“Maika-35 a Paset: Pimmanaw Dagiti Santo iti Jackson County, Missouri: Septiembre–Disiembre 1833,” Dagiti Estoria iti Doktrina ken Katulagan (2002), 132–34
“Maika-35 a Paset,” Dagiti Estoria iti Doktrina ken Katulagan, 132–34
Maika-35 a Paset
Pimmanaw Dagiti Santo iti Jackson County, Missouri
(Septiembre–Disiembre 1833)
Rirriribuken dagiti dakes a tao dagiti Santo iti Jackson County, Missouri. Inkarigatan dagiti Santo ti dimmawat iti tulong iti gobernador ti Missouri. Napan nakipagkita da William Phelps ken Orson Hyde iti gobernador. Imbagada kenkuana ti maipapan iti bunggoy dagiti mangriribuk. Imbagada no kasano a nadadael dagiti pagtaenganda.
Saan a matulongan ida ti gobernador. Imbagana nga agpatulongda kadagiti ukom. Ngem gagayyem met dagiti ukom dagiti dakes a mangriribuk. Saanda a matulongan dagiti Santo.
Rinaut dagiti mangriribuk dagiti Santo iti uneg ti innem nga aldaw. Rinebbada dagiti pagtaenganda. Dinangranda dagiti lallaki. Sinerrekda dagiti pagtagilakuan ket inwar-itda ti amin a banag iti datar.
Pinapanaw dagiti mangriribuk dagiti Santo kadagiti pagtaenganda. Panawen idi ti lamiis. Adu ti tao a natay gapu iti nalamiis, nabasa a panawen. Napan dagiti Santo kadagiti kabangibang nga ili ti Missouri tapno maliklikanda dagiti mangriribuk.
Nagladingit dagiti Santo. Nadadael dagiti pagtaengan, talon, ken pagtagilakuanda. Natakaw dagiti ayupda. Saan a matulongan ti gobernador ken dagiti ukom dagiti Santo.
Ngem adda latta pammati dagiti Santo iti Dios. Ammoda pudno a Simbaan ti Simbaan ni Jesucristo. Ammoda a propeta ti Dios ni Joseph Smith.
Adda idi ni Joseph Smith iti Kirtland, Ohio. Nangted ni Jesus kenkuana iti paltiing. Imbagana no apay nga adda riribuk kadagiti Santo. Sumagmamano kadakuada ti saan a nagtungpal kadagiti bilin ti Dios.
DkK 101:2, 6–7
Kinuna ni Jesus a saan a nagtitinnulong a nagtrabaho dagiti Santo. Saanda a nagsisinnaranay. Nagpipinnadakesda. Saanda a nagkararag iti Dios no naragsakda. Dida kaano man nagyaman iti Dios. Nagkararagda laeng no kasapulanda ti tulong.
Kinuna ni Jesus a nasken nga agsagana dagiti Santo iti yaayna manen ditoy daga. Intono umay, addanton talna kadagiti tao. Maparaburanto dagiti Santo a nagsagaba gapu ken ni Jesus. Awanton ti bileg ni Satanas a mangsulisog kadagiti Santo. Awanton ti agladingit. Awanton ti ipapatay a kas ammo ita. Intono umay manen ni Jesus, agragsakto ti tunggal maysa.