Maika-21 a Paset

Napan ti Propeta Idiay Missouri

(Mayo–Hunio 1831)

Adu kadagiti Santo ti nagnaed pay laeng iti Nueva York. Adda da Joseph Smith ken Sidney Rigdon iti Kirtland, Ohio. Imbaga ni Joseph kadagiti Santo iti Nueva York a mapanda iti Ohio. Tinungpalda ti Propeta. Napanda iti Ohio.

Imbaga ni Jesus ken ni Joseph nga ibinglayan dagiti Santo iti Kirtland iti daga dagiti Santo nga aggapu iti Nueva York. Adu ti daga ni Leman Copley. Inkarina a mangibinglay. Immakar ditoy dagiti Santo ti Nueva York.

DkK 48:2

Saan a tinungpal ni Leman Copley ti karina. Dina kinayat nga ikkan iti dagana dagiti Santo a naggapu iti Nueva York. Nasken a pumanawda. Awan ti lugar a pagyananda.

Ni Newel Knight ti dadauloda. Dina ammo ti aramidenna. Napanna kinita ni Propeta Joseph. Dinamagna ken ni Joseph no ania ti nasken nga aramiden dagiti Santo.

Imbaga ti Apo ken ni Joseph a mapan dagiti Santo a naggapu iti Nueva York idiay Missouri iti saan a mabayag.

DkK 54:7–9

Sakbay a pimmanawda, nagkomperensia dagiti Santo iti Kirtland. Nagpaut ti komperensia iti tallo nga aldaw. Nangted ti Apo ken ni Joseph Smith iti sumagmamano a napateg a paltiing.

Imbaga ti Apo ken ni Joseph nga ordenanna dagiti umuna a nangato a saserdote iti Simbaan. Addaan iti Kinasaserdote a Melchizedek dagiti nangato a saserdote. Dadauloda iti Simbaan. Kaaduan kadagiti dadaulo ti Simbaan ti naordenan iti nangato a saserdote.

Imbaga ti Apo a sumagmamano kadagiti lallaki ti nasken a mapan iti mision iti Missouri. Nasken nga ikasabada ti ebanghelio iti dalanda. Idi nalpas ti komperensia, napan dagiti misionario iti Missouri.

DkK 52:9–10

Imbaga ti Apo ken ni Joseph a maangayto ti sumaruno a komperensia ti Simbaan iti Jackson County, Missouri. Imbagana ken ni Joseph ken dagiti gagayyemna a mapanda sadiay. Maipatakderto iti Jackson County ti Zion. Ipakitanto kadakuada ni Jesus no sadino ti pakaipatakderan ti siudad ti Zion.

DkK 52:1–5