Dagiti Kapanunotan tapno Mapadur-as ti Sangapamiliaan a Panagadalyo iti Nasantuan a Kasuratan

Ti kanayon a sangapamiliaan a panagadal iti nasantuan a kasuratan ket nabileg a wagas a mangtulong iti pamiliayo nga agsursuro iti ebanghelio. No kasano ti kaadu ken kasano ti kapaut ti panagbasayo a kas maysa a pamilia ket saan a kas iti kinapateg ti panagbalin a consistent wenno saan a panagbalbaliw kadagiti panagkagumaanyo. No aramidem ti panagadal iti nasantuan a kasuratan a napateg a paset ti biag ti pamiliam, matulongamto dagiti miembro ti pamiliam nga umas-asideg ken ni Jesucristo ken mangpapigsa kadagiti pammaneknekda maipapan iti pundasion dagiti balikasna. Ibilang dagiti sumaganad a saludsod:

• Kasano a maallukoymo dagiti miembro ti pamiliam nga agadal kadagiti nasantuan a kasuratan iti bukodda?

• Ania ti mabalin nga aramidem tapno maallukoymo dagiti miembro ti pamiliam a mangibinglay iti no ania ti masursuroda?

• Kasano a mayunay-unaymo dagiti pagbatayan nga ad-adalen iti Baro a Tulag kanito iti panangisuro iti inaldaw?

Laglagipen a ti pagtaengan ti kapatgan a lugar a pagsursuruan iti ebanghelio. Mabalinmo a sursuruen ken isuro ti ebanghelio iti pagtaengan iti wagas a saan a mabalin nga aramiden iti klase iti Simbaan. Agbalinka a managpartuat bayat ti panangpanunotmo kadagiti wagas a makatulong iti pamiliam a makasursuro manipud kadagiti nasantuan a kasuratan. Usarem ti sumagmamano a sumaganad a kapanunotan a mangpasayaat ti sangapamiliaan a panagadalyo iti nasantuan a kasuratan:

Mangibinglay kadagiti Napnuan Kaipapanan a Nasantuan a Kasuratan

Ikkam dagiti miembro ti pamiliam iti oras a mangibinglay kadagiti binatog ti nasantuan a kasuratan a nasarakanda a napnuan kaipapanan kabayatan ti bukodda a panagadal.

Usarem dagiti Bukodmo a Balikas

Awisem dagiti miembro ti pamilia tapno manggupgop iti bukodda a balikas no ania ti masursuroda manipud kadagiti nasantuan a kasuratan nga adalenyo.

Yaplikarmo dagiti Nasantuan a Kasuratan iti Biagmo

Kalpasan ti panangbasam iti maysa a binatog iti nasantuan a kasuratan, kiddawem kadagiti miembro ti pamilia a mangibinglay kadagiti wagas a pakayaplikaran ti binatog iti biagda.

Agdamagka iti Saludsod

Awisem dagiti miembro ti pamilia nga agdamag iti saludsod maipanggep iti ebanghelio, ket kalpasanna mangbubos iti oras a mangsapul kadagiti bersikulo a makatulong a mangsungbat iti saludsod.

Mangi-display iti Nasantuan a Kasuratan

Pumilika iti maysa a bersikulo a makitam a napnuan iti kaipapanan, ket i-display daytoy iti lugar a masansan a makitanto dagiti miembro ti pamilia. Awisem dagiti dadduma pay a miembro ti pamilia nga agsisinnublat a mangpili iti maysa a nasantuan a kasuratan nga i-display.

Agaramid iti Listaan ti Nasantuan a Kasuratan

Kas maysa a pamilia, pumilikayo iti sumagmamano a bersikulo a kayatyo a paglilinnawagan kabayatan ti umay a lawas.

Mangikabesa kadagiti Nasantuan a Kasuratan

Pumilika iti maysa a binatog iti nasantuan a kasuratan a napnuan kaipapanan iti pamiliam, ket awisem dagiti miembro ti pamilia a mangikabesa iti daytoy babaen ti inaldaw a panangulit iti daytoy wenno agay-ayam iti memorization game.

Mangibinglay kadagiti Banag nga Adalen [Object Lesson]

Agsapul kadagiti banag nga adalen a mainaig kadagiti kapitulo ken bersikulo a basbasaenyo kas maysa a pamilia. Awisem dagiti miembro ti pamilia nga agsarita maipapan ti no kasano a mainaig iti tunggal banag kadagiti pannursuro kadagiti nasantuan a kasuratan.

Mangala iti maysa a Topiko

Pagsisinnublaten dagiti miembro ti pamilia a mangpili iti maysa a topiko nga adalento ti pamilia a sangkamaysa. Usarem ti Topical Guide, ti Bible Dictionary, wenno ti Pangiwanwan iti Nasantuan a Kasuratan (scriptures.lds.org) a mangsarak kadagiti binatog ti nasantuan a kasuratan maipapan iti topiko.

Agdrowing iti Maysa a Ladawan

Basaen ti sumagmamano a bersikulo kas maysa a pamilia, ket kalpasanna mangilatang iti oras para kadagiti miembro ti pamilia a mangidrowing iti maysa a banag a mainaig iti no ania ti nabasayo. Mangbubos iti panawen a panangilawlawag kadagiti drowing ti tunggal maysa.

Mangyakem iti Maysa nga Estoria

Kalpasan ti panangbasam iti estoria, mangawis kadagiti miembro ti pamilia a mangyakem iti daytoy. Kalpasanna, isaritam maipapan iti no kasano a mainaig ti estoria kadagiti banag a mapadpadasanyo kas indibidual ken kas maysa a pamilia.

Insuro ni Elder David A. Bednar: “Tunggal sangapamiliaan a panagkararag, tunggal panawen iti sangapamiliaan a panagadal iti nasantuan a kasuratan, ken tunggal family home evening ket makatulong iti kinataotayo. Awan ti maysa a pasamak a mabalin nga agparang a makaawis unay iti imatang wenno nakallalagip. Ngem kas iti panangdidinnanggay ti amarilio ken balitok ken kayumanggi a paspasada ti pinta ket nangparnuay iti makaawis imatang nga obra maestra, isu a ti agtultuloy a panagaramidtayo kadagiti kasla babassit a banag ket mangiturong kadatayo kadagiti napateg a naespirituan a bunga” (“More Diligent and Concerned at Home,” Ensign wenno Liahona, Nob. 2009, 19–20).