“Maika-34 a Paset: Binallaagan ti Dios Dagiti tao iti Zion: Hulio-Agosto 1833,” Dagiti Estoria iti Doktrina ken Katulagan (2002), 128–31
“Maika-34 a Paset,” Dagiti Estoria iti Doktrina ken Katulagan, 128–31
Maika-34 a Paset
Binallaagan ti Dios Dagiti tao iti Zion
(Hulio–Agosto 1833)
Imbilin ti Dios iti ad-adu pay a Santo a mapanda iti Jackson County, Missouri. Adu dagiti tao a napan nagnaaed sadiay. Nagipatakderda iti balay, pagtagilakuan, ken pagimalditan.
Saan a kinayat ni Satanas nga agindeg dagiti Santo it Jackson County. Dina kinayat a bangonenda ti siudad ti Zion. Kinayatna nga agbalin a natangsit kadakuada dagiti sabali a tao. Kinayat ni Satanas a papanawen dagiti dakes a tao dagiti Santo iti Jackson County. Inaramid dagiti dakes a tao ti kayat ni Satanas a mapasamak. Pinadasda a papanawen dagiti Santo.
Naguummong ti bunggoy dagiti makapungtot a mangiribuk. Nangipatulod ti bunggoy dagiti mangriribuk kadagiti sumagmamano a lallaki a makipagkita kadagiti dadaulo ti Simbaan. Imbilin dagitoy a lallaki kadagiti Santo a nasken a pumanawda iti Jackson County. Ngem ammo dagiti dadaulo ti Simbaan a kayat ti Dios a mangbangonda iti siudad ti Zion iti Jackson County. Imbagada kadagiti bunggoy ti mangriribuk a saan a makapanaw dagiti Santo.
Nagsubli dagiti dakes a lallaki iti yan ti bunggoy dagiti mangriribuk. Nagpungtot unay ti bunggoy dagiti mangriribuk. Sinerrekda ti pagimalditan dagiti Santo. Dinadaelda daytoy. Saanen a makaimaldit dagiti Santo kadagiti libro wenno pagiwarnak.
Natiliw ti bunggoy dagiti mangriribuk da Obispo Partridge ken Brother Allen ket linabusanda ida. Inikkanda iti napudot nga alkitran ken dutdot ti bagida. Nasarakan pay ti bunggoy dagiti mangriribuk dagiti dadduma a Santo ket minalmaloda ida.
Kalpasan ti tallo nga aldaw, nagpasiar iti ili dagiti dakes a lallaki. Pinaltoganda dagiti pasdek. Iniriaganda iti agkakadakes a banag dagiti Santo. Imbagada a malmaluenda ti asino man a matiliwda. Pinadasda a sinapul dagiti dadaulo ti Simbaan. Inlemmengan dagiti dadaulo ti Simbaan ti bunggoy dagiti mangriribuk.
Ni Oliver Cowdery ti maysa kadagiti dadaulo. Pimmanaw iti Jackson County. Napanna kinita ni Joseph iti Kirtland.
Imbaga ni Oliver ken ni Joseph ti inaramid dagiti dakes a lallaki iti Zion. Kayat a maammuan dagiti Santo iti Jackson County no ania ti nasken nga aramidenda.
Imbaga ni Joseph ken ni Oliver ti maipapan iti sumagmamano a paltiing nga inted ni Jesus kenkuana. Kinuna ti Apo a nasken a mangbangon dagiti Santo iti templo iti Zion. Nasken nga agbayad dagiti Santo iti apagkapullo. Ti apagkapullo a kuarta ti pangigastoda iti templo. Imbaga ni Jesus ken ni Joseph nga agbalinto a dakkel ti Zion no la ket tungpalen dagiti Santo ti Dios. Madusanto dagiti Santo no dida agtungpal iti Dios.
Imbaga ni Jesus a nasken a tungpalen dagiti Santo dagiti paglintegan ti pagilian. Nasken a butosan dagiti Santo dagiti nalinteg a tao nga agbalin a dadaulo ti pagilian. No dadduma agbalin a dadaulo ti pagilian dagiti dakes a tao. Daytoy ti makapaladingit kadagiti nalinteg a tao.
Imbilin ti Apo kadagiti Santo nga isardengdan ti agaramid kadagiti dakes a banag. Kinuna ni Jesus a nasken a saan a madanagan dagiti Santo kadagiti bunggoy dagiti mangriribuk. Masapul a dida kagura dagiti dakes a tao. Nasken a pakawanen dagiti Santo dagiti kabusorda. Makirangetda laeng no bilinen ti Dios a makirangetda. Dusaento ti Dios dagiti dakes a tao.
Iti saan a nabayag, kinuna ni Jesus nga addanto riribuk kadagiti Santo iti Zion iti apagkanito. Dida tinungpal dagiti bilin. Iti maysa nga aldaw, tulonganto ni Jesus dagiti Santo a mangbangon iti Zion. Kalpasanna bendisionanto ida ni Jesus.