“Maika-45 a Paset: Dagiti Bunggoy a Mangriribuk iti Missouri: 1833,” Dagiti Estoria iti Doktrina ken Katulagan (2002), 167–72
“Maika-45 a Paset,” Dagiti Estoria iti Doktrina ken Katulagan, 167–72
Maika-45 a Paset
Dagiti Bunggoy a Mangriribuk iti Missouri
(1833)
Sumagmamano kadagiti Santo ti agnanaed idi iti Far West, Missouri. Nagnaed ni Joseph Smith sadiay. Naragsakan dagiti tao. Nagipatakderda kadagiti napipintas a pagtaengan ken pagadalan.
Ngem saan unay a nagpaut ti talna dagiti Santo. Riniribuk ida dagiti dakes a tao. Nagipadamagda iti inuulbod maipapan kadagiti Santo. Pinadpadakesda dagiti dadaulo ti Simbaan.
Naguummong ti bunggoy dagiti mangriribuk a nangplano kadagiti wagas a pangdangranda kadagiti Santo.
Adu a dakes a banag ti inaramid dagiti mangriribuk. Pinaruarda dagiti Santo manipud kadagiti pagtaenganda.
Pinuoranda dagiti pagtaenganda ket dinadaelda dagiti talonda.
Kinabilda dagiti lallaki ket impupokda iti pagbaludan ti sumagmamano kadakuada.
Dinangran dagiti bunggoy a mangriribuk dagiti babbai ket pinatayda ti sumagmamano kadakuada.
Ni Mr. Boggs ti gobernador ti Missouri. Adu ti pamadpadakes nga impulong ti bunggoy dagiti mangriribuk kenkuana maipapan kadagiti Santo.
Binilin ni Gobernador Boggs ti sumagmamano a soldado a mangpatay kadagiti Santo no saanda a pumanaw iti Missouri. Naragsakan ti bunggoy dagiti mangriribuk. Adu pay dagiti dakes a banag nga inar-aramidda. Saan a linapdan ida ti gobernador.
Sumagmamano a Santo ti nagnaed iti maysa nga ili a managanan iti Haun’s Mill. Maysa nga aldaw sumagmamano kadakuada ti agtartrabaho iti talon. Agtartrabaho kadagiti pagtaenganda dagiti dadduma. Simmangpet dagiti mangriribuk ket rinautda ida.
Sumagmamano kadagiti Santo ti nagtaray a napan iti maysa a pasdek a naaramid iti tabla. Pinaltogan ti bunggoy dagiti mangriribuk ti baet dagiti diding.
Pinatay ti bunggoy dagiti mangriribuk dagiti Santo nga aglemlemmeng. Sumagmamano nga ubbing ti napaltogan ken napapatay.
Kalpasanna tinakawan dagiti mangriribuk dagiti pagtaengan ken karison dagiti Santo. Pinapatayda ti kaaduan kadagiti lallaki. Nabati nga is-isuda dagiti babbai ken ubbing.
Iti saan a mabayag, tiniliw ti sumagmamano a soldado ni Joseph Smith ken dadduma a dadaulo ti Simbaan. Nabilin dagiti soldado a paltoganda ni Joseph Smith ken dagiti gagayyemna.
Ngem saan a nagtungpal ti dadaulo dagiti soldado. Saanna a pinaltogan ni Joseph ken dagiti dadduma. Kinunana a pammapatay daytoy.
Imbalud dagiti soldado ni Joseph ken dagiti gagayyemna. Kinawaran ida dagiti soldado. Nalamiis ti uneg ti pagbaludan. Nasken a maturog da Joseph ken dagiti gagayyemna iti nalamiis a datar.
Dakes a lallaki dagiti agbambantay. Nagsapata ken nagisalaysayda kadagiti pamadpadakes nga estoria. Imbagada no kasano a tinakawan ken pinapatayda dagiti Santo. Imbagada no kasano ti panangdangranda kadagiti babbai ken ubbing. Nagpatnag a nagkakatawa ken naglilinnastogda.
Kinagura ni Joseph dagiti sasaoda. Saanna a kinayaten ti dumngeg. Timmakder ket binilinna ida nga agsardeng iti nagan ni Jesucristo. Kinunana, “Agsardengkayo! No saan, siak wenno dakayo ti matay iti daytoy met la a kanito.” Nagbuteng dagiti agbambantay. Imbagada ken Joseph a ladingitenda. Siuulimekda a nagtugaw iti maysa a suli.
Maysa ni Brigham Young kadagiti Apostol. Kiniddawna kadagiti Santo a dumar-ayda iti taripnong bayat ti kaadda ni Joseph iti pagbaludan. Imbaga ni Brigham Young kadakuada a nasken a pumanawda iti Missouri. Kaaduanna kadagiti Santo ti marigrigat. Awan ti karison wenno kabalioda. Kinuna dagiti lallaki nga adda iti taripnong a tulonganda nga umakar dagiti marigrigat a Santo.
Pimmanaw dagiti Santo iti Missouri. Panawen ti lamiis ket nakalamlam-ek. Pinadas a dinangran ti bunggoy dagiti mangriribuk ida. Tinakaw ti bunggoy dagiti mangriribuk dagiti kabalio ken baka dagiti Santo.
Napan dagiti Santo iti Quincy, Illinois. Naasi kadakuada dagiti tao iti Quincy.
Naragsakan ni Gobernador Boggs ken dagiti gagayyemna ta pimmanawen dagiti Santo. Dagiti laengen adda iti pagbaludan ti nabati a Santo iti Missouri.