“Disiembre 11–17. Apocalipsis 6–14: ‘Pinarmekda …babaen ti Dara ti Kordero,’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)

“Disiembre 11–17. Apocalipsis 6–14” Umaykayo, Sumurot Kaniak—Para kadagiti Indibidual ken Pamilia: 2023

Ladawan

Ni Jesus a nakatakder iti baet dagiti bituen

Composite art ni Eric Johnson: Ti Dakkel a Konseho, ni Robert T. Barrett; star cluster pammadayaw ti European Space Agency

Disiembre 11–17

Apocalipsis 6–14

“Pinarmekda …babaen ti Dara ti Kordero”

Imbalakad ni Presidente Boyd K. Packer: “No iti damo kasla ganggannaet kenka dagiti nasantuan a kasuratan, agtultuloyka iti panagbasa. Iti saan a mabayag mabigbigmonto ti kinangayed ken bileg a masarakan kadagita a panid” (“The Key to Spiritual Protection,” Liahona, Nob. 2013, 27).

Isuratmo dagiti Impresionmo

Panunotem ti maysa a babai nga “agik-ikkis iti panagpasikalna, ken marigatan nga agpasngay.” Ita panunotem “ti maysa a dakkel a nalabaga a dragon, nga addaan pito nga ulona ken sangapulo a sarana” nga agrikusrikus iti ngatuen ti babai, a sisasagana a “mangalun-on iti anakna apaman a maipasngay” (Apocalipsis 12:2–4). Tapno maawatan dagitoy a bersikulo iti paltiing ni Juan, laglagipem a dagitoy a ladawan ti mangibagi iti Simbaan ken pagarian ti Dios ken ti peggad a sanguenda. Para kadagiti Santo a nakapadas iti nakaro a pannakairurumen iti aldaw ni Juan, kasla saan a mabalin nga agturay ti balligi iti kinadakes. Mabalin met a narigat nga ipadles daytoy a balligi iti maysa nga aldaw a kas iti aldawtayo, no ti kabusor madama ti “pananggubatna kadagiti santo” ket naited kenkuana “ti panagturay iti isu amin a kaputotan, ken ili, pagsasao, ken pagarian” (Apocalipsis 13:7). Ngem iti paggibusan ti paltiing ni Juan sidadayag a mangipakita nga agballiginto ti naimbag a maibusor iti dakes. Matnagto ti Babilonia. Ket maruk-atanto dagiti Santo “iti dakkel a rigat” a nagkawes iti puraw a pagan-anay—saan a gapu a di pay pulos namansaan dagiti pagan-anayda ngem gapu ta dagiti Santo “binugguanda dagiti pagan-anayda ket pinapudawda ida iti dara ti Kordero” (Apocalipsis 7:14).

Ladawan

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Apocalipsis 6–11

Nakita ni Juan ti adu a pasamak iti pakasaritaan ti daga, nangnangruna kadagiti pasamak iti ud-udina nga aldaw.

Kadagitoy a kapitulo mabasamto ti maipapan iti maysa a libro nga addaan iti pito a selio. No masdaawka no ania ti kaipapanan dayta, saanka nga agmaymaysa. Inaramid met ni Propeta a Joseph Smith. Impalgak ti Apo ken ni Joseph nga ibagi daytoy a libro ken dagiti seliona ti estoria ti “saan nga agpaut a kaadda ti daga,” nga addaan iti selio a mangibagbagi iti sangaribu a tawen (kitaen iti Doktrina ken Katulagan 77:6–7). Mabalin nga interesadoka a mangammo a dagiti pasamak iti umuna nga uppat a selio nagupgop iti parmata ni Juan iti walo laeng a bersikulo (Apocalipsis 6:1–8). Iladawan ti sumaruno a tallo a bersikulo ti maikalima a selio (dagiti bersikulo 9–11). Dagiti pasamak ti dua a selio ti mangala iti kaaduan a nabati pay iti libro ti Apocalipsis. Iti sabali a pannao, kangrunaan a pokus ti parmata ni Juan dagiti maudi nga aldaw—dagiti aldawtayo. Bayat ti panagbasam, utobem no apay a napateg a maammuan no ania ti insurat ni Juan maipapan kadagiti ud-udina nga aldaw.

Bayat ti panangbasam maipapan kadagiti pasamak nga impadto ni Juan, ibilangmo dagiti sumaganad a singasing ken saludsod:

Basaem ti Apocalipsis 7 a pampanunotem ti aramid ti panangummong iti Israel. Ania dagiti kapanunotam maipapan iti daytoy nga aramid? (kitaen met iti Doktrina ken Katulagan 77:8–11). Ania ti masursurom manipud kadagiti bersikulo 13–17 maipapan ken ni Jesucristo ken dagiti umasideg Kenkuana?
Ania ti isuro kenka dagiti kapitulo 8; 9; ken 11 maipapan iti paspasamak kadagiti maudi nga aldaw? (kitaen met iti Doktrina ken Katulagan 77:12–13, 15). Kasano a makapagsaganatayo a naespirituan para kadagitoy a pasamak?
Apocalipsis 10 saritaenna ti maysa a libro nga ited ti maysa nga anghel ken ni Juan ken bilinenna daytoy a kanenna. Ania ti mabalin nga isimbolo daytoy? Doktrina ken Katulagan 77:14).

Apocalipsis 12–13

Agtultuloy iti daga ti Gubat idiay Langit.

Awan unay ti adu nga ammotayo maipapan iti Gubat idiay Langit, ngem adda nalawag nupay ababa laeng a pannakailadawan daytoy iti Apocalipsis 12:7–11. Bayat ti panangbasam kadagitoy a bersikulo, iladawam ti bagim kas paset ti saan a panagkikinnaawatan ti dayta biag sakbay iti yaay iti daga. Ania ti masursurom maipanggep iti no kasano a maparmek ni Satanas? (kitaen iti bersikulo 11).

Agtultuloy iti daga ti gubat a nangrugi iti langit, kas iti panagpursigido ni Satanas a “nanggubat ]kadagiti] addaan iti pammaneknek ni Jesucristo” (Apocalipsis 12:17). Ania ti masursurom manipud iti Apocalipsis 13 maipapan iti no kasano a mangparnuay iti gubgubat iti agdama? Kasano a “ti dara ti Kordero” ken “ti balikas ti pammaneknek[mo]” (Apocalipsis12:11) agtultuloy a tulongandaka iti daytoy a gubat?

Kitaen met iti 1 Nephi 14:12–14; Moroni 7:12–13; Moises 4:1–4; Doktrina ken Katulagan 29:36–37; Gospel Topics, “War in Heaven,” topics.ChurchofJesusChrist.org.

Apocalipsis 14:6–7

“Nakakitaak iti sabali nga anghel … addaan iti agnanayon nga ebanghelio.”

Napasamak ti maysa a pannakaipatungpal iti padto kadagitoy a bersikulo idi nagparang ni Moroni ken ni Joseph Smith ket inturongna kadagiti kasuratan nga impatarus ken impablaakna a kas ti Libro ni Mormon. Linaon daytoy a libro ti “agnanayon nga ebanghelio” a naibilin kadatayo a mangikasaba iti “amin a pagpagarian, ken kaputotan, ken pagsasao, ken il-ili” (Apocalipsis 14:6).

Tapno masursuro maipapan kadagiti anghel a nakiraman iti pannakaisubli ti agnanayon nga ebanghelio, kitaen iti Doktrina ken Katulagan 13; 27:5–13; 110:11–16; 128:20–21.

Kitaen met iti “The Restoration of the Fulness of the Gospel of Jesus Christ: A Bicentennial Proclamation to the World,” ChurchofJesusChrist.org.

Ladawan

family study icon

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Apocalipsis 7:9, 13–15.Ania ti maisuro kadatayo dagitoy a bersikulo maipapan no apay a puraw ti usarentayo para kadagiti ordinansa iti panagbuniag ken iti templo?

Apocalipsis 7:14–17Ibilang ti panangawis kadagiti miembro ti pamilia a mangibinglay iti riknada maipapan kadagiti kari ti Apo kadagitoy a bersikulo. Kasano a matulongannatayo dagiti karina no maipasangotayo iti “dakkel a rigat”? (bersikulo 14).

Apocalipsis 12:7–11; 14:6.Mabalin a magustuan ti sumagmamano a miembro ti pamilia ti panagdrowing kadagiti ladawan ti parparmata a nailadawan iti Apocalipsis. Kas pagarigan, ti panagdrowing kadagiti ladawan a naibatay iti Apocalipsis 12 mabalin a mangiturong iti panaglilinnawag maipapan iti Gubat ti Langit (kitaen dagiti bersikulo 7–11). Dagiti ladawan a naibatay iti Apocalipsis 14:6 mabalin a mangiturong kadagiti panaglilinnawag maipapan iti Pannakaisubli ti ebanghelio.

Kalpasan ti panangbasa iti Apocalipsis 14:6 nga aggigiddan, ibilang ti panangipakita kadagiti ladawan ni anghel Moroni ken dagiti dadduma pay nga anghel a timmulong a nangisubli iti ebanghelio iti aldawtayo (kitaen dagiti ladawan iti ungto daytoy a balabala). Nalabit a mabalin nga agsisinnublat dagiti miembro ti pamilia iti panangiggem iti maysa kadagiti ladawan ken panangibinglay kadagiti gapu ti panagyamananda nga immay dagiti anghel nga “addaan iti agnanayon nga ebanghelio nga ibinglay [kadatayo].”

Apocalipsis 12:11.Ania ti mabalin a kayat a sawen ti ragup ti balikas a “sao ti pammaneknekda”? Kasano a dagiti pammaneknektayo ken ni Jesucristo matulongannatayo ken dagiti dadduma pay a mangparmek ken ni Satanas?

Apocalipsis 13:11–14.Ania dagiti pampanunot nga adda kadagiti miembro ti pamiliam maipapan iti mangal-allilaw nga ayup? Kasano a takuaten ket liklikantayo dagiti panangallilaw a makitkitatayo iti lubong iti agdama?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Will Be Valiant,” Children’s Songbook, 162.

Panangpadur-as iti Bukod a Panagadal

Iraremmo ti bagim kadagiti nasantuan a kasuratan. Insuro ni Presidente Russell M. Nelson, “Napateg ti inaldaw a pannakairarem iti balikas ti Dios para iti naespirtuan a pannakaispal, nangnangruna kadagitoy nga aldaw a kumarkaro ti pannakaburibor” (“Hear Him,” Liahona, Mayo 2020, 89). Ania ti kaipapanan kenka ti “pannakairarem iti balikas ti Dios”?