Ti Pannakapasurot ti Panggeptayo a Tun-oyen

Ti panggep ti amin a panagsursuro ken panangisuro iti ebanghelio ket mangpapigsa iti pannakapasurottayo ken tulongannatayo nga agbalinnga ad-adda a kas ken ni Jesucristo. Gapu iti daytoy a rason, iti intay panagadal iti ebanghelio, saantayo laeng nga agsapsapul iti baro nga impormasion; kayattayo ti agbalin a “baro a parsua” (kitaen iti 2 Taga-Corinto 5:17). Kayat a sawen daytoy ti panagpannuray ken ni Cristo a mangbalbaliw tipuspusotayo, dagiti pannirigantayo, tignaytayo, ken dagiti mismo nga ugalitayo.

Ngem ti kita ti panagadal iti ebanghelio a mangpapigsa iti pammatitayo ken mangiturong iti namilagruan a panagbalbaliw iti pannakapasurot ket saan a mapasamak iti mamimpinsan. Agtultuloy daytoy iti labes ti maysa a siled ti klase iti puso ken pagtaengan ti indibidual. Kasapulanna ti agtultuloy, inaldaw a panagkagumaan a makaawat ken agbiag iti ebanghelio. Kasapulan ti pudno a pannakapasurot ti impluensia ti Espiritu Santo.

Tarabayennatayo ti Espiritu Santo iti kinapudno ken paneknekanna dayta a kinapudno (kitaen iti Juan 16:13). Lawlawaganna dagiti panunottayo, pasantakenna ti pannakaawattayo, ken sagidenna ti puspusotayo iti paltiing manipud iti Dios, ti pagtaudan ti amin a kinapudno. Patarnawen ti Espiritu Santo dagiti puspusotayo. Paregtaenna kadatayo ti tarigagay nga agbiag babaen iti kinapudno, ket yarasaasna kadatayo dagiti wagas a mangaramid iti daytoy. Pudno, a “ti Espiritu Santo … ket isuronanto[kadatayo] dagiti amin a banag” (Juan 14:26).

Gapu kadagitoy a rason, kadagiti panagkagumaantayo nga agbiag, agsursuro, ken mangisuro iti ebanghelio, nasken nga umuna ken kangrunaan nga ikarigatantayo a gun-oden ti panangkadkadua ti Espiritu. Rumbeng a daytoy a panggep a tun-oyen ti mangituray kadagiti pilitayo ken mangtarabay kadagiti kapanunotan ken tignaytayo. Nasken nga ikarigatantayo a gun-oden dagiti ania man a pangawis iti impluensia ti Espiritu ket supringentayo dagiti ania man a mangpapanaw iti dayta nga impluensia—agsipud ta ammotayo a no mabalin a maikaritayo iti panangkadkadua ti Espiritu Santo, mabalin a maikaritayo met nga agindeg iti sidong ti Nailangitan nga Ama ken ti Anakna, ni Jesucristo.