“Maika-42 a Paset: Far West, Missouri: Enero–Hulio 1838,” Dagiti Estoria iti Doktrina ken Katulagan (2002), 161–63
“Maika-42 a Paset,” Dagiti Estoria iti Doktrina ken Katulagan, 161–63
Maika-42 a Paset
Far West, Missouri
(Enero–Hulio 1838)
Saan nga agbabawi dagiti dakes a tao iti Kirtland. Kayatda a patayen ni Joseph Smith. Nasken a pumanaw ni Joseph iti Kirtland. Panawen idi ti lamiis ket nakalamlam-ek unay. Sinurot dagiti kabusor ni Joseph. Adda imuko ken paltogda a pangpatay kenkuana.
Nasken nga aglemmeng ni Joseph. Sinalakniban daytoy ti Apo tapno saan a masarakan dagiti kabusorna. Maysa a rabii, naturog ni Joseph iti maysa a balay a nagturogan met dagiti kabusorna. Saanda nga ammo nga adda isuna sadiay.
Iti sabali pay a gundaway, nalabsan ni Joseph dagiti kabusorna iti kalsada. Kimmitada kenkuana. Saanda a nailasin.
Ginasut a milia ti dinaliasat ni Joseph. Napan iti Far West, Missouri. Naragsakan dagiti Santo iti Missouri a nakakita kenkuana.
Sumagmamano kadagiti dadaulo iti Missouri ti saan nga agtungtungpal kadagiti bilin ti Dios. Saanda nga agbabawi. Kinagurada ni Joseph. Kayatda ti bumaknang.
Nagladingit ni Joseph. Sigud a gagayyemna idi dagitoy a lallaki. Naikkat da Oliver Cowdery, David Whitmer, ken dadduma pay a tao a kas kameng ti Simbaan. Saandan a kameng iti Simbaan ni Jesucristo.
Sabali a lallaki ti napili a dadaulo ti Simbaan iti Far West.
Maysa nga aldaw napan ni Joseph Smith iti maysa a lugar nga asideg iti Far West. Imbaga ni Jesus a maawagan daytoy a lugar iti Adam-ondi-Ahman. Maysa daytoy a naisangsangayan a lugar. Nakisao ni Jesus ken ni Adan idiay ket binendisionanna daytoy. Binendisionan ni Adan dagiti annakna iti Adam-ondi-Ahman. Addanto aldaw a da Jesus ken Adan ken dadduma pay a nalinteg a tao ti agkikitanto manen sadiay.