“Maika-3 a Paset: Ni Anghel Moroni ken Dagiti Balitok a Pinanid: 1823–1827,” Dagiti Estoria iti Doktrina ken Katulagan (2002), 13–16
“Maika-3 a Paset,” Dagiti Estoria iti Doktrina ken Katulagan, 13–16
Maika-3 a Paset
Ni Anghel Moroni ken Dagiti Balitok a Pinanid
(1823–1827)
Tallo a tawen ti napalabas kalpasan ti umuna a parmata ni Joseph. Sangapulo-ket-pito ti tawenna. Pinanunot ni Joseph no ania ti tarigagayan ti Dios nga aramidenna. Maysa a rabii, nagkararag ni Joseph. Adda pammatina nga ibaga kenkuana ti Dios no ania ti aramidenna.
Nakakita ni Joseph iti naraniag a lawag iti siledna. Nakatakder ti maysa nga anghel iti tengnga ti lawag. Nakalawlawag ti rupa ti anghel. Nakakawes iti napintas a puraw a roba.
Kinuna ti anghel a Moroni ti naganna. Imbaon ti Dios daytoy a makisao ken ni Joseph. Kinuna ni Moroni nga adda paaramid ti Dios ken ni Joseph.
Imbaga ni Anghel Moroni ken Joseph ti maipapan iti maysa a libro. Linaon ti libro ti maipapan kadagiti tao iti America iti nabayagen a panawen. Napan ni Jesucristo kadagitoy a tao. Insurona kadakuada ti ebangheliona.
Kinuna ni Moroni a naisurat ti libro kadagiti balitok a panid. Maawagan iti pinanid dagiti balitok a panid. Naisurat ti libro iti pagsasao a ditayo ammo iti agdama. Kayat ti Dios nga ipatarus ni Joseph ti libro. Ipatarus ni Joseph daytoy iti pagsasao nga Ingles.
Kinuna ni Anghel Moroni a nailemmeng dagiti pinanid iti maysa a turod iti asideg ti pagtaengan ni Joseph. Naikali dagitoy iti daga. Kinuna ni Moroni a nailemmeng ti dua a bato ti kadua dagiti balitok a pinanid. Maawagan dagiti bato iti Urim ken Tumim. Dagiti bato ti makatulong ken ni Joseph a mangipatarus iti libro.
Imbaga ni Moroni ken Joseph ti maipapan ken ni Elias. Maysa a naindaklan a propeta ni Elias a nagbiag iti nabayagen a panawen. Addaan iti kinasaserdote ni Elias. Adda iti Daan a Tulag ti pakasaritaan ni Elias. Kinuna ni Moroni nga agsublinto ni Elias ditoy daga. Ibaganto ni Elias kadagiti tao nga adalenda ti maipapan kadagiti kapuonanda. Kameng ti kaamaantayo dagiti kapuonantayo a nagbiag kasakbayantayo.
Imbaga ni Moroni ken Joseph ti maipapan iti kinasaserdote. Ti kinasaserdote ti bileg ti Dios. Kinuna ni Moroni nga itugotto ni Elias ti bileg ti kinasaserdote iti daga. Ti bileg ti kinasaserdote ti mangtulongto kadagiti nalinteg a kaamaan. Mailantipdanto. Kalpasanna, makapagbiagdanto nga agdedenna iti agnanayon. Pimmanaw ni Moroni kalpasanna.
Namindua pay a daras a nagsubli ni Anghel Moroni iti dayta a rabli. Adu dagiti banag nga imbagana ken ni Joseph iti tunggal gundaway. Bigaten idi pumanaw. Bimmangon ni Joseph ket napan nagtrabaho iti talon a kaduana ti amana.
Nabannog unay ni Joseph tapno agtrabaho. Nadalupo daytoy. Bayat ti pannakadalupona immay manen ni Moroni. Imbaga ni Joseph iti amana dagiti banag nga insuro ni Moroni kenkuana. Namati ti ama ni Joseph kenkuana. Ammona nga imbaon ti Dios ni Moroni. Imbagana ken ni Joseph a tungpalenna ni Moroni.
Sinapul ni Joseph dagiti balitok a pinanid. Napan iti maysa a turod nga asideg iti pagtaenganna. Maawagan daytoy iti Turod Cumorah. Adda idiay dagiti balitok a pinanid. Naikalida iti sirok ti dakkel a bato. Addada iti uneg ti bato a kahon. Adda met ti Urim ken Tumim iti uneg ti kahon.
Nagparang ni Anghel Moroni ken ni Joseph. Dina impalubos a yawid ni Joseph dagiti balitok a pinanid iti pagtaenganda. Imbagana a tinawen a sarungkaran ni Joseph ti turod iti uneg ti uppat a tawen iti isu met la nga adlaw.
Tinungpal ni Joseph ni Moroni. Tinawen a napan iti Turod Cumorah. Idiay ti nangisuruan ni Moroni kenkuana. Imbaga ni Moroni ken ni Joseph ti maipapan iti pudno a Simbaan ni Jesucristo. Iruginto manen ni Jesus ti Simbaanna ditoy daga.
Idi 1827, inted ni Moroni dagiti balitok a pinanid ken ni Joseph. Naguray ni Joseph iti uppat a tawen a panangalana kadagiti pinanid. Imbaga ni Moroni ken ni Joseph nga aywananna a nasayaat dagiti pinanid.
Inyawid ni Joseph dagiti balitok a pinanid. Kayatna nga aywanan a nasayaat dagitoy. Pinadas a takawen dagiti dakes a tao dagitoy. Inlemmeng ni Joseph dagiti balitok a pinanid iti lugar a saan a masarakan dagiti dakes a tao. Tinulongan ti Dios ni Joseph a mangidulin a natalged kadagiti balitok a pinanid.