“Maika-61 a Paset: Ti Batalion ti Mormon: Hunio 1846–Hulio 1847,” Dagiti Estoria iti Doktrina ken Katulagan (2002), 218–22
“Maika-61 a Paset,” Dagiti Estoria iti Doktrina ken Katulagan, 218–22
Maika-61 a Paset
Ti Batalion ti Mormon
(Hunio 1846–Hulio 1847)
Adda dagiti Santo iti Council Bluffs. Maysa a kapitan ti Armada ti Estados Unidos ti napan nangkita ken ni Brigham Young. Kapitan Allen ti naganna.
Imbaga ni Kapitan Allen a kasapulan ti presidente ti Estados Unidos ti 500 a lallaki a tumipon iti buyot. Kinuna ni Brigham Young nga agtungpal dagiti Santo iti kayat ti presidente a maaramid.
Nakisarita ni Kapitan Allen kadagiti lallaki ket lima gasut kadakuada ti timmipon iti armada. Naawaganda iti Batalion ti Mormon. No dadduma maawagan dagiti kameng ti Simbaan iti Mormon gapu ta mamatida iti Libro ni Mormon.
Imbaga ni Brigham Young a dagitoyto a lallaki ti kalaingan a soldado iti buyot. Nasken nga ikuyogda ti Biblia ken ti Libro ni Mormon. Nasken a naurnos, nadalus, ken nadayawda. Nasken a dida agsapata wenno agay-ayam iti baraha. Imbaga ni Brigham Young kadagiti lallaki a tungpalenda dagiti bilin ti Dios. Iti kasta, nasken a saandanto a pumatay iti asino man.
Simmurot ti Batalion ti Mormon ken ni Kapitan Allen. Nagladingit dagiti Santo a nangpalubos kadakuada. Kasapulan dagiti Santo dagiti amin a lallaki a tumulong kadakuada a mapan iti Laud. Dida kayat a pumanaw dagiti lallaki a mapan makiranget. Ngem ammoda a mabayadan dagiti soldado. Makatulong ti kuarta kadagiti Santo.
Nagpaabagatan ti Batalion ti Mormon. Sumagmamano kadagiti kaamaan dagiti soldado ti kimmuyog iti Batalion ti Mormon. Narigat unay ti panagdaliasat dagiti tao. Awan ressat ti pannagnada.
Narusanger unay dagiti kalsada. No dadduma mailumlom dagiti karison iti nauneg a kadaratan. Awan mainum a danum. Awan dagiti kayo a mapaglinongan tapno makapaginana dagiti lallaki. Sumagmamano a tattao ti nagsakit. Dagiti laeng masakit a tao ti makalugan iti karison.
Inkeddeng ni Kapitan Allen nga agbati iti Colorado dagiti masakit a soldado ken babbai ken ubbing. Nagyanda iti maysa nga ili a maawagan iti Pueblo. Nabayadan dagiti masakit a soldado iti kaaddada iti buyot. Sumagmamano kadagiti masakit a soldado ti nagipatulod iti kuarta kadagiti kaamaanda iti Council Bluffs. Nagipatulodda iti kuarta para kadagiti marigrigat a tao iti Nauvoo ken para kadagiti misionario.
Nagtuloy ti pannagna dagiti soldado iti Batalion. No dadduma dida ammo no sadino ti papananda. Nasken nga agkalida iti nauneg iti kadaratan tapno makasarakda laeng iti danum. Saan nasayaat ti raman ti danum. Awan umdas a kanen dagiti soldado. Awan kayo tapno makaaramidda koma iti apuy. Nagpuor dagiti lallaki kadagiti ruot.
Nakasabat dagiti soldado kadagiti Indian ken dadduma a tao nga adda kanenda. Awan kuarta dagiti soldado a paggatang iti kanenda. Inted dagiti soldado ti sumagmamano kadagiti kawesda kadagiti Indian. Inikkan dagiti Indian iti kanen dagiti soldado.
Nagdaliasat ti Batalion ti Mormon iti laud. Nakadanonda kadagiti sumagmamano a narangkis unay a bantay. Nasken a singdanan dagiti lallaki dagiti karisonda ket ginuyodda nga insang-at dagitoy iti bantay. Sada impababa dagiti karison iti sabali a bangir.
Maysa nga aldaw, nakakita dagiti soldado iti sumagmamano a toro. Dinarup dagiti toro dagiti soldado. Nakiranget dagiti soldado kadagiti toro. Iti kamaudiananna, napapanawda dagiti toro. Maysa a lalaki ti nasugatan. Nabayag a panawen a saan a nakapagna.
Iti kamaudiananna, nakadanon ti Batalion ti Mormon iti Taaw Pacifico. Enero 29, 1847 idi. Kasta unay ti bannog dagiti soldado. Pigispigisen dagiti kawesda. Naragsakanda ta naggibus met laengen ti atiddog a panagdaliasatda.
Nabayadan dagiti soldado iti kaaddada iti buyot. Saanen a nasken ti kaaddada iti buyot. Mabalindan ti agawid kadagiti pagtaenganda iti sidong dagiti kaamaanda.
Sumagmamano kadagiti lallaki ti nagtalinaed iti California. Kaaduanna kadakuada ti napan iti Rocky Mountains tapno makikaduada kadagiti Santo a simmangpet sadiay manipud iti Council Bluffs.