“Maika-28 a Paset: Napan Manen ni Propeta Joseph iti Missouri: Marso–Mayo 1832,” Dagiti Estoria iti Doktrina ken Katulagan (2002), 108–12
“Maika-28 a Paset,” Dagiti Estoria iti Doktrina ken Katulagan, 108–12
Maika-28 a Paset
Napan Manen ni Propeta Joseph iti Missouri
(Marso–Mayo 1832)
Nangted manen ni Jesus iti maysa a paltiing ken ni Joseph Smith. Kinunana a kasla annakna a babassit dagiti Santo. Agsursuroda pay laeng. Kinuna ni Jesus a nasken nga agragsakda. Nasken nga agyamanda. Isunto ti agbalin a dadauloda.
Kayat ni Jesus nga agsisinnaranay dagiti Santo. Kayatna nga aywananda dagiti marigrigat a tao. Kayat ni Jesus nga agtitinnulong dagiti Santo.
Iti saan a nabayag kalpasan ti paltiing, napan manen ni Joseph iti Missouri. Maawagan ti Missouri iti daga ti Zion. Sumagmamano kadagiti gagayyem ni Joseph ti kimmuyog kenkuana. Naragsakan dagiti Santo iti Zion a nakakita ken ni Joseph.
Kiniddaw ni Joseph kadagiti Santo a mapanda iti taripnong. Imbagana kadakuada ti maipapan iti paltiing. Ammo dagiti Santo a Propeta ti Dios ni Joseph.
Iti taripnong nangted ti Apo ken ni Joseph iti sabali pay a paltiing para kadagiti Santo. Maragsakan ni Jesus ta napakawanen dagiti Santo ti tunggal maysa. Kinuna ni Jesus, “Siak, nga Apo, pakawanenkayo.”
Nangted ni Jesus iti baro a bilin kadagiti Santo. Kinunana nga intednan kadakuada ti daga ti Zion. Ita nasken a pagbibingayanda ti daga. Nasken nga addaan koma ti tunggal maysa no ania ti kasapulanna. Makatulong daytoy iti Simbaan ni Jesucristo.
Kalpasan ti taripnong, sinarungkaran ni Joseph dagiti Santo iti adu nga ili. Naragsakan dagiti Santo a nakakita kenkuana. Maysa a naragsak a kanito daytoy ken ni Joseph. Patpatgenna dagiti Santo.
Nangted ni Jesus iti paltiing ken ni Joseph maipapan kadagiti babbai ken ubbing. Kinuna ni Jesus a nasken nga aywanan dagiti lallaki dagiti assawada. Nasken nga aywanan dagiti nagannak dagiti annakda.
Nasken nga aywanan dagiti Santo dagiti babbai nga awanan assawa. Nasken nga aywanan dagiti Santo dagiti ubbing nga awanan iti amma wenno inna.
Kinuna ni Jesus a nasken nga agurnong dagiti Santo iti taraon iti pagidulinan. Nasken nga ikkan ti obispo iti taraon dagiti mabisin a tao manipud iti pagidulinan.
Nagsubli da Joseph Smith ken Obispo Whitney iti Kirtland. Nagluganda iti karison.
Maysa nga aldaw, adda nagbutngan dagiti kabalio. Napartak ti panagtarayda.
Timmapuak ni Joseph manipud iti karison. Saan a nasugatan. Timmapuak iti karison ni Obispo Whitney. Nablo ti luppona.
Nagtalinaed da Joseph Smith ken Obispo Whitney iti maysa a pagdagusan. Uppat a lawas a naginana ni Obispo Whitney. Kinadua ni Joseph bayat ti panaglaing ti luppona.
Adda nagsabidong iti taraon ni Joseph iti nagdagusanda. Nagsakit iti kasta unay.
Kiniddaw ni Joseph ken ni Obispo Whitney a bendisionanna. Inaramat ni Obispo Whitney ti bileg ti kinasaserdote a mangbendision ken ni Joseph. Nalaingan ni Joseph.
Nagyaman ni Joseph iti Dios iti pannakapaimbagna. Iti kamaudiananna, nakapagbaniaga manen da Joseph Smith ken Obispo Whitney. Nagawidda kadagiti kaamaanda.