Panagtungpal kadagiti Kari ken Katulagantayo
Awisenkayo a mangutob kadagiti kari ken katulagan nga aramidenyo iti Apo ken iti dadduma, nga addaan iti naindaklan nga integridad, iti panangammo a tungpalenyo ti balikasyo.
Kakabsat, iti panangigibustayo itoy a sesion, laglagipentayo koma dagiti nangngeggantayo maipanggep iti kinapudno ti ebanghelio ni Jesucristo. Nabendisionantayo iti sagrado nga oras tapno mapapapigsa ti karitayo ken Jesucristo a datayo ti katulonganna ken Isu ti Mangisalakantayo.
Pampanunotek ti pateg ti panagaramid ken panagtungpal kadagiti kari ken katulagan. Kasano ti pateg ti panagtungpalmo iti saom? mapagtalkan? aramidem ti ibagam? agkagumaan a mangdayaw kadagiti sagrado a katulagam? maaddaan iti integridad? Babaen ti pudno a panagtungpal kadagiti karitayo iti Apo ken iti dadduma, magnatayo iti dana ti katulagan nga agsubli iti Nailangitan nga Ama ken riknaentayo ti ayatna.
Ti Mangisalakantayo, ni Jesucristo ti naindaklan a Pagwadantayo iti panagaramid ken panagtungpal kadagiti kari ken katulagan. Immay iti daga a nagkari nga aramidenna ti pagayatan ti Ama. Inpakitana dagiti pagbatayan ti ebanghelio iti balikas ken aramidna. Sinubbotna dagiti basoltayo tapno makapagbiagtayo manen. Tinungpalna ti tunggal maysa kadagiti karina.
Maibaga kadi ti kasta met laeng kadatayo? Ania dagiti peggad no agkusittayo bassit, masulisog bassit, wenno ditayo unay matungpal dagiti inkumittayo? Ania ngata no baybay-antayo dagiti katulagantayo? Adda kadi umasideg ken ni Cristo gapu iti pagwadantayo? Tungpalem kadi ti balikasmo? Iti panagtungpal iti kari saan nga ugali: kababalin daytoy ti disipulo ni Jesucristo.
Gapu ta maseknan ti Apo iti pagkapsutantayo iti biag, inkarina, “Agragsakkayo, ket saankayo nga agbuteng, ta siak nga Apo adda kadakayo, ket agtakderakto iti abayyo.” Nariknak ti tulongna no kasta a masapulko ti pammatalged, liwliwa, naespirituan a pannakaawat wenno pigsa, ken napalaus a pakumbabak ken panagyamanko iti nasantuan a panangkadkaduana.
Kuna ti Apo, “Tunggal kararua a mangtallikud iti basolna ket umay kaniak, ket awagannak iti naganko, ken agtungpal iti timekko, ket tungpalenna dagiti bilinko, makitananto ti rupak ket maammuannanto a siak.” Nalabit a dayta ti kangrunaan a karina.
Nasursurok ti pateg ti panagtungpal iti karik idi baritoak. Maysa a pagarigan ket idi timmakderak a nalinteg a nangisao iti Scout Oath. Ti pannakikappengmi iti Boy Scouts of America, nga itan naggibusen, kanayonto a napateg a tawid kaniak ken daytoy a Simbaan. Iti timpuyog ti Scouting, adu a lallaki ken babbai a naganetget a nagserbi kas Scout leaders, kadagiti inna—a pangtedan iti pudno a pammadayaw—ken kadagiti babbarito a nakiraman iti Scouting, “Agyamankami kadakayo.”
Ditoy mismo a sesion, ti patpatgentayo a propeta, ni Presidente Nelson, ken ni Elder Quentin L. Cook impakaammoda dagiti panagbalbaliw a mangipokus iti imatangtayo kadagiti agtutubo ken mayurnos dagiti organisasiontayo iti naipalgak a kinapudno. Itay naglabas a Domingo, inlawlawag da Presidente Nelson ken Presidente Ballard ti baro a programa dagiti Ubbing ken Agtutubo iti Simbaan ni Jesucristo dagiti Santo iti Ud-udina nga Aldaw iti intero a Simbaan. Daytoy ti sangalubongan nga inisiatibo a naipokus iti Apo ken Mangisalakantayo, ni Jesucristo. Nagkaykaysa ti Umuna a Panguluen ken ti Korum dagiti Sangapulo-ket-dua nga Apostol itoy baro a direksion, ket paneknekak a tinarabaynakami ti Apo iti tunggal addang. Maragsakanak para kadagiti ubbing ken agtutubo ti Simbaan a mangpadas itoy nainayon a pokus kadakuada iti pagtaengan ken iti simbaan—babaen ti panagadal iti ebanghelio, serbisio ken dagiti aktibidad, ken bukod a panagdur-as.
Ti tema dagiti agtutubo para iti daytoy umay a tawen, 2020, maipapan iti kari ni Nephi a “mapan ket aramiden.” Insuratna, “Ket napasamak a siak, ni Nephi, kinunak iti amak: mapanak ket aramidek dagiti banag nga imbilin ti Apo, ta ammok a saan nga ited ti Apo ti bilin kadagiti annak ti tao, malaksid no naisagananan ti wagas nga agpaay kadakuada a mangtungpal kadagiti banag nga imbilinna.” Nupay naisaon iti nabayag a panawen, tungtungpalentayo dayta a kari ita.
Ti “mapan ket aramiden” kayatna a sawen ti agaramid iti bambanag iti wagas ti Apo, umawat ken agtignay iti bukod a paltiing, agbiag a nalinteg a mangnamnama ken mamati iti masakbayan, agaramid ken agtungpal iti katulagan a suroten ni Jesucristo, ken dumakkel ti ayattayo iti Mangisalakan.
Ti katulagan ket maysa a panagkinnari iti nagbaetantayo ken ti Apo. Kas miembro iti Simbaan, nakitulagtayo iti panagbuniag nga awatentayo ti nagan ni Jesucristo, agbiag kas Kenkuana. Kas kadagiti nabuniagan iti danum ni Mormon, makitulagtayo a, “makipagbaklay iti imet ti tunggal maysa, tapno lumag-anda; … “makipagladingit iti agladladingit; … manglinglingay iti makasapul iti pannakalinglingay, ken agtakder a kas saksi ti Dios iti amin a kanito ken iti amin a banag, ken iti amin a lugar.” Ti panagserbitayo iti tunggal maysa iti Simbaan mangyanninaw iti panagkumittayo a tungpalen dagita mismo a kari.
No makiranudtayo iti sakramento, pabaruentayo dayta a tulag nga awatentayo ti naganna ken agaramid kadagiti nayon pay a kari tapno dumur-as. Dagiti inaldaw a panunot ken tignaytayo, agpada a bassit ken dakkel, mangyanninaw iti panagkumittayo Kenkuana. Ti sagrado a karina kadatayo, “Addanto ti espirituk kadakayo no kanayon a laglagipendak.”
Saludsodek ita, matungpaltayo kadi dagiti kari ken katulagantayo wenno no dadduma di napudno a panagkumit dagito,manmano a maaramid ken alisto a malabsing? No kunatayo iti maysa a tao, “Ikararaganka,” aramidentayo kadi? No agkumittayo, “Umayak dita a tumulong,” intayo kadi? No ikaritayo nga agbayad iti utang, aramidentayo kadi? No itag-aytayo ti imatayo a mangkanunong iti pada a miembro iti baro a takemna, tapno mangsuporta, aramidentayo kadi?
Maysa a sardam idi baritoak, kinaabaynak ni nanangko a nagtugaw iti sakaanan ti katrena ket kinasaonak maipanggep iti pateg ti agtungpal iti Word of Wisdom. “Ammok iti padas ti dadduma, iti naglabas a tawtawen,” kinunana, “ti pannakapukaw ti espiritualidad ken kinasensitibo aggapu ti di panangsurot iti Word of Wisdom.” Pinerrengnak ket nariknak dagiti saona a simlep iti pusok: “Ikarim kaniak, Ronnie, ita, [Ronnie ti awagna kaniak], a kanayonmonto a tungpalen ti Word of Wisdom.” Ket nagkariak kenkuana, ket tinungpalko daytoy kadagitoy amin a tawen.
Nagserbi kaniak dayta a panagkumit idi baritoak ken idi agangay kadagiti tawen nga addaak iti pasken ti negosio a siwayawaya nga aginum dagiti tao iti arak. Nasapsapa nga inkeddengko a suroten dagiti linteg ti Dios, ket inkeddengko manen a tungpalen ti kari. Kinuna ti Apo, “Siak, ti Apo, ikarik nga aramidek ti sawek no agtungpalkayo; ngem no diyo tungpalen ti sawek, awan ti kariyo.” Ania ti kunkunana kadagiti agtungpal iti Word of Wisdom? Nga addanto kadatayo ti karina a salun-at, pigsa, sirib, pannakaammo, ken dagiti anghel a mangsaluad kadatayo.
Sumagmamano a tawen ti naglabas, addakami ken Sister Rasband iti Salt Lake Temple iti pannakailantip ti maysa kadagiti balasangmi. Iti panagtakdermi iti ruar ti templo a kaduami ti ub-ubing a balasangmi, ubing pay tapno dar-ayanna ti seremonia, kinasaomi maipanggep ti pateg ti pannakailantip iti nasantuan a templo ti Dios. Kas idi insuronak ti inak adun a tawen ti naglabas, imbagami iti balasangmi, “Kayatmi a natalgedka a mailantip iti templo, ket kayatmi nga agkarika kadakami nga inton makasarakka iti eternal companionmo, agsaganakayonto a mailantip iti templo.” Nagkari kadakami.
Manipud idin, imbagana a ti panagsaritami ken ti karina nangsaluad ken nangipalagip kenkuana “no ania ti kapatgan.” Idi agangay nagaramid kadagiti sagrado a katalugan iti pannakailantipna iti asawana iti templo.
Insuro ni Presidente Nelson: “Manayonan … ti bileg ti Mangisalakan iti biagtayo no agaramidtayo kadagiti sagrado a katulagan ken tungpalentayo nga eksakto dagitoy. Dagiti katulagantayo ti mangisilpo kadatayo Kenkuana ken mangted kadatayo iti nadiosan a bileg.”
No tungpalentayo dagiti karitayo iti tunggal maysa matungpaltayo dagiti karitayo iti Apo. Laglagipen dagiti sao ti Apo: “Gapu iti inaramidyo iti maysa kadagitoy kanunumuan kadagitoy kakabsatko, inaramidyo met kaniak.”
Utobentayo dagiti pagarigan dagiti kari iti scriptures. Nagkumit ni Ammon ken dagiti annak ni Mosiah iti Libro ni Mormon nga “ikasaba ti balikas ti Dios.” Idi tiniliw dagiti soldado a Lamanite ni Ammon, indatagda ken ni Ari Lamoni. Nagkumit iti ari, “Agbalinak a katulongam.” Idi mapan dagiti mangraut a takawen dagiti karnero ti ari, pinuted ni Ammon dagiti takiagda. Nagsidaaw unay ti ari, dimngeg iti mensahe ni Ammon iti ebanghelio ket napasurot.
Ni Ruth, iti Daan a Tilag, nagkari iti katuganganna a babai, “Umayak iti sadino man a papanam.” Nagbiag a pudno iti saona. Ti naimbag a Samaritano, iti maysa a pangngarig iti Baro a Tulag, nagkari iti agpadpadagus a no taripatuenna ti nadunor nga agbambaniaga, “Inton agsubliak, bayadakto amin a nagastom.” Ni Zoram, iti Libro ni Mormon, nagkari a mapan iti langalang a kaduana ni Nephi ken kakabsatna. Nalagip ni Nephi, “Idi nagsapata ni Zoram kadakami, awanen ti rumbeng a pagbutnganmi maipapan kenkuana.”
Ania ti nagkauna a kari a “naaramid kadagiti amma” a kas nailadawan iti nasantuan a kasuratan a “maisublinto ti puspuso dagiti annak kadagiti ammada?” Iti biag sakbay daytoy a biag idi pinilitayo ti plano ti Dios, nagkaritayo a tumulong a mangummong iti Israel iti agsumbangir ti belo. “Simrektayo iti pannakikadua iti Apo,” inlawlawag ni Elder John A. Widtsoe, adun a tawen ti naglabas. “Ti panangitrabaho iti plano di laeng trabaho ti Ama, ken trabaho ti Mangisalakan, ngem trabahotayo pay.”
“[Ti] panaguummong ti kapatgan a maar-aramid ditoy daga ita,” kinuna ni Presidente Nelson iti panagbiahena iti lubong. “No saritaentayo ti panagguummong, makunatayo daytoy napateg a kinapudno: tunggal maysa kadagiti anak ti Nailangitan nga Amatayo, iti agsumbangirt ti belo, maikari a dumngeg iti mensahe ti naisubli nga ebanghelio ni Jesucristo.”
Kas maysa nga Apostol ni Apo Jesucristo, gibusak iti maysa nga awis ken kari. Umuna, ti awis: Awisenkayo a mangutob kadagiti kari ken katulagan nga aramidenyo iti Apo, ken iti dadduma, nga addaan iti naindaklan nga integridad, iti panangammo a tungpalenyo ti balikasyo. Maikadua, ikarik kadakayo, a no aramidenyo daytoy, bangonento ti Apo ti balikasyo ken paraburanna dagiti aramidyo no ipasnekyo a papigsaen ti biagyo, ti pamiliayo ken ti Ti Simbaan ni Jesucristo dagiti Santo iti Ud-udina nga Aldaw. Kaduaennakayto, patpatgek a kakabsatko, ken, addaan iti talek, mapasungadanyo a “maawatkayto idiay langit, ket makipagtaeng[kayo] iti Dios iti kasasaad nga awan iti gibusna a kinaragsak … agsipud ta ti Apo a Dios ti nangisao.”
Paneknekak daytoy ken ikarik iti nagan ni Jesucristo, amen.