mangparegta ken mangguyugoy kenka. Ibilangmo ti panangmarka kadagitoy kadagiti nasantuan a kasuratam wenno panangisurat kadagitoy iti study journalmo.

Mangsapul kadagitiKinapudno ti Ebanghelio

No dadduma dagiti kinapudno ti ebanghelio (masansan a maawagan iti doktrina wenno dagiti prinsipio) ket direkta a madakamat, ken no dadduma maipadlaw babaen iti pagwadan wenno estoria. Saludsodem ti bagim, “Ania dagiti agnanayon a kinapudno a maisursuro kadagitoy a bersikulo?”

Dumngeg iti Espiritu

Imdengam dagiti kapanunotam ken riknam, nga uray dagitoy ket awan pakainaiganna iti basbasaem. Dagitoy nga impresion ket mabalin a dagiti mismo a banag a kayat ti Nailangitan nga Ama a masursurom.

Iyarig dagiti Nasantuan a Kasuratan iti Biagmo

Ibilangmo no kasano a mayaplikar iti biagmo dagiti estoria ken pannursuro a basbasaem. Kas pagarigan, mabalin a saludsodem iti bagim, “Ania dagiti padasko a maipada iti basbasaek?” wenno “Kasano a masurotko ti pagwadan daytoy a tao iti nasantuan a kasuratan?”

Agdamag kadagiti Saludsod bayat ti Panagadalmo

Bayat ti panangadalmo kadagiti nasantuan a kasuratan, sumangbay dagiti saludsod iti panunotmo. Dagitoy a saludsod ket mabalin a mainaig iti no ania ti basbasaem wenno ti biagmo iti sapasap. Utobem dagitoy a saludsod ken sapulem dagiti sungbat bayat ti panagtultuloymo iti panaagadal kadagiti nasantuan a kasuratan.

Usaren dagiti Tulong iti Panagadal iti Nasantuan a Kasuratan

Tapno magun-od dagiti nayon a nalawag a pannakaammo ken pannakaawat [insights] kadagitoy a bersikulo a basaem, usarem dagiti footnote, Topical Guide, Bible Dictionary, iti Pangiwanwan iti Nasantuan a Kasuratan (scriptures.lds.org), ken dadduma pay a tulong iti panagadal.

Isuratmo dagiti Pampanunotem ken Marikriknam

Adu a wagas a panangisurat kadagiti impresion nga umay bayat ti panagadalmo. Kas pagarigan, mabalinmo a markaan ti maysa a napnuan kaipapanan a balikas wenno ragup dagiti balikas ket isuratmo dagiti kapanunotam a kas maysa a palagip kadagiti nasantuan a kasuratam. Mabalinmo met nga isurat iti journal dagiti nalawag a pannakaammo ken pannakaawat[insights], rikna, ken impresion a maawatmo.

Adalem dagiti Balikas dagiti Propeta ken Apostol iti Ud-udina nga Aldaw

Basaem no ania ti insuro dagiti propeta ken apostol iti ud-udina nga aldaw maipapan kadagiti prinsipio a masarakam kadagiti nasantuan a kasuratan (kas pagarigan, kitaen iti conference.lds.org ken dagiti magasin iti Simbaan).

Ibinglay dagiti Nalawag a Pannakaammo ken Pannakaawat[Insights]

Ti panangilawlawag kadagiti nalawag a pannakaammo ken pannakaawat manipud iti bukodmo a panagadal ket saan laeng a nasayaat a wagas a mangisuro kadagiti dadduma, ngem ketdi makatulong pay a mangpapigsa iti pannakaawatmo maipapan iti no ania ti nabasam.

Agbiag iti no Ania ti Masursurom

Ti panagadal iti nasantuan a kasuratan ket saan laeng koma a mangparegta kadatayo—nasken nga iturongnatayo koma a mangbalbaliw ti wagas ti panagbiagtayo. Dumngeg no ania ti iparikna kenka ti Espiritu nga aramidem bayat ti panagbasam, ken kalpasanna agkumit nga agtignay babaen kadagita a parikna.

Kinuna ni Presidente Thomas S. Monson: “Bayat ti panangbasa ken panangutobtayo kadagiti nasantuan a kasuratan, mapadasantayonto dagiti nasam-it nga arasaas ti Espiritu kadagiti kararuatayo. Masarakantayo dagiti sungbat kadagiti saludsodtayo. Masursurotayo dagiti parabur a dumteng babaen ti panagtungpal kadagiti bilin ti Dios. Magun-odtayo nga awan duadua ti pammaneknek maipapan ti Nailangitan nga Amatayo ken ti Mangisalakantayo, ni Jesucristo, ken iti ayatda para kadatayo. No ti panagadaltayo kadagiti nasantuan a kasuratan ket maitipon kadagiti kararagtayo, awan duadua a maammuantayo a pudno ti ebanghelio ni Jesucristo. … Bayat ti pananglagiptayo ti kararag ken maaddaantayo iti oras nga agbasa kadagiti nasantuan a kasuratan, awan inggana nga ad-adda a maparaburanto ti biagtayo ken mapalag-an dagitidagensentayo” (“We Never Walk Alone,” Ensign wenno Liahona, Nob. 2013, 122).